قوجایلا دنیز
بوتا یاییم ائوی'نین گونئی ادبیاتیندا منجه ایکی اؤنملی و دانیلماز نقشی وار و سورکلی اولاراق واردیر. بیرینجیسی دیلیمیزی نثر ایله باریشدیرماغا چالیشیر. ایکینجیسی ایسه ادبیاتیمیزا و دئمک ادبیات هوسکارلارینا دونیا آدلیم اثرلرینی اؤز تورکجه'میزده دادیزدیریر.
ائله بو ایکی ندن یئتر، جناب محمد صبحدل، بوتا یاییم ائوی'نین سوروملو مودوروندن اؤزل تشکورلر و مینتتدارلیغیمیزی بیلدیریب اورکدن یورولمایاسینیز دئیه'یک کندی'لرینه.
بوتا یاییم ائوی بو بیر ایکی ایلین بویوندا دونیانین آدلیم یازارلاریندان گؤزل کیتابلار بسته'لییب اوخوجولارا سونوبدور. او جومله'دن ائرنئست هئمینگوئی'یین "قوجایلا دنیز" آدلی، آدلیم اثرینی تانیتدیرماق اولار. بو کیتابی مناف سلیمان اوو آذربایجان تورکجه'سینه چئویریب، خانیم لیلا ایبراهیمی ایسه عرب آلفابئسینه کؤچوروبلر.
کیتاب بیر قوجا بالیقچی'نین قوجایکن گونلرجه اووسوز، هم ده یورغون آرغین دنیزدن قاییتماسینین ریوایتی دیر. قوجانین بیر گنج یاشلی شاییردی(شاگردی) و دئمک اولار تکجه دوستو دا وار. بیر گون قوجا نئچه گون بالیقسیز دنیزدن قاییتدیقدان سونرا تصمیم توتور تک باشینا بیرآز اوزاغا گئدیب شانسینی اورالاردا دا دنه'سین. چوخ چتینلیکدن سونرا بیر ناققا بالیق تورونا دوشور. او بالیقلا نئچه گون آجیبان سوسوز موباریزه ائدیب سونوندا اونا قالیب گلیر. آنجاق بالیق چوخ آغیر اولدوغو اوچون بالیغی گمینین ایچینه چیخارتمایا گوجو یئتمیر. بالیغی گمی'یه باغلاییب لیمانا ساری دؤنور. (و...)
بو کیتابی دنیز و بالیقچلیقلا هئچ کولتورل یاخینلیغی اولمایان بیزه تای میللتلرده، یازارین گؤزل و بدیع صحنه'لر یاراتدیغیندان دولایی منیمسه'نه بیلیر. چوخ آخیجی و گؤزلجه'سینه ده تورکجه'میزه چئوریلیب. اومارام هر کس بو گؤزل و بالاجا رومانی اوخویوب اولدوقجا ذؤوق آلسین. بو کیتابی تورکجه کیتاب ساتان یئرلردن الده ائدیب اوخویا بیلرسینیز.
ح. م
- ۹۴/۰۷/۱۱