آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

سون گؤندری‌لر
سون یوروملار

هر نه‌دن اؤنجه‌کی آچیقلاما: بونلار منیم اؤزل دوشوندوکلریمدیرلر، اولا بیلر بوتؤولوکله یا بیر قیسمن دوغرویلا یانلیشین قاریشیمی اولاراق یانلیش ساییلالار.

¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥؛

دیلیمیز آذربایجانجا، آذربایجان تورکجه‌سی یوخسا ائله تورکجه‌دیر؟؟!!

بیر سیرا آذربایجان دوشونورلری بلکی دئمک اولار دیلیمیزین اوزه'رینده داها آرتیق حساسیت گؤستریرلر. بو اؤزلویونده چوخ گؤزل و آلقیشا لاییق بیر تاویرین سرگیلنمه'سی دئمک'دی. آنجاق نه یازیق بو سایین بی'لرین تکجه آماجلاری دیلیمیزه گیرن تورکجه سؤزلری آذربایجانجالاشدیرماق فیکیرینده اولماقلاری'دیر. بونا دایاناراق دا اؤزلرینه یازیلمامیش بیر گؤره'و تعریفله'ییب'لر دیلیمیزدن بئله'جه، تورکجه'نین قابا ایزلرینی سیلسینلر دئیه هئچ ایشدن اسیرگه'میرلر.

من گونئی آذربایجاندا یارانمیش تورکجه'نی اونلارین معیار دیلی ساییلان دیلین قارشیسیندا چوخ آری و داها چوخ دورو دیل بیلیرم. مکتبسیز، یازیلی و گؤرونتولو مئدیاسی اولمایاراق بیله. آنجاق قورولوش باخیمیندان بیزیم ده شفاهی دیلیمیزین آخسارلیقلاری گؤز اؤنونده'دیر. تکجه سؤز بو اولا بیلر بیزیم آنلاییشیمیز بو اولمالیدیر دیلیمیز تورکجه'دیر و بو تورکجه'نین بللی دیل بیلگیسی، قایدا قورالی وار، بیز ده اونا سیغمالی'ییق. موقاییسه مقامیندا دیلیمیزه آذربایجان تورکجه'سی دئمک اولار. بئله اولماسین آنادولو تورکجه'سی'نین تورونا دوشمه'مک اوماجاغیلا فارسجا، روسجا و عربجه کیمی یابانجی دیل'لرین تورونا دوشک. هر نه ده اولسا بیرینجیسی تورکجه'دیر، آنجاق ایکینجی دیل'لر بیزیم دیلیمیزین تاریخی دوشمانی و وارلیغینی یوخ ائده بیلن دیل'لر ساییلیرلار.
دیل بیلگی'لر باخیمیندان دا اونلارین دیل'لری بیزیم دیل دایانان کاتاگوریده یئر آلماییر. نه کؤکوموز بیردیر نه ده دیل قورولوشوموز. اونلاردان گلن ضرر ائتگیسینده'دیر ایندی بیزیم دیل'لریمیز بیر بیریسیله یابانجیلاشیرلار. بیزلر ایسه یانلیشجاسینا تورکجه'نی بو پوزونتویا باش ندن بیلیریک. بیر حالدا کی فارسلاشماق و روسلاشماق سیاست'لرینی اونوداراق اؤزوموزو تورکجه'نین هئژمونیسی آلتیندان قورتارماق فیکرینده'ییک.
قوزئی آذربایجان و گونئی آذربایجان تورکلری'نین اورتاقلیقلاریندان ائله دانیشیرلار اونون یانی سیرا تورکییه تورکلرینی بیزدن آیری اولدوقلارینی گؤسترمه'یه ائله چالیشیرلار سانکی بیرینجیسی بیزیم دوغما و ائکیز قارداشیمیز، او بیریسی ایسه بیزیم گونوموز (رقیب)، محو ائده'نیمیز، اورتاق دوشمانیمیزدیر. بو اوزدن بو آماجلارین یئرینه یئتیرسینلر دئیه ایستالین'ین چئشیدلی آدلارین قوللانماسیندان توتون ریضاخان'ین یارادان ائلینه و آسئمیلاتور سیستم'لی مکتبینه کیمی منیسه'ییرلر، آنجاق تورکجه'نین آدینی قوللانمامیزی سیندیره'بیلمه'ییرلر. 
کئشکه بو اورتاقلیقلاری قابارداندا تورکییه'نی بو قدر یابانجی گؤستریب قوزئی آذربایجانی دا بو قدر دوغما گؤسترمه'یه چالیشمازدیرلار. بلکی تاریخ بویوتوندا هئژمونی'لری آراشدیراندا چوخراق جوغرافییایی آیریشمالار تمل یوکوملولویو داشیالار. خوی، سلماس، اورمو، تاریخ بویو آنادولویلا ایلگیده ایمیش، بو اوزدن اونلاردان دا ائتگی'لنیرمیشلر. اونلارین یانی سیرا بیر قاراداغلی، قوزئی آذربایجان و بیر همدانلی تورک، تئهراندان گلن دالغالارین ائتگیسینده'یمیش طبیعی و البته جوغرافییا ائتگیسی زوروندا اولاراق. بو ائتگیلنمه'لری ده آییرد ائتمک بیرآز زور ایش ساییلا بلکی.

اصلینده گرکلی'دیر گونئی آذربایجانی آراشدیریب بورانین دیلینین اوزه'رینده تدقیقات گئده. بورادا عمومییتله کوتله دیلینی تورک دیلی بیلیری. دیل'لرین اورتاقلیق یا آیریلیق بؤلوملری حاقدا دا دیلچی'لر یوروم یازا بیلرلر آنجاق دئمک اولار هله ده واردیلار بیر چوخلاری ائله همین دیللچی'لرین بیلیمسل آراشدیرمالارینی دا شصت ایله رد ائدیب دیل'لریمیزین آیری اولدوغونو وورغولاییرلار نه یازیق. بیر حالدا کی یوزده 99 اورتاقلیقدان بیله'رکدن گؤز یومورلار.

هر حالدا او تایدا دانیشیلان بیر سیرا ندنلره گؤره ساختالاشمیش آذربایجانجا، گونو گوندن تاریخی باغلانتیلاریمیزین اولدوغوندان دولایی بیزیم دیله ده ضرر یئتیریر و بو دانیلمازدیر. نئجه کی ماهواره سیگناللاری'نین آراجیلا دیلیمیزه یونتانمامیش گیرن، دیلیمیزین سوزگه'جیندن کئچمه'میش، اویغونلانمایش ایستانبول آغزیندا دانیشیلان تورکجه سؤزلری'نین گیرمه'سی'نین پیس ائتگیسی واردیر دئمک.
تورکجه دیل بیلگی'سینه دایاناراق آذربایجان دیلی آدیلا تانینان دیل، ایندی آغیر و دهشتلی دورومدادیر؛ بئله'جه گونو گوندن یابانجیلاشاراق کؤکو تورکجه'دن آیریلیر.
بو دیل یا روسجادان ائتگیله'نیب یا فارسجا و عربجه'دن، آنجاق اورانین سیاسی باشچیلاری تورکجه'نی او دیله ضررلی گؤروب آنادولو تورکجه'سینده موزیک یایمیرلار تئلئویزیون کاناللاریندا، تورکییه فیلم'لرینی اؤزلری دئمیشکن زوروملو اولاراق ترجومه(!) ائتدیکدن سونرا آذربایجانجایا دوبله ائدیرلر و... آنجاق بوللوجاسینا فارسجا، روسجا، عربجه سؤزلرینه، بعضن قورولوشو پوزاراق دیلیمیزه گیرن تئرمین'لره ده تپگی گؤسترمیرلر. بو گئرچکدن ده اوزونتولو دورومدور دئمک. بونا دایاناراق بیزیم هانسی سونو بللی اولمایان قارانلیقلارا سوره'کلندیکلریمیزین گؤسترگه'سی'دیر.
بونلارا داها چوخ اوزولوب، بونلارین چؤزولمه'سی و بو ترس آنلاییشین آرادان گئتمه'سینه ده دوشونمه'لییک. ان آزی بیز اونلارین گئتدیکلری یانلیش یوللاری و سئچه'نک'لری گئتمه'مه'لییک.

بونا دیققت ائدین من ده وورغولاییرام تورکجه اولان دیلیمیزین موقاییسه مقامیندا آدی آذربایجان تورکجه'سی'دیر. و بودیلین اؤزونه اؤزل آغیزی، سوزگه'جی، دیل قایداسی وار. هر بیر باشقا آغیزلاردان گتیرمه یا یئنی یارانمیش سؤزلرده ده بو قایدایا دیققت ائتمه'لیییک. ائله'جه دیلیمیزین اؤزگونلویونو الیندن آلامامالی'ییق. بو اؤزگونلویو پوزانلارین قارشیسیندا دا سس'سیز اولمامالی'ییق.

هله ده واردیلار بیزده او کیمسه'لر جوغرافیایی یورد و اؤلکه آدی اولان آذربایجاندان یارارلانیب بیزه قوندارما ائتنیک آدی سئچیب قوللانماق ایسته'ییرلر. بلکی بیزلرین بیر چوخوموزون دا باشلیجا یانلیشیمیز بو اولا بیله، ائتنیک کیملیییمیزی جوغرافییا و یورد کیملیییمیزدن آییرد ائده بیلمه'ییریک. یئری گلدیکده جوغرافییا آدینی هم دیلیمیزه هم کیملیییمیزه هم ده ائله یوردوموزا بیر یئرده البته یانیلمیش اولاراق قوللاناق.

  • حامید مورسلی

یوروملار (۰)

هئچ بیر یوروم ثبت اولماییب
ارسال نظر آزاد است، اما اگر قبلا در بیان ثبت نام کرده اید می توانید ابتدا وارد شوید.
شما میتوانید از این تگهای html استفاده کنید:
<b> یا <strong>، <em> یا <i>، <u>، <strike> یا <s>، <sup>، <sub>، <blockquote>، <code>، <pre>، <hr>، <br>، <p>، <a href="" title="">، <span style="">، <div align="">
تجدید کد امنیتی