آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

اوغور قازانان گؤندری‌لر
سون یوروملار

۸ مطلب در دی ۱۳۹۳ ثبت شده است

دئییر ایسته‌ییرسن بیر گئرچه‌گی آرادان قالدیریب بیرباشقا دوشونجه‌نی یئرینه قویاسان، گرکلی دئییل تام اونا قارشی داوراناسان؛ سؤزو گئدن گئرچه‌گی یانلیشلیقلارلا دولو ساوونسان ایسته‌دیگین آماجا أل تاپمیشسان دئمک! 
آنجاق داها آغیر، داها آدامی ایچینه کیمی یاندیران قونو بودور کی هئچ بیر آماجین اولمایاراق یانلیشلیقلارلا دولو ساووندوغون گرچگی هئچ ائتمه‌گین دیر، بیر حالدا کی اؤزون ده بونون فرقینده اولمایاسان؛ هئچ دوشمن وورا بیلمه‌یَن ضربه‌نی اؤزون ووراسان!

او "آیی دوستلوغو" ناغیلی گؤز اؤنونه گلیر؛ رامین جهانگیرزاده یاخشی یازیب:
" آیی 
داش 
چوبان 
میلچک 
آیی دوستلوغونو ثبوت ائتدی 
داش قانا بویاندی 
چوبان اؤلدو 
میلچک هله ده یاشاییر "

بیزیم بیر چوخ قونودا بئلَنچی دوستلوغوموزو ثبوت ائتمکلریمیز چوخ اولوب و اولور؛ ائشیکدن باخان اووچونجو آدام چوخ یاخشی گؤره‌ بیلر !!!

  • حامید مورسلی

"دوستوم"

 

چوخ صمیمی ایکی دوست ایدی‌لر. آنجاق بیری چوخ حیله‌گر، قوچاق و حرکت‌لی، او بیری ایسه چوخ صاف، دوروست و سس‌سیز ایدی. حیله‌گر اولان یولداش بیر گون، یولداشینین یانینا گئتدی و ایشلری‌نین پوزولدوغونو سؤیله‌دی، اؤزون‌دن پول ایسته‌دی. صمیمی دوستو اونو هئچ قیرمادی، الینده‌کی بوتون پولو یولداشینا وئردی. یولداشی بو پوللا ایشلرینی دوزلتدی.

بیر موددت سونرا حیله‌گر اولان یئنه دوستونون یانینا گئتدی و یولداشینین ائولنمک اوزره اولدوغو نیشان‌لی‌سینی چوخ به‌یه‌ندیگینی سؤیله‌دی و اونو اؤزونه وئرمه‌سینی ایسته‌دی. یولداشی چوخ چاشدی، اووَل نه دئیه‌جه‌یینی بیلمه‌دی ... لاکین آرا‌لاریندا او جور گوج‌لو بیر سئوگی وار ایدی کی، یولداشینا "یوخ" دئیه بیلمه‌دی، نیشان‌لی‌سینی اونا وئردی.

 زامان ایچینده صاف اولانین ایشلری پوزولدو. آغلینا، یولداشی گلدی. "من اونا سیخیشدیغیندا یاخشی‌لیق ائتمیشدیم" دئدی و اومیدله یولداشینین ایش یئرینه گئتدی، اؤزونه چالیشماسی اوچون بیر ایش وئرمه‌سینی ایسته‌دی.

  • حامید مورسلی

45 Lessons in Life
45
درس یاشاییشدا !


Life isn't fair, but it's still good.
یاشاییش عادیل دئییل آمما هله ده یاخشی‌دیر.


When in doubt, just take the next small step.
او چاغ کی ایکی اوره‌کلی سیز، سونراکی بالاجا آتدیمی آتین.


. Life is too short to waste time hating anyone
یاشاییش اوندان کی سیز دوشونورسوز چوخ قیسا دیر بیرینین نیفرتیله هدر اولا .

  • حامید مورسلی

أورنسل آچیدان دا باخاندا یئنه "برادرلیک برابرلیک یالنیز آغیزلاردا بوش سؤز" اولدوغونو گؤره‌جکسن.

رحمتلیک پاشایی‌نین اؤلوموندن سونرا چوخلاری (بیلیم آداملاری و توپلوم‌سال بیلگی‌لر اوزمانلاری‌دا داخیل) شاشیردیقلارینی دیله گتیرمه‌دن چَکینمیردیرلر. منجه فیرانسا اولایلاری،ایران‌دا اوز وئرن پاشایی‌نین اولایلاری و دونیادا اوز وئرن بیرچوخ بونا بنزه‌راولایلارین تملی "مئدیا" گوجودور. بوگون راحاتلیقلا دئیه‌بیلرم کی: اونلارین کی مئدیالاری یوخدو اؤلوب‌لر، اؤزلری ده خبرسیزدیرلر.



فیرانسا اول
ایلاریلا بیرگه بوکو حرام 2000 نفره یاخین گوناه‌سیز اینسانی قانینا بیله‌دی آنجاق کیمسه او اولایی قینامادی؛ کیمسه پروفایل شکیلین ده‌ییشمه‌دی؛ کیمسه اؤزه‌ل تی‌وی پروقرامی حاضیرلاماییب؛ درگی‌لرده باش یازیلار بونا اؤزه‌للشمه‌دی. و...
بوتون بونلار بیر قیراغا، اورتادوغو ایللریدی تئرورون، قانسیزلیغین، سویسوزلوغون، بربرچیلیغین اودونا یانیب و یانماقدادیر، کسیلمیش بوغازینین قانی اؤز ایچه‌ریسینه آختیغینا رغمن، بیرلشمیش دئولت‌لر تشکیلاتی(ب.ام.ت) بونلارا گؤره، توو تله‌سیک اوتوروم قورمادی.

ایشید، پ.ک.ک، پژاک، بوکوحرام، طالیبان، القاعیده، النصره و بونلارا بنزه‌ر ترورچولار اؤز ایشینیز و اؤلدورمه‌گینیزده اولون، آنجاق اؤز تورپاقلارینیزدا؛ امین اولون هر آچیدان، اؤز دوغما یئرلریزده بیر بیرینیزین قانینیزی تؤکوب فلاکت‌لر یارالتسازدا بیله کیمسه سیزین گؤزونوزون اوستونده قاشدیر سؤزونو ده دئمه‌یه‌جک دیر.

  • حامید مورسلی




"ایسلامچی‌لار" و "ایسلام فوبی" :

بوگونلر هامی فیرانساندا سون گلیشملری قیناییرلار. بو اولای بیر چوخ تپکی‌لره نده‌ن اولدو. بیر چوخ یئرلی ائلیشدیری‌لره یول آچدی بونلا بیرگه بیر چوخ بو اولایا قارشی اولان رادیکال گروپلار و فردلرین وَریندن یئرسیز یوروملارینا سونوجلاندی. بیلمیرم سورون موسلمانلاردادیرمی یوخسا موسلمانلارین قارشی جیبهه‌لرینده اولانلاردادیر؛ نیه کی باشقا ایدولوژی و دین‌لره عایید اولان کیمسه‌لر بیر بؤیوک جینایتی یاپاندا دا بیله اونلارین اؤزلری ائلیشدیریلیر تمل ایدولوژیایا ایناندیقلاری دئییل. آنجاق موسلمانلاری بوگون آبیرسیز دوروملارا چاتدیران آشیری موسلمان و ترور اؤرگوتلرینه باغلی اولانلار داها آغیر ضربه‌لری ایسلامین هئیکه‌لینه ائندیریب‌ گونو گوندن ایسلامین گؤرونومونو چیرکینلشدیریب‌لر. سون ایللرده بو آدی موسلمان اولانلار "ایسلام فوبی یا ایسلام هراسی‌یه" بؤیوک نده‌ن اولوب‌لار. القاعیده، طالیبان، ایشید(داعش)، بوکو حرام و بیرچوخ بونلارا بنزه‌ر اؤرگوتلنمیش آشیری ایسلامچیلار، ایسلاما آیدینجاسینا دوشمانلاری دئییلیب تانیملانان کیمسه‌لر یا اؤرگوتلرین گؤردوکلری ایشلرینه دایاناراق داها چوخ آغیر ضربه‌لر ووروب‌لار. منجه بو آرادا مشکوک أللری آختارماق تام یئرلی بیر ایش ساییلا بیلر. آرخا دا پیلانلار و بؤیوک ایش‌بیرلیگی‌نین اولدوغونو سانماق، گئری ذکالیلیق ساییلماز. نیه کی سون ایللرده ایسلام اؤز یانداشلاری‌نین و اینانانلاری‌نین ضربه‌سینی بللی و گرچک‌ده وار اولان دوشمانلاریندان چوخ یئییب‌دیر. باشقا اینانج‌لارا اینانانلاری بیریسی بئلنچی سوچلاری یاپدیغیندا سادجه اؤزو سوچلانیب ائلیشدیریلر و چوخ آز گؤرونر اونون ایناندیغی اینانجی توپا باغلایالار و هر کسیم سوچون اؤز آیاغینا یازارلار آنجاق ایسلاملا ایلگیلی مسئله‌لر همئشه یؤنه‌لیب و سونوندا ایسلام ذاتی ائلیشدیریلیب محکوم اولوب دور.
باشقا آچیدان دا بو مسئله یه یاناشاندا گؤروروک بوگون دونیا اوزه‌رینده شیعی ایسلامچیلیق سوننو ایسلامچیلیغی یئنیلدیب دیر. دونیا شیعه ایدولوژیاسیندان قورخاراق سوننو‌لردن آشیری ایسلامچیلیقلاری اساسیندا ضربه لر یئدی؛ دئمک اولار سون ایللرده باتی اؤز قولتوغوندا بئجرتدیگی ایلانلارین سانجیلمیشی اولدو. فیرانسانین سون اولایلاریندا منجه بیر ته‌هَر ایران شیعه ایدولوژیاسیلا اؤزونو قیراغا چکه‌رک ساوونوب اولوسلار آراسیندا ایرانین نوکلوئر اوزره چالیشمالاریندان داها قورخونج اولایلارلا راشتلاشیب دیر. بونلارلا بیرگه سوننو ایدولوژیاسی، باشدا عربیستان اولماغیلا بؤیوک اودوزانلار سیراسیندا یئر آلدی. نیه کی فیرانسانین سون قانلی گونلری‌نین تمل داشلاری یمن و عربیستان القاعیده آشیری سوننو تئرورچو اؤرگوتو قولونا باغلی اولدوقلاری آچیقلانمیشدیر. بونا گؤره ایران یمن‌ده یوروتدوغو پولیتیکالاری داها سرتلشدیریب، ایندیکیندن چوخ گئنیشلندیره‌جک دیر منجه. نیه کی عربیستان بیر ته‌هر دونیا دوزه‌یینده اولان لابی‌لرینین ساوونماسینی ألدن وئرمیش کیمی دوروما گَلمیشدیر.

أته‌ک یازی:
1-فیرانسادا سون گون‌لر حاقلی اولمایاراق اؤلدورولن‌لری سایقیلا آنیرام و او اولایلاری شیددتله قیناییرام. .
2-منجه شیددت هر طورونده، هر کیمسه‌یه قارشی اونو سوسدورماق اوچون اویغولانسا، محکوم دور. مدنی‌لشمیش اینسانلارا و اینسانلیغا آیقیری بیر داورانیش اولدوغونو دئیه‌بیلرم. کسینلیکله.
3- دوشونجه و ایفاده اؤزگورلوغونو پوزان هر هانسی ایش شیددت‌له قینانیلیر.
4-اسلحه ایله قلم سوسدورولماز عکسینه قلم ایله اسلحه سوسدورولار. اؤرنه‌یی "چارلی ابدو" درگی‌سی نین بیر میلیون سایی‌دا چیخماسی.

شکیل: قورخما

ویدیو: Eminem - Not Afraid - https://www.youtube.com/watch?v=j5-yKhDd64s

20/10/93 حامید مورسلی.

  • حامید مورسلی

◘◘◘ قادین‌لاریمیز و بیزیم توپلوم ◘◘◘

شَهَرین ایچینه کی چیخیرسان بیر چوخ گؤرونتو، بیر چوخ صحنه سنین فیکیرینی اؤزونه ساری چه‌کیر. فرقلی فرقلی اینسانلار گؤرورسن، فرقلی فرقلی دوشونجه‌لر و فرقلی فرقلی پئشه‌لرله راستلاشیرسان. توپلومون چاخلاشماسین، ترپه‌نیشین، جانلی اولاراق چالیشماسینی‌ گؤز آردی ائده‌بیلمیرسن. بوتون چتینلیک‌لر، فلاکت‌لر، یوخسوللوق‌لار، ایش‌سیزلیک‌لره، بیرجه سؤزده دئسه‌م " آغری و دردلره" رغمن یئنه یاشاییشین چیرکین اوزون گؤردویونه بیله، هله‌لیک جانلی‌لیغین ایلکین یانسیدیجی‌لارینین ایزلرینی گؤردویونده بیر ته‌هَر بوتون بونلارا قاتلاشیب اؤزونو ساواش مئیدانی‌نین اورتاسیندا گؤرورسن. من بونون آدین قویورام "یاشام موجادیله‌سی". 


یاشادیغیمیز توپلوم‌دا بیر چوخ گئری قالمیشلیک‌لار وار، بلکی باشقا اؤلکه‌لرده یاشاسایدیق بیر چوخ داورانیشلاریمیز، بیر چوخ قایدا قوراللاریمیز، بیر چوخ یازیلمامیش یاسالاریمیز بیزی هویوخدورموش، قورخوتموش " نئجه بئله اولا بیلر آخی؟" سوروسونو دئیه سوروشدورموش کیمی اولاردی. آنجاق زامان سوره‌جی بیزیم تاریخ‌سل آلت بیلینجیمیزه ائتکیسین بوراخمیش کیمی دورومدادیر. بو گلیشمه‌لر داها بیزی بیر ته‌هر کوبوتلاشدیریب، داها عادی‌لشمیش بیر چوخ مسئلیه گؤرمزدن گلمه‌گیمیزه، دایاناقلی نده‌ن اولوب دور. بیر چوخ بئلنچی سورونلاریمیز وار کی داها سورون بیله ساییلمیرلار نیه کی زامان او چاتیشمازلیقلاری اؤز ایچینده بوغوب، گله‌نک‌ و دینی-مذهبی یاپیلار بو سوره‌جه توو وئریب داها قاباریق آجیلارین أللریندن آلیب لار. بونلارین بیریسی و اؤنملی‌سی ساییلان "قادنین‌لار و قادین حاقلارینین دورومودور" منجه. "بیل کیلینتون" آمئریکانین کئچمیش پیرئزیدنت‌لریندن اولان بیریسی دانیشیقلارینین بیرینده دئمیشدی "قادین ده‌ییشیلیرسه توپلوم ده‌ییشیله‌ر" آنجاق منجه بو سؤز دوغرو دا اولسا یئته‌رلی دئییل نیه کی قادینا قارشی باخیشلار، قادینین بیلگی‌سیز قالماغی، قادین‌لارلا ایلگیلی بیر چوخ توپلومسال قورال و قایدالار، قادین حاقلارینا ائرکک‌لرین سایقیلا یاناشمالاری و... کیمی قونولار ائتکیلی درجه‌ده داخیل‌دیرلر؛ تکی قادین یوخ سایدیغیم اؤرنک‌لر ده اویغونلانیب، یئرینده بلکی ده‌ییشیلمه‌لی‌دیرلر.
بوگون بیر آنانین اؤلوم اعلامییه‌سین بیر دووارا یاپیشدیریلمیشین اولدوغونو گؤردوم. آنجاق سؤزو گئدن اعلامییه‌‌نی گؤردوک‌ده توپلوموموزدا قادینلاریمیزین دورملارینین نه‌قده‌ر آغیر اولدوقلاری یئنی‌دن گؤزومون اؤنونه گَلدی. بیزیم توپلومدا دونیاسین ده‌ییشمیش قادینین اؤز شَکیلین اعلامییه‌سینه وورمازلار !!! ؛ اونون یئرینه، بیر زامانلار دینی کیتابلاریمیزدا 14 معصوم‌دان بیریسینی گؤسترمک ایسته‌دیکلری کیمی بیر ایشیق‌لی اؤرتو یا دا ایشیق‌سیز بیر اؤرتویله گؤستَرَرلر. آنجاق بوگون گؤردوگوم شکیلده او ایشدن علاوه رحمته‌ گئندن قادینین بؤیوک اوغلونون شکیلین‌ ده وورموشدورلار. و آنانی اوغلویلا تانیتدیرمیشدیرلار ! بیلمیرم نیه ولی چوخ اوزولوب ایچیمدن یازیقلاندیم.
بو دئمک اولار قادینلاریمیزین مین‌ده بیر اولان آغری‌لارینین گؤسته‌رگه‌سی‌دیر. و گؤسته‌ریرکی نه‌قده‌ر زامان ایستیر بو گؤروشلر ده‌ییشیب ایده‌آل بیر توپلوما یییه اولاق. هله بونا دیلسیزلیق و او اعلامیه‌نین اؤز دیلیمیزده یاییلماماسی‌نین نیه‌لیگین‌ ده آرتیرساق بو آغری‌یا ساخلاشماق داها چتین اولاجاق. آنجاق بؤیوک ده‌ییشیم و بؤیوک اوغورلار بالاجا آددیم‌لاردان اولاشیر. بو بالاجا ده‌ییشیم‌لر یئرینده ائعمال اولسالار بؤیوک دئویرمه‌لری آز زامان‌دا گؤره‌بیله‌جه‌ییک، دییه دوشونورم.


18/10/93 حامید مورسلی.

  • حامید مورسلی

:::::::: اردوغان ؛ تورکجه و فلسفه اوزره دارتیشمالار :::::::::



تورکییه‌ده اردوغان کیمی دیکتاتور دا دئمه‌سه‌ک، اؤزونه قاپالی بیریسی‌نین، عدالت و قالخینما پارتیاسی بیچیمینده اوسته گلمه‌سی سونوجوندا، تورکییه توپلوموندا بیر چوخ ده‌ییشیملره نده‌ن اولدو. اردوغان ائکونومیک‌ چالیشمالاردان باشلاییب تورکییه‌نین دئمه‌ک اولار پوزقون دوروملارین آریدیب (دوزلدیب،تمیزله‌ییب) گونو گوندن گلیشمه‌سینه دوغرو یول آچدیر. بونون یانی سیرا تورکییه کوتله‌سی وریندن اؤزللیکله تورکیه‌نین آشاغا قاتمانیلا(طبقه‌سی) بیرگه بیر سیرا اورتا قاتمانی و دینچی قیسیملری آراسیندا دا اؤزونه اؤزل یئر آچا بیلدی. بوردا دئمه‌لی یم کی قاتمان تام آنلامیلا تورکییه‌ کوتله‌سینی، اؤز ایچینده قاپسیا بیلَن بیر سؤزجوک ساییلمیر؛ نیه کی بیر چوخ اوزمانلارین دئدیکلرینه گؤره تورکییه ده، ایران کیمی دئمه‌ک اولار قاتمانسیز بیر توپلوما یییه‌دیر.
اردوغان رئفورمچولوغو تورکییه‌نین گله‌جه‌گه باخیش آچیسینی ده‌ییشدیریب بو یئنی باخیشلار چرچیوه‌سینده یئنی ایستک‌لر اورتایا قویدو. ائورنسل (جهانی) باخیشلارینین ده‌ییشمه‌سی اساسیندا بؤلگه‌سل گؤروشلرینی ده ده‌ییشدیردیرلر. تورکییه‌نین ایچ سیاستین قازانان اردوغان، اورتادوغونون (خاورمیانه) دا سون سؤزونو دئمه‌ک ایسته‌دی. آنجاق ایدولوژیک باخیشلارینا گؤره بیر چوخ متحدلرینی الدن وئریب، دیش(ائشیک) سیاستینده، بوتون دایاندیغی چرچووالاردان گئری چکیلمه‌ک زوروندا قالدی. میصردن باشلا سوریه‌دن عراغا کیمی بؤیوک اودوزانلارین سیراسیندا دایانانلارین بیریسی تورکییه اولدو. "عرب باهاری" دئدیگیمیز بوتون آختا دئوریملره ائگه‌منلیک ائتمه‌ک ایسته‌ین تورکییه، بو سیاستلری اساسیندا تورکییه‌یه قارشی یؤنه‌لیک چالیشان مئدیالار پروپاقانداسی آراجیلا ایچ چاخلانیشینا دا نَدن اولدو. و بو باشاری‌سیزلیق اردوغانین تورکییه‌نین ایچه‌ریسینده دیکتاتورجا داورانیشلارین، داها یوکسه‌گه قالدیردی.
بو نئچه ایلده اردوغان بیر چوخ ساحه‌لرده ده‌ییشیم‌لره ال قویموشدور. أن باشدا چؤزوم سوره‌جی دئییلن بیر گلیشمه‌یی اورتایا قویدو، بیر نئچه آنا یاسا ده‌ییشیک‌لیگی و حقوق آلانیندا دا ده‌ییشمه‌لره اوز گه‌تیرمیشدیر. سون دانیشیقلارینین بیریسینده " دیل دئوریمی"-نه قارشی چیخیب دیلی هدفه آلاراق " تورکجه ایله فلسفه یاپیلماز" سؤزونو اورتایا قویموشدور. آتاتورک قوران جومهوریتین اساسلارینین بیریسی اولان تورکجه‌نی رد ائدیب عوثمانلیجانی ساوونموشدور. و بئله ایفاده ائتمیشدیر کی فلسفه یاپماق ایسته‌ین یا عوثمانلیجانی دوزگون بیلمه‌لی دیر یادا اینگیلیزجه‌نی. بو اوزدن بو سؤزلره تپگی اولاراق بیر چوخ بیلیم آدامی و آکادئمیک اوزمانلار وریندن قینانیب ائلیشدیریلمیشدیر. "ائفدال سئوینجلی: دیل دئوریمی تورکجه‌یه مینلرجه سؤز(کلمه) قازاندیرمیشدیر " دئیه ایفاده ائدن تورک دیلی‌نین اؤیرتمنی "جومهمور باشخانی تورکجه‌نی یاخشی بیلمه‌ییر. تورکجه‌نی عربجه ایله قاریشدیریر آنجاق عربجه‌نی ده بیلمه‌ییر" دئمیشدی.
تورکییه‌نین فلسفه درنه‌گی وریندن ده تپگی‌لر گلدی و بو سؤزون اساس سیز اولدوغونو آچیقلادیرلار. آنجاق بیر نئچه بیلیم آدامی دا تورکییه‌‌ده واراولان بوگونکو تورکجه‌نی "آختا" دئییمی ایله ده‌یرلندیریب بیر ته‌هَر اردوغانا قاتیلمیشدیرلار. 
تورکجه آتاتورکون تاساریلادیغی یئنی جمهورییتین تمل‌لریندن بیریسی ساییلیر و سون 90 ایلده تورکجه دیل قورومو بودیلین زنگینلشمه‌سینده ده‌یرلی ایشلر گؤروب، آددیم‌لار آتماغا باشاریلی اولموشلاردیر. آنجاق بو دارتیشمالارا باخمیاراق اردوغان یئنه بو قونویا دا ایدولوژیک اولاراق یاناشیب اؤز اینانجلارینا آیقیری(ضد) اولان فلسفه پاپماق کیمی دئییمی اورتایا قویموشدور. نیه کی اردوغانین اینانجلارینا باخاراق "حیکمت" یئرینه فلسفه سؤزون قوللانیشی سؤزونون آرخاسیندا باشقا آماجینین اولدوغونو اورتایا چیخاردیر. اردوغانین فلسفه دردی دئییل هر هانسی آراجیلا اولور اولسون اؤز ایدولوژیک آماجی‌نی سونوجا وارماسی اؤنملی اولدوغودور کی بو اساسدا بئلنچی ایفاده‌لری اورتالیغا بوراخیر. 
فلسفه سؤیلملرینی اورتایا قویا بیلن بیر فیلوزوف (فیلسوف) اؤنجه‌لیکله یارادیجیلیق یاپماق ایسته‌دیگی دیلیی بیر دیلچی کیمی بیلمه‌گی گره‌ک‌لی دیر. نیه کی فلسفه دیلی‌ایله آنلاتماغا چالیشان فیلوزوف دیلی دوزگون بیلمه‌دیگینه گؤره یئرینده آخسارلیقلارلا راستلاشیب آنلاییش فرقینه وارماغا دا بیله، یؤنلمه‌ک زوروندا قالاجاغی قاچیریلماز اولاجاقدیر. دیلی آنلایان فیلوزوف یئره‌ل و ساوسال (فلسفی‌سل) یئنی سؤزجوکلری یارالدا بیله‌جه‌ک گوجونه یییه اولا بیله‌جه‌کدیر. اردوغانین بو سؤزلری تورکجه‌یه و تورکجه‌نین اوغروندا چالیشان شخص‌لر و قوروملارا بیر اویاری کیمی اولا بیلَر. نیه کی بیر چوخ دیلچی‌نین دئدیکلرینه گؤره دیلی دیلچی‌لر سؤزجوک یاراتماغیلان قورویوب ساخلیا بیلمزلر؛ بلکه دیلی کوتله قورویار. کوتله آراسیندا دانیشیلان دیل و باشقا دیللرله آل وئرده اولان دیل اؤز تمل قوراللارین و یاپیلارین قورویوب ساخلیا بیلدیگینده، او دیلین قورونوب ساخلانمیشدیر دئمه‌گینی ایدیعا ائده بیله‌ریک.

6/10/93
یازار: حامید مورسلی

  • حامید مورسلی

::: قیش یوخوسو؛ بیرئی‌سل‌لیک و اینسانلارین سئچیم‌لری :::

***************************************************************


" ویجدان گوجلولری قورخوتماق اوچون دوشونولموش، قورخاقلارین قولاندیغی بیر سؤزجوکدن باشقا بیر شئی دئییل‌دیر"

شئکسپیئر.

تورکیه‌لی یؤنه‌تمن "نوری بیلگه جئیلان"-ین "قیش یوخوسو" آدلی سون فیلمی اینسانلارین بیرئی اولاراق آلینماق پئشینده اولدوقلارینی گؤزه‌لجه‌سینه تصویره چکیب‌دیر! اینسانلار اؤز یئته‌نه‌کلرینه یییه اولدوقلارینا باخمیاراق باشقا آلانلاردا آلیندیقلاری اوچون اؤزلرینی اورالاردا ایرضاء ائتمه‌کده‌دیرلر. آنجاق بو یئنی آتدیم آتدیقلاری یولدا باشاریسیز اولدوقلارینا باخمیاراق آتدیم آتمالارینی اؤنه‌سوردورولر ! "آیدین" آدلی باش کاراکتئر 25 ایل تیاتروچو اولدوغونا رغمن بیر یئره‌ل و آز سایدا اوخوجوسو اولان قازئته‌ده یازماغی سئچیر، بوردا خاقانلیغی بؤیوک قازئته‌لرده یازماغا ترجیح ائدیر! بو آرامانچیلیق اساسیندا قوردوغو، یازان کاراکتئر، آز سایدا اولان آلدیغی تپکی‌لره تام آنلامیندا دئسه‌ک فخر دویوب اونو دا باشقالارینا بیر فخر کیمی ساتیر. آنجاق اؤزونو یازدیقلاریندا یانسیتاماییر، تام باشقا بیر کارکتئر کیمی یازیر، اؤزو یاشادیغی یوخسول و زنگین دارتیشماسینی یازیلاریندا دئمک بیر آرمانچیلیقلا قلمه آلیر، جیبیندن پول پارا خرجله‌ییر و اؤزونه محبوبیت قازاماق ایسته‌ییر، تام آنلامدا آلینماق ایسته‌ییر. آنجاق بو آلینماق آماجینین لاییقی اولدوغو اوزدن قازانمیر، پاراسیلا آلیر! بوتون بوشلوق دویدوقلارینی پارایلا الده ائدیر، اؤرنه‌گی هوتئلینه آت آلماغی. فیلمده گئدن باشقا کارکتئرده بیرته‌هر بئلنچی دوروملاریلا یاریشماقدادیرلار، آیدینین سوروجوسو "هیدایت" آیدینین سوروجوسو اولدوغونا گؤره اؤزونو کاسیبلاردان آیری بیلیب یئرینده "اربابین مالی چیخار؛ نؤکه‌رین جانی" دئییلن آتا بابا سؤزوموزون تام آنلامینین گؤسترگه‌سی اولور، آیدینین خانیمی نیهال، اؤزونو بیر خئیریه قورومون گوجویله ایرضاء ائدیب بوشلوقلارینی دولدورماق ایسته‌ییر، "لئونت" خئیریه قوروپون باشچیسی و بیر چوخ باشقا کاراکتئرلر. تام فیلیمین آدیلا اویغون دئسه‌ک هر کس بیر ته‌هر قیش یوخوسوندا یاشاییرلار و ان آجیسی بودور کی هئچ بیریسی باشقاسینی سئویب سایقیلا آنماق ایسته‌مه‌ییرلر. هر کس اؤز ایچینده یاشاییر، هر کس اؤزونو دونیانین ان یاخشی اینسانی گؤسترمه‌ک ایسته‌ییر.
بو بئنی دونیادا ویجدان و اینسانلیق سادجه سنین باخدیغین آچیدان اؤنملی دیر؛ باشقالارینین یوزوملارینین بیر شاهالیقدا بیله ده‌یه‌ری یوخدور! اینسانلار بیله‌ره‌ک اؤزلرینی یوخویا ووروب اؤز توخودوقلاری تورلاردان چیخماق ایسته‌مه‌ییرلر !


آنجاق قیش یوخوسو اؤلمه‌ک دئییل دیر کیمی آنلامیندادیر، هر بیر قیش یوخوسوندا اولان فرد اویانماق اولاسیلیغینی دا داشییر.نئجه کی آیدین سونوندا باجیسینین، یولداشینین و هوتئلینده اولان موتورچو موسافیرین سؤزلرینین ائتکیسینده بیر آرا اؤز ایچینده دولانیب دارتیشدیغیندان سونرا سون سئچیمینی سئچیب و اؤزو اولماق ایسته‌ییر ؛ ائوینه دؤنوب، خانیمی نیهالی سئچیب، تورک تیاترو تاریخینی اؤزو اوزمانی اولاراق یازماغا باشلاییر! (اؤزگه‌له‌شمه‌دن اؤزله‌شمه‌گه دوغرو).

بو فیلیمین دئمه‌ک ایسته‌دیگی تمل سؤزونو اساس آلاراق تورکلرین ایراندا اؤزگه دوشونجه‌لری سئویب اونا قولوق ائتمه‌کلری اوغروندا دارتیشماسی قونوسویلا ایلگیلی اولوسال سه‌وییه‌ده بیر چوخ اولقولو قانیتلار گَتیرمه‌ک اولار ؛ ان تملی منجه مدرنیته‌نین گلیشیمی و گئنیشلنمه‌سی ایله ایلگیلی دیر؛ تام توپلومون آیدین بیرئی‌‌لرینی آراشدیرماقلا بو قونویا یاناشمالییق منجه. هر بیر قلم یییه‌سی و آیدین دوشونجه‌لی بیرئی اؤز ایچینده آلینماق آختاریر، اوخونولوب، دوشونولوب و اونون یورومو باشقالارینا ائتکی بوراخماسینی گؤرمه‌ک ایسته‌ییر! بو مسئله یئنی اؤزگه‌له‌شدیریجی و اؤزگه‌سئورلیک سیاست‌لریله اوست اوسته دوشنده سؤز قونوسو اولان بیرئی کیملیک باخیمیندان چؤکولوب باشقا کیملیکلری ساوونوب اؤزونه یاراشدیرماق ایسته‌یه‌جه‌گی قاچیریلماز اولاجاق ! نئجه کی بیزیم آیدینلاریمیزین باشینا بئلنچی بیر اویون گلدی و بیز چاغداش تاریخیمیزده بونو آیدینجاسینا گؤردوک و ایندی ده گؤروروک البته!

  • حامید مورسلی