آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالییق دئیه دوشونورم. بو دوشرگه‌ده اؤز آنادیلیم اولان تورکجه‌ ده یازاجیام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب و بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی دیر :)
سیز ده دیریلیغینیزی بیلمه‌ک ایسته‌ییرسینیزسه یازماغا باشلایین !
یادیمدان چیخمامیش: سلام، خوش گلیب‌سیز :)

سون گؤندری‌لر
سون یوروملار

سونگو دؤیوشو

سه شنبه, ۱۴ مهر ۱۳۹۴، ۰۳:۴۷ ب.ظ

آلئکساندر قرین. عسگرین فیکیرلری
-"عسگر کیملیییم عادی کیملیییمدن آرالانیب، آرتیق منیم ایسته‌ییمدن آسیلی اولمایاراق، قاچماقدا ایدی." 
________________________________________
آلئکساندر قرین(ائوسکی) 
سونگو(سرنیزه) دؤیوشو 
(حئکایه) 
(روس دیلیندن اوستاد آراز گوندوز چئویریبدیر) 
کؤچورن: حامید مورسلی
________________________________________
بوتون گئجه‌نی گؤزومو یوممامیشدیم. 
سؤزون دوزو، قورخموردوم، آنجاق ایندییه‌دک سنگرده دالدالانیب اوزونو گؤرمه‌دیییم دوشمن‌له آتیشماقدان بوسبوتون فرقلی اولان، اونونلا بیرباشا اوز-اوزه گله‌جه‌ییمی دوشوننده برک هیجانلانیردیم. 
ایندی‌دن او آنلاردا هانسی دویغولاری کئچیرجه‌ییمی بیلمک ایسته‌ییردیم... 
بودور، تنگه‌نفس، توفنگیمین اوجونا برکیتدیییم سونگونو ایره‌لی یؤنلدیب، منیمکی کیمی ایتی سونگوسونو اوستومه توشلایاراق قاچیب گلن دوشمنه ساری جومورام... بیز قارشیلاشیب توققوشوروق...
آنجاق منیم یازیق فانتازییام بوندان او یانا گئده بیلمیر، اوره‌ییم ایسه آنلاشیلمازلیق ایچینده قالیب سیخیلیردی.
هاوا ایشیقلاناندا های-کویلو دؤیوش حاضیرلیغی باشا چاتدی و بیز بوینوزلاشاجاغیمیز آنین گلیب چیخاجاغینی گؤزله‌مه‌یه باشلادیق. 
اؤنجه سیرالاریمیزی دوزلدیب، سنگرده دالدالاناراق دوشمن‌له آتیشدیق، داها سونرا بیزیم توپلار دوشمنی مرمی یاغیشینا توتاندان سونرا، دوشمن سنگرلرینه سونگو ایله هوجوم ائله‌مک امری وئریلدی.
بیز سنگردن چیخیب قارماقاریشیق "اورا!" قیشقیریقلاری ایله کَلَک‌اؤتور چؤللوک‌له توللانا-توللانا ایره‌لی‌یه جومدوق. 
قارشیدان گوجلو کولک اسیردی؛ اوستوموزه یاغان گولله‌لرین فیت سسی کوله‌یین ویییلتیسینا قاریشمیشدی. 
من دینمزجه آلمان دؤیوشچولری‌نین دالدالاندیغی سنگره ساری قاچیر، ایندیجه اؤلدوروله‌جه‌ییمی گؤزله‌ییردیم. 
چوخ برک عصب سارسینتیسی کئچیردیییمدن بوتون بدنیم تیتره‌ییردی. ائله بو واخت چوخ غریبه بیر ایش اولدو... 
بیردن منه ائله گلدی، اؤز ایراده‌مین عکسینه اولاراق، بیر آنلیغینا دایاندیم و آز سونرا بوتون بدنیمده سببینی بیلمه‌دیییم بیر یونگوللوک دویاراق یئنیدن ایره‌لی‌یه قاچماغا باشلادیم. 
آزجا اؤنده قاچان بیر عسگر منه چوخ تانیش گلدیییندن، بوتون دیققتیمی اونا یؤنلتدیم. 
بو عسگرین فوراژکاسی (عسگرلیک بؤرکو)، کوره‌یی، چکمه‌لری، قاچیش طرزی، بیر سؤزله گؤرکه‌می و داورانیشلاری چوخ تانیش گلیردی و من دئیه‌سن، بو عسگری چوخدان تانیییردیم؛ اؤزومو عسگره یئتیریب اونون اوزونه باخدیم؛ بو، منیم اوزوم ایدی؛ هه، من، فؤوق‌العاده درجه‌ده گوجلو عصب گرگینلییی کئچیردیییمدن، اؤزومو قیراقدان گؤرمه‌یه باشلامیشدیم؛ ائله بیله‌سن، کیملیییم ایکی‌یه بؤلونموشدو، آنجاق من اؤز عادی منیم‌له بو، عسگر منیم آراسینداکی قیریلماز علاقه‌نی ده گؤروردوم. 
منیم عسگر کیملیییم عادی کیملیگیمدن آرالانیب، آرتیق منیم ایسته‌ییمدن آسیلی اولمایاراق، قاچماقدا ایدی. 
بو پسیخولوژی مومئنت منده آرتیق کیملیییمین بوسبوتون ایکیلی‌یی ایللوزییاسی (توهم) یاراتمیشدی. 
بئله‌لیک‌له ده، من قیراقدان اؤزومه باخیردیم و –نه گیزله‌دیم!–بو آندا، البیاخا ساواشا گیریشدیییم سولغون اوزلو، چوخ چئویک و عاغیللا حرکت ائله‌ین آلمان عسگری‌نین منی اؤلدوره بیله‌جه‌ییندن قورخدوم. 
بو آندا ائکیز تاییما چئوریلمیش دؤیوشچو فانیکووون منیم، عاغیللی و ایراده‌لی اولان کیملییمین ایشتیراکی اولمادان، نئجه باجاریقسیز و ناشیلیقلا ساواشدیغینی گؤروردوم؛ منیم بیرینجی کیملیییم یالنیز مئخانیکی اولاراق بدنیمی حرکت ائلتدیریردی و بو واخت آز قالا ایکی دفعه آلمان سونگوسو ایکینجی فانیکووو دئشیب کئچه‌جکدی، اوندا آنلادیم: 
من ایندیجه ایکینجی فانیکوولا بیرلشمه‌سه‌م و اونون ضربه‌لرینی شوورلو شکله سالماسام، اوندا منیم بیرینجی و ایکینجی کیملیییمین هر ایکیسی محو اولاجاقدیر. 
من بوتون ایراده‌می توپلاییب بونو ائله‌یه بیلدیم، آنجاق بونو نئجه ائله‌یه بیلدیییمی سؤزله آنلادا بیلمیرم. 
او آندان باشلایاراق منیم قولوما گوج گلدی، حرکتلریم چئویکلشدی و من او آنداجا قارشیمداکی دوشمنین ضعیف یئرلرینی گؤرمه‌یه باشلادیم، بیردن یالاندان سنتیرله‌ییب اونو چاشدیرا دا بیلدیم، بیر آنلیغینا دیزی اوسته چؤکوب سونگونو اونون آیاغینا سانجدیم. 
آمانسیز آغری دویان آلمان دؤیوشچوسو، بیر آنلیق، کؤکسونو قوروماغی اونوتدو؛ من ایسه، بو بیر آندان یارارلانیب سونگونو اونون کؤکسونه سانجماغا ماجال تاپا بیلدیم. 
بیزیم اونونلا ساواشیمیز چوخ اوزاندیغیندان، دؤیوش یولداشلاریم دوشمنی قوواراق اوزاقلاشمیشدیلار؛ من آلمان دؤیوشچوسونو اؤلدورندن سونرا قاچاراق اؤزومو اونلار چاتدیردیم و دوشوندوم: 
"من ایندی "اؤزوندن چیخماق" دئییمی‌نین نه دئمک اولدوغونو آنلاییرام... بو چوخ قورخونج ایمیش!"

قایناق: 
http://www.azadliq.org/content/article/27284688.html

  • حامید مورسلی

الکساندر قرین

حئکایه

کؤچورمه

یوروملار (۰)

هئچ بیر یوروم ثبت اولماییب
ارسال نظر آزاد است، اما اگر قبلا در بیان ثبت نام کرده اید می توانید ابتدا وارد شوید.
شما میتوانید از این تگهای html استفاده کنید:
<b> یا <strong>، <em> یا <i>، <u>، <strike> یا <s>، <sup>، <sub>، <blockquote>، <code>، <pre>، <hr>، <br>، <p>، <a href="" title="">، <span style="">، <div align="">
تجدید کد امنیتی