آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

سون گؤندری‌لر
سون یوروملار

بیزیم نوعی اینسانیمیز

سه شنبه, ۲۲ ارديبهشت ۱۳۹۴، ۱۰:۳۲ ب.ظ




ایکی آیاقلی، جانلی اولاراق اینسان آدلانانین وارلیغی‌نین بینئوره‌سی دوز اولماسا، دوشونجه‌سی دوغروجا بیچیملنمه‌سه، یاشاییشیندان اوماجاقلاری بللی اولماسا، اینسان حاقلارینا دیلده دئییل عملده سایقی دورماسا، ماکیاوئلیستی دوشونجه‌لرینه یییه‌له‌نیرسه ، آشیری شریعت‌چی یا آشیری آتئیست اولورسا، بیر گوج ألده ائتدیکدن سونرا سادجه بیرئی‌سل عقده‌لرینی قاباردیب و سادجه اونلارین اولاشیلماسی اوغروندا چالیشماغی اولورسا، منافع أسینتیلری هانسی یؤندن أسیرلرسه او یؤنه ساری اوز دؤنده‌ریرسه، آلینماق دردینی چؤزمک اوچون هرهانسی قاپینی چالیب اورایا سیغینماقدان واز گئچمیرسه، اخلاق قوراللارینی اؤزونو گووه‌نلی ساندیغی یئرده آیاغی آلتینا آتیرسا، یاشامیندا یاشاماغینا بیله فلسفه‌سی اولمورسا، دالغالار اوزه‌رینده چؤپ کیمی، کؤپوک کیمی بوردان اورایا، او داشدان اوبیریسی داشا چیرپیلیب، بو ألدن او آغیزا قالیب، سونو بوشلوق، یوخلوق، ایزسیزلیک کیمی‌یه چاتیب، سانکی یوخموش کیمی دورومونا یئتیشمه‌سی قاچیلماز اولاجاقدیر.

منصور حللاجا چوخلاری داش آتدیلار، آنجاق سادجه اؤز دوشونجه‌داشی کَسسَک آتاندا آغلادی؛ سوروشدولار بس ندن داشلارا آغلامادین بو ایچی بوش کسسه‌یه آغلادین؟

منصور ایسه جاوابلادی: اونلار بیلمیرلر نه اوچون داش آتیرلار، بیلگی‌سیزلردیرلر. آنجاق بو کَسسَک آتان منیم اؤنجه‌لر دوشونجه‌داشیم اولاراق بیله‌رک‌دن، قورخوسوندان، اونو دا بو دوروما گتیرمه‌سینلر دئیه بو ایشی گؤرور، بودور منی آغلاتدیران.

نئچه آی قاباق، اؤنجه‌لر اونونلا دوشونجه‌بیر اولدوغوم  یول یولداشیمی خیاواندا گؤردوم؛ سؤز گلدی میللی مسئله‌لره یئتیشنده " أه بابام سن ده کی هله بو پان تورکلویوندن أل گؤتورمه‌ییب‌سن" دئدی. منیم ایسه گولوشوم دوداغیمدا قورویب داها هئچ نه دئمه‌ییب سانکی اوره‌ییمین باشیندان بیر قامچی چکمیش‌لر کیمی ساغوللاشمامیش اوندان آیریلدیم. ایکی گون سونراسی گؤندردییی بیر چیلخا توهینلی مئساژلا "لُر"-لارا سایقیسیزلیق ائتمیشدی. من ایسه جاواب یازدیم سیزی تانیمیرام؛ لوطفن بئلنچی مئساژلاری منه گؤندرمه‌یینیز.

نه‌سه؛ بوگون همین آدام بیر ایشی دوشدویوندن دولایی زنگ آچمیش‌دیر. بئلنچی اینسانلار آدامی سادجه ایشلری دوشنده یوخلارلار؛ اؤزو ده سنین یوخو دامارینی بیلدیکلرینی ساندیقلاری اوچون سنی اؤزلری تانیدیقلاری ساندیقلاری آدام کیمی دانیشدیرماغا باشلارلار.

هرنه، دئمیشم سیزی تانیمادیم! اؤزونو تانیتدیردیقدان سونرا مئییل‌سیز اولاراق دانیشمیشیق. هارداسان سورومون جاوابیندا: جنوب‌دایام؛ بو قره‌قوره‌لرین ایچینده، دئدیم بیر آغ اینسان گؤرسونلر، همین خلیج عربی‌نین یانیندایام دا!

یئنه بو سؤزلری ائشیتدیکدن سونرا ناراحات اولوب جئب تئلئفونومو قاپاتدیم! بوندان باشقا بیر ایش ألیمدن گلمیردی ذاتن.

  • حامید مورسلی

یوروملار (۳)

  • بهنام عظیمی
  • سلاملار
    ایلک دفعه وئبلاقینیزا گیردیم و 8 مطلبینیزی دورمادان اوخودوم، گؤزل یازیسیز.
    بوندان بئله مودام باش چکیب گؤزل یازیلارینیزدان فایدالانمالییام.
    سیزه اوغورلار آرزیلاییرام.
    یانیت:
    سالاملار قارداش؛
    اؤنجه چوخ خوش گلیب سیز؛ سئویندیم ده‌یر وئریب اوخویوب، یورومونوزو یازیب سیز.
    نئچه گوندور ألیم یازماغا قیزمیر، بلکی بو گونلر یئنی دن باشلادیم.
    سیزین ده گؤزل دوشرگه‌نیز وار؛ اؤنجه‌لر باش چکمیشیدیم؛ یئنه سئوه‌ سئوه باش چکرم. ساغ قالین.

    گؤزل یازین بو شعری خاطیرلاتدی منه:


    کونول وفاسیز اولان نازلی یـــــاره یالوارما،
    نه اعتبــــار اونـــــــا؟ بی‌اعتبــاره یالوارما!

    داریخما یاخشی – یامان روزگاریمیز کئچه‌جک،
    بو بئش گون عؤمره گؤره روزگــــــــــاره یالوارما!

    سنین ده بیر گون اولار نوبهارین، ای بولبول،
    بو ذوق سوز، بو صفاسیز بهـــــــاره یالوارما.

    دوشنده موشگوله، بیر اهل حاله دردین دئه،
    علاجین اوندادیر، اوندان کنـــــــــــاره یالوارما!

    فقیره، عاجیزه، مظلومه احتیرام ائیله،
    عدویه، قان ایچنه، ظولم‌کاره یالوارما !

    وطن یولوندا اولوم مرد اوچون سعادت دیر،
    حیــــات اوچون فله‌یه – کج مداره یالوارما !

    موخالف اهلینه باش ایمه، سن ده منصور اول،
    "انا الحـــــق" اوسته چکیلسنده داره، یالوارما !

    نه اولدو دوولتی جمشید، مولکی ایسکندر؟
    نه تــــــــــاج‌داره نه بیر شهریـــــــاره یالوارما !

    اگر حیاتینی، ‫#‏واحد‬، خوش ائتمک ایستیرسن،
    نه گول جفاسینی چک، نه‌ده خــــــاره یالوارما.



    یانیت:
    چوخ چوخ یاشا وحید بی نریمان جنابلاری، گؤزل شعر اوچون تشککورلر.
    عزیز یولداش و دؤشونجه داش حامید بئی

    تأسف لر اولسون کی بو گؤنلرده ساغلام فیکیرداش تاپماق و اونا گوونماق هئش ده راحات دئیلمیش. چؤخلی اینسان لار، حتی یوکسک تحصیل آلمیش اینسانلارین ایچینده بئله، یاشاماق فلسفه سی اولمادان، هئش بیر دؤشونجه یه صاحیب دئیللر. بویله جه، یئل هر طرفه اسدی، بونلاری اوزو او طرفه اسه جاقمیش. چؤخداندی یازمیشیدیم کی بیزلرده مین لر ایل قره استیبداد گئچیردن بیر میللت، مین لر ایل واسطه سی له اوز دؤشونجه سی نه صاحیب اؤلمایان و اوز دؤشونجه سینی گیزلدماق زوروندا قالان بیر میللت، هله مین لر ایل گرک ماکیاولیسم و ایکی اوزلوقا معروض قالا. یالنیز دؤشونجه و مستقیل دؤشونجه صاحیب اولان اینسانلار، یول گؤرسدماقدان باشقا بیر چاره سی یوخموش. 

    ساغولونوز. هممیشه کیمی یازدیغینیزدان فایدالاندیم.
    یانیت:
    چوخ ساغ اولون عزیز یاور مشیرفر جنابلاری؛ سیزیله یولداش اولماقدان دولایی چوخ سئوینیرم؛ اؤزومو موتلو سانیرام.
    ارسال نظر آزاد است، اما اگر قبلا در بیان ثبت نام کرده اید می توانید ابتدا وارد شوید.
    شما میتوانید از این تگهای html استفاده کنید:
    <b> یا <strong>، <em> یا <i>، <u>، <strike> یا <s>، <sup>، <sub>، <blockquote>، <code>، <pre>، <hr>، <br>، <p>، <a href="" title="">، <span style="">، <div align="">
    تجدید کد امنیتی