قورخورام
قورخورام؛ قورخورام؛ قورخورام
♤■♤■♤■♤■♤■♤■؛
نئچه گون اؤنجه دوستوملا بیرلیکده آددیملاییردیق، اوزاقدان ایکی نفرین یاخالاشماسی، اؤتهیاندان بیریسینینین ساققالا سؤیوش دئمهسی ایلگیمیزی چکدی. آنجاق اوْ'گون بیز قیراقدان سوْوشاراق "گوندهکی آتیشمالارا تای بیر شئیدیر دئیه یانلاریندان سایمازجاسینا کئچدیک. اوْنلار آیریلمیشدیلار، آنجاق بیریسی اوْبیریسینین ساققالینی سؤیوشه باغلامیشدی. اوْ بیریسی ایسه الدن قورتولوب قاچماق ایستهییردی.
آداما بئلهگلیردی سؤیوشدئیهنین یانیندا اوْلان خانیمینا بیر سؤزمو دئییب؛ ساققاللی اوْلدوغوندان دوْلایی بو دا اوْنون ساققالینی سؤیور.
آنجاق دونن، آخشام بازاری، اؤزوم بیر ایلگینج اوْلایی تجروبه ائتدیم. ایلگینج یانی بوراسیندایدی، همین اوْ گون سؤیوش ائشیدن آدام منه ساری بیر کاغاذ تیکهسی توتدو. من آلماق همن، اوْ قاچدی. بیرآن الیمدهکی کاغاذا نظر سالدیم. همین شکیلده اولان یازی ایدی. آرخاسیجا باخدیم ائله گئدیردی سانکی بیلهسین قوْوالاییردیلار. سانیرام اورهیینده سئوینیردی ده. ائله بیل بیر اؤنملی پیلانی یئرینه یئتیرمیشدی. ایشی بیتیرمیش سرمست ساواشچیلار کیمی گؤزدن ایتدی. بیرآن بئینیمده اینفیجاری دوزاق دوزنلهمیش ترورچولار جانلاندی. بوْمبالاری پاتلارکن "اللهواکبر" سوْلوقانلارینی سسلندیرن داعش و القاعده ترورچولارینا بنزتدیم بیلهسین. سانیرام اؤزونو بو یوْلون ساوچیسی بیلن همین آدام دا، اوزاقلاشاراق اورهیینده همین شوعاری سسلندیریردی. نه بیلیم.
ایش یئریمده بیر امکداشیم وار. شهید بالاسیدیر. آتاسی ایران عراق ساواشیندا شهید اوْلماییبدیر. "جنگ"دن سوْنرا عایله اوْلاراق پارکدا اوْتورمایا گئتمیشایمیشلر. آنجاق بو کاغاذی وئرن اینسانین دوشونجه تؤرهسیندن اوْلانلار، "بیز چکهبیلمهریک اینسانلار عاییلهلری ایله بیرلیکده پارکدا دئییب گولهلر" دئیه اوْنون عاییلهسیگیل اوْتوران یئره بیر نارنجک آتیب قاچیرلار. سوْنوجدا آتاسی اؤلوب بالاجا باجیسی یارالانیر و...
بلکی اوْ دؤنه بو کاغیذی وئرسهیدیلر عادی گلردی بیلهمه. آنجاق دوغروسو دونن دوْنوب قالدیم بیر یئرده. منجه بئلنچی بالقوه آشیریلارین، داعش، بوکوحرام و القاعده کیمی بالفعل اوْلموش آشیریلار ایله هئچ فرقی یوْخدور. اؤزلرینی اینسانلارین اوْ دونیاسینا قیوم سانانلار. اینسانلاری زوْر گوجویله اوْلموش اوْلسا بیله جننته آپارماق فیکرینده اوْلانلار، هامیدان چوْخ اینسانلارین اؤزل و شخصی حریملری اوْلان دین آنلاییشلارینا ضربه وورورلار.
بیلمیرم بلکی بیر سیرالاری بونون آدینی "امر به معروف و نهی از منکر" قوْیالار، آنجاق من بونو خصوصی حریمه تجاوز کیمی آلقیلاییرام.
اولو شاعیریمیز میرزه علی اکبر صابیر دئمیشکن: هاردا موسلمان گؤرورم قوْرخورام...
- ۹۴/۱۲/۲۳