آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

سون گؤندری‌لر
سون یوروملار

۱۸ مطلب با موضوع «آنی‌لار» ثبت شده است

قورخورام؛ قورخورام؛ قورخورام

♤■♤■♤■♤■♤■♤■؛


نئچه گون اؤنجه دوستوملا بیرلیکده آددیملاییردیق، اوزاقدان ایکی نفرین یاخالاشماسی، اؤته‌یاندان بیریسینی‌نین ساققالا سؤیوش دئمه‌سی ایلگیمیزی چکدی. آنجاق اوْ'گون بیز قیراقدان سوْوشاراق "گونده‌کی آتیشمالارا تای بیر شئی‌دیر دئیه یانلاریندان سایمازجاسینا کئچدیک. اوْنلار آیریلمیشدیلار، آنجاق بیریسی اوْبیریسی‌نین ساققالینی سؤیوشه باغلامیشدی. اوْ بیریسی ایسه الدن قورتولوب قاچماق ایسته‌ییردی.

  • حامید مورسلی

"آیریلارمی کؤنول جاندان؟ آذربایجان آذربایجان"


بوگونو اونوتماق اولماز، ان آزی بیز بوگونو اونوداسی دئییلیک.

 

بیرینجی ائپیزوت:


 آخی بئلنچی بیر گونده قاراداغ اؤلکه'سینه، اؤلوم مله'یی یئر ترپنمه آراجیلا حوزون، یاس، آیریلیق، یالنیزلیق، یئتیملیک، چوخاسینی سریب گئتدی. آییردی آنانی کؤرپه بالادان، آروادی اریندن، سئوگیلی آداخلی'لاری بیری بیریندن. نئجه ده کوبوتجاسینا، رحمسیزجه'سینه بوایشی گؤردو. آنجاق کؤنلوموز فله'یین وئردییی بلاسینا گؤره یارالانسادا پارچالانمادی.

  • حامید مورسلی

اوشاغیدیم؛ کندیمیزده ایکی نفرین یئرلرینین مرسی(مرزی) اوُسته سؤزلری چیخمیشدی ، بیری دئییردی او آغ داشدان بویانا منیم دی اوبیریسی دئییردی یوخ او نوواخدان بویانا سنین دی . بو آرادا سؤزو گئدن یئرین دوزگون قورقوشوملو سندی ده یوخودو بللی اولا کیم دوز دئییر کیم‌سه او بیری‌نینی حاققینی پوزوب اونون یئرینه و امه‌یینه یییه دورماق ایسته‌ییردی!

  • حامید مورسلی

گؤیلومدن گئچدی بیر نئچه سطیر أسکی آنی‌لاریمدان یازام smile ifade simgesi

اول(بیرینجی) کیلاسین آنیلاریندان

اول کیلاسینا گئده‌جه‌یدیم، آجانیم(آتام) بیله‌مه قیلاسه باشماق و قره کت شالوار آلمیشدی. مندن اؤنجه‌کیلر یالان اولماسا قوروت بلله‌سیله بویا باشا چاتمیشدیرلار. آمما دا من آنادان اولاندان بری دئیه‌سن دوروملار آلا-قولای جورله‌نمیشدی و داها اوگئچمیشده‌کی‌لر کیمی دئییل دیر. یئنی دوندوروجو (یاخچال) و بیر 14 اینچ آغ قره "پارس" تیلویزیون دا آلا بیلمیشدیک. البتده بونلارین هامیسی مندن یاش یاریم بؤیوک اولان باجیمین آیاغینین برکتلی و اورزولو (روزیلی) اولدوغونا یازیلمیشدی و بوتون ایقتیصادی گلیشمه‌لرین ندنی اونا حصر اولموشدو.

  • حامید مورسلی

سون اومود

دئییردی سحر یئددی دن گئجه ساعات اووچه کیمی کشتارگاهدایدیم؛ اوردان دا گلیب ایکی ساعات هوشلانیب دان یئری سؤکولمه‌میش ائشیگه وورموشام. هله آللاها مین آیه شوکور منیم بو ماشینیم وار؛ هله جاوانام ایشله‌یه بیلیرم. تکی بو میراثا قالمیشین دا خرجی اولماسایدی. آنجاق اوشاقلاریمی درس اوخویولار؛ اونلارین خرجلرین تاپمالیام. اونلار موطلق اوخومالیدیلار.

دئییردی 80 نفر ایشچیدن، 50 نفر قارا فهله‌ییک، گونه‌موزد ایشله‌ییریک؛ ایش اولاندا ایشله‌دیرلر ایش اولمایاندا دئییرلر خوش گلدیز! تازا ره‌ییسیمیز ده تئهراندان گلمه‌دیر. "ائله آغاجی اؤز ایچیندن قورد یئیه‌ر دئمیش‌‍لر-دئییر! سوروشورام نئجه به‌یه؟

  • حامید مورسلی




ایکی آیاقلی، جانلی اولاراق اینسان آدلانانین وارلیغی‌نین بینئوره‌سی دوز اولماسا، دوشونجه‌سی دوغروجا بیچیملنمه‌سه، یاشاییشیندان اوماجاقلاری بللی اولماسا، اینسان حاقلارینا دیلده دئییل عملده سایقی دورماسا، ماکیاوئلیستی دوشونجه‌لرینه یییه‌له‌نیرسه ، آشیری شریعت‌چی یا آشیری آتئیست اولورسا، بیر گوج ألده ائتدیکدن سونرا سادجه بیرئی‌سل عقده‌لرینی قاباردیب و سادجه اونلارین اولاشیلماسی اوغروندا چالیشماغی اولورسا، منافع أسینتیلری هانسی یؤندن أسیرلرسه او یؤنه ساری اوز دؤنده‌ریرسه، آلینماق دردینی چؤزمک اوچون هرهانسی قاپینی چالیب اورایا سیغینماقدان واز گئچمیرسه، اخلاق قوراللارینی اؤزونو گووه‌نلی ساندیغی یئرده آیاغی آلتینا آتیرسا، یاشامیندا یاشاماغینا بیله فلسفه‌سی اولمورسا، دالغالار اوزه‌رینده چؤپ کیمی، کؤپوک کیمی بوردان اورایا، او داشدان اوبیریسی داشا چیرپیلیب، بو ألدن او آغیزا قالیب، سونو بوشلوق، یوخلوق، ایزسیزلیک کیمی‌یه چاتیب، سانکی یوخموش کیمی دورومونا یئتیشمه‌سی قاچیلماز اولاجاقدیر.

  • حامید مورسلی

حامید و ناغیللاری :D


دونن آتام و قارداشیملا بیرلیکده چؤلوموزده ایشله‌ییردیک، او "بوببو و بالالارینین" ناغیلینا تای  بیز ده هر یئره گئتسک بیر سورو چؤزولمه‌میش مسئله‌لریمیزدن دانیشماغا باشلاریق و یازیلمامیش گؤرَو یاسامیزی یئرینه یئتیرمک آماجیلا هر کسیله دارتیشماغا گیریب بحث ائده‌ریک!

 آنجاق من ده آتاملا بیرلیکده اولدوغومدا گؤره، اونونلا گونده‌کی کیمی باشلامیشدیم بحثه و "نیه"لری بیر بیریسینین اوجونا دویونله‌مه‌یه! ائله همین حالدا آتاما 2050دن بیر ساو (مئساژ) گلدی؛

آتام باشلادی اوجا سسیله هؤججوله‌یه هؤججوله‌یه اوخوماغا:


" آموزش تورکی آذربایجانی

Türkcə yazaq

Türkcə oxuyaq

و ... "


ایشی بیلجک تئز موبایلینی جیبینه یئرلشدیره‌رک ؛ " اوغلان بو همراه اووله‌ده نفوذ ائله‌ییب‌سیز ها!" دئدی !

من ایسه آز گتیرمه‌ییب قاققیلدایاراق؛ "هله هاراسیدی ایشیمیزین اوولیدی " دئدیم!

(بیر ایل اؤنجه‌یه عایید دیر)

  • حامید مورسلی

:::::چیلله گئجه سی:::::

بو گئجه چیلله گئجه‌سی‌دیر؛ چیلله گئجه‌سی ایلین لاب اوزون گئجه‌سی ساییلار. بو گئجه‌نی تورک‌ ائللری، اؤزللیکله آذربایجان تورکلری بیر گله‌نه‌ک‌سل (سنتی) دَب اولاراق قوتلاییب بیرلیکده جشن توتارلار. نیسبی اولاراق هر هانسی یئره، مدرنیته آیاق آچماییبدیرسا او یئرلرده بو گله‌نه‌ک‌سل دَبلرین اؤزگونلوگو (اصالت) قورونوب ساخلانمیشدیر. ایللر اؤنجه هله اینسالارین اؤز یارانمیشلاری اؤزونه لوتولوق ائده‌بیلمه‌دیگی زامانلار بئلنچی گئجه‌لر هر کسین وریندن قارشیلانیب قوتلاناردی. ایندیکی کیمی دئییل دیر کی تیلویزیون، موبایل، اینتئرنئت و بونلارا بنزه‌ر ایلگیلنمه‌ک آراجلاری اینسانلارین هر بیر ایشلرینه و یاشاملارینین بیر چوخ ساحه‌لرینه ائتکی بوراخیب، اونا أنگل اولمامیشدیرلار.

بو گونلر هامی قارپیزدان و چیلله گئجه‌سینین آیریلماز حیسسه‌لرینین بیریندن یازیب اونون آدی و نیه‌لیگی حاقدا بیلگی‌لر وئریرلر. من اؤزوم دئمک اولار بیر سنتی و کند چئوره‌سینده بویا باشا چاتان بیر آییله‌دن اولدوغوم اوچون آز دا اولموش اولسا کئچمیش و ایندی چوخ آز گؤرونن گونلری تجروبه ائتمیشم. چیلله کئجه‌سینین أن تملی، دئمک تندیرلی کورسونون اولدوغونو ایدیعا ائده بیله‌ریک. طایفا اولاراق کیچیک‌لر، اوشاقلار ، نوه‌لر و نتیجه‌لر بؤیوک آنالار و بابالارین ائولرینه ییغیشیب کورسونون تووندا أیله‌شیب بو اوزون گئجه‌نی بیرلیکده دئییب گولمه‌کلرله سحره چاتدیرماق ایستردیرلر. بؤیوک بابالار اؤیود وئریب آغ بیرچه‌ک آنالار ناغیللار دئیه‌ردیرلر؛ کیمیسی گولمجه دئییب کیمیسی ایسه تاپماجالار دئمه‌ک‌له زامانین نئجه سووشدوغونو بیلمه‌گه أنگل اولاردیرلار. هئچ کیمسه‌نین باشی الینده‌کی جئب تئلئفونوندا اولمازدی. اینسانلار تام اوره‌کدن اولاراق بیر بیریلرینه یاخین ایدیرلار؛ بئلنچی اورتاملارین أن تمل قورالی بؤیوک‌لرین سایقیسینی ساخلاییب اونلارلا احتیرامیلان داورانماق ایدیر.


بئلنچی بیر گئجه‌ده بؤیوک آنالار دولما دولاردیرلار، و تندیرین ترکینده بیر شاققاباغی (کدو) پیشمه‌ک‌ده اولاردی. من اولان یئرلرده قارپیزدان چوخ یایقین اولان یئمه‌لی ائله همین بو شاققاباغی ایدیر. تندیرین سازاغی ایله پیشمیش شاققاباغیلارین هله ده کی وار دادلاری داماغیمدادیر. شاققاباغینی آزجا شکره یاتیرتدیکدان سونرا یئیه‌نده، دادی نئچه قات اولوردور. شاققاباغیلا ائلچی گئدردیرلر بئلنچی گئجه‌لرده. اوزوگو (انگشتر)، بزه‌نمیش شاققاباغینین ایچینه یئرله‌شدیریب، یئنی کوره‌کن‌لر، قایناتاسی گیله قوناق گئدردیرلر. 
بو اوزون گئجه‌نی ائلجه دئییب گولوب میرتلاشاردیلار سانکی دونیادا هئچ بیر درد غملری یوخموش کیمی ایدیرلر. آرادا فامئلده بیر دنه قاچاق "ویدیو" دستگاهی دا اولسایدی او گئجه‌نی مین بیر موکافاتیلا، بیر فیلمه باخاردیرلار و اولدوقجا او بیر فیلمدن لذت آلاردیرلار. دوغرودور کی گئنل اولاراق او چاغلارین یاشام طرزی اوست اوسته چوخ آغیر ایدی آنجاق اینسانلار آز فورصت‌لردن اولدوقجا لذت آلابیلیردیرلر. 

دئمه‌ک اولار سون 15-20 ایلین ایچینده آذربایجان توپلومو و بلکه ایران بؤیوک ده‌ییشیکلیک‌لره و دئویرمه‌کلره راستلاشیب‌دیر و یئنی نسل ایله او چاغلارین اینسانلارینین آرالاریندا دا دَرین خنده‌ک‌لر (خندق) یارانیب‌دیر. و بئلجه‌ اولوب‌دور کی گئنل اولاراق وورغولادیغیمیز مئدیا بو یارانمیش خنده‌کلردن اولدوقجا یارارلانیب و بو آیریشمالاری یؤنه‌لدیب یئنی و تام فرقلی باخیش آچیلارینا یییه اولان اینسانلاری تؤره‌دیب‌دیر. بو یئنی نسلین سئلئبیریتی‌لری، ایسته‌ک‌لری و پئشینده اولدوقلاری آماجلاری یئنی مئدیا قورومونون چئشیدلی آراجلارینین گوجویله تام فرقلی اولوب‌‍دور. یئری گلنده کئچمیش نسلین دوشونجه‌لری و نه‌یی الده ائتمه‌ک ایسته‌دیکلری اوغروندا ووروشمالاری بلکه اونلارا ایلغیم گَلیب بو اوزدن اونلاری مسخره ائتمه‌ک توزاغینا دا سالا بیله.

30/09/93 حامید مورسلی

  • حامید مورسلی

کتدی‌لیک، من و سون گونلر گؤردوگوم ایدولوژیک دارتیشمالار

********************************************

من بیر کتدی یم؛ همده یئرلی کؤکلو کتدی ؛ آنلیم آچیق اولاراق بیله‌گیمین چؤره‌گین یئیه‌رم. دئیه بیله‌رم بوتون دویغو قایناغیم، سؤز داغارجیغیم، یاشام طرزیم ، تام آنلامدا دئمه‌ک ایسته‌سم: وارلیغیمی اورادان منیمسه‌ییب گؤز آچیب ایلکه‌لریمین دوزه‌نین دوزه‌نله‌میشم. 

کند منیم اوچون بیر دالدالاناجاق، سیغیناجاق، گووه‌نمه‌ک یئری دیر. کندیمیزده گووه‌ندیگیم اینسانلار وار، دوشونجه‌لی اینشانلار، قانان اینسانلار،چیخارلی اینسانلار بونا باخمیاراق کی کتدی‌دیرلر، ساوادسیزدیرلار، یاشلی دیرلار، مدرنیته ایلیشگی قورما دستگاهلاریلا تانیش اولمایا بیله‌ بوتون اینسانلاری سئویرلر، اینسانلاری اولدوقلاری کیمی آنلاییرلار. سایقیلی و بیلگین اینسانلارا اولدوقلاری قده‌ر ده‌یر وئریرلر؛ اینسانلارین کیم اولدوقلاری، یاشلاری نئچه اولدوغو ؛ هانسی تؤره‌مه‌دن- طایفادان اولدوقلاری؛ وارلی یا وارسیز اولدوقلارینا دئییل دوشونجه‌سی، آنلاغی و چئوره‌لرینده‌کی اینسالارا یئتیردیکلری یاردیملارلا یوروملاییب لاییق اولدوغو یئرده کیمی قالخیزارلار. 

آنجاق نه یازیق کی هابیل اولان یئرده قابیل‌ده کسینلیکله تؤره‌نه‌جک؛ بوتون سایدیغیم اؤزللیکلردن قات قات چیرکینینه یییه اولانلاردا وار، قارنی زیغلی‌لار، دیل آجی‌لار، دوشونجه‌سین گلیشدیرمه‌یه‌نلر و او گلیشمه‌یش دوشونجه ایله‌ باشقالارینی قیضاوت ائدن‌لر ده وار ! نه یازیق کی سایلاری اؤنجه سایدیقلاریمدان قات قات- دا یوخاری‌دیر! 

نئچه ایل اولار بئلنچی قونولارا فیکیر وئریرم؛ بو گونلر سانال اورتاملاردا دا بئله اولوب اینسانلارین قاباریق، چیرکین و کوبوت اوزلری داها چوخ گؤزه چارپیر. سیاست قونوسوندان گونده‌لیک داورانیشلاریمیزا کیمی بیر اینجیدیجی مونولوق، اؤزونو حاق سانیب باشقاسینی جهنمین اورتاسینا دوغرو گئتدیگینین فرقینده اولماقلیغی دویانلار، غرور، قضاوت، کوچه باجا ساواشلاری کیمی دسته کئشلیک، حاقدان یانا یوخ منافئعدن یانا اولماقلیق، منیله اولمایان اولمامالی‌دیر کیمی سونوجلانمالار کیمی چیرکین داورانیشلار دا داها چوخ گؤزه چارپیر.

منجه هر بیر دیالوقون یارارلی سونوجلارا دوغرولانماسی‌نین ایلکه‌سی دئمک اولار اخلاق قوراللارینا دایاناراق قارشی طرفله سایقی‌ایله داورانماقدیر. هر کس اؤز ایچینده‌کی داعش صوفتلیگی بوغوب باشقاسینین بوتون یییه اولدوغو حاقلارا توخونمامالی‌دیر کی هئچ اؤز ویجدانی‌نین محکمه‌سینده اولموش اولسادا بئله اؤزونون سوچلامالی‌دیر. حذف، شانتاژ، یالان ؛ ایفتیرا، اخلاقسیزلیق و بونلارا تای چیرکین توتملر ارادان قالدیریلمیش دورومدا اولمالی‌دیرلار یوخسا چوخ راحاتجاسینا داغیلماق و محو اولماغا اوغراشماق قاچیریلماز اولار.

هر بیر شخص اینسان فئونومنینین ده‌یرلری و چیخارلارینی منیمسه‌ییب اؤزون اونلارا لاییق دوروما چاتدیرا بیله‌جک قده‌ر اولا بیله‌ر؛ سادجه اؤزوندن باشلامالی‌دیر، اؤزو اولمالی‌دیر، اؤزویله ساواشیب اؤزونو بیلیم، اخلاق، سایقی و اؤزونون فلسفه‌سینین یاراقلاریلا یاراقلانمالی‌دیر. بئلنچی اؤزه‌ل بیرئی‌لر بسلندیکدن سونرا اونلارین یاشادیقلاری چئوره و آتموسفئرده اونلاردان ائتکیله‌نه‌رک بؤیوک بیر گلیشمه‌یه دوغرو گئده‌جه‌گینه دریندن اینانیرام.

ح. م - گئجه یاریسی 21 آبان 93

  • حامید مورسلی

قارا باسدی  /  ح . م


گؤزلریمی آچا بیلمیرم، سانکی قارا لچه‌ک‌لی "خالاسی‌آغزی‌پوخلو" کیرپیکلریمین اوستونده باغداشین قوروب. گؤزلریم آچیلماسین دئیه یئته‌ری قده‌ر گؤزلریمی اووچالاییب آغیرلیغین سالیر ائله‌بیل. اؤزومو اؤلومله دیریلیگین اؤرتاسیندا حیس ائدیرم. هئچ بیلیمرم یوخودایام یوخسا اویاغام. دونیا باشیما فیرلانیر؛ باشیمین اوستونو قارا بولوتلار چولغالاییرلار. کوللوکده چؤنبه‌لمیش یئتیم اوشاغی کیمی اؤزومو بیر اوجا بویلو دووارین اؤنونده دویورام.

بیرآن صحنه ده‌ییشیلیر. قارا بولوتلاردان آغ-آپباغ قار یاغماغا باشلاییر. یئنه منده گووه‌ن یارانیب اومودله‌نیرم. گؤزلریمین اوزیندن او چیرکینین گئتمه‌سینی حیس ائدیرم. گؤزلری آچماغا چالیشیرام؛ سول گؤزومو مورگوله‌یه‌ن بیریسی تک یاریمچیلیق اولموش اولسادا آچماق ایسته‌ییرم.

بیرآن آشپازخانادان سومورجونون (هود) ایشه‌دوشمه‌ک سسیله اؤزومو یئنه قاراباسمیش‌لار کیمی قارانلیغینین سونو بللی اولمایان بیر صحرادا دویورام. دؤرد دؤوره‌مده هوندور فیرتینالارین منه ساری گلدیکلرینی گؤرورم ! قاچماغا باشلییرام ؛ اؤزومو فیرتینانین آغزیندان قورتاریم دئیه تام قارانلیغین اورتاسینا تپلیرم. گؤزلریمین یومولو اولدوغونا باخمیاراق سوموروجونون سسی، هؤویشنه وئریجی بیر متن موسیقی‌سی کیمی هله ده کی وار قولاقلاریمدادیرلار.

بیرآن آنام سوموروجونو سؤندورور؛ یئنه دئیه‌سن اؤز الیمده اولمایاراق سول گؤزومو آچیب آچمامیش کیمی اولورام . ساغ قولوم آلتیمدا قالدیغینا گؤره کئریدیغینی دریندن دویورام ، اونون کئریمه‌سینه انگل اولوم دئیه قیچلاریمی اوزادیب  دابانلاریمی سؤنوب-سؤنمه‌میش کیمی اولان پونجا دایاییب الیمی زوران-گوجه‌ن آلتیمدان چیخاردیب سول بؤیروم اوستده چؤنوب یئنه گؤزلریمی یومورام.

لیم-لیم یانماقدا اولان پونجون سیجاقلیغینی(ایستیسینی) حیس ائدیرم، یاغی اریه‌ن بیریسی کیمی دابانلاریمی داها سیخ  اولاراق پونجا داییریرام. ایچیمدن بو دویغونو چوخ سئویرم. سیجاقلیق چوخالدیقجا اؤزومو فیرتینانین آغزیندان قؤپموش بیر یانار‌داغین (ولقان؛ آتش‌فشان) پوسکورتوسونون اؤزه‌رینده دویورام.

هر یئر قارالیر؛ دابانلاریمین یاندیقلاری سانکی سوموکلریمه بیر چوالدوز سوخورلار، ایکی قیچیمی‌دا آنیندا پونجون اوزه‌ریندن اوزوره‌م.

یاریم اویاق- دابانلاریمین سیزیلتیسینی دوشونه‌رک " مئساژین وار" سسی‌ایله ایکی گؤزلریمی‌ده آچیب؛ هوزمویلن (توولو) جئب‌تئلئفونوما ساری چؤنورم. الیم موبایلیما ساری گئده‌رک، اؤز اؤزومه دئییرم، به پیسلیک توتمیاسان هارداسان به ، آخ منی قارا باسدی سنسیزلیکدن.
 مئساژی اوخوماغا باشلییرام:

" سئوگی گؤزومدن دوشدو ؛ سن گؤزومدن دوشه‌ن زامان"

ایستر ایسته‌مز, سانکی هئچ اؤز الیمده دئییل، تئز گؤزلریمی یومورام ؛ قاراباسدیم یوخوسون گؤرمه‌ک ایستیرم ؛ آنجاق هر یئر داها ، سادجه قارانلیقدیر ، سینیرسیز بیر قارانلیق !

خزل آیی‌نین26-سی 1393

  • حامید مورسلی