آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

سون یوروملار

آلوْولار (Incendies (2010

چهارشنبه, ۱۶ آبان ۱۳۹۷، ۰۳:۲۳ ب.ظ

آلوْولار (Incendies (2010


فیلم کانادا اۆره‌تیمی‌دیر. یؤنتمنی «دنیس ویله‌نوْو»، اوْیونچولاری ایسه: لوبنا آزابئل، ملیسا دسورمکس پولین، ماکسیم گاواده و...

«آلوْوولار» یا تۆرکییه‌ده «ایچیمده‌کی یانغین» آدلی ایله چئویرلن فیلم، آدی قدر بؤیۆک بیر یانغین یارادیب ایزله‌ییچینی ایچیندن یاندیریب، داغیدا بیلر قدر بیر آجی فیلم‌دیر. آچیقجاسینا دئمه‌لی‌یم بو فیلمی ایزله‌دیکدن سوْنرا گؤز یاشلاریمی ساخلایا بیلمه‌دیم. هم ده اوجادان هایخیرماق ایسته‌ییردیم. بوْغازیم بیچیلمیشدی آنجاق. بیر ایزله‌ییچی اوْلاراق ایچیم آجیشمیشدی. سانکی فیلمده اوْلان یانغینین قیغیلجیملاری اۆره‌ییمین باشینی نیشان آلمیشدیلار.

ژان ایله سیموْن، نوال مروان آدلی یئنیجه حیاتینی ده‌ییسمیش بیر قادینین ائکیز تای اوشاقلاری‌دیرلار. ژان ایله سیموْن بیر یئرده آنالارینین وصیت کاغاذینی اوْخوماق اۆچۆن حاضیر اوْلورلار. آنلارینین وصیتی ایکی چئشیدلی مکتوبدان عیبارت‌دیر. بو مکتوبلار ژان ایله سیموْنو کئچمیشه باغلاییر. آنلالارینین وصیتینه گؤره اوشاقلار بیر سیرا تیتره‌دیجی گئرچکلری بیلمک اۆچۆن اوْرتادووْغودا بیر اؤزل یئره گئتمه‌لی اوْلورلار.

بو سفره چیخماق آنالاری نوال حاقدا بیر چوْخ کئرچکلره ایشیق توتور.

ناوالین یئرینده اوْیونچولوق ائدن لوبنا آزابئل گئرچکدن مۆکممل بیر اوْیون سرگیله‌ییب‌دیر. شیت-شنگول بیر بالاجا قیز اوْلان ناوال، بؤیۆیۆب بیر سیاسی، باریشچی، بیر مدنی فعالا دؤنۆشۆر. دۆستاغا دۆشۆر و...

فیلم ۱۹۸۲ده لبنان خالقینین، مسیحی گۆج‌لرین فیلیسطینلی سۆرگۆنلره وئردیکلری عذابا گؤره چکدیکلری آجی‌نی ریوایت ائدیر. بۆتۆن بو کوْر تعصوبلارا قارشی اؤز اصوللاری ایله یاشاماق ایسته‌ین ناوالین باشینا گلن اوْیونلار آلوْولار فیلمینی داها ده‌یرلی داها گۆجلو ائتمه‌سینه یاردیم ائدیب‌دیر. بو ایکی باجی قارداشین گئرچه‌یی آختاریشی دیراماتیک و آجی اوْلسا دا، سوْنوندا آنالارینین درین کاراکتئرینی اوْنلارا تانیتدیر.


 فیلم «وجدی معود» آدلی لبنان کؤکنلی کانادالی بیر یازیچی‌نین حیکایه‌سیندن آلینیب یاپیلمیش‌دیر. دنیس ویله‌نوو اینسانی ایچه‌ریدن تیتره‌ده بیله‌جک بیر قوْنویا ال قوْیموشدور. فیلم ایزله‌ییچی‌ده باشدان باشا سوْرو یارادیر. هم ده بو سوْرولار، فیلم قاباغا گئتدیکجه داها درینله‌شیر.

قورو تعصوبلار حاقدا اوْلوشدورولموش بو فیلم بیر اینسانین یاشام حاققینین آلینماسینی تصویره چکیر، نفرت‌دن دوْلو یاشام ایلیشکی‌لرینی تکجه سئوگی آچاری ایله آچیلاجاغینا اوستاجاسینا ایزله‌ییچی‌لرین گؤزلری اؤنۆنه سریر.


آلوْولار فیلمی بالالارین آنالاریلا کئچمیشده‌کی دیراماتیک بیر ناغیندان دوْلایی ایلیشکی‌لرینین ریوایتی‌دیر. آرد آردا کئچمیشه فلش بک وورماقلا بو ریوایت آچیقلانیر. بو فلش بک‌لرده بیز یؤنتمنین اینجه باخیشلارینی دا گؤرۆرۆک. فیلم شخصیت پردازی آچیسیندان ان چوْخ اوغور قازانمیش فیلم‌لر سیراسیندا دایانیر. بونو فیلمه باخدیقجا سیز ده وورغولایاجاقسینیز. فیلمین سوْن پیلانی ریوایتین بۆتۆنۆ قدر آجی هم ده گۆجلۆدۆر.

فیلمین تمل قوْنوسو ساواشدان ائتکیلنمیش اینسانلارین یاشامی‌‌نین ریوایتی‌دیر. سانکی فیلم باشدان سوْنا قدر، ساواش اوْلان یئرده اینسانییت بیله اؤلر سؤزۆنه دئمک ایسته‌ییر. 


آرتیرمالی‌دیر فیلم بیر چوْخ اولوسلار آراسی فیلم فئستیوالیندا اؤلدۆل قازانیب، اوْ جۆمله‌دن سئزار، وایادولید، ونکوور، سینئه فیل، آدلاید، آتلانتیک، جئنی، نشنال برد ریویو و باشقا اولوسلار آراسی ۲۲ فیلم فئستیوالیندا چئشیدلی بؤلۆملرین ان یاخشی اؤدۆلۆنۆ قازانمیش‌دیر.

@turkcesinema

#فیلم_تانیتیمی #فیلم #تورکجه_سینئما

  • حامید مورسلی

یوروملار (۰)

هئچ بیر یوروم ثبت اولماییب
ارسال نظر آزاد است، اما اگر قبلا در بیان ثبت نام کرده اید می توانید ابتدا وارد شوید.
شما میتوانید از این تگهای html استفاده کنید:
<b> یا <strong>، <em> یا <i>، <u>، <strike> یا <s>، <sup>، <sub>، <blockquote>، <code>، <pre>، <hr>، <br>، <p>، <a href="" title="">، <span style="">، <div align="">
تجدید کد امنیتی