کافکانین وصیت‌نامه‌سی
(فرانتس کافکانین دوغوم گونو موناسیبتینه گؤره اونون وصیت‌نامه‌سین اؤز دیلیمیزده، حوضورلاریزا چاتدیریرام؛ اومارام به‌یه‌نمیش اولاسیز)
عزیزیم ماکس، یقین کی، بو دفعه من آرتیق یاتاقدان قالخا بیلمه‌یه‌جم؛ بیر آی ایچینده معروض قالدیغیم حسبه‌دن سونرا آغ جییریمین ایلتیهابی بوتؤولوکله اولاناقلی‌دیر. بو باره‌ده یازماغیمدان اولارغی ائتکی‌یه مالیک اولسا دا بیله ستلجمین قاباغینی آلماقدا باشاریسیز دیر.
تؤره‌نیلمیش دورومدا منیم ایندییه‌کیمی یازدیقلاریما گؤره وصییتیم بئله‌دیر:
بوتون یازدیقلاریمدان یالنیز بو کیتابلار اعتیبارلی‌دیر: "حؤکم" ،"اوجاقچی" ،"چئوریلمه" ، "محکوملار کولونییاسی" ،"کند حکیمی" و "قولو دار" نووئللیاسی. ("گؤرونگولر"ین مؤوجود اولان بیر نئچه نوسخه‌سی قوی قالسین، اونلاری محو ائتمک اوچون هئچ کیمی آرتیق اینجیتمه‌ک ایستمیرم، آنجاق اونلارین ایچه‌ریسیندن هئچ نه یئنیدن چاپ اولونمامالیدیر.) من دئینده کی، او بئش کیتابی و نووئللیانی اعتیبارلی ساییرام، بونونلا هئچ ده اونلارین بیرداها نشر اولونمالارینی و گله‌جک اوچون ساخلانیلمالارینی دیله‌دیگیمی نظرده توتمورام، عکسینه، اونلار تام شکیلده سیرادان چیخیلسالار سا، بو، بوتؤولیکده منیم ایسته‌گیمجه اولاردی. بیر حالدا کی، اونلار واردیرلار، من سادجه اولاراق اونلاری ساخلاماق آرزیسیندا اولانلارا انگل تؤرتمک ایسته‌میرم.
یازدیغیم قالان بوتون شئیلر (قزئتلرده چاپ اولونانلار، أل یازمالار، یاخود مکتوبلار) تام ایستیثناسیز اولاراق یاندیریلمالیدیر؛ اونلارین هامیسی خواهیشله، میننتله – نه‌یین باهاسینا اولورسا، اولسون گؤندریلن شخص-لردن (شخص-لرین بیرچوخونو اؤزون تانییرسان، صؤحبت أن تمل حاقیندا گئدیر ، خانیم فئلیسه اِم*،خانیم یولیه ویرتسک-ین اؤنجه‌کی آدی ** و خانیم مئلینا پولاک *، علی‌الخصوص پولاک-دا اولان بیر نئچه دفتری اونوتما) الده اولونمالی و تام ایستیثناسیز اولاراق هامیسی یاخشی اولاردی کی، اوخونمادان یاندیریلسینلار (من سنه اونلارا باخماغی قاداغان ائتمیرم، آنجاق، البتته سن بونو ائتمه‌سه‌یدین منیم اوچون داها خوش اولاردی، هر حالدا باشقاسی اونلارا باخمامالیدیر)، – تام ایستیثناسیز اولاراق هامیسی یاندیریلمالیدیر بو اوزدن سندن خواهیش ائدیرم بونو مومکون قدر تئز ائده‌سن.
فرانتس
أته‌ک یازی :
Felice Bauer کافکانین بیرینجی آداخلی سی کی Moritz Marasse ایلن ائوله‌نندن سونرا ائشینین آدیلا Marasse چاغیریلیردی.
* Wohryzek Julie کافکا اونون ایکینجی آداخلی‌سی ساییلیردی بیر حالدا کی آماجلاریندا واریدی 1919 نوامبر آییندا ائوله‌نه‌لر. آنجاق کافکانین عاییله‌سی بو ائولنمک ایله شیدتله قارشی اولدوقلارینا گؤره 1920 جولای آیی آداخلیلیغی آرادان قالدیردیرلار.
* Milena Jesenská ؛ Ernst Pollak ایلن ائولندیغیندن سونرا ائشینین
آدیلا پولاک آدلاندی. او کافکانین چئک‌جه‌یه چئویرمنی ساییلیردی و کافکا ایله اؤزل و رومانتیک ایلیشگیسی واریدی.
حامید مورسلی 13 تیر 93
