آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

اوغور قازانان گؤندری‌لر
سون یوروملار

آلوْولار (Incendies (2010


فیلم کانادا اۆره‌تیمی‌دیر. یؤنتمنی «دنیس ویله‌نوْو»، اوْیونچولاری ایسه: لوبنا آزابئل، ملیسا دسورمکس پولین، ماکسیم گاواده و...

«آلوْوولار» یا تۆرکییه‌ده «ایچیمده‌کی یانغین» آدلی ایله چئویرلن فیلم، آدی قدر بؤیۆک بیر یانغین یارادیب ایزله‌ییچینی ایچیندن یاندیریب، داغیدا بیلر قدر بیر آجی فیلم‌دیر. آچیقجاسینا دئمه‌لی‌یم بو فیلمی ایزله‌دیکدن سوْنرا گؤز یاشلاریمی ساخلایا بیلمه‌دیم. هم ده اوجادان هایخیرماق ایسته‌ییردیم. بوْغازیم بیچیلمیشدی آنجاق. بیر ایزله‌ییچی اوْلاراق ایچیم آجیشمیشدی. سانکی فیلمده اوْلان یانغینین قیغیلجیملاری اۆره‌ییمین باشینی نیشان آلمیشدیلار.

ژان ایله سیموْن، نوال مروان آدلی یئنیجه حیاتینی ده‌ییسمیش بیر قادینین ائکیز تای اوشاقلاری‌دیرلار. ژان ایله سیموْن بیر یئرده آنالارینین وصیت کاغاذینی اوْخوماق اۆچۆن حاضیر اوْلورلار. آنلارینین وصیتی ایکی چئشیدلی مکتوبدان عیبارت‌دیر. بو مکتوبلار ژان ایله سیموْنو کئچمیشه باغلاییر. آنلالارینین وصیتینه گؤره اوشاقلار بیر سیرا تیتره‌دیجی گئرچکلری بیلمک اۆچۆن اوْرتادووْغودا بیر اؤزل یئره گئتمه‌لی اوْلورلار.

  • حامید مورسلی

#فیلم_تانیتیمی

شئیطانین تانگوْسو 1994 Satantango 


مجار سینئماسی ایله دۆنیا سینئماسی‌نین ان بؤیۆک یؤنتمن‌لریندن بیریسی اوْلان بئلا تار، سینئماسینی فلسفیک آلت یاپی ایله اوْلوشدورموشدور. اوْنون اثرلرینده هم آنلامسال همی ده بیچیم‌سل اوْلاراق یئنی و اؤزۆنه اؤزل باخیشینی سیئنما دۆنیاسینا بخش ائتدیگینی گؤرۆرۆک.

بئلا تار شئیطانین تانگوْسو آدلی فیلمینی ۱۹۹۱-دن یؤنتمه‌سینه باشلاسا دا ۱۹۹۴-ده سوْنا اردیردی. بو فیلم سینئما تاریخینین ان اۆزۆن مئتراژلی فیلم‌لریندن بیریسی‌دیر ده. فیلمین سۆره‌سی ۷.۳۰ ساعات اوْلسا دا آنجاق یؤنتمنین ایزله‌یی‌چی‌لردن ”لۆطفن کسینتیسیز ایزله‌نیلسین“ ایسته‌یی ده هر یئرده یازیلمیش‌دیر.

  • حامید مورسلی

#بئلا_تار

#تورین_آتی


بیر چوْخ سینئما الیشدیریچی‌سی‌نین آچیسیندا تورین آتی‌ آدلی فیلم ۲۰۱۱ میلادی ایلده یؤنلتیلمیش اوْلسا دا، سینئما تاریخینین ان قالارغی فیلم‌لر سیراسیندا دایانیر.

فیلمین آدی: «تورین تورین

 / A torinói ló / The Turin Horse»

یؤنتمن بئللا تار Bella Tarr  اصلینده مجاریستانلی‌دیر. 


فیلمه کئچمکدن اؤنجه قیسسا بیر آچیقلاما وئرمکده فایدا وار. فیلم نیچه‌نین سوسقونلوغا کئچیش دؤنه‌می آدی ایله بیلینن اوْلاراق، ایچه قاپانیشیندان سوْنراسینداکی حیکایه ایله باشلانیر. آدلیم حیکایه‌یه گؤره فردریش نیچه ۱۸۸۹-دا تورین‌ده یئرییَرکن بیر فایتوْن سۆرۆجۆسۆ ایله قارشیلاشیر. فایتوْنچونون بۆتۆن باسغی‌لارینا باخمایاراق حرکت ائتمه‌یی رد ائدن آتین رحمسیزجه‌سینه قامچیلاندیغینی گؤرن نیچه، بیرآندا آتین بوْینونا ساریلیب حوْزۆنله آغلامایا باشلار. بو اوْلایین سوْنراسیندا ائوینه دؤنۆر و هرکسه قارشی قاپیلاری باغلایاراق آناسینا، «آنا من بیر آخماغام» دئدیکدن سوْنرا، سوْنوجوندا عؤمرۆنۆن سوْنونا دک سوسقونلوغا باشلاییر.

نیچه‌نین بو آغیر دویغوسال دورومونا سبب اوْلان شئی نه‌دیر؟ داها دا اؤنملیسی گؤره‌سن اوْ آتا نه اوْلموشدور؟

  • حامید مورسلی

فیلمین آدی: نفسدن دۆشمۆش Breathless / ۱۹۶۰/ اؤلکه: فرانسه/ یؤنتمن: ژان لوک گوْدار/ اوْیونچولار: ژان پوْل بلموْندوْ، جین سیبیرگ، دانیئل بوْلاژه، ژان پیئر مئلویل و...


📽🎬⁦📽️⁩🎬⁦📽️⁩


فیلمین اؤزه‌تی:

همفری بوگارتا وورغون اوْلان، ماشین اوْغروسو، میشئل ایتالیایا گئتمک رؤیاسیندادیر. اوْ بو یوْلدا بیر ماشین اوْغورلاییر. یوْلدا آردیجا گئدن بیر پوْلیس مامورویلا درگیر اوْلوب اوْنو اؤلدۆردۆکدن سوْنرا پاریسه قاچاق دۆشۆر. میشئل اوْنا وورغون اوْلان پاتریشیا آمریکالی یوْلداشین گؤرۆر. میشئل ایتالیایا قاچا بیلمه‌لری اۆچۆن بیر یئردن پارا تاپماغا چالیشیر. آرد آردا اوْغرولوق ائدیر، هر یئره باش چکیر و...


گیریش: 

۱۹۶۰-لار آوروپا و دۆنیا سینئماسینا ان اؤنملی ایل‌لردن ساییلیر. بو ایلده اۆز وئرن اوْلایلار سینئما پرده‌لرینده بیر دئوریم یاراتدی. هله ده کی وار بیز اوْ ایلدن یارانان دالغانین ائتکیسین دانا بیلمه‌ریک. گوْدارین ایلک فیلمی اوْلان نفسدن دۆشمۆش سینئمانین فوْرم دۆنیاسیندا درین بیر ده‌ییشیم یاراتدی. اینسانلارین یاشاملارینداکی آنیلاری سینئما پرده‌سینه داشیدی. و بئله‌لیکله سینئمانین یئنی دالغاسینی بیزلره سوندو. (تقدیم ائتدی)

 البته اوْ بو یوْلدا تک دئییلدی. فئدریکوْ فیلئینی، آنتوْنیوْنی، تروْفو کیمی‌لری ده اوْنا اؤز تایسیز اثرلری ایله بو یوْلون گئنیشلنمه‌سینده یاردیمچی اوْلدولار. کایه دو سینئمادان گلیشیب ادبی روحلو فیلم‌لردن جانا گلمیش فرانسه‌نین یئنی دالغاچیلاری سانکی سینئمایا یئنی بیر روح باغیشلادیلار. بونلارین اثرلرینده گۆنده‌لیک یاشام تصویره چکیلیر. اینسانلار اؤز یاشاملارینداکی یاشادیقلاری اوْلایلاری سینئمانین پرده‌سینده ایزله‌مه‌یه باشلادیلار. 


فیلمه گؤره:

بیر اؤزل هنجارسیزلیقلا نظمسیزلیک وار فیلم‌ده. بو باغیمسیزلیلیغی بیز هم کاراکتئرلرین گؤرۆنۆمۆنده گؤرۆرۆک، همی ده فیلمین ریوایتینده. سانکی اوْنلارین هئچ بیر نسنه‌یه باغلیلیقلاری یوْخدور. ائیله‌جه ده فیلمین ریوایتی مکان و زاماندان باغیمسیز اوْلاراق هئچ بیر باغلیلیق داشیماییر. 

میشئل اؤز رؤیالاریلا، اؤز یاشام طرزی ایله یاشاییر، پاتریشیا ایسه اؤزۆ ایله نئتلشمه‌میش بیر دورومدا سۆرۆنۆر.

کاراکتئرلرین اؤز ایچ وورنوخمالاری سوْنوجوندا، دیراماتیزه بیر فضادا، جینایی اوْلایلار دا گؤرۆنۆر، سئوگی‌سل آنلار دا یاشانیلیر. فیلمین سوْن سئکانسی پاتریشیانین گؤردۆیۆ ایش ایله داها ایزله‌مه‌لی، داها دارتیشیلمالی اوْلور. فیلمده قادین مسئله‌سی و یؤنتمنین توْپلومدا قادینین قازاندیغی قوْنوما الیشدیرل یاناشماسینا شاهید اوْلوروق. آمئریکا قادینی ایله فیرانسیس قادینلاری موقاییسه اوْلونور. پاتیرشیانی بیر ایده‌آلیست کیمی تصویره چکیر و بو ایده‌آلیسمی نقد ائدیر. سانکی فیلم سوْن سئکانسدا دئییلن: «سن گئرچکدن هرزه‌سن!» سؤزۆنۆ دئمک اۆچۆن دۆزلدیگی، ایزله‌ییچی‌نین بئینینده یووا سالیر.


 @turkcesinema

#فیلم_تانیتیمی


فیلمدن بیر دیالوْگ:

پاتریشیا: چوْخ پیس‌دیر!

میشئل: نمنه؟

پاتریشیا: آداملاری ساتماق!

میشئل: یوْخ نوْرمال‌دیر! ساتقینلار ساتار، اوْغرولار چالار، قاتیل‌لر اؤلدۆررلر، وورغونلار ایسه سئورلر!


© Breathless


  • حامید مورسلی

.

مربع آدلی فیلم، ایسوئچ‌لی یؤنتمن، روْبئن استلوند-ون، ۲۰۱۷ده، یئتمیش اینجی کن فئستیوالینین قیزیل خورما آغاجی اؤدۆلۆنۆ قازانان فیلمی‌دیر. فیلم ساختا قهرمان پرورلیک‌له باشلانیر. و بو ایلغیملیقلارین بوْش اوْلدوغلانیری ثبوتلامایا اوزانیر. 

کریستیین بیر اینجه‌صنعت موزئیی‌نین سوْروملو مودورودور. سحر ایشه گئدرکن بیر قیزین ”قوْیمایین منه ساری گله لۆطفن، اوْ منی اؤلدۆره‌جک“ دئیه باغیراراق یاردیم ایسته‌مه‌سی سوْنوجوندا قیزی قورتارمیش کیمی نئچه آنلیق اوْلسادا بیله قهرمانلیق حیسسی ایله دوْلور. آنجاق بونون بیر ساختا  اوْیون اوْلوب بو اوْیونلا اوْنون جئب تئلئفوْنون، پارالارین و بؤیۆک باباسیندان میراث قالان دۆیمه‌لرینین اوْغرولانماسینی دویدوقدان سوْنرا آخماقلیق حیسسینی یاشاییر. یؤنتمن  مربع‌ده ده اؤنجه‌کی «فوْرس ماژور» آدلی فیلمینه تای توْپلومدا گؤردۆیۆ توْپلومسال اوْلایلارا الیشدیرل یؤندن یاناشیر. یؤنتمنده‌کی اینسانا و یاشاما اومودسوزلوغو بئرگماندان بوْرج آلینسا دا، فیلم‌لرینین ایچه‌ریسینده معما سایاغی ایشله‌نن سئکانسلاردا هیچکاک‌ین ایزلرینی ده گؤرمک اوْلور. مربع ده هر نه‌دن آرتیق ساختاکارلیق، ایکی اۆزلۆلۆک، ریاکارلیقلا تظاهر گؤزه چارپیر. آیدینلیق، هۆنر، عدالت کیمی سؤزلرین بوْش اوْلدوغو آچیقلانیر. یئنی اینساندا بینؤوره سالان قوْرخو فیلمین باشاباشیندا گؤز اؤنۆنده‌دیر. فیلمده اینسانلارین قوْنوملاریندان ائتکی‌له‌نن گۆنده‌لیک ایلیشکیلری گؤز اؤنۆنه گلیر. سانکی یئنی عصرده اینجه صنعت ده  ابتیذالا چکیلیب‌. هۆنر آنلاییشی پول ایله اؤلچۆلۆر. چۆنکی هۆنری یاشادان آزاد بازاردان تزریق اوْلونان سایسیز پارالاردیر. قوْنوملاردان آسیلی اوْلاراق بیر هۆنری موزه‌ده اینجه صنعتلیکدن یوْخسون هر نه‌یی اینجه‌صنعت آدی ایله موخاطبه سونماق اوْلار کیمی گؤرۆنۆر. مربع توْپلومدا بوتون عدالت‌سیزلیک‌لره باخمایاراق عدالت و برابرلیک سیمگه‌سی‌دیر. آنجاق اوْنون دا اصیل آنلامینی تبلیغات تیزئرینده پارتلایان بالاجا دیلنچی قیزین باشینین قضاسیندا گؤرۆرۆک. هزینه‌لرینی آزاد بازاردان تامین ائدن بو موزه اینسانلارین اعتیراضینا معروض قالاراق آردیجا بیر چوْخ سوْرونلارلا توشلاشیرلار.



فیلمده مئیمونا بنزر آدامین سئکانسی توْپلومون اوْرمانا چئوریلیب، گۆجسۆزلۆکله قوْرخودان دوْلایی سوْسماسینی قاباردان اینسانلار گؤسته‌ریلیر. سانکی منله ایشی اوْلماسا تام ضعیف بیریسینه تجاووز بیله ائتمکده اؤزگۆردۆر. اسکی اینسانلارین ایندیکی اینسالارلا موقاییسه‌ده داها گۆوه‌نیلیر اوْلدوقلاری بیر خاطیره دئمکله وورغولانیر. سانکی یئنی اویغارلیق(تمدن) اینسانی داها قوْرخاق، داها یالنیز، داها اوْیونباز، داها شعاروئرن بارا گتیریب. اینسانلار آراسیندا داها سئوگی آرادان قالدیریلیر. هرکسه سادجه گۆوه‌نسیزلیک مئیدان اوْخویور. آنه ایله کریستینین سئکس صحنه‌لری بونون قانیتی‌دیر.

بۆتۆن بونلارا رغمن فیلمین ریوایتلری بعضن جاوابسیز قالیر. سانکی ایکی ساعات ۲۲ دقیقه ریوایتی بۆتۆنلتمه‌یه یئتمه‌میش کیمی گؤرۆنۆر یا بعضی ریوایتلرین حشو و فیلمده اوزالدیجی اوْلدوقلاری نظره گلیر.

  • حامید مورسلی

yol 1982
یوْل؛
توْپلوم آدلی دوستاغا گئدن بیر یوْل!

یوْل/1982/تورکیه/یؤنتمن: ییلماز گونئی‌/اوْیونچولار:خلیل ارگون، شریف سئزَر، آنیتا پی‌نس و ...
🎥🎥🎥📽📽📽

بئش نفر توتساغا، ایزینلی اؤزگورلوک(مرخصی) وئریلیر، عاییله‌لرینی گؤروب شخصی ایشلرینی یئربه‌یئر ائتسین‌لر دئیه؛ آنجاق ...

🎥🎥🎥📽📽📽

  • حامید مورسلی

The Burmese Harp 1956
بئرمه سازی
باریش اوچون بیر سس

@turkcesinema

برمه سازی/1956/اؤلکه: ژاپن/ یؤنتمن: کن ایچیکاوا/اوْیونچولار: رنتاروْ میکوْنی، شوجی یاسوْی، یان هاماموْرا و...

🎬🎬🎬🎬🎬🌹🌹🌹🌹🌹

ساواش چوْخ تئز قورتارا بیلَردی. بو قَدَر خسارت ایله ویرانلیغی تؤره‌تمه‌سین دئیه هئچ باشلانیلمازدی دا بیله. بو قدر گنج اینسان دونیاسین ده‌ییشمزدی؛ آزجا موسیقی ایله ایلگی‌لنسه‌یدیرلرسه، لطیف دویغویا اؤنم وئرسه‌یدیرلرسه، باریشین سسی‌نی ائشیتسه‌یدیرلرسه، ببرآز داها چوْخ مئهریبان اوْلسایدیرلارسا، هئچ بیر ساواش باش توتمازدی یقین.

  • حامید مورسلی

عروج (یوکسه‌لیش) The Ascent 1977

شئپیتکوْ'نون شاه اثری
@Turkcesinema
.

عروج/1977/اؤلکه: سوْوییئت‌لر بیرلیگی/یؤنتمن: لاریسا شئپیتکوْ/اوْیونچولار: آناتوْلی سوْنوْنیتسین، بوریس پلوْتنیکوْف، وئلادیمیئر گوْستیوخین و...
🌹🌹🌹🌹🌹🌹🌹🌹🌹🌹🌹؛

ایکینجی دونیا ساواشی چاغیندا ایکی نفر پارتیزان قاردا قالمیش قوروپداشلارینا یئمک اوچون بیر شئی تاپسینلار دئیه، بیر کنده یوْللانیرلار. بیر قوْیون (گوسفند) تاپیب قوروپلارینا ساری یوْللانیرلار. آنجاق یوْلدا آلمان عسگرلره توش گلیرلر. اوْنلار اسیر اوْلورلار. آلمانلی‌لار سوتنیکوْف ایله ریباک'ا اوْنلارین پوْلیس گوج‌لرینه قاتیلماق اؤنری‌سین وئریرلر. سوتنیکوْف بو اؤنرینی قبول ائتمه‌ییر آنجاق ریباک...

  • حامید مورسلی

الجزایئر ساواشی
The Battle Of Algiers 1966
پوْنته کوْروْنون شاه اثری

@turkcesinema

الجزایئر ساواشی/1966/اؤلکه: الجزایر ایله ایتالیا/یؤنتمن: جیلو پوْنته کوْروْ/اوْیونچولار: ژان مارتین، سعدی یاسف، براهیم هگیاگ، توماسوْ نری و...

🎥🎥🎥📽📽📽

۱۹۵۷ میلادی ایلینده فیرانسالی سوْرغوچولار (بازجولار) الجزیره شهرینده بیر الجزایئرلی ناسیوْنالیستی، علی لاپوْآنته آدلی الجزیره‌لی چیریک‌لرین گیزلندییی یئری لوْوا وئرسین دئیه، ایشکنجه ائدیرلر. آنجاق ...

  • حامید مورسلی

The Weeping Meadow 2004
آغلار اوْتلاق
پوْلوْسون شاه اثری 

آغلار اوْتلاق/2004/یؤنتمن: تئو آنجئلوْپوْلوْس/اوْیونچولار: الئکساندرا آیدینی، تالیا آرگیریوْ، جیوْرجوس آرمئنیس و...
🎬🎬🌹🌹🎬🎬

آغلار اوْتلاق (علفزار گریان)

ایکینجی دونیا ساواشی‌نین سوْنوجوندا ائولریندن دیده‌رگین توشموش بیر سیرا یونانلی، ائدسادان یونانیستانا گیریش یاپیرلار. هئچ بیر عاییله‌سی اوْلمایان ائلئنی اوْنلارلا بیرگه‌دیر. ائلینی بؤیویوب، یاشی چوْخالیر. بیر یانلیش اوْلای سوْنوجودا حامیله اوْلور.

آغلار اوْتلاق آنجئلوْپوْلوْسون شاه اثری ساییلیر. بو فیلم بیر قادین اوْلموش قیزجیغازین کدرلری‌نین ریوایتی‌دیر. بیر قادین کی آنا اوْلور، اؤزو ایسته‌مه‌دیی اوشاقلاری‌نین وورغونونا چئوریلیر. نه‌قدر چالیشسا دا چاتا بیلمه‌ییر. بو فیلم دوْلودور غم ایله کدر هم ده اؤزلم‌له. بو فیلم، شاه اثرلر یؤنتمنی اوْلان پوْلوْسون شاه اثری ساییلیر. هر بیر سئریجینی اوْزونه حئیران ائدیر...

آنجئلوْپوْلوْسون سینئماسی گونوموزده‌کی سیرادان بیر سینئمالاردان داها فرقلی بیر سینئمادیر. بو اوْلاغان اوستو سینئما حاقدا نه‌قدر دایشساق دا یئنه سوْنوندا سؤزوموز قیسیر قالاجاق. گئرچکدن اوْنون اینجه‌صنعتدن تام آنلامی ایله بارینمیش سینیماسینی، سادجه دیلده آنلاتماق اوْلماز. صنعت دوْلو سینئما، بلکی دئمک اوْلار پوْلوْسدا سوْن دوراغینا چاتیر.
آغلار اوْتلاق آنجئلوْپوْلوْسون بیتمه‌میش اوچلویونون ایلک فیلمی‌دیر دئمک. بو فیلم ده، باشقا فیلم لرینه تای پوْلوْسون همئشه‌کی وورنوخمالاری‌نین گؤسترگه‌سی‌دیر. آنایورد، آنا توْرپاق، وطن دردی، اوزاقلیق و اؤزله‌مک، ساواش، چاتماماق، غم، کدر، ائیله‌جه، قاندیرمایا دوْغرو سوْنوجا وارا بیلمه‌ین دورتولر؛ دئمک اوْلار پوْلوْسون همئشه‌کی وورنوخمالاریندان ساییلالار. بو فیلمده ده گؤزلجه‌سینه بونلارا توْخونوب‌دور. بو اوزدن ایزله‌ییچینی درین دوشونجه‌لره دالدیرمایی باشارا بیلیب‌دیر یقین. 

  • حامید مورسلی

ماراغادا بیر کیشی وار ایدی؛ آدی بؤیوک آغایدی...
یازان: حامید مورسلی


اینسان وارلیغی‌نین چئشیدلی بویوتلارینا باخاراق اینسانین ایچ و دیش دوزه‌نینه قورولوش باغیشلایان، سَهمانا سالان هم ده اونون روحونا ام وئرن نسنه، قوشقوسوز دئمک اولار موسیقی‌دیر. موسیقی دوغادان آلینمیش بیر واراولوشچول نسنه اولاراق تکجه ایدراک گوجونه یییه اولان انسانی دئییل، بلکی بوتون کاییناتی اؤز ایچینده قاپسایاراق هامیسینا حضور، آخیملی‌لیق، هم ده دئمک اولار یاشام بخش ائدیری. بَدَوی توپلوم‌لار ایله مدرن توپلوم‌لارین چئشیدلیلیگی اونلارین تئکنولوژی دونیاسیندان بارینماقلاری ایله دئیل موسیقی کیمی روح‌سال وارلیقلارا اؤنم وئرمک‌لری ایله اؤلچولَر. بیر یاندان آراشدیرمالارین سونوجونون معیین‌لشدیردیگینه گؤره موسیقی زامان سوره‌جینده توپلومون اؤزل قاتلاریندا بیر سیرا آیدین ندن‌لردن دولایی گئت گئده اؤزل اینسانلار، دوشونجه‌لر و قاتمان اویه‌لرینه حصر اولوب، اولماقدادیر. دوغرودور گئنل اولاراق موسیقی‌سیز یاشاماق آنلامسیزدیر آنجاق موسیقی‌دن هانسی درجه‌ده بارینماق اینسانلارین یاشاییشلارینا کئیفییت باغیشلاییر.

  • حامید مورسلی

قورخورام؛ قورخورام؛ قورخورام

♤■♤■♤■♤■♤■♤■؛


نئچه گون اؤنجه دوستوملا بیرلیکده آددیملاییردیق، اوزاقدان ایکی نفرین یاخالاشماسی، اؤته‌یاندان بیریسینی‌نین ساققالا سؤیوش دئمه‌سی ایلگیمیزی چکدی. آنجاق اوْ'گون بیز قیراقدان سوْوشاراق "گونده‌کی آتیشمالارا تای بیر شئی‌دیر دئیه یانلاریندان سایمازجاسینا کئچدیک. اوْنلار آیریلمیشدیلار، آنجاق بیریسی اوْبیریسی‌نین ساققالینی سؤیوشه باغلامیشدی. اوْ بیریسی ایسه الدن قورتولوب قاچماق ایسته‌ییردی.

  • حامید مورسلی

بوْرخئس همئشه "ادبییات‌ین یاراری نه‌دیر؟" سوْروسوندان چوخ شیددتله حیرصله‌نردی. اوْ بو سوْرغونون آخماقجاسینا اوْلدوغونو وورغولاییب دئیه‌ردی: "کیمسه سوْروشماییر قوشون اوْخوماسی‌نین ائیله‌جه گونشین باتان چاغی‌نین گؤزللیگی‌نین نه فایداسی وار؟" ایه‌رسه بو گؤزل نسنه‌لر واردیرلار و ایه‌ر بونلارین وارلیغیندان دوْلایی یاشام بیر آن اوْلموش اوْلسا بیله آز چیرکین و آز اوره‌ک سیخان اوْلورو، اوْنلارا بیلیم‌سل ندن‌لر آرخاسیجا اوْلماق؛ قیسسا دوشونجه‌لیک دئمک دئییل‌می؟

  • حامید مورسلی

"فئورالین 26-سی (25-26) خوْجالینین سوْیْ‌قیریمی گئجه‌سی‌دیر"

بو گئجه فئورالین 26-سی، ائرمنی‌لرین وریندن خوْجالی سوْی‌قیریمی، ائیله‌جه آذربایجانین اونودولماز یاراسی اوْلان خوْجالی‌نین وحشی‌جه‌سینه ایشغال اوْلونما گئجه‌سی‌‌نین یییرمی‌دؤردونجو ایل دؤنومودور. 24 ایل اؤنجه بئلنچی بیر گئجه‌ده ائرمنیستان عسگرلری روس‌لارین، فارس‌لارین و فیرانسیزلرین ایستیراتئژیک و نیظامی دستک‌لری‌نین گوجو ایله قاراباغین ان اؤنملی شهری اوْلان خوْجالی‌یا وحشی‌جه‌سینه گیریب، یییرمینجی عصرین سوْنلاریندا، ان دهشتلی سوْی‌قیریملاریندان بیریسینه سبب اوْلدولار. سیلاحسیز و نیظامی اوْلمایان اینسانلاری رحم‌سیزجه‌سینه سوْی‌قیریم ائتدیلر.
قوجامی‌دیر؟ قادین‌می‌دیر؟ یوْخسا اوشاق‌می‌دیرلیغینا دا باخمادیلار. بوْیلو قادینلاری، کؤرپه اوشاقلاری، بیرجه سؤزله اوْ توْرپاقلاردا قالان هر هانسی بیر تورک نوفوسونو، تورک اوْلدوغو اوچون قانسیزجاسینا اؤلدوردولر. گؤزلری وحشی‌لیک‌له قاپانیلمیش ائرمنی‌لر، بو گوناه‌سیز اینسانلاری اؤلدورمک‌له بشرییتین آلنیندا زیگیل اوْلان ساواش لکه‌لریندن تؤرنمیش چیرکین سوْی‌قیریملاردان، ان قوْرخونجونا، بیرگئجه (25-26گئجه‌سی) بوْیونجا، سبب اوْلدولار. بیر گئجه‌ده ۶۱۳ نفر، او جومله‌دن ۱۰۶ قادین، ۶۳ اوشاق و ۷۰ قوْجانین یاشامینا وحشی‌جه‌سینه سوْن قوْیولدو. بو سوْی‌قیریمدا ۱۲۷۵ دینج (سیویل) ساکین اسیر گؤتورولوب، ۱۵۰ نفر ایسه ایتگین دوشدو. بو فاجیعه‌دن 24 ایل کئچمه‌سینه باخمایاراق دونیا اؤلکه‌لری او جومله‌دن بو بربرلیگی دستکله‌ین اؤلکه‌لر بو اوْلایا سس‌سیز یاناشاراق آذربایجان تورک خالقی‌نین سوْی‌قیریملا اوزلشمه‌سینی، هله ده لاییقی درجه‌ده محکوم ائتمه‌ییب‌لر. بیرلشمیش میللت‌لر تشکیلاتی‌نین نئچه دنه بیاننامه‌سینده ایشغالچی تانینمیش و تئزلیک قئیدی ایله ایشغال ائتدیگی توْرپاقلاری بوشالتماسینی قولاق آردی ائدن ائرمنی دیغالاری، بوگونه دک هله ده قاراباغی ایشغال آلتیندا ساخلاییب‌لار.

بئلنچی گونده اؤزگور اینسانلارا گرکلی‌دیر سس‌سیز قالماییب، بو اوْلایی قیناماقلا آذربایجان تورک خالقی‌نین سای‌سیز یارالارین نین بیریسینه مرحم اوْلوب، اینسانلیق گؤره‌ولرینی یئرینه یئتیره‌لر.

  • حامید مورسلی

دئموستین'ین ناغیلی
🌺🌺🌺🌺🌺

دئموستین، یونانین بؤیوک خطیب و دانیشانی، جاماعاتا میللی مسئله‌لرین بیریندن سؤز آچیب، دانیشماقدایمیش؛ آرادا گؤرور هئچ بونون سؤزلرینه قولاق آسان یوْخدور. درحال سؤزونو کسیب دئیه‌ر:
قولاق وئرین سیزه بیر گولمه‌لی حئکایه دئییم:
بیر نفر یایین ایستی‌سینده مینیب مقصدینه ساری گئتسین دئیه، بیر ائششک کرایه ائدیر. یاری یوْلدا گؤره‌ر گون یامان قیزیشیب، ایستی‌لیک آمانینی کسیر. ائششکدن یئنیب، ایستر ائششگین کؤلگه‌سینده آزجا دینجه‌لسین. آنجاق ائششگین صاحابی اوْنا مانع اوْلوب دئیه‌ر: سن منیم ائششگیمی مینمک اوچون کیرایه ائدیبسن، داها کؤلگه‌سینی کیرایه ائتمه‌ییب‌سن کی! 
قال-ماقال باشلار، ایش چکر ووروشماغا!
ناغیل بورا یئتیشدیکده خطیب سؤزونو کسیب، دانیشدیغی منبردن آشاغی یئنه‌ر. قولاق آسانلار هامیسی بیر سسله یالوارماغا دوشرلر کی، آخی بس ووروشمانین سوْنو نه اوْلدو؟
دئموستین گولومسه‌ییب بئله جواب وئرر:
اوْنلارین وورشماغی قورتولدو، چونکی هر ایکیسی ده بو سؤز اوسته راضیلاشدیلار:
بیر مللت کی اؤز اؤلکه‌لری‌نین اؤنملی ایشلری بارسینده دوشونمه‌دن، ائششگین کولگه‌سی کیمی سفئه سؤزلره قولاق وئره، اوْ میللتین یاشاماغا بیله، نه لیاقتی وار، نه ده یاشماق اوْنلارا یاراشاندیر. اوْنا گؤره‌ده یوْخا چیخاجاقلاری قاچیلماز اوْلاجاق.

آ. ی: ایندی بیزیم بیر چوْخ مسئله‌میز ده دئموستین'ین ناغیلی مسئله‌سینه بنزه‌ییر.

  • حامید مورسلی