آنی‌لار دوشرگه‌سی

بیلدیینیز کیمی فیرانتس کافکا آلمانجا یازان چک اسلوواکی'لی یازاردیر. کافکا دئمک اولار پست مدرن یازار ساییلیر. نییه کی یازیلاریندا سنت (اؤرنه'یین دین) و مدرنیته'نین (اؤرنه'یین قانون و نوین حکومت'لر) یاراتدیقلارینا الیشدیرل یاناشیر. و یازیلاریندا شخص چوخ محوریت و اؤنم داشییر تا توپلوم. 
کافکانین اؤزل دیلی، اؤزل دوشونجه'سی و اؤزل یازی طرزی وار. بو اوزدن کافکانی منیمسه'مک ایسترسه'نیز اصلی دیلده اوخوساز داها یاخشی اولار آنجاق نه یازیق کی بوایشی گؤرمک بیرآز چتین ایشدیر.
محاکمه آدلی ناقیص اولان کیتابی بیر "آقای کئی" آدلی کیشینین اؤزو بیلمه'دن نه اوچون موحاکیمه اولماسینین ریوایتی دیر. آقای کئی'یی موحاکیمه ائدن قاضی یا اوستون گوج هئچ زامان گؤزه گؤرونمور. چئوریلمه رومانینا تای ناغیلین قهرمانی یوخودان آییلیر و بیر واهی و بللی اولمایان سوچلامایا گؤره، گلن یکشنبه موحاکیمه اولمایا چاغریلیر.
آقای کئی اؤنجه اؤزونو سوچسوز ساندیغی اوچون بو اولایی اومورسامیر؛ آنجاق گئت گئده ایش جیددیله'شیر. بیر وکیل توتور، سونرا وکیله ده گوونه بیلمه'دییی اوچون اؤزو موحاکیمه سوره'جینین ایشلرینی آلیر الینه. بیر چوخ دنه'ییم، دارتیشما و دانیشیقلاری اولور و... (آردینی کیتابدان اوخویارسینیز)
بو کیتاب دئمک اولار دین، دین اوزوندن یازیلان یاسالارا، عدالت، قانون، محاکمه سوره'جی، جرم، جزالانما و بوکیمی قونولارین نقد و الیشدیریسینده یازیلمیش بیر اثردیر. آنجاق کافکانین یولداشی "ماکس برود" اونون وصیتینه دایانسایدی بو کیتاب گرک یاندیریلمیش اولاردی. بئله'لیکله کیمسه اونو اوخویا بیلمه'یه'جک'دیر. آنجاق یئنه وورغولاماق لازیم'دیر بو کیتاب ناقیص دیر بلکه کافکا ساغ قالیایدی سونرالار بونو کامیل یاریب سونرا کؤنوللو اولاراق اؤزو یاییملاردی.
هر حالدا نه موتلو بو کیتاب کافکادان سونرا یاییلدی و بیر چوخ کیتاب اوخویان و کیتاب سئونی اؤزونه حئیران ائتمه'یی باشاردی. منجه بو کیتابی دین'له ایلگیلده اولان اینسانلار، حقوق اوخویان اؤیرنجی'لر، وکیل'لر، قاضی'لر و بئلنچی قونولارلا اوغراشیب اؤزلرینی سیاسی تپگی گؤسترن (کنشگر سیاسی) تانیملایان هر کس اوخومالیدیر. آنجاق دئدیییم کیمی بو کیتابین فارسجا چئویرمه'سی بیرآز یوروجودور. بیرآز دؤزومله اوخوماق گرکیر. یوخسا سیزی تئز یورا بیلن بیچیمده چئوریلیب'دیر.