آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالیییق دئیه دوشونورم. بو دوشرگه‌ده اؤز آنادیلیم اولان تورکجه‌ده یازاجایام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب، بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی‌دیر :)
سیز ده دیریلیگینیزی بیلمک ایسته‌ییرسینیزسه یازماغا باشلایین.
یادیمدان چیخمامیش: سلام، خوش گلیب‌سینیز :)

سون گؤندری‌لر
سون یوروملار

۵ مطلب با کلمه‌ی کلیدی «توپلوم» ثبت شده است

:::::::: اردوغان ؛ تورکجه و فلسفه اوزره دارتیشمالار :::::::::



تورکییه‌ده اردوغان کیمی دیکتاتور دا دئمه‌سه‌ک، اؤزونه قاپالی بیریسی‌نین، عدالت و قالخینما پارتیاسی بیچیمینده اوسته گلمه‌سی سونوجوندا، تورکییه توپلوموندا بیر چوخ ده‌ییشیملره نده‌ن اولدو. اردوغان ائکونومیک‌ چالیشمالاردان باشلاییب تورکییه‌نین دئمه‌ک اولار پوزقون دوروملارین آریدیب (دوزلدیب،تمیزله‌ییب) گونو گوندن گلیشمه‌سینه دوغرو یول آچدیر. بونون یانی سیرا تورکییه کوتله‌سی وریندن اؤزللیکله تورکیه‌نین آشاغا قاتمانیلا(طبقه‌سی) بیرگه بیر سیرا اورتا قاتمانی و دینچی قیسیملری آراسیندا دا اؤزونه اؤزل یئر آچا بیلدی. بوردا دئمه‌لی یم کی قاتمان تام آنلامیلا تورکییه‌ کوتله‌سینی، اؤز ایچینده قاپسیا بیلَن بیر سؤزجوک ساییلمیر؛ نیه کی بیر چوخ اوزمانلارین دئدیکلرینه گؤره تورکییه ده، ایران کیمی دئمه‌ک اولار قاتمانسیز بیر توپلوما یییه‌دیر.
اردوغان رئفورمچولوغو تورکییه‌نین گله‌جه‌گه باخیش آچیسینی ده‌ییشدیریب بو یئنی باخیشلار چرچیوه‌سینده یئنی ایستک‌لر اورتایا قویدو. ائورنسل (جهانی) باخیشلارینین ده‌ییشمه‌سی اساسیندا بؤلگه‌سل گؤروشلرینی ده ده‌ییشدیردیرلر. تورکییه‌نین ایچ سیاستین قازانان اردوغان، اورتادوغونون (خاورمیانه) دا سون سؤزونو دئمه‌ک ایسته‌دی. آنجاق ایدولوژیک باخیشلارینا گؤره بیر چوخ متحدلرینی الدن وئریب، دیش(ائشیک) سیاستینده، بوتون دایاندیغی چرچووالاردان گئری چکیلمه‌ک زوروندا قالدی. میصردن باشلا سوریه‌دن عراغا کیمی بؤیوک اودوزانلارین سیراسیندا دایانانلارین بیریسی تورکییه اولدو. "عرب باهاری" دئدیگیمیز بوتون آختا دئوریملره ائگه‌منلیک ائتمه‌ک ایسته‌ین تورکییه، بو سیاستلری اساسیندا تورکییه‌یه قارشی یؤنه‌لیک چالیشان مئدیالار پروپاقانداسی آراجیلا ایچ چاخلانیشینا دا نَدن اولدو. و بو باشاری‌سیزلیق اردوغانین تورکییه‌نین ایچه‌ریسینده دیکتاتورجا داورانیشلارین، داها یوکسه‌گه قالدیردی.
بو نئچه ایلده اردوغان بیر چوخ ساحه‌لرده ده‌ییشیم‌لره ال قویموشدور. أن باشدا چؤزوم سوره‌جی دئییلن بیر گلیشمه‌یی اورتایا قویدو، بیر نئچه آنا یاسا ده‌ییشیک‌لیگی و حقوق آلانیندا دا ده‌ییشمه‌لره اوز گه‌تیرمیشدیر. سون دانیشیقلارینین بیریسینده " دیل دئوریمی"-نه قارشی چیخیب دیلی هدفه آلاراق " تورکجه ایله فلسفه یاپیلماز" سؤزونو اورتایا قویموشدور. آتاتورک قوران جومهوریتین اساسلارینین بیریسی اولان تورکجه‌نی رد ائدیب عوثمانلیجانی ساوونموشدور. و بئله ایفاده ائتمیشدیر کی فلسفه یاپماق ایسته‌ین یا عوثمانلیجانی دوزگون بیلمه‌لی دیر یادا اینگیلیزجه‌نی. بو اوزدن بو سؤزلره تپگی اولاراق بیر چوخ بیلیم آدامی و آکادئمیک اوزمانلار وریندن قینانیب ائلیشدیریلمیشدیر. "ائفدال سئوینجلی: دیل دئوریمی تورکجه‌یه مینلرجه سؤز(کلمه) قازاندیرمیشدیر " دئیه ایفاده ائدن تورک دیلی‌نین اؤیرتمنی "جومهمور باشخانی تورکجه‌نی یاخشی بیلمه‌ییر. تورکجه‌نی عربجه ایله قاریشدیریر آنجاق عربجه‌نی ده بیلمه‌ییر" دئمیشدی.
تورکییه‌نین فلسفه درنه‌گی وریندن ده تپگی‌لر گلدی و بو سؤزون اساس سیز اولدوغونو آچیقلادیرلار. آنجاق بیر نئچه بیلیم آدامی دا تورکییه‌‌ده واراولان بوگونکو تورکجه‌نی "آختا" دئییمی ایله ده‌یرلندیریب بیر ته‌هَر اردوغانا قاتیلمیشدیرلار. 
تورکجه آتاتورکون تاساریلادیغی یئنی جمهورییتین تمل‌لریندن بیریسی ساییلیر و سون 90 ایلده تورکجه دیل قورومو بودیلین زنگینلشمه‌سینده ده‌یرلی ایشلر گؤروب، آددیم‌لار آتماغا باشاریلی اولموشلاردیر. آنجاق بو دارتیشمالارا باخمیاراق اردوغان یئنه بو قونویا دا ایدولوژیک اولاراق یاناشیب اؤز اینانجلارینا آیقیری(ضد) اولان فلسفه پاپماق کیمی دئییمی اورتایا قویموشدور. نیه کی اردوغانین اینانجلارینا باخاراق "حیکمت" یئرینه فلسفه سؤزون قوللانیشی سؤزونون آرخاسیندا باشقا آماجینین اولدوغونو اورتایا چیخاردیر. اردوغانین فلسفه دردی دئییل هر هانسی آراجیلا اولور اولسون اؤز ایدولوژیک آماجی‌نی سونوجا وارماسی اؤنملی اولدوغودور کی بو اساسدا بئلنچی ایفاده‌لری اورتالیغا بوراخیر. 
فلسفه سؤیلملرینی اورتایا قویا بیلن بیر فیلوزوف (فیلسوف) اؤنجه‌لیکله یارادیجیلیق یاپماق ایسته‌دیگی دیلیی بیر دیلچی کیمی بیلمه‌گی گره‌ک‌لی دیر. نیه کی فلسفه دیلی‌ایله آنلاتماغا چالیشان فیلوزوف دیلی دوزگون بیلمه‌دیگینه گؤره یئرینده آخسارلیقلارلا راستلاشیب آنلاییش فرقینه وارماغا دا بیله، یؤنلمه‌ک زوروندا قالاجاغی قاچیریلماز اولاجاقدیر. دیلی آنلایان فیلوزوف یئره‌ل و ساوسال (فلسفی‌سل) یئنی سؤزجوکلری یارالدا بیله‌جه‌ک گوجونه یییه اولا بیله‌جه‌کدیر. اردوغانین بو سؤزلری تورکجه‌یه و تورکجه‌نین اوغروندا چالیشان شخص‌لر و قوروملارا بیر اویاری کیمی اولا بیلَر. نیه کی بیر چوخ دیلچی‌نین دئدیکلرینه گؤره دیلی دیلچی‌لر سؤزجوک یاراتماغیلان قورویوب ساخلیا بیلمزلر؛ بلکه دیلی کوتله قورویار. کوتله آراسیندا دانیشیلان دیل و باشقا دیللرله آل وئرده اولان دیل اؤز تمل قوراللارین و یاپیلارین قورویوب ساخلیا بیلدیگینده، او دیلین قورونوب ساخلانمیشدیر دئمه‌گینی ایدیعا ائده بیله‌ریک.

6/10/93
یازار: حامید مورسلی

  • حامید مورسلی

اسیدسپمه‌ک‌دن سومورولمه‌گه گئدن یول:

بو گونلر دئیه‌سن اسید سپمه‌ک توپلومدا بیر چوخوندا بؤیوک بیر قورخولار یارالدیب اونون یانی سیرا بیر چوخ تپگی‌لره شاهید اولدوق؛ بیر چوخو اونا قارشی چیخدی، بیر چوخو اعتیراض اولاراق آکسیالارا قوشولوب اینسانین ایلکین حاقلارینین بیریسی اولان اؤزگورلوغون پوزولماسینا اعتیراض ائتدیرلر، بیر چوخو اللرینده اولان آراجلارین گوجویله بو چیرکین ایشه قارشی چیخدیرلار و اؤز دوشونجه‌لرین یازیب یایدیرلار، قادین حاقلاری دارتیشیلدی، اونلارین معروض قالدیقلاری ظولوملر یئنی‌دن جانلاندی آنجاق بیر سیرالارینادا لوقالانماق، دوزسوزلانماق و دبه‌ک‌لنمه‌کلرینه یئنی یول و یئنی پیلان کیمی اولدو؛ دئمک توپلودا ائتکی بیراخان بیر سیاسال داورانیشا و اوندان سیاسال یارارلانماغا ندن اولدوغونو آچیقجاسینا گؤردوک.

باشقا سؤزله دئسه‌ک، ایرانین سون ایللرده سیاسی آلانیندا گیزلیجه  اوز وئرن گوجه یییه‌لنمه‌ک ساواشلاری گئت گئده یوخاری سیاسال گوج قاتمانینین ایچ قاتیندان آشاغی قاتمانا گیریب اؤزونو گؤسترمه‌سی آچیقجاسینا اورتایا چیخدی ؛ بو اولای بیر ته‌هر دنگه‌لری پوزماق و بولانمیش سودان بالیق توتماق کیمی آلینیر و داها قوطوبلاشمیش ایدولوژی و باخیش یوخاریداکیلاردان، یانداشلارینا یانسینماغین به‌لیرتیر و بو او دئمک دیر کی بیزه بوندان بئله بئلنچی اولایلاری گؤرمه‌ک چوخ‌دا ایراق گلمه‌مه‌لی دیر.

بو آرادا مئدیا یئنه اؤز گوجونو یئته‌ری قده‌ر تبوتلادی، اولدوقجا ایزله‌ییجی‌لرینده ائتکیله‌ییجی ائتکی‌لر بیراخدی؛ منجه بو ایش تام بیر سیاسی اولای اولاراق، سیاسی دنگه‌لری پوزماق ایسته‌ین بیر سیرالارینین وریندن تام پیلانلانمیش شکیلده اورتایا چیخدی. بو آرادا یئنی بیر چوخو دئمک یارانمیش دالغالاردان گؤزلجه‌سینه یارارلاندیرلار و توپلومون یوغون قیسمی‌نین مئدیانین قولو اولدوقلارینی ثبوتلادیرلار!
تام دوغرودور کی بئلنچی بیر  چیرکین ایش اینسانسال داورانیشلارین دیشیندا یئر آلیر و هر بیر اینسانین وریندن قینانمالی دیر آنجاق همین گونلرده خبرلرین سیراسیندا چوخ اؤنملی و دیققت چکیجی بیر خبرده یئر المیشدیر آنجاق هئچ بیر تپگی هئچ کیمسه‌نین وریندن اولماییب تام دهشه‌تیله یئنه سس‌سیزه آلیندی، نده‌نینین ‌ده یوغون قیسمی یئنه مئدیایا قاییدیر، بئله‌جه کی مئدیا یؤنه‌تیجی‌لری ایسته‌دیکلری  آماجلار و بلکه‌ او اولایدان باشقا آلینتی‌لاری ایسته‌میرمیش‌لر بو اوزدن سس‌سیزه آلماق لاب دوغرو بیر سئچه‌نه‌ک اولا بیله‌ردی.
سون گونلرده بئله بیر خبر گئتدی: اهوازدا بیرجه یاغیشیلا 1000 نفر خسته‌خانالارا گئتمه‌ک زوروندا قالدیرلار؛ یانی تام بیر چئوره‌فلاکتی یاشانیر او یئرلرده آنجاق کیمسه بو قونویا توخونماق‌دا ایسته‌مه‌دی، بلکه نئچه‌ندنه گؤره کی بو یازیدا دانیشماغا و سیرالاماغا یئر اولمایا؛ سادجه بیر وورغولاما و اوخویوجونون بئینینده بیر سووال ایشاره‌تی‌نین یارانماسی یئته‌ر.
بوردا بلکه اسید سَپیرلر ، آنجاق اوردا گؤیدن اسید یاغیر، بیز یاغیش یاغاندا سئوینیریک اوردا یاغیش یاغاندا کیمسه ائشیگه چیخمامالی‌دیر، یاغیشین دویغوسون یاشامامالی‌دیر. نه یازیق کی کیمسه‌ اونلارا گؤره آکسیا یولا سالمیر، اعتیراض ائتمیر، اونلارا گلدیکده کیمسه روشنفکر اولمور، دیللر سوسقونلوق توتورلار، دانیشمیرلار ، آنجاق اوتانمازجاسینا اونلارین قارا نفتین ساتیب اونلارا خوزی دئیه ‌بیلیرلر، سیز عرب دئییلسیز دئییرلر ، عرب اولوب‌سوز! سیز دانیشساز دیلینیزی دالینیزدان چیخارداریق . . . بیر تک اومود وئریجی ایشیغلاریدا بئله، اوزلرینه قاپادیبلار !

کئچن گونلر بونولارین دوروملارینین باشقا یؤنون تیکان تپه نین فرماندارینین آغزیندان ائشیتدیک؛ مهدی قهرمانی دئمیشدی: کتدی‌لر یوردلارینین تالانماسینین قارشیسیندا دایانیب بو معدنچی‌لره چالیشماغا ایزین وئرمه‌سه‌لر برق و سولارین قطع ائده‌جه‌ییک ! ؛ بو یعنی بوردا دا همین سومورولمه‌ک پیلانلاری تام هیزیلا اؤنه‌سورولور.
سومورگه‌چی بی ؛ هن سنی دئییرم، سن کی بو دوروملاری گؤروب سس سیز قالیرسان؛ سنده سومورگه‌چی‌لر سیراسیندا یئر آلیرسان؛ نیه کی بو میللتین بوقدر مظلوم اولدوقلارینی گؤروب جینقیریندا چیخماییر بیله. بوگون بیر چوخلاری  "هل من ناس ینصرونی"-نی باغیریرلار! سادجه  اؤزگور دوشونجه، و اؤزگور اینسانلار گره‌کیر کی بو سسی ائشیدیب "لبیک" هاراییلا اونلاری جاوابلایالار !

حامید مورسلی ؛ قیروو آیی‌نین ایکی‌سی- 1393

  • حامید مورسلی

نئچه گون اؤنجه اؤتری باخیشدا اورمیه کانالیندا مسئولارین بیری‌سی‌نین، دونیالیق "اؤیره‌تیم و ائیتیم" گونو حاقیندا دانیشیقلاری ایلگیمی چکدی؛ همین دانیشمان‌-ین دئدیکلرین قایناق گتیره‌ره‌ک باتی آذربایجان‌دا : 
267 مین نفریمیز کؤکدن یازیب اوخویا بیلمه‌ییرلر ! 
29 مین نفرین اوشاقلاری مدرسه‌لرده اؤیرنجی اولاراق دئمه‌ک اولار اؤزلری موطلق ساوادسیزدیرلار ! 
اینقیلابدان اؤنجه ساوادسیزلیق اؤلکه‌نین (ایرانین) اورتالامالاریندان 11 قات یوخاریمیش ! آنجاق بوگون ایسه 5.5 قات یوخاریدادیر !!!
و بیر سورو بونلارا تای بو ساحه‌ده دهشتلی دوروملاریمیزی یانسیدان بیلگی‌لر ! 
هله بو دهشتلی بیلگی‌لره یونسکونون بو یاساسینی کی علی بی جباری گؤزل قوشوق شکیلینه سالیبدیرلار، آرتیرساق، بو قونودا دا دوروملاریمیزین داها دارماداغین اولدوغو دریندن گؤزه چارپاجاق :

" یونئسکو یازدیغی یاسا فریاددیر/ کیم اؤز دیلین یازانمیر بی‌سواددیر"

----------------------------------------------------------------------

ی. س 1: باشقا اوستانلاریمیزین دوروملاری، باتی آذربایجان‌دان چوخ دا یاخشی دئییل !

ی. س 2: گوزاریشده بیر قوجا کیشی‌نین سؤزو منی چوخ فیکیره دالدیردی: " بالا بیز کور قوش کیمی‌-ییق دا " frown ifade simgesi

ی. س 3: مدرسه‌لر آچیلیر آنجاق هله‌ده کی وار، بیزیم دیلیمیزه چه‌کیل اویانا دا دئیه‌ن یوخدور؛ دئیه‌سن بو ایل‌ ده دیلسیز قالماغیمیزا ، دیلیمیزی ائویمیزده بیراخماغیمیزا، اؤزگه‌لرین دیلینه قوللوقچو اولماغیمیزا آلیشمالییق !

ا. ی: شکیل‌ده اولان سؤز اینسان حاقلارینین تمل‌لریندن بیریسینی وورغولاییر !

  • حامید مورسلی

"خود سانسوری" یا " ایچ اؤرت باسدیری"-نین نه‌دن‌لری؟ / حامید مورسلی

************************************************

سیز سانال اورتاملاردا، هارا کیمی اؤز دوشوندوکلرینیزدن دیفاع ائده‌رسینیز ؟

اؤز ماراقلارینیزلا کیمسه‌نین یوروملارینا قارشی اولوب دارتیشمایا گیرمه‌یه کؤنوللو اولارسینیز یوخسا یوخ ؟

بئلنچی بیر دارتیشمالاردا اؤزوونوزه ساووندوغونوز قونودان قیراقدا، قیرمیزی سینیرلار تانیملایارسینیز یوخسا یوخ ؟

یوروملارینیزی اؤز دوشوندوکلرینیزین اساسیلا یازارسینیز یوخسا باشقا نه‌دن‌لردن‌ده ائتکیله‌نه‌ره‌ک ؛ اونلارین زوروندا قالیبان یورومونوزو اؤزونوز ایسته‌مه‌دیگینیز کیمی بَلیرترسینیز ؟
و بیر سورو بونلارا تای سورولار ! . . .

اینگیلتره‌نین ایندیپئندئنت آدلی، آدلیم گونده‌لیک درگیسینده چاپ اولموش بیر راپورا گؤره بوتون سانال اورتاملاردا آکتیو اولان اویه‌لر، اؤزلری بیله‌ره‌ک، اؤزلرین و دوشونجه‌لرین اؤرت باسدیر ائدیرلر؛ باشقا آنلامدا دئدیکده بیر چوخو اؤزلرین سانسور ائدیب، دئمک "خود سانسوری"یه معروض قالیرلار!
2013-جی ایلده آمریکادا ائدوارد اسنودئن‌-ین حاقیندا بیر آراشدیرماجی مرکزین آراشدیردیغی یوروملاماسینا گؤره، بیرحالدا کی اوندا 1801 نفر 18 یاشیندان یوخاری ایشتیراک ائتمیشدیرلر؛ آلینمیش یوروملارادا ، 44 فاییز اسنودئن‌-ین ایشینین آمریکا اؤلکه‌سینه قارشی اولدوغو بیر ایش اولدوغون وورغولامیشدیرلار؛ آنجاق قارشی طرفدن ایسه 49 فاییزین وریندن بو ایشین آمریکانین خئیرینه اولدوغون بیلیندیرمیشدیر. دئمه‌ک اولار بو سونوجلار تام بیر قوطوبلاشمیش دوروم و آتموسفئردن خبر وئریر!

بو اساسدا بیر اؤتری باخیشدا بوتون‌ده اولماسا بیله یوروملارین بیر چوخو اورتاقلیق اوزره یوروملانیرلار، ائله‌جه‌ کی یوروم یازان بیرئی(فرد)، اورتاق دوشونجه‌ده اولدوغون دویاندان سونرا ماراغی یوروم یازماغا 91 دفعه آرتیر !

" حؤوصله‌م یوخدو؛ بوشلا بابا؛ گووه‌نلی اولماز بئله یازسام؛ ائششک گتیر معرکه داشیرا باشیم آغریمیر؛ کسینلیکله آیری آماجی وار بونو سورماقدان؛ قورخولو باش سلامت اولار" و ... لره تای نه‌دن‌لری بئینینه گتیریب دارتیشابیله‌جه‌ک، ساوونا بیله‌جه‌یی قونولارین اوستوندن راحاتجاسینا کئچیب اؤنمسه‌مه‌ییر!

بوگونکو یوزومسال و هرمونوتیکال آراشدیرمالار و اینجه‌له‌مه‌لرده ،هله باشقا باشقا آلینتیلاری نظره آلماییب بیر قیراغا بیراخساق یئنه بو قونو آغیر و حاشیه‌لی بیر قونودور. هله بیر آتدیم گئریه گؤتوروب اؤز میللی مسئله‌لر و قونولاریمیزا گلدیغیمیزده بو خود سانسوری بللی ندن و آخسارلیقلاریمیزا گؤره داها آرتیق گؤزه چارپیر، چوخلاری اؤز کؤنوللرینه رغمن باشقا جوره داورانماق زوروندا قالیرلار ، چوخلاری اؤزلرین باشقا اؤرتولر آلتیندا گیزله‌دیرلر ؛ هر بیر مسئله ده " گووه‌ن، دوغرولوق، باشقا آنلاملاردا آلینماماسین، کیمسه‌یه توخونماسین، سؤز ایسته‌دیگی آنلامین چاتدیرا بیلسین " و بونلارا تای باشقا یوروملاری نظره آلدیقدا، دئمه‌ک سؤزو گئدن بیرئی (فرد) داها آرتیق خود سانسوری قویوسونا دوشمه‌ک زوروندا قالیر !

20 شهریور 93

  • حامید مورسلی

گلین قبول ائده‌ک کی مرثیه اوخویان بیر میللتیک یا بلکه‌ده اولموشوق! 
گنج قیزلارین آغ آت رویالارینا تای بیزلرده گؤزوموزو تیکمیشیک چیخیش یولاریمیزین قاپیلارینا، بیر قورتاریجی گلیسین بیزی بو دوروملاردان قورتارسین دئیه؛ چاباسیز، چالیشماقسیز. بیر یئرده قالان سو کیمی اؤز ایچیمزدن قوخوماغا باشلاییریق. 
نیه دئییرم چیخیش یوللاریمیزین قاپیلاری، اونون اوچون کی چیخیش یوللاریمیزین لاب آچیق آیدین فرقینده‌ییک. بو اوزدن هئیت کیمی‌ دوشونورلریمیزی چوخ سئویریک؛ اونلارا بیزی قورتاران منجی کیمی باخیریق! کیتابلارین آلیریق آنجاق قاتلاری آچیلمامیش قالیر، ائله‌بیل ساتیش اوچون آلمیشیق، کیتاب قفسه‌لریمیزده توز یئییرلر. بو دوروم نه‌قدر اؤزوموزو اوتوزموش ساندیغیمیزدا بیر اوقدر ده داها آرتیق گؤزه چارپیر،گئت گئده اؤزوموزده بئلنچی دوروملارا قاتلاشمیش کیمی داورانیریق نه یازیق.

کئشکه بئله اولماسایدی و هر کیمیمیز اؤزونه هئیت کیمی بیریسی اولا بیلمه‌سه‌یدی‌ده بیله بو یولون دوغرو یولچوسو اولماسینا اولدوغو و یئته‌نه‌ییجه چابا گؤسترسه‌یدی . . .

ی. س: نئچه ایل اؤنجه دوستلارین بیرینه تئهراندان نئچه سای "وارلیق" درگیسی گؤندریلمیشدیر؛ درگیلری ساتسین، پاراسین اونلارا گؤندرسین دئیه. آنجاق درگیلر دوستوموزون الینده قالمیشدیرلار، سادجه ایکیسین ساتا بیلمیشدیر؛ بو یولداشیم ایسه قورخوردو رحمتلی دؤکتور هئیت (ایندی زنگ آچماسین)، زنگ آچیب، درگیلره گؤره سوروشسون، بودا اوستادین أمه‌یینین قارشیسیندا اوتاندیغیندان بیلمه‌سین نه جاوابی وئرسین.

  • حامید مورسلی