آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالیییق دئیه دوشونورم. بو دوشرگه‌ده اؤز آنادیلیم اولان تورکجه‌ده یازاجایام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب، بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی‌دیر :)
سیز ده دیریلیگینیزی بیلمک ایسته‌ییرسینیزسه یازماغا باشلایین.
یادیمدان چیخمامیش: سلام، خوش گلیب‌سینیز :)

سون گؤندری‌لر
سون یوروملار

۴ مطلب در مهر ۱۳۹۳ ثبت شده است

قارا باسدی  /  ح . م


گؤزلریمی آچا بیلمیرم، سانکی قارا لچه‌ک‌لی "خالاسی‌آغزی‌پوخلو" کیرپیکلریمین اوستونده باغداشین قوروب. گؤزلریم آچیلماسین دئیه یئته‌ری قده‌ر گؤزلریمی اووچالاییب آغیرلیغین سالیر ائله‌بیل. اؤزومو اؤلومله دیریلیگین اؤرتاسیندا حیس ائدیرم. هئچ بیلیمرم یوخودایام یوخسا اویاغام. دونیا باشیما فیرلانیر؛ باشیمین اوستونو قارا بولوتلار چولغالاییرلار. کوللوکده چؤنبه‌لمیش یئتیم اوشاغی کیمی اؤزومو بیر اوجا بویلو دووارین اؤنونده دویورام.

بیرآن صحنه ده‌ییشیلیر. قارا بولوتلاردان آغ-آپباغ قار یاغماغا باشلاییر. یئنه منده گووه‌ن یارانیب اومودله‌نیرم. گؤزلریمین اوزیندن او چیرکینین گئتمه‌سینی حیس ائدیرم. گؤزلری آچماغا چالیشیرام؛ سول گؤزومو مورگوله‌یه‌ن بیریسی تک یاریمچیلیق اولموش اولسادا آچماق ایسته‌ییرم.

بیرآن آشپازخانادان سومورجونون (هود) ایشه‌دوشمه‌ک سسیله اؤزومو یئنه قاراباسمیش‌لار کیمی قارانلیغینین سونو بللی اولمایان بیر صحرادا دویورام. دؤرد دؤوره‌مده هوندور فیرتینالارین منه ساری گلدیکلرینی گؤرورم ! قاچماغا باشلییرام ؛ اؤزومو فیرتینانین آغزیندان قورتاریم دئیه تام قارانلیغین اورتاسینا تپلیرم. گؤزلریمین یومولو اولدوغونا باخمیاراق سوموروجونون سسی، هؤویشنه وئریجی بیر متن موسیقی‌سی کیمی هله ده کی وار قولاقلاریمدادیرلار.

بیرآن آنام سوموروجونو سؤندورور؛ یئنه دئیه‌سن اؤز الیمده اولمایاراق سول گؤزومو آچیب آچمامیش کیمی اولورام . ساغ قولوم آلتیمدا قالدیغینا گؤره کئریدیغینی دریندن دویورام ، اونون کئریمه‌سینه انگل اولوم دئیه قیچلاریمی اوزادیب  دابانلاریمی سؤنوب-سؤنمه‌میش کیمی اولان پونجا دایاییب الیمی زوران-گوجه‌ن آلتیمدان چیخاردیب سول بؤیروم اوستده چؤنوب یئنه گؤزلریمی یومورام.

لیم-لیم یانماقدا اولان پونجون سیجاقلیغینی(ایستیسینی) حیس ائدیرم، یاغی اریه‌ن بیریسی کیمی دابانلاریمی داها سیخ  اولاراق پونجا داییریرام. ایچیمدن بو دویغونو چوخ سئویرم. سیجاقلیق چوخالدیقجا اؤزومو فیرتینانین آغزیندان قؤپموش بیر یانار‌داغین (ولقان؛ آتش‌فشان) پوسکورتوسونون اؤزه‌رینده دویورام.

هر یئر قارالیر؛ دابانلاریمین یاندیقلاری سانکی سوموکلریمه بیر چوالدوز سوخورلار، ایکی قیچیمی‌دا آنیندا پونجون اوزه‌ریندن اوزوره‌م.

یاریم اویاق- دابانلاریمین سیزیلتیسینی دوشونه‌رک " مئساژین وار" سسی‌ایله ایکی گؤزلریمی‌ده آچیب؛ هوزمویلن (توولو) جئب‌تئلئفونوما ساری چؤنورم. الیم موبایلیما ساری گئده‌رک، اؤز اؤزومه دئییرم، به پیسلیک توتمیاسان هارداسان به ، آخ منی قارا باسدی سنسیزلیکدن.
 مئساژی اوخوماغا باشلییرام:

" سئوگی گؤزومدن دوشدو ؛ سن گؤزومدن دوشه‌ن زامان"

ایستر ایسته‌مز, سانکی هئچ اؤز الیمده دئییل، تئز گؤزلریمی یومورام ؛ قاراباسدیم یوخوسون گؤرمه‌ک ایستیرم ؛ آنجاق هر یئر داها ، سادجه قارانلیقدیر ، سینیرسیز بیر قارانلیق !

خزل آیی‌نین26-سی 1393

  • حامید مورسلی

Gecələr , Gecələr, Gecələr
Gecələr gündüzlərə boyludurlar
qaranlıq gecəmdən 
Gündüz kimi doğ
məni bağrına bas 
Əzan səsində!
dodağlarınla sevgivin dadın, 
mənə dadızdır !
və əlimdən yapış gəzdir sevişdiğimiz dağlarda.
sonra axar sular qırağında 
mənə Ayətülkürsü oxuyub
boyuma oxşa, 
məni suda olan ördəklərin ağzına tapışır !
oğru sürücülərə de, 
məni azdırsınlar başqa şəhərdə.
və sən mənilə sağollaşmamış 
özünü ruzğara tapışır !
son nəfəsinə dək səni məndən alıb 
başqa mənzillərə misafir edsin diyə ! 
sənə birdaha qovuşduğumda
Savçı Xızırı li şalvarımın dal cibinə qoyub
Var Oluş suyunu 
ağız pinarından dadıb
səninlə birlikdə Əbədiyətə qovuşacıyam !

***************************

گئجه‌لر،گئجه‌لر، گئجه‌لر 
گئجه‌لر گوندوزلره بویلودورلار 
قارانلیق گئجمدن
گوندوز کیمی دوغ 
منی باغرینا باس
اذان سسینده! 
دوداغلارینلا سئوگیوین دادین،
منه دادیزدیر ! 
و الیمدن یاپیش گزدیر سئویشدیغیمیز داغلاردا. 
سونرا آخار سولار قیراغیندا
منه آیت والکورسو اوخویوب 
بویوما اوخشا،
منی سودا اولان اؤردکلرین آغزینا تاپیشیر ! 
اوغرو سوروجولره دئ،
منی آزدیرسینلار باشقا شهرده. 
و سن منیله ساغوللاشمامیش
اؤزونو روزغارا تاپیشیر ! 
سون نفه‌سینه دک سنی مندن آلیب
باشقا منزیللره میسافیر ائدسین دییه !
سنه بیرداها قوووشدوغومدا 
ساوچی خیضیری لی شالواریمین دال جیبینه قویوب 
وار اولوش سویونو
آغیز پیناریندان دادیب 
سنینله بیرلیکده ابدییته قوووشاجییام

13/07/93

  • حامید مورسلی

سون دوروملارا باخاراق اؤن گؤروشلریم (پیشگویی‌لریم) grin ifade simgesi (نوستوراداموس اولموشام) بلکه بیر قورخولو سینمایی فیلیم کیمی اولا ، آنجاق دا بوندان آرتیق قورخوسون آلا بیلمزدیم ! یوخسا چوخ دا دهشتلی اولا بیله‌ردی tongue ifade simgesi
-------------------------------------------------
1- تورکیه کوردلریلن آغیر وضعیتده ساواشا گیره‌جک ؛ اؤلومونه یا قالیمینا ساواشاجاق!
2- بشار اسد داغیلاجاق !
3- آمریکا و باتی اؤلکه‌لری آری یوواسی (لانه زنبور) آدلی سیاست ایله نئچه آماجا ال تاپاجاقلار؛ اؤز یوردلاریندا تمل سورونلاری، آشیری درجه‌ده اولان ایسلامچیلارین الیندن قورتولموش اولاجاقلارین بو ساواشلاریلان تضمین ائده‌جک‌لرین ساندیغیندا یانیلدیقلارینین درینده فرقینده قالاجاقلار.
4- ایران، عربیستان و ایسراییل ایله؛ آیدین ساواش‌ یوخ، بلکه الینده اولان سون ایللرده یاراتدیغی چته‌لرین گوجویله اینتیحار اویونو و اونلارین کؤکلرین قازدیرماق پیلانینا گیره‌جک !
5- ایسراییل ایرانلا ساواشماق زوروندا قالیب بوتون لابی‌لریله ایرانلا آچیق آیدین ساواشا گیره‌جک !
6- بئله‌لیکله اورتا دوغودان اوچونجو دونیا ساواشی آچیق آیدین باشلاناجاق ! 
7- بوگونه کیمی ائشیکدن باخیب ساواشا تئز صادیر ائدنلرده بو اودون توستوسوندن اوزاق قالمیاجاقلار ! 
8- بلکه ایران یا بلکه ایسراییل طرفیندن اتم بومباسیلا بو ساواش سونا چاتمیش اولاجاق ! frown ifade simgesi
9- بو دفعه میللت قوزو کیمی بیر بیرینین یانیندا یاشاماغا باشلیاجاقلار!
10- ایلده مراسیملر توتاجاقلار و بو اولایلاری ائلیشدیریب، آتا بابالاری(بیزلره) لعنت اوخویاجاقلار
11- ساواش؛ سؤیوش؛ اؤلدورمه‌ک؛ نیفرت؛ زوراکیلیق؛ آیریشماقلیق؛ یالان؛ کین؛و بونلارا تای سؤزلری سؤزلوکلردن سیله‌جک‌لر
12- اینسان اولوب باشقا اینسانلاری اینسان کیمی گؤرمه‌یی باجاراجاق‌لار ! آنجاق نه یازیق کی چوخ گئج اولاجاق اوزامان ! 
کئشکه بوگونکو داورانیشلاریمیزین آغیر بدلینی اؤده‌مه‌میش بیر بیریمیزی اولدوغوموز کیمی آنیب، بیر بؤیوک فاجیعه‌نین قاباغین آلاق ! 
آنجاق نه یازیق کی هئچ بیر گوج داها بو گلیشمه‌لرین قاباغین آلابیله‌جک گوجونه مالیک دئییل !

  • حامید مورسلی

نئچه گون اؤنجه اؤتری باخیشدا اورمیه کانالیندا مسئولارین بیری‌سی‌نین، دونیالیق "اؤیره‌تیم و ائیتیم" گونو حاقیندا دانیشیقلاری ایلگیمی چکدی؛ همین دانیشمان‌-ین دئدیکلرین قایناق گتیره‌ره‌ک باتی آذربایجان‌دا : 
267 مین نفریمیز کؤکدن یازیب اوخویا بیلمه‌ییرلر ! 
29 مین نفرین اوشاقلاری مدرسه‌لرده اؤیرنجی اولاراق دئمه‌ک اولار اؤزلری موطلق ساوادسیزدیرلار ! 
اینقیلابدان اؤنجه ساوادسیزلیق اؤلکه‌نین (ایرانین) اورتالامالاریندان 11 قات یوخاریمیش ! آنجاق بوگون ایسه 5.5 قات یوخاریدادیر !!!
و بیر سورو بونلارا تای بو ساحه‌ده دهشتلی دوروملاریمیزی یانسیدان بیلگی‌لر ! 
هله بو دهشتلی بیلگی‌لره یونسکونون بو یاساسینی کی علی بی جباری گؤزل قوشوق شکیلینه سالیبدیرلار، آرتیرساق، بو قونودا دا دوروملاریمیزین داها دارماداغین اولدوغو دریندن گؤزه چارپاجاق :

" یونئسکو یازدیغی یاسا فریاددیر/ کیم اؤز دیلین یازانمیر بی‌سواددیر"

----------------------------------------------------------------------

ی. س 1: باشقا اوستانلاریمیزین دوروملاری، باتی آذربایجان‌دان چوخ دا یاخشی دئییل !

ی. س 2: گوزاریشده بیر قوجا کیشی‌نین سؤزو منی چوخ فیکیره دالدیردی: " بالا بیز کور قوش کیمی‌-ییق دا " frown ifade simgesi

ی. س 3: مدرسه‌لر آچیلیر آنجاق هله‌ده کی وار، بیزیم دیلیمیزه چه‌کیل اویانا دا دئیه‌ن یوخدور؛ دئیه‌سن بو ایل‌ ده دیلسیز قالماغیمیزا ، دیلیمیزی ائویمیزده بیراخماغیمیزا، اؤزگه‌لرین دیلینه قوللوقچو اولماغیمیزا آلیشمالییق !

ا. ی: شکیل‌ده اولان سؤز اینسان حاقلارینین تمل‌لریندن بیریسینی وورغولاییر !

  • حامید مورسلی