آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالیییق دئیه دوشونورم. بو دوشرگه‌ده اؤز آنادیلیم اولان تورکجه‌ده یازاجایام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب، بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی‌دیر :)
سیز ده دیریلیگینیزی بیلمک ایسته‌ییرسینیزسه یازماغا باشلایین.
یادیمدان چیخمامیش: سلام، خوش گلیب‌سینیز :)

سون گؤندری‌لر
سون یوروملار

اومود سنه‌دیر آنجاق آذربایجان عسگری!

ریچارد جئوئل (٢٠١٩) آدلی فیلمده بئله بیر دیالوگ وار -سانمیرام ساواش سؤزوندن دهشتلی بیر سؤز ده اولا؟
+نییه وار، باریش! ساواشمالی اولدوغون زامان، سن باریشی دوشونه‌سن! 

آذربایجان اوردوسو بوگون تام گوجویله ساواشمالیدیر. بوندان باشقا بیر سئچه‌نک یونتایانلار خیانت ائدیرلر. هر دفعه آتیش‌کس خبرلری گلدیکده سانکی بیر ابدی صولحه سونلانان ایشه، خیانت ائدیلیر نظریمده. 

هردن ایران عراق ساواشینا فیکیرلشیرم. یاشیم چاتماسا دا اورتالیقدا اولان بلگه‌سل فیلم‌لردن، سندلردن، حتی اؤلوب ایتن‌لرین عاییله‌لرینی گؤرمک‌له نئجه‌لیگیندن بیر سیرا بیلگی‌لر الده ائتمیشم. او اوزونلوغا سورن ساواش، او بویدا اؤلوم ایتیمه سبب اولان ساواش، بیتسه‌یدی ده آرادا یارانان ساواشدان تؤرنمیش نیفرتی بیتمه‌یه‌جک کیمی گؤروردوم.  ایکی طرفده‌ده شهریار دئمیشکن، قانلا اؤز لکه‌لرینی یوماق ایسته‌ین مفکوره‌لر وار ایدی. ساواشا بیر نعمت گؤزونده باخیردیلار. دؤیوش غلبه اوچون دئییل، بوتون کسیم‌لری بیرلشدیره بیلمه‌سی اوچون بیر ایلاهی فورصت کیمی نظره گلیردی. آنجاق آرادا اینسانلار اؤلوردو، ضحاک‌لار ایسه داها آرتیق قان ایسته‌ییردیلر. ساواش هر نه تهر ایدیسه بیتدی. بونلار زهر جامینی ایچدیلر، صدام گئتدی. نهایتده او بویدا نیفرت یوخویموش سانکی. ایرانین آیاغی عراغا آچیلدی، سیاسی آنلاشمالار اولدو. خالقلار درین بیر باریشا دوغرو گئتدیکلری آن، قالسین کی بو وضعیتین خوشلوغو بونلاری آزدیردی، بوتؤوجول مفکوره‌لی ایراندان نیفرت، عراق خالقیندا یئنی‌دن دوغماغا باشلادی. آنجاق بونو یاخشی بیلیریک بیر سیرا حذفی باخیشلار، تک سسلی سیاست‌لر اؤنه سوردورولمه‌سه‌یدی ایندی عراقدا نه داعش یاراناردی، نه حشدالشعبی، نه ده بو قدر اینتحار قوخولو سالدیریلارا شاهید اولاردیق.

  • حامید مورسلی

👈 بوگون اوکتیابرین اونو(١٠ اکتبر)، دونیا اعدام جزاسینا قارشی دورما گونودور. نه‌دن اعدام جزاسینا قارشی دورمالیییق؟ چونکی اینساندان، اینسانی ایلیشگی‌لردن دانیشیریق. چوخ ساده دیلده دئسک: اینسان بیر دفعه بو دونیادا یاشاییر، یاشامین ایکینجیسی یوخدور. بو اوزدن هئچ بیر سوچون بدلی اعدام جزاسیلا اؤده‌نیلمه‌مه‌لی‌دیر. ناقیص عدالتدن اوزاقدیر بیر چوخ عامیلین ال اله وئرمه‌سیله بیرآندا اوز وئرمیش بیر سوچون ایشله‌یه‌نینین یاشامینا بئلنچی سون وئرک.اعداما قارشی دیک دایانیب، اونون همیشه‌لیک لغو اولونماسینی ایسته‌ییمیز، بو مسئله‌نین چؤزومونو آختارماق ایسته‌ییریک دئمک‌دیر. یانی هئچ بیر شئیه دوزه‌لیش گتیرمه‌دن تکجه وار اولان مسئله‌نی سیلمک ایسته‌مه‌دیگیمیزه بؤیوک بیر بلگه‌دیر. بیز اینسانی توپلولوقلاردان دانیشدیغیمیزدا هرآن او توپلولوغو  دوزگون یاراقلارلا یاراقلاندیرمالیییق. 

  • حامید مورسلی

کئچن هفته اوتوز بیر ایل اؤنجه آللاهین بئلنچی بیر گونلری‌نین بیرینده دوغولدوغوم گونون ایل دؤنومویدو. تقویمین اویاریسیلا عادت اوزره اینسانلار بئلنچی گونو دوغوم گونو آدلاندیریب جشن دوتارلار. آنجاق دوغوم گونونو سونوجو بللی اولمایان، نهایتده اؤلومه ختم اولان بیر چرخه کیمی نظرده آلارساق بو تکرارلانمانی جشن توتماق بیر اوقدر ده یاخشی آلیناسی بیر ایش ساییلمیر منجه. ندن اینسانین دوغولوشو تقویملره، گونلره، آیلارا حصر اولور؟ اردملی تصمیم‌لر، دؤنوشوم‌لر، اولوملو حیات فلسفه‌لری ائیله‌جه گؤزه گلیم ده‌ییشیم‌لرین عطف نقطه‌لری، ویا بؤیوک بیر ده‌ییشیملره ایمضا آتمالار قوتلانمالی‌دیر می یوخسا ایلده بیرگون تکرارلانان اؤلو موناسیبت‌لر؟

  • حامید مورسلی

بوگونلر توئیتردن باشلانان بیر دالغایلا بیر چوخ اینسان تجاوزلا باغلی آجی تجروبه‌‌لرینی پایلاشیرلار. بو ایسه فرقلی تپکی‌لره سبب اولوبدور. منسه بو حاقدا بیر نئچه سؤز اکله‌مک ایسته‌دیم:
 
بیر اینسانین منه ⁧ #تجاوز⁩ اولوب دئمه‌سی بیراوقدر ده راحات آغیزا آلینیب یازیلاسی بیر ائیلم دئییل‌دیر. بیری بئلنچی بیر ادعادا بولونورسا ایلک باشدا آرخاندایییق، سنینله‌ییک، سن تک دئییلسن دئییلمه‌سی باشلیجا قوشوللاردان ساییلیر. بوردا بیز قونویا ذات‌انگارانه یاناشمالیییق. نئجه‌لیک‌لر، نییه‌لیک‌لر، بیر طرفه قضاوت‌لر/یارغیلامالار، متجاوز آدلانان کیمسه‌دن بوشونا یان ساخلامالار بیزه چاتماز. بو حیمایت‌دن باشلیجا آماجیمیز ایسه تجاوزا اوغرایانلارا اومود وئرمک‌دیر. اونلاری جسارتلندیریب، کؤلگه‌دن ائشیگه چیخارتماق‌دیر. هر شئیه رغمن هله یاشامالیسان دئمک‌دیر. تجاوزا اوغرایان یالنیز قالیرسا متجاوز داها آرتیق جسارتله‌نیب اوندان بتَرینی یاپاجاق‌دیر. حقوق قایداسی دئییر اصل برائته‌دیر آنجاق بورادا منجه اصل حیمایته‌دیر.

  • حامید مورسلی

بوگونلر اعتیراض یوللارینی کووید-١٩ ویروسو گلدیکدن سونرا داها دا آرتیق ایتیرن بیروت اینسانی مستاصل اولوبدور. الی هر یئردن اوزولوب. او اؤز حؤکومدارلاریندان الی سویوسا دا ایچه‌ریده‌کی آلترناتیولره دا راضیلاشا بیلمیر. البته کی حاکیمییت ایله خالقی بیرلشدیره بیلن آلترناتیولر ده گؤزه گؤزوکمور. آنجاق فرانسه حاکیمییتی کیمی سؤموروجولرینه بیر قورتاریجی و منجی کیمی باخمالاری حقیقتن اینسانی کدرلندیریر. بوگونلر لبنانلی‌لاردا میللی ایراده اؤلوب، تکی قفسین بیرآز گئنیشلنمه‌سینه ایمضا توپلاییرلار. نه فرق ائدر، لبنان تالانچیلار الینده تالانا گئده‌جک‌سه کیمین الیله اولسون؟ اؤز حاکیم اقتیدارلارینا و باشقا سیاسی طیف‌لره گوونمه‌دیکلری، هرکسه آیدیندیر. بونون اوچون بئلنچی بیر سیاسی اکتی اورتایا بیراخیرلار.  

  • حامید مورسلی

بیر اؤلکه‌نین گلیشمه و قالخینماسینی اؤلچه بیلن فاکتورلارین اساسی او اؤلکه‌نین GDP-سی‌ (تولید ناخالص ملی) دیر. GDP بیر اؤلچودور دئمک. هربیر شخصه بیر اؤلکه‌نین بوتون ناخالیص قازانجیندان چاتا بیلن مالی رقم نه قدر بؤیوک اولورسا او اؤلکه‌نین ائکونومیک وضعییتی یاخشی‌دیر/یاخشیلاشماقدادیر، ادعاسینی ائتمک اولار. بو GDP اوچ اساس بؤلومون چیخارلاریندان اولوشور. صنعت، خدمات و اکینچی‌لیک!

  • حامید مورسلی

بیزلر، بیزلر، بیزلر...

هر نه‌یین پارالئلینی دوزلدن یازیق بیزلر! اؤزوموزو دونیادان فرقلی گؤروب آچیقجا اؤزوموزدن باشقاسینی بیه‌نمه‌دییمیزی اوتانمادان دارهادارینان دیلیمیزه گتیرن راسیست بیزلر. هر بیر کوره‌سل آنیمساما گونونه اؤزوموزدن چیخارتما قوندارما گونلر قوشان بیزلر. دوشونمه‌میش دانیشان بوش‌بوغاز بیزلر. آز ایشله‌ییب چوخ قازانماق فیکرینده اولان بوتؤوجول بیزلر. اوخومامیش دؤهدور مهندیس، اوستاد کیمی القابلاری فخرله اؤزوموزله داشییان بیزلر. دیلی اوزون بئینی کوت، گوج مئدیالارینین اویونجاغی اولاراق، باشینی قارا سوخوب هئچ یئردن خبری اولمایان کلیک‌لر سایاغی یاشایان بیزلر. یالان دانیشیب دا، یالانچیلاردان زهله‌سی گئدن بیزلر. اونون بونون مالیندا، عاییله‌سینده، خصوصی یاشامیندا گؤزو اولان بیزلر. اوزده دوست دالدا خائین اولان بیزلر. اورتمه‌دن توکه‌دن بیزلر. شاپالاق ایله اوز قیزاردان بیزلر. اونا-بونا فخر ساتیب ایچیمیزده‌کی بوشلوغو دریندن دویان بیزلر. پالازا بورونوب ائلینن سورونوب، هامیمیز بیر بئزین قیراغی اولان بیزلر. ایچمه‌میش کئفلی، چکمه‌میش توهم ووران بیزلر. دئدی قودولار اوزمانی اولان بیزلر. دین چؤره‌یی یئییب دینسیزین دینسیزی اولان بیزلر. بئش قیرانا گؤره اؤزوموزدن چوخ اسکیک‌لره یالتاقلیق ائدن بیزلر. بدوی توپلوم‌لار سایاغی هر بوجاقدان گله‌بیلن ایشیغی بوغماقدا بنزه‌ریمیز اولمایان بیزلر. ساواشدان اؤز کؤکوموزو برکیتمک اوچون فایدالانان بیزلر. چئوره‌نی ییرتیجیلار سایاغی دیدیب داغیدان، آنجاق همئشه اونون داشینی سینه‌میزه ووران بیزلر. چؤرک داشدان چیخیر سؤزو دیلیمیزدن دوشمه‌سه ده، باشقا بیریسینه چؤرک وئرمکده داشدان برک اولان چیلیس بیزلر. بیر عابباسییا ده‌یمز اولان ماشینلاری قانیمیزین قیمتی ایله آلان بیزلر. دیلسیز آغیزسیزجا، اینمز دینمز اولان، اعتیراض یوللارینی باشارمایان بیزلر. اؤز وطنینده غوربتده یاشاییر کیمی اسیر یاشایان بیزلر. اؤز دوشونجه‌لریمیزی سانسورلاییب باشدان دیرناغا ریاکار اولان بیزلر. قادین حقوقو دئیه باغیریب عملده جهالت عصری سایاغی اونلاری دیری دیری قویلاماق ایسته‌ییمیزده ایصرارلی اولان ایسلامی فمنیست بیزلر. هئچ بیریمیز اولدوغوموز گئرچک مؤوقعیمیزدن راضی اولمایان بیزلر. اؤزوموز بیر گؤزلو اولساق دا قونشوموزو کور گؤرمک ایسته‌ییمیزده ایصرارلی اولان بیزلر. اؤلوم حق‌دیر دئییب آنجاق سانکی اؤلمه‌یه‌جه‌ییک کیمی یاشایان بیزلر.

بیزلر، بیزلر، بیزلر!

  • حامید مورسلی

کئچن گونلرده دوستلارین بیریسی استورسینده بیر یازی پایلاشاراق بو مضموندا یازمیشدی: گؤره‌سن بیزده ده بئله بیر اؤدول گرکلی‌دیر می یوخسا یوخ؟ پایلاشدیغی یازی زرشک طلایی اؤدولونه لاییق گؤرونن کیتابی سئچمکله ایلگیده ایدی. اصلینده بونون کؤکو باتیدا تمشک طلایی دئیه بیر اؤدولدن آلینما‌ ایدی. نئچه یؤندن دالی اولان ادبی اثرلر و فیلملره بئلنچی بیر اؤدول وئریله‌رک هم موخاطبه دئییرلر بو اثرین واخت ایتیرمک اوچون ده‌یری یوخدور، هم ده اثر یییه‌لرینه بیر چیلتیک، بیر اویاری اولور بئله اثرلر یاراتماق یئرینه داها فایدالی ایشلرله مشغول اولالار.

نه‌یسه اوردا ایزله‌ییچیلر وریندن اؤنریلمیشدی بیزده بئلنچی بیر اؤدول یارانارسا، آدی ماراغا باسلیغی اؤدولو اولمالی‌دیر. یازیلا ایلگیلی من ده نظریمی بئله یازدیم:

گولدوم؛ ماراغاچیلیق ائتمیش اولوم دئیه گولدوم. نه ده اولسا ماراغانین آدی گلیب‌دیر آرایا.

دوغروسو اصلی دغدغه‌نیزه گلینجه دئمه‌لی‌یم نیتینیز گؤزلدی، هدف ده بیر چوخ ادبییات آدینا چالیشان بوش بوغازین تولیداتینین ایچینده دوز اثر ایله یانلیش اثرین تانینماسی‌دیر. هانکه دئییر بیر دوز فیلم وار بیر ده پوخ فیلم؛ ادبیاتدا دا بئله‌دی بیر دوز اثر وار بیر ده پوخ اثر. هر بیر یازییا دولغوندور، دوزگوندور دئییلمه‌سین گرک. آنجاق بونون گره‌یی هر نه‌دن اؤنجه بیر کیتاب اوخویان کسیمین وارلیغی‌دیر. بیر تعداد کی کیتابلاری حب و بغضدان اوزاق اوخویوب یارغیلاییرلار. توپلومدا دا اونلارا اعتماد وار. بو اعتمادی ایسه اؤزلری زامان سوره‌جینده قازانیبلار. منه گؤره هله بئله بیر جمعییتین یارانماسی کیتابلاری کئیفییت باخیمیندان سیرالاماقدان داها اوستوندور. بیزیم کیمی‌لره هله کیتاب اوخویاق دئیلسین گرک، نه اوخویاجاغیمیز چوخ فرق ائتمز هله‌لیک. زامانی گلمیشکن بو دا اؤز قونومونو قازانا بیلر. کسین او اینسانلارین وارلیغی سایه‌سینده دوزگون‌لر ده بیلینه‌جک‌لر، ماراغا باسلیغینا لاییق‌لر ده! البته بیر چاغدان سونرا هم کیفییت‌لر همی ده کمییت‌لر یوخاری گئتسه بئله بیر اؤدوللرین اولماسی دا یاخشی اولابیلرلر!

  • حامید مورسلی

گئرچکچی اولمایان، اولوب کئچنلرین اصیل ماهییتینی آنلایا بیلمز. بعضن گؤررسن توهم وورار. اؤزونو بغدادداکی کور خلیفه‌دن آرتیق بیلر. اؤز وارساییملاری اساسیندا هر نه‌یی یارغیلاییب، او دوغرولتودا عمل ائدر. آنجاق چیخیلار/سونوجلار او ایسته‌دیگی کیمی اولماز. اؤزونو آلداتمایا باشلار. اؤزونه بیر جزیره یارالدار. آلیشار اؤز سئچدیگی یاشام طرزینه. دئپرسیونلارا گیرر، آنجاق اؤزو هؤردویو قانداللی حوجره‌دن چیخا بیلمز. حیاتین ائنیش یوققوشو اونو سئچدیگی یولدا برکیدر. قویماز آیری هاوالار، فرقلی دونیا گؤروشلری اونو تاثیرلندیره. پاخیللیق، قیسقانجلیق اونو ذره-ذره اله آلار. ‏اونا بونا عاغیل قویار، آنجاق اؤزو ده ایچینده بیلر بو دئدیکلری بوش ایلغیملیقلاردان عیبارت‌دی. چئوره‌سینده‌کیلر اونا اینانسالار ایش داها زور اولار. اوسلوجالیقلا نقد ائدنلر سوسدورولار، آخساقلیقلار بازتولید اولار. زامان اؤتسه ده اورادا اولوملو ده‌ییشیم گؤرونمز. تکجه یالتاقلیق چوخالار!

  • حامید مورسلی

«قادین گولرسه بو ایسسیز موحیطیمیز گوله‌جک
سوروکله‌نن بشرییت قادینلا یوکسله‌جک»
                                           -حسین جاوید-

کیشی‌لر ایله قادینلارین فیزیولوژیک چئشیدلیلیک‌لرینی گؤز اؤنونه آلاراق عدالت‌سیز دونیامیزدا قادینلارین دا کیشی‌لر برابری حاقلارینی الده ائده بیلمه‌لری اوچون اینتیقادی دیله صاحیب اولان آخیما، فمنیستی آخیم دئییلیب‌دیر. دونیا فمنیست‌لری سیمون دوبووار ایله ویرجینا وولف کیمی‌لری ایله تانینسالار دا آذربایجاندا دا بو آخیم اولدوقجا درین ایزلره مالیک‌دیر. ایل‌لردیر دینی ایناج‌لاریمیزدان توتاق گله‌نک‌سل-کولتورل باخیشلارین درین ائتکیسینده اولان بو آخیم بوتون قارشیلاشدیغی چتینلیکلره باخمایاراق اؤز ایده‌آل‌لارینی اؤنه سوردوروبدور/سوردورمک‌ده‌دیر. چاغیلا یازیچیلاریمیزین قلیمنه آخیب، یئری گلمیشکن ده پیراتیکایا بورونوب اؤزونو عمل مئیدانیندا دا لاییقیجه ثبوتلامایا باشلامیش‌دیر.

  • حامید مورسلی

تاریخ نگاری

علم و تاریخ همسانی‌های بسیاری دارند. هر دو می‌کوشند امر نامشهود را نشان دهند. هر دو با مسائلی دست به گریبان‌اند. هر دو جویای حقیقت هستند. هر دو می‌کوشند داده‌های فراروی خود را به درستی توصیف نمایند. هر دو به دنبال علل چیزها هستند. هر دو می‌کوشند پدیده‌ها را تبیین کنند. هر دو نوعی استقرا را انجام می‌دهند و هر دو از تعمیم‌های به دست آمده استفاده می‌کنند. و در آخر می‌توان گفت هر دو به دنبال حدس و ابطال هستند. به روایت دیگر آزمایش در پی حدس و گمانه‌زنی می‌آید و حدس و گمانه‌زنی در پی آزمایش. و این موضوع پویا هر روز هم اثبات شده و هم ابطال می‌گردد.
وجه تمایز علم و تاریخ در نوع نمود واقعیت نامشهود می‌باشد که هر دو می‌خواهند به ذهن آورند. یکی می‌خواهد شمار واقعیت‌ها را کاهش دهد یا تا حد ممکن گزاره‌های درست خاص را (به نفع گزاره‌های درست کلی) کنار بگذارد، درحالیکه دیگری هرگز نمی‌تواند حقیقت‌های واحد کافی در اختیار داشته باشد.

  • حامید مورسلی

موْللانصرالدین ژورنالی‌نین بیرینجی ساییسی‌نین ایل دؤنۆمۆ آنیسینا



اوْندوْققوزونجو عصرین سوْنلاری، ییرمینجی عصرین ایلکلرینده موللانصرالدین ژورنالینین بیرینجی نۆمره‌سی ۱۹۰۶-ینجی ایل آوریلین ۷-سینده ایشیغی اۆزۆ گؤرمۆشدۆ. دۆز ۱۱۳ ایل اؤنجه چیخماسی عصرینین سیاسی-ایجتیماعی بیر ضرورتی کیمی حیس اوْلونان ژورنالین باشیندا میرزه جلیل محمدقلی‌زاده کیمی دۆشۆنر، یازیچی، دئموْکرات، فیکیر آدامی، خالقینین آیدینلاماسی یوْلوندا عؤمرۆنۆ بیله هیچ بیر بدل گؤزله‌مه‌دن، بدلینی تکجه خالقینین جهالتدن قورتولماسیندا خولاصه ائدن شخصدن دانیشیریق. خالقینی معاریفلندیرمک، مدنییته چاتدیرماق، ائیله‌جه جهالت ایلغیملیقلاریندان قورتارماق فیکیرینده اوْلان بو بؤیۆک یازیچی و ژورنالیستدن دانیشماق ائله ده راحات بیر ایش دییل اصلینده. آیدین دۆشۆنجه‌لرینی الینده کسکین بیر پیچاق کیمی قوللاناراق هرآن خالقینی جهالت‌لردن قیریب قورتاریب، آیدینلاتمایا ساری آپاریردی. باشدا موللانصرالدین ژورنالی اوْلماقلا جلیل محمدقولوزاده علم‌لی و تربییه‌لی اوْلماقدان یانایدی. اوْنون نظریجه ساوادسیزلیق بیر توْپلوما ان بؤیۆک تهلیکه حئساب اوْلور. حقوق سؤیلمینین طرفداری ایدی. برابرلیکدن، اؤزگۆرلۆکدن یانایدی. قادین آزادلیغی، ایجتیماعی آزادلیغی ضیمانت ائدیب بیر آخیما چئوریلینجه اوْ توْپلوم بخته‌ور بیر توْپلومدور دئیه دۆشۆنن میرزه جلیل ۲۵ ایل بوْیونجا تیفلیس‌ده، باکی‌دا، تبریزده، جمعینده ۷۴۸ نۆمره ساییندا چیخان ژورنالدان چیخارتماقلا بو آرمانلارینی اؤنه آپاریردی.

  • حامید مورسلی

مشروطییت، مدرنیته، ریضاخان

مشروطه دؤنمی ایرانا مدرنیته‌نین گیریش قاپیسی ساییلیر. بو گزاره‌نی آچیقلامامیشدان اؤنجه مدرنیته نه دئمک‌دیر سؤزۆنۆ آچیقلامامیز گره‌کیر. بلکی ان ساده تعریف سنت‌ین قارشیسیندا دوْغان یئنی دۆشۆنجه‌لره مدرنلیک آدی وئرمک اوْلا. بو اۆزدن مدرنیته‌یه قارشیلیق «تجدد» سؤزۆنۆ ده ایشلده بیله‌ریک. آنجاق بیز مدرنیته‌نی بئله تعریفله‌ییریک: سنتی باخیشلاردان آیریلیب، بیلیمه اؤنم وئریب، اینسان دئیه بیر فنوْمنین حضور و اؤزگۆرلۆیۆنۆ قوْرویا بیلسین دئیه تئخنوْلوْژیانی خیدمته آلیب اصیل گۆجۆ میللت‌ده گؤرۆب، ائیله‌جه اوْنلارین ایستکلرینی یئرینه یئتیرسین دئیه دؤولت قوروب، بۆتۆن آلانلاردا قوروملاشمایا یؤنه‌لیب، یاسال چرچووالار ایچه‌ریسینده یئنه میللتین آرمان و ایده‌آل‌لارینی دۆشۆنن سۆره‌جه مدرنلشمه سۆره‌جی آدی وئرمک اوْلار. دئمک اصل تفکیک قوایا صادیق باغیمسیز ائیله‌جه گۆجلۆ دؤولت قورا بیلمک بونون ان تمل گرکلریندن‌دیر. بیرجه سؤزله مدرن دؤولت، اینسانین بیرئیسل(فردی) اؤزگۆرلۆکلریندن، توْپلومسال اؤزگۆرلۆکلرینه قدر سیغوْرتالایا بیله‌جک دؤولته دئییلیر.

  • حامید مورسلی

«بایرام آیی‌نین ۱۷‌سی آذربایجان دئموکرات فیرقه‌سی‌نین حیاتا کئچمه گۆنۆ آنیسینا»

احمد کسروی اؤزۆ شیخ محمد خیابانی‌نین دئموْکرات فیرقه‌سی آدلی حیزبیندن قیراغا قوْیولموشلاردان بیریسی اوْلدوغونا باخمایاراق، شئیخی دۆننه کیمی چیگین‌لرینده دوْلاندیریب آمئریکانین ویلسوْنو وارسا، بیزیم ده شئیخیمیز وار دئیه‌ن ایکی اۆزلۆ اینسانلاری قینایاراق اوْنلاری «بی‌سر و پا» آدلاندیریب بو مضموندا یازیر: دۆننه کیمی شئیخین نطق‌لاریندا بیر ائشیدن اوْلاراق اوْنو آلقیشلاییب، فیشقا-چپیک چالماقلا یاشاسین سسله‌ین‌لر، بوگۆنلری شئیخین جانسیز بدنی‌نین اۆستوْنده اوتانمازجاسینا شادلیق ائتمک‌ده‌دیرلر.

شئیخ محمد خیابانی ۱۲۵۹ گۆنش ایلی دوْغوملوسو، بیر بازرگان اوشاغی، شبیسترین خامنه کندینده دۆنیایا گؤز آچیر. آتاسی عبدالحمید آناسی ایسه رقیه سلطان ایدی.  آتاسی ایله پتروْفسکی‌ده (داغیستان) تجارته مشغول اوْلماقدان تئزلیکله واز کئچه‌رک تبریزده طالبیه مدرسه‌سینده فقه ایله اصول درسینی اوْخومایا باشلاییر. آنجاق باشقا فقه عالیم‌لرینه تای اوْلماییب بیلیمین بیر چوْخ ساحه‌سینه ده ال اوزادیر. فقه، ریاضی و نجوم کیمی بیلیم داللاریندا اوزمان ایدی. تۆرکجه اوْلان آنا دیلی ایله بو داللاری باشقا اؤیرنجی‌لرینه ده اؤیرتمکده ایدی. شئیخ تبریزین خیاوان محله‌سیندن اوْلدوغو اۆچۆن خیابانی آدی ایله تانینیر. 

  • حامید مورسلی

آلوْولار (Incendies (2010


فیلم کانادا اۆره‌تیمی‌دیر. یؤنتمنی «دنیس ویله‌نوْو»، اوْیونچولاری ایسه: لوبنا آزابئل، ملیسا دسورمکس پولین، ماکسیم گاواده و...

«آلوْوولار» یا تۆرکییه‌ده «ایچیمده‌کی یانغین» آدلی ایله چئویرلن فیلم، آدی قدر بؤیۆک بیر یانغین یارادیب ایزله‌ییچینی ایچیندن یاندیریب، داغیدا بیلر قدر بیر آجی فیلم‌دیر. آچیقجاسینا دئمه‌لی‌یم بو فیلمی ایزله‌دیکدن سوْنرا گؤز یاشلاریمی ساخلایا بیلمه‌دیم. هم ده اوجادان هایخیرماق ایسته‌ییردیم. بوْغازیم بیچیلمیشدی آنجاق. بیر ایزله‌ییچی اوْلاراق ایچیم آجیشمیشدی. سانکی فیلمده اوْلان یانغینین قیغیلجیملاری اۆره‌ییمین باشینی نیشان آلمیشدیلار.

ژان ایله سیموْن، نوال مروان آدلی یئنیجه حیاتینی ده‌ییسمیش بیر قادینین ائکیز تای اوشاقلاری‌دیرلار. ژان ایله سیموْن بیر یئرده آنالارینین وصیت کاغاذینی اوْخوماق اۆچۆن حاضیر اوْلورلار. آنلارینین وصیتی ایکی چئشیدلی مکتوبدان عیبارت‌دیر. بو مکتوبلار ژان ایله سیموْنو کئچمیشه باغلاییر. آنلالارینین وصیتینه گؤره اوشاقلار بیر سیرا تیتره‌دیجی گئرچکلری بیلمک اۆچۆن اوْرتادووْغودا بیر اؤزل یئره گئتمه‌لی اوْلورلار.

  • حامید مورسلی