آنی‌لار دوشرگه‌سی

"آیریلارمی کؤنول جاندان؟ آذربایجان آذربایجان"

بوگونو اونوتماق اولماز، ان آزی بیز بوگونو اونوداسی دئییلیک.

بیرینجی ائپیزوت:

 آخی بئلنچی بیر گونده قاراداغ اؤلکه'سینه، اؤلوم مله'یی یئر ترپنمه آراجیلا حوزون، یاس، آیریلیق، یالنیزلیق، یئتیملیک، چوخاسینی سریب گئتدی. آییردی آنانی کؤرپه بالادان، آروادی اریندن، سئوگیلی آداخلی'لاری بیری بیریندن. نئجه ده کوبوتجاسینا، رحمسیزجه'سینه بوایشی گؤردو. آنجاق کؤنلوموز فله'یین وئردییی بلاسینا گؤره یارالانسادا پارچالانمادی.

بیلیرسینیز هاچان پارچالاندی؟ اونودولموش اولدوغوموزو ساندیعیمیز چاغدا، تاوانلارین تورپاغی آلتیندا یالنیزجاسینا جان وئردییمیز آن. اؤزوموزو گؤزل دونون چیرکین یاماغی ساندیغیمیز و دویدوغوموز آن. مه'لر قالمیش قیزجیغازلاریمیزی گؤز یاشلاری قورتولوب کیمسه هارایلارینا های وئرمه'دییی آن.

آنجاق بیز یئنه باش قالدیردیق. آخی ائل گوجو سئل گوجو دئمیشلر. بیز کیمسه'نی گؤزله'مه'دن، اوره'ییمیز اونلاردان سینسادا بیله، اؤزوموز یالنیزجاسینا تام گوجوموزله قاراداغیمیزین هارایینا گئتدیک. یئرده قالمیش کول'لریمیزدن یئنه حایات نغمه'سی گلدی. بیرلیک سسی. قول قولا وئردیک. وطنداشلاریمیزا ساریلدیق. یارالارینا توخدارلیق وئردیک. داها اوجادان باغیردیق: بیز سیزی اونوتمامیشیق. 

اونلار سیزی اونودسالار دا. خنده بازار یولا سالسالاردا. سایماسالاردا. 

گئرچکده ده بیز سایماسایدیق قاراداغ چؤکردی. قاراداغ داغیلاری. قاراداغلی محو اولاردی. آنجاق قاراداغلی دا گؤردو، سون دایاناجاغیدی ائله همین اورمولو، تبریزلی، زنگانلی، ماراغالی، سولدوزلو، ماکی'لی، ساوه'لی و... وطنداشی. 

قیش گلدی، سویوغلوغون چولغالادی، سون گوجونو ووروب لابید قالیب اوزو قارا گئتدی؛ چونکو قاراداغلینین اوره'یی قیزمیشدی داها. اومود بولاغی جوشموشدو. سن، من، او وارکن قاراداغلی اؤزونو یالنیز دویماییردی. بوردان آلدیغی درس'لری ده اونوتماق ایسته'میردی.

******************************************

ایکینجی ائپیزوت:

بئلچی بیر گونده وارلیق درگیسی'نین سوروملو مودورو، ایران تورک'لرینین معنوی آتاسی، دیل اؤیرتمن'لری، تاریخ اوزمانلاری، بیلیم و فلسفه بیلگینی، بوتون حسرتلر و اؤزلملریله، خسته'لیک قارشیسیندا حیاتدان گؤزون یومدو. قوجالیقدان چلیک واسیطه'سیله آیاقدا زورلا  دورا بیلن کیمسه، ایللر اؤنجه وئردییی سؤزدن دؤنمک ایسته'مه دیر. یورولمادی. قلمی ایله قارشیسیندا نهنگ هوندورلویونده اولان فاشیزم و نئو فاشیزمله گوجونون یئتدییی قدر ووروشدو. گوجو گوجلرینه یئتمه'سه ده آنجاق یئنه باشدان باشلادی. سوسوز و آج قالان گونو اولدو، آنجاق اومودسوزلشن گونو اولمادی. آچیلان سحری سانکی آچیق آیدین گؤروردو.

نیسگیللی اؤلومونه باخمایاراق اؤلوموندن قورخانلار دا آز دئییل دیر. قبیر داشی'سینین  سیمگه'لنمه'سیندن قورخانار تبریزده، اؤزو وصیت ائله'دییی یئرده گؤمولمه'سینه ایزین وئرمه'دیلر. داها توتوملار آچیق آیدین اورتایا قویولدو. بیلمه'یه'نلر بیله اؤز آرالاریندا "آخ نییه؟" سوروسونا جاواب آختارسالاردا چوخ دوزگون و ایقنا ائدیجی یانیتلار الده ائده بیلمه'دیلر. یئنه اوزو قارالیق کؤموره قالدی. یئنه اینسانلارین ایچلریندن وولکانلار باش قالدیردی. داها کیم کیمه دیر دورومونا جاواب تاپدیلار. یئنه اؤزلرینین چیرکین یاماق اولدوقلاری گؤزلرینین اؤنونده جانلاندی. هله ده بو آتش سؤنمه'ییب؛ کولون آلتیندا بیلیمله، دوشونجه'یله، داها شوعارلا یوخ عمل'له کؤزه'رنلر وار. بیر گون بو کؤزه'رنلر دوشمانین باغرینا هوندور اودلار سپه'جک لر. داها اونلارا یوخ دئیه'جک'لر. کؤله'لییه سون قویاجاقلار. کسین او گون گلیب چاتاجاق. آنجاق زامان لازیم. تلسمک چؤزوم دئییل بیلیم چایلاریندان دولغونلوقلا دؤزوم گرکیر.

(ح. م)