آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

سون گؤندری‌لر
سون یوروملار

۹ مطلب با کلمه‌ی کلیدی «آنی» ثبت شده است

بو شاه‌بئیت، آردیجا گلن یازیلا ایلگیسی اولماسا دا، ایچه‌ریسینده چوخ سؤزلر داشییر:


"گؤزلرین باخدی منه سؤیلدی صبر ائت سنینم

دوغروسو صبر ائدیرم عُمر شیتاب ائتمده دیر"


فئیس بوکون " نه دوشونورسن؟" سوروسونا، چوخراق جاواب وئرمک بیله اولمور! دوغروسو آدام چوخ زادلار دوشونور؛ بیر چوخونو آغزینا بیله گتیره‌بیلمیر. اوره‌ک دولو اولاندا، سورون سورونون اوستوندن باشینا یاغماقدا اولاندا، هامی وار ایکن یوخ اولاندا، دیلین وارکن لال اولاندا، قولاغین وارکن کار اولاندا، ایچین عوممان دنیزی کیمی چاخلاشیب سن ایسه سوسقونلوق توتاندا، آرخاندان بیر أل چالیب "هله من وارام دوستوم" دئمه‌ینده. یالان یالان گولوشلر، ساختا ساختا داورانیشلار آری-دورو ایلگی‌لرین پوخونو چیخارداندا، بیر چوخ گؤرمه‌دییین ایشین یورقونلوغو سنی آیاقدان سالاندا داها اینجارسیزجاسینا، ترپنمه‌یه، فیلیم اویناماغا، ساختا گولوش تحویل وئرمه‌یه بیله ایمکان وئرمه‌یه‌نده، هر نه‌یین اؤنمسیز اولدوغونو سنه دریندن خاطیرلاداجاق.

قایدالار، قوراللار، یاشادیغیمیز یئرلر، قازاندیغیمیز ایلگی‌لر، گله‌نک‌لر، ایناملار، قوروملار، قورولوشلار، هامیسی و هامیسی سنی سن ایسته‌مه‌دییین کیمی یؤنلندیره‌جک‌لر. زامانین اؤتوشو سنین اؤزلویونو قامچیلایاراق داها اؤزوندن بیله آلاجاق. اوره‌یین بیر تک وارلیغا اینانسایدی دا داها او دا بو توپلومدا یاشادیغی اوچون، او دا بو سیستئمین اوره‌تیلمیشی اولدوغو اوچون، او دا سئچمک زوروندا اولدوغو اوچون، داها بوشلوق دا اولان هؤرومجک یوواسی‌نین اوزه‌رینده تیکیلمیش ایتوپیانی دئییل اؤزونو سئچیب، اؤزونو دوشونه‌جک دیر. داها کئیییب بیر بوجاقدا قالماغی سئوه‌جک سن، قارانلیغی، سس‌سیزلیی، دانیشماماغی. سن نئجه دوشونوردون سونوجون نه اولدوغو دوشوندوکجه داها کئیییب داها فرقینده بیله اولماغی ایسته‌مه‌یه‌جک‌سن. اویسا بئینینده سئزان آکسونون "گئچَر"-ینی ایچینه باغیرماق ایسته‌سن ده آنجاق بئینینده احمد کایانین "آغلادیقجا"-سی جانلانیب نیسگیل و اؤزلَم دولوسو اولاراق، بئلنچی بیر یازی یازمایا سوره‌کله‌یه‌جک دیر. نم هانسی دوشونور دئمیشکن: اینسان بیر دفعه بیرینی سئومه‌یه گئجیکر، داها اوندان سونرا کیمسه‌یه یئتیشمک اوچون ته‌لَسمز!

بلی ایندی من بونلاری دوشونورم؛ داها نه ایسته‌ییرسن جانیمدان!


شکیل: ساختاکارلیق اوزوندن سئچیلیب!

  • حامید مورسلی

بوراسی منیم اؤزل یازیلاریم و آنیلاریمین دوشرگه‌سی‌دیر دئمه‌ک. یازیرام نیه کی یازماقدان درین، یازماقدان گوجلو، یازماقدان یارارلی بیر أیله‌م تانیمیرام؛ منه نفس وئریب، گوج باغیشلاییب گله‌جه‌یه ایره‌لی‌له‌مه‌ییمه درین قاتقیلار بیراخان سادجه یازماقدیر؛ یازاندا اؤزومو یاشادیرام؛ یازاندا واراولوشوما اولوشدوغومو دریندن دویورام؛ یازاندا سئویب سئویلیرم؛ یازماسام سانکی اؤلموشم داها؛ دوشونجه و ایدولوژی-یایا دیالئکتیک تؤره‌دن تمل وارلیق، سادجه یازیشماق‌دیر. کیمسه یازیشمادان یاراغلانیب، داها گوجلو اولاراق اینام‌لار و وارلیقلارینی قاپساییب سا، دئمه‌ک اونلاری قوروماق اوچون اؤنملی جهدلر گؤسته‌ریب‌دیر.


"یازدیم،

گؤزلریم دولدو.

یازدیم،

اوره ییم بوشالدی.

یازدیم،

قونشوموز- أکیل دده! دئدی!

یازدیم،

بیر شاعر گؤزومدن اؤپدو.

یازدیم،

بیر مأمور اوستومه ایشه دی.

یازدیم،

یازیم چاپ اولان قزئته، اؤدول وئردیلر.

یازدیم،

یازیما گؤره دوستاقدا یاتدیم.

یازدیم،

دوستلاریم سئویندی،قاریم اؤپوش توللادی

اوغلوم آج یاتدی.

یازمادیم،

"....................اؤلدوم................"

(-سعید موغانلی-)


بیرجه سؤزله دئسه‌م: یازماغی چوخ سئویرم. J

  • حامید مورسلی

کتدی‌لیک، من و سون گونلر گؤردوگوم ایدولوژیک دارتیشمالار

********************************************

من بیر کتدی یم؛ همده یئرلی کؤکلو کتدی ؛ آنلیم آچیق اولاراق بیله‌گیمین چؤره‌گین یئیه‌رم. دئیه بیله‌رم بوتون دویغو قایناغیم، سؤز داغارجیغیم، یاشام طرزیم ، تام آنلامدا دئمه‌ک ایسته‌سم: وارلیغیمی اورادان منیمسه‌ییب گؤز آچیب ایلکه‌لریمین دوزه‌نین دوزه‌نله‌میشم. 

کند منیم اوچون بیر دالدالاناجاق، سیغیناجاق، گووه‌نمه‌ک یئری دیر. کندیمیزده گووه‌ندیگیم اینسانلار وار، دوشونجه‌لی اینشانلار، قانان اینسانلار،چیخارلی اینسانلار بونا باخمیاراق کی کتدی‌دیرلر، ساوادسیزدیرلار، یاشلی دیرلار، مدرنیته ایلیشگی قورما دستگاهلاریلا تانیش اولمایا بیله‌ بوتون اینسانلاری سئویرلر، اینسانلاری اولدوقلاری کیمی آنلاییرلار. سایقیلی و بیلگین اینسانلارا اولدوقلاری قده‌ر ده‌یر وئریرلر؛ اینسانلارین کیم اولدوقلاری، یاشلاری نئچه اولدوغو ؛ هانسی تؤره‌مه‌دن- طایفادان اولدوقلاری؛ وارلی یا وارسیز اولدوقلارینا دئییل دوشونجه‌سی، آنلاغی و چئوره‌لرینده‌کی اینسالارا یئتیردیکلری یاردیملارلا یوروملاییب لاییق اولدوغو یئرده کیمی قالخیزارلار. 

آنجاق نه یازیق کی هابیل اولان یئرده قابیل‌ده کسینلیکله تؤره‌نه‌جک؛ بوتون سایدیغیم اؤزللیکلردن قات قات چیرکینینه یییه اولانلاردا وار، قارنی زیغلی‌لار، دیل آجی‌لار، دوشونجه‌سین گلیشدیرمه‌یه‌نلر و او گلیشمه‌یش دوشونجه ایله‌ باشقالارینی قیضاوت ائدن‌لر ده وار ! نه یازیق کی سایلاری اؤنجه سایدیقلاریمدان قات قات- دا یوخاری‌دیر! 

نئچه ایل اولار بئلنچی قونولارا فیکیر وئریرم؛ بو گونلر سانال اورتاملاردا دا بئله اولوب اینسانلارین قاباریق، چیرکین و کوبوت اوزلری داها چوخ گؤزه چارپیر. سیاست قونوسوندان گونده‌لیک داورانیشلاریمیزا کیمی بیر اینجیدیجی مونولوق، اؤزونو حاق سانیب باشقاسینی جهنمین اورتاسینا دوغرو گئتدیگینین فرقینده اولماقلیغی دویانلار، غرور، قضاوت، کوچه باجا ساواشلاری کیمی دسته کئشلیک، حاقدان یانا یوخ منافئعدن یانا اولماقلیق، منیله اولمایان اولمامالی‌دیر کیمی سونوجلانمالار کیمی چیرکین داورانیشلار دا داها چوخ گؤزه چارپیر.

منجه هر بیر دیالوقون یارارلی سونوجلارا دوغرولانماسی‌نین ایلکه‌سی دئمک اولار اخلاق قوراللارینا دایاناراق قارشی طرفله سایقی‌ایله داورانماقدیر. هر کس اؤز ایچینده‌کی داعش صوفتلیگی بوغوب باشقاسینین بوتون یییه اولدوغو حاقلارا توخونمامالی‌دیر کی هئچ اؤز ویجدانی‌نین محکمه‌سینده اولموش اولسادا بئله اؤزونون سوچلامالی‌دیر. حذف، شانتاژ، یالان ؛ ایفتیرا، اخلاقسیزلیق و بونلارا تای چیرکین توتملر ارادان قالدیریلمیش دورومدا اولمالی‌دیرلار یوخسا چوخ راحاتجاسینا داغیلماق و محو اولماغا اوغراشماق قاچیریلماز اولار.

هر بیر شخص اینسان فئونومنینین ده‌یرلری و چیخارلارینی منیمسه‌ییب اؤزون اونلارا لاییق دوروما چاتدیرا بیله‌جک قده‌ر اولا بیله‌ر؛ سادجه اؤزوندن باشلامالی‌دیر، اؤزو اولمالی‌دیر، اؤزویله ساواشیب اؤزونو بیلیم، اخلاق، سایقی و اؤزونون فلسفه‌سینین یاراقلاریلا یاراقلانمالی‌دیر. بئلنچی اؤزه‌ل بیرئی‌لر بسلندیکدن سونرا اونلارین یاشادیقلاری چئوره و آتموسفئرده اونلاردان ائتکیله‌نه‌رک بؤیوک بیر گلیشمه‌یه دوغرو گئده‌جه‌گینه دریندن اینانیرام.

ح. م - گئجه یاریسی 21 آبان 93

  • حامید مورسلی

قارا باسدی  /  ح . م


گؤزلریمی آچا بیلمیرم، سانکی قارا لچه‌ک‌لی "خالاسی‌آغزی‌پوخلو" کیرپیکلریمین اوستونده باغداشین قوروب. گؤزلریم آچیلماسین دئیه یئته‌ری قده‌ر گؤزلریمی اووچالاییب آغیرلیغین سالیر ائله‌بیل. اؤزومو اؤلومله دیریلیگین اؤرتاسیندا حیس ائدیرم. هئچ بیلیمرم یوخودایام یوخسا اویاغام. دونیا باشیما فیرلانیر؛ باشیمین اوستونو قارا بولوتلار چولغالاییرلار. کوللوکده چؤنبه‌لمیش یئتیم اوشاغی کیمی اؤزومو بیر اوجا بویلو دووارین اؤنونده دویورام.

بیرآن صحنه ده‌ییشیلیر. قارا بولوتلاردان آغ-آپباغ قار یاغماغا باشلاییر. یئنه منده گووه‌ن یارانیب اومودله‌نیرم. گؤزلریمین اوزیندن او چیرکینین گئتمه‌سینی حیس ائدیرم. گؤزلری آچماغا چالیشیرام؛ سول گؤزومو مورگوله‌یه‌ن بیریسی تک یاریمچیلیق اولموش اولسادا آچماق ایسته‌ییرم.

بیرآن آشپازخانادان سومورجونون (هود) ایشه‌دوشمه‌ک سسیله اؤزومو یئنه قاراباسمیش‌لار کیمی قارانلیغینین سونو بللی اولمایان بیر صحرادا دویورام. دؤرد دؤوره‌مده هوندور فیرتینالارین منه ساری گلدیکلرینی گؤرورم ! قاچماغا باشلییرام ؛ اؤزومو فیرتینانین آغزیندان قورتاریم دئیه تام قارانلیغین اورتاسینا تپلیرم. گؤزلریمین یومولو اولدوغونا باخمیاراق سوموروجونون سسی، هؤویشنه وئریجی بیر متن موسیقی‌سی کیمی هله ده کی وار قولاقلاریمدادیرلار.

بیرآن آنام سوموروجونو سؤندورور؛ یئنه دئیه‌سن اؤز الیمده اولمایاراق سول گؤزومو آچیب آچمامیش کیمی اولورام . ساغ قولوم آلتیمدا قالدیغینا گؤره کئریدیغینی دریندن دویورام ، اونون کئریمه‌سینه انگل اولوم دئیه قیچلاریمی اوزادیب  دابانلاریمی سؤنوب-سؤنمه‌میش کیمی اولان پونجا دایاییب الیمی زوران-گوجه‌ن آلتیمدان چیخاردیب سول بؤیروم اوستده چؤنوب یئنه گؤزلریمی یومورام.

لیم-لیم یانماقدا اولان پونجون سیجاقلیغینی(ایستیسینی) حیس ائدیرم، یاغی اریه‌ن بیریسی کیمی دابانلاریمی داها سیخ  اولاراق پونجا داییریرام. ایچیمدن بو دویغونو چوخ سئویرم. سیجاقلیق چوخالدیقجا اؤزومو فیرتینانین آغزیندان قؤپموش بیر یانار‌داغین (ولقان؛ آتش‌فشان) پوسکورتوسونون اؤزه‌رینده دویورام.

هر یئر قارالیر؛ دابانلاریمین یاندیقلاری سانکی سوموکلریمه بیر چوالدوز سوخورلار، ایکی قیچیمی‌دا آنیندا پونجون اوزه‌ریندن اوزوره‌م.

یاریم اویاق- دابانلاریمین سیزیلتیسینی دوشونه‌رک " مئساژین وار" سسی‌ایله ایکی گؤزلریمی‌ده آچیب؛ هوزمویلن (توولو) جئب‌تئلئفونوما ساری چؤنورم. الیم موبایلیما ساری گئده‌رک، اؤز اؤزومه دئییرم، به پیسلیک توتمیاسان هارداسان به ، آخ منی قارا باسدی سنسیزلیکدن.
 مئساژی اوخوماغا باشلییرام:

" سئوگی گؤزومدن دوشدو ؛ سن گؤزومدن دوشه‌ن زامان"

ایستر ایسته‌مز, سانکی هئچ اؤز الیمده دئییل، تئز گؤزلریمی یومورام ؛ قاراباسدیم یوخوسون گؤرمه‌ک ایستیرم ؛ آنجاق هر یئر داها ، سادجه قارانلیقدیر ، سینیرسیز بیر قارانلیق !

خزل آیی‌نین26-سی 1393

  • حامید مورسلی

بوگون دوغوم گونومدن توپلام 9131 گون سوووشدو؛ 25 ایل بیتدی گئتدی تاریخین صحیفه‌لرینه 
دوزدو کیملیک بلگه‌مده یازیلان تاریخه چوخ گووه‌نه‌بیلمه‌رم آنجاق بیر چوخوموز یاخامیزا کئچه‌ن یانلیش دوغوم تاریخیمیز دوغرو اولماسادا بئله اونونلا راضیلاشیب منیمسه‌مک زورونداییق یوخسا چاغی گلنده بیر بوشلوق دویاجاغیمیز قاچیریلماز اولاجاقدیر؛ منیم دوغوم تاریخیم آتامین دوغوم تاریخیله بیر آی و بیر گونده اولماسی داها ایلگینج، داها گوونمه‌مه‌لی اولدوغون وورغولاییر؛ آنجاق باشقا آچسدان آداما یاخشی بیر دویغو باغیشلاییر، اؤزون آتاسینا چوخ یاخین دویور و ساییره.
نئچه ایل اؤنجه کیمسه یاشیمی سورسایدی چالیشاردیم اولدوغومدان أن آزی بیر ایکی یاش آرتیق دئییب اؤزومو یاشلی گؤسته‌رم، چوخ چتین اولاردی فرقینده اولان اولا نیه کی اوُز-گؤزوم منی اولدوغوم یاشیمدان آرتیق گؤسته‌ریردی؛ مدرسه‌ده همین یاشلی گؤرونمه‌م بیرآزدا یئکه یئکه دانیشیب، آتابابا سؤزلرین قولانان، هر نمنه‌یه بیر ناغیلی اولان کیمسه اولدوغوما گؤره بوتؤولوکده یاشیندان ایره‌لی دانیشان بیریسی اولدوغوما گؤره بیله‌مه (منه) " قوجا " دئیه‌ردیرلر؛  اوزامان دوستلاردان منه چاتان بو تاخما آدی چوخ سئومه‌سه‌یدیمده بئله ایندی او آدی چوخ سئویب دئمک اولار اؤزله‌میشم، بو دفعه نه یازیق کی داها قوجا چاغیران یوخدو !!! 
سانال دونیایا گلدیکده کیمسه منی گؤرمه‌دیغینه گؤره اؤزومو یاشلی تانیملایاردیم، او زامان یاهو مسئنجر مدودو؛ هرکس چت دن دانیشاردی منسه اوردادا آزدان چوخدان فعالیدیم؛ 17-18 یاشیم واریدی آنجاق هر کیم " اصل "(ASL Plz) ایسته‌سه‌یدی اؤزومو 24 یاشیندا تانیتدیراردیم، بیلمیرم نیه بو 24دو چوخ سئوه‌ردیم ؛ باشیم بو دولما دولاشیق یاشاما ائله قاریشدی کی بوگون بیرآن گؤزومو آچدیم گؤردوم 24دو یوخ 25-ی ده سونا أرمیشه‌م؛ 26-یا سالام دئمه‌لی‌یم !
انگیمده بیر آغ توک بیتیب، ساچلاریمداکی آغ توکلرین داها ساییسی الیمدن چیخیب،داها باشیمدا دؤولت توکو یوخ قوجالیق توکلرینی گؤرورم، ظالیملرین سایلاریدا گونو گوندن آرتماغا دوغرو گئدیر ! 
ایندی بیر دویغو بئینیمی چولغالاییب دئییر 24 یاشینین سئوگیسی سنی آتماییب هله؛ سنده اونو آتما، یاشینی سورانلارا 24 یاشیم وار دئیه جاواب وئر ! 

ی. س:یاشاسین دیرلی دوستلاریمی کی همراه اولدن اؤنجه دونن گئجه ساعات 12دن سئوگیله دولو مئساژلارین منه یوللاماغا باشلادیرلار؛ بوتون منه دیه‌ر وئریب دوغوم گونومه گؤره، سئوگی دولوسو مئساژلارین گؤنده‌رن دوستلاریمدان سونسوز تشککورلریمی بیلدیریرم؛ نه یاخشی کی وارسینیز دئیه‌ بیله‌رم سادجه.

ا. ی: بو گؤزل گولون شکیلینی سئوگیله دولو بوتون دوستلاریما سونورام 


02.06.93

  • حامید مورسلی

نئچه ایل اؤنجه جیب تئلفونون خیردا خیردا توپلومون بوتون قاتلارینا گیریدیگینده، اونونلا بیرگه بولوتوث دا یامان مد اولموشدو، هر کیمی گؤروردون دئییردی بولوتوثونو آچ یئنی بیر گؤرونتوم وار یا یئنی بیر سس وساییره.
یادیمدا خالامین اوغلو یبر چوخ دم تراغینان منه بیر ویدیونو گؤندرمک ایسته‌ییردی، دئییردی چوخ قورخمالیدی ها، اوره‌یین زادی ضعیف اولسا یا قاندان قورخسان باخماسان صلاحدی؛ اوره‌گین زادین پیس اولسا مندن دئییل!
آنجاق بو دئدیگی سؤزلری منی لاب یانقین ائدیب دئدیم تئز اول گؤندر گلسین؛ اوشاق دئییلم کی قورخام . یادیمدا اوردا ابوعلی‌سینیا نیسبت وئرن سؤزو کی دئییر "هر یازی بیردفعه اوخوماغینا دیه‌ر"-ی تحریف ائدیب " ناصیر جان هر ویدیو بیر دفعه باخماغینا دیه‌ر" دئدیم.
آنجاق ویدیونو بولوتوث ایله آلیب؛ تئز ایزله‌مه‌یینه باشلادیم؛ گؤرونتوده 2دیقه 30 ثانیه‌لیک ویدیو واریدی، بیر حالداکی نئچه نفر الی سیلاحلی، اوزلَری اؤرتولو، دایانمیشدیرلار؛ عربیستانین بایراغی‌ایسه داللارینداکی دووارا ویریلمیشدیر؛ اورتالیقدا بیر گنج یاشلی اوُز-گؤزو آچیق، اللری دالیسیندان باغلی، آیاقلارینین اؤنونده دیزله‌رین یئره ویریب دایانمیشدی!
بیرآن سؤزو گئدن الی سیلاحلیلاردان بیریسی بیر نئچه‌ عربجه سؤزو دئدیگیندن سونرا الینده‌کی پیچاق ایله او اوغلانین باشین کسمه‌یه باشلادی؛ اولدوقلاری اوتاقین کفی آغ کاشیدی بو اوزدن هر یئری آل قان آلدی آغزینا ، صحنه‌ده اولان باشقا الی سیلاحلیلار او آدامین باشی کسیله کسیله سیلاحلارینی قالدیراراق اوجا سس ایله "الله اکبر" دئمه‌یه باشلامیشدیرلار! 
بیر آن گؤزلریم قره‌لدی،سانکی آیاقلاریم یئردن اوزولدو، باشیم فیرلانماغا باشلادی، اوره‌ییم ائله بولاندی مصموم اولموشلار کیمی قوسماغیم گلیردی. نئچه گون اوندان سونرادا هر گؤزومو یومدوغومدا او صحنه‌ گؤزومون اؤنونه گلیردی یئنه اوره‌ییم بولانماغا باشلاییردی.
آنجاق او اولایدان چوخ آز ایلین سوروشدوغونا باخمیاراق، بؤلگه‌ده گئدن ساواشلار، قانسیزجاسینا باش کسیب تکبیر دئیه‌ن چئردکلرین چوخالدیقلاری، و او جینایتلرین ریسانه‌لرده گئنیش شکیلده یاییلماسی دئمک اولارداها او روحی لطافتیمی آرادان آپاریب؛ بیر چوخونون داها اوره‌یی بولانمیر، حالی خاراب اولانلارین سایی آزالیب ؛ قان تؤکمکله باش کسمه داها چوخالیب ! گونده باش کسمه‌لر، قان تؤکملرین فئیس بوک، یوتیوب یا باشقا آراجلاردان گؤروروک، بلکه دوداغیمیزین آلتی بیر یامان دئییب ظالیملری ، قان تؤکه‌ن‌لری قارقیش ائتدیگیمیزدن سونرا چوخ راحاتجاسینا !!! اوستوندن کئچیریک.

گؤره‌سن دوغرودان بو تووونان هایانا دوغرو گئدریک ؟؟؟

29.05.93

  • حامید مورسلی

اوشاقلیق آنی‌لاریمدان

ایبتیدایی‌نی کندیمیزین مدرسه‌سینده اوخوموشام. سحر چاغی کیلاسلاریمیز 8/30 دان باشلاردی ناهاردا دا معلیملریمیزین ائولرینه گئتمه‌لرینه گؤره یاریم ساعات زنگی تئز چالاردیرلار ؛ مدره‌سه میز بیر تپه کیمی یئرین اوستونده یئرله‌شمیشدی ائله بو اوزدن مدره‌سه میزین دالی طرفینده یئرله‌شن باغچالارا تپه‌دالی دئیردیرلر.نه دوواری واریدی نه دوزاغاللی بئهداشتی سئرویسی.داشدان پالچیقدان تیکیلمیش مدره‌سه بیر چوخلارینا اوردان ایلک تحصیللرینی آلماقلارینا ندن اولموشدور
سون زنگین آخیر دیقه لری هامی کیرکیتابی‌لاریندان توت سیلگی، قلم‌لرینه کیمی جامتایی لاریندا یا بیر سیرالاری کیفلرینده یئربه‌یئر ائدردیرلر. او دومئیدانی‌ده باشلانیش سیلاحینین سسلنمه‌سینی گؤزتله‌ین ایدمانچیلار کیمی بیزلرده سون زنگین چالینماسینی گؤزله‌یردیک. زنگ چالیندیغیندا سانکی قفس‌دن قورتولموش قوشلار کیمی یا داها اویغون یانسیتما دئسم ؛ موزا آریسی چالمیش بوغالار کیمی اوجا سسیمیز ایلن " ائـــــــــــــــــــــو " باغیراراق قوشا-دؤرد-أم یوللاناردیق ائولریمیزه ساری. ائله‌بیل هامی اؤز آراسیندا ایستردی بیرینجی نفر ائولرینه چاتسین. تپه کیمینی ائویمیزه ساری قاچدیغیمیزدا اؤزوموزو بیر تکه‌ر کیمی حیس ائدردیک کی بیر سیرتیق اوشاق بیزی اوردان هئللتمیشدیر ؛ هاوا نین اوزونده ائله یئلله‌نیب قاچیردیق، سانکی بولودلاردان آیاقلاریمیزین آلتیندا ییمیشاق فرش سالمیشدیرلار.

  • حامید مورسلی

قدس گونو باشقا آچیدان

دونن نئچه آی گؤروشه‌بیلمه‌دیغیم بیردوستوملا بیرگه چیخدیق شهرین ایچینده بیر فیرلاناق ؛دانیشا دانیشا ، یئرده ، یولوموزو سالدیق صوفو چایینین قیراغینا ساری. آنجاق چوخ آجی و دئمک اولار چیرکین بیر صحنه‌یه شاهید اولدوق.
یولو بیر نئچه گؤرونتو و بنر قدس گونو موناسیبتینه گؤره گؤردوک؛ بیزیم قاباغیمیزجا بیر کؤرپه اوشاق ، 4-5 یاشی آنجاق اولاردی، آناسی ایله بیرگه گئدیردیرلر . شهردارینین یاپیشیغیندا بیر بسیج پایگاهی وار؛ او پایگاهین اؤنونده داربست گوجونه اووچدنه دار آغاجی حاضیرلاتمیشدیرلار و ایسراییل ، آمریکا و اینگیلیسین موغاپبالارین دارا چکمیشدیرلر!. صحنه‌نی تاساریلایان چوخ چکیجی تاساریامیشدی، قانلی اللر شکیلین موغاپپالارین اوستونه سالمیشدی ،او اؤلکه‌لرین چیریق پیریق بایراقلارینی‌دا او موغاپبالارین داللارینا آسمیشدیر. بوتؤولیکده دئمک اولار چوخ قورخوج بیر تابلو یاراتمیشدیر.
آنجاق همین سؤزو گئدن آنا ایلن اوشاقدا او صحنه‌نین اؤنوندن کئچیردیرلر بو اوزدن او اوشاغا صحنه‌نی گؤرمک قاچیریلمازیدی.
منیم گؤزوم اوشاقدایدی؛ اوشاق سانکی دؤرد گؤزلو اولموشدو ، بیلمیرم نه‌یه فیکیرله‌شیردی، بیر الی آناسینین الینده ایدی آنجاق گؤزلرین دیره‌میشدی او چیرکین صحنیه ؛ اوردا اوزاقلاشدیقلارینا رغمن گئنه اوشاغین بوینو او صحنیه ساری أیریلمیشدیر. بیلمیرم او موغاپبالارا فیکیرله‌شیردی ،دار آغاجینا فیکیله‌شیردی، آسیلماغا فیکیرله‌شیردی یا باشقا زادلار، اوشاغین کیچیک و هر نه‌یی تئز گؤتورن بئینیندن کئچیردی ! 
ایندی کوچه‌ده همین اوشاغین یاشیتلارین گؤردوم دونن قدس گونونده ائشیتدیکلری شوعارلاردان ائتکیله‌نه‌رک، باشلامیشدیلار " مرگ بر آمریکا " دئییردیرلر . 
ناپلئون بوناپارتین بو مضموندا بیر سؤزو وار دئییر : بیر شکیل تابلوسو، نئچه‌دنه کیتابدان، دوزگون و گؤزل شکیلده دئمک ایسته‌دیگی سؤزو چاتدیرماق گوجونه مالیک دیر !
ایندی سیز حئساب ائدین دونن او شیددتله گؤردوغو جانلی تابلونون او اوشاغین ناخودآگاهیندا هانسی ائتکیلر بیراخا بیلمه‌ک گوجونه مالیک دیر.

----------------------------------------------------

ی. س 1 : قوشقوسوز ، آمریکا ، ایسراییل و بوتون اؤز حققینه قانع اولمایان اؤلکه‌لر محکومدولار 
ی. س 2: داورانیشلاریمیز و ایشلریمیزین چوخ پیس و هر طرفلی ائتکیلرینه‌ده فیکیر وئرسه‌یدیک پیس اولمازدی !

  • حامید مورسلی

["منیم بو یاشیما قَدَر بیر نفر ده موصاحیبیم اولماییب ! "]

*************

هاوانین شاختاسی آدامی کَسیردی ، بیر یئره گئتمه‌لی‌ ایدیم کی نئچه تاکسی ده‌ییشمه‌ک زوروندایدیم ! بو اساسدا زنگ آچدیم " آژانس"-آ بیر ماشین گئتمه‌ک ایسته‌دیگیم یئره ایسته دیم !
بیرآز گئج گلمه‌سی و هاوانین شاختاسینا گؤره قیزقین (حیرصلی) حالدا زنگ ووردوم دئدیم قاغا به سیزین بو ماشین هاردا دی بس ؟؟؟ دا من دوندوم دا !!!
سس : "ایندیجه یئتیشربا " دئدی !
...
هاندان گئج‌دن بیر اورتا یاشلی کیشی پیرایدیلان گلدی ! دا بیر سؤز دئمه دن مینیب و یوللاندیم !
"کیشی بس هاردایدین منی دا شاختا ووردو دا " دئدیم .
یولو ائله داغدان باغدان دانیشدیق ! سؤز گلدی چاتدی بورایا کی سوروجو عمی جان دئدی منیم بو یاشیما قَدَر بیر نفر موصاحیبیم (یولداش) اولماییب ! بونو دا او کابلایی-یا بورجلویام ! (رحمتلیک آتاسینا کابلایی دئییردی) 
دئییردی :
اوشاغیدیم ، یاشیتلاریمیلا بیرلیکده ایلک اولاراق خرمنده (کندلی اوشاقلارین استادیوم لاری) توپ اویناماغا گئتمیشدیم ! کابلایی سسله‌مه‌دن الینده‌کی موُسوُن شیرپیسی ایله دالدان منیم کوره‌ییمین اورتاسیندان یاش شیرپینی ائله یاتیرتدی کی frown ifade simgesi ائله بیل بوزون اوستونه قاینار سو تؤکدون ! بئلیمی ائله پؤشله ییب قیزیشدیردی ، دا من ایلان کیمی اؤزومه دولاشدیم ! 
"داها او اولدو بو اولدو من یولداشی ، توپو و تریبیت سیزلیک‌لری بیر دفعه لیک بوکدوم قویدوم قیراغا " دئدی !
هله ده دئییردی من او کیشی‌یه بورجلویام یوخسا ایندی بیلمیرم نه دورومدایدیم ! 
دا ایسته‌مه‌دیم اوره‌گین سیندیرام ! {هن}ین گتیردیم !
بیله سینه "حاقلی سان کیشی ، آللاه او کیشی لره رحمت ائله سین " دئدیم ! 
آمما اوره‌گیمدن چوخ اؤزلم‌لر، حسرت لر و دویغولار کئچدی ! 

او بی بوگون تاکسی سوروجوسو اولموشدور و گئجه گوندوز قاچا قاچدایدی ! آمما هئچ واخت یئتیشه بیلمه‌ییردی ! frown ifade simgesi 
توپلومدا اولان ساختا ، آنلامسیز و بوش قوراللار گؤزومون اؤنوندن کئچدی ! 
آتاسینین نه‌یی دوشوندویو و اوشاغینین اوشاخلیق ائله‌مه‌سینه قارشی دورماسینی دوشوندوم !!! اؤزومو قاندیرا بیلمه دیم !!!
توپچولارین میلیاردلار پول - پارانین یئر به یئر ائله‌مه‌لری و بو کیشی‌نین هله ده تاکسی سوروجوسو اولماسی گؤزومون اؤنوندن کئچدی ! 
و بیر چوخ بونلارا بنزه‌ر آجی دوشونجه‌لر !
بیلمیرم آدین اخلاق قویام، تربیت قویام، کولتور قویام، یا باشقا هر نمنه ! مینلر اینسانی بو سوروجو عمی جان کیمی‌لرینین یاشاملارین نیسگیللی ائله‌ییب !
هله ده بئچارالار اونلاردان ائتکیله‌نه‌رک شوکور نعمت اینسانلاردیرلار ! 
هله ده بونلار اؤزلری ده او دوشونجه‌لر ایله اؤز اوشاقلارین یئتیریب، بویا باشا چاتدیریرلار ...
و بو آجی ناغیل چوخلارینین یاشامیندا آردیجیل اولاراق آتین چاپدیریر! frown ifade simgesi

(ح.م)

  • حامید مورسلی