سون اومود
سون اومود
دئییردی سحر یئددی دن گئجه ساعات اووچه کیمی کشتارگاهدایدیم؛ اوردان دا گلیب ایکی ساعات هوشلانیب دان یئری سؤکولمه‌میش ائشیگه وورموشام. هله آللاها مین آیه شوکور منیم بو ماشینیم وار؛ هله جاوانام ایشله‌یه بیلیرم. تکی بو میراثا قالمیشین دا خرجی اولماسایدی. آنجاق اوشاقلاریمی درس اوخویولار؛ اونلارین خرجلرین تاپمالیام. اونلار موطلق اوخومالیدیلار.
دئییردی 80 نفر ایشچیدن، 50 نفر قارا فهله‌ییک، گونه‌موزد ایشله‌ییریک؛ ایش اولاندا ایشله‌دیرلر ایش اولمایاندا دئییرلر خوش گلدیز! تازا ره‌ییسیمیز ده تئهراندان گلمه‌دیر. "ائله آغاجی اؤز ایچیندن قورد یئیه‌ر دئمیشلر-دئییر! سوروشورام نئجه به‌یه؟
دردلی دئیینگن اولار دئمیشلر؛ آچیر صاندیغی تؤکور پانبیغی. دئییر بیزی ساتدیلار قارداش اوغلو، بیزی ساتدیلار!
-عمی سیزی کیم ساتدی؛ نئجه ساتدی؟ هله نئچه‌یه ساتدی؟-دئییرم ماراقلا گؤزلریمی او سیغار توسدوسوندن سارالمیش بوغلارینین آلتیندا یالاما دوداق اولوب چاتدداق باغلامیش دوداقلارینا مین بیر سورغوما جاواب وئرمه‌یینی گؤزله‌دیییم آغزینا تیکیرم.
دئییر نئچه آیدی بیزه یئنی بیر ره‌ییس وئریب‌لر، فارسیستاندان گلیب، ایراق اوزدن بیر ایت اخلاغین بیریدی، سانکی فیل بورنوندان دوشوب. آنجاق کؤپه‌ی‌اوغلولارین مورشودودور! بیزیم بیر حاجی واریمیزیدی یئتیشیب یئتیشمه‌میش اونو چاغیردی اوشاقلارین بوتون جیک-بؤرک‌لرینه کیمی هامیسینی سوروشدو. کیم نئجه آدامدی، کیمین اخلاغی نئجه‌دیر، کیم چوخ دانیشاندیر، کیم زور آلتینا گئتمه‌ین دیر و هابئله. او آغ ایت‌دن منشور اولانلاری باهانا یونتاماغلا بیر نفعیله ائشیگه اؤتوردو. داها قالانلاردا دا چیخار اولمادی سؤزلرینی دئسین‌لر. یئنی‌دن قرارداد گتیردی آرایا. هر نه‌دن ده اؤنجه هامیدان تعهد آلماق ایسته دیر. آنجاق اوولده بیز دیره‌ندیک، قرار اولدو هئچ کیم تعهودو ایمضالاماسین؛ آخی تعهودو ایمضالایان اؤز دیلیندن سؤز وئریردی هر هانسی دورومدا اولموش اولسا دا اعتیراض حاققی اولمایا؛ فرمانداری قاباغینا ییغیشمایا، اؤز آلین تریله قازاندیغی بئش اوچ قیرانی دا بیله ایسته‌مه‌یه حاققی قالمایاجاغیدی. هر زامان پول اولاندا او زامان حئساب کیتاب اولوناجاغیدی.
دئیردی ایکی گون کئچمه‌میشدی اوشاقلارین بیری گلدی دئدی حسن آغا بیلیرسن نه اولوب؟ دئیردی دئدیم یوخ؛ نه اولوب؟ دوغروسو ائله سی...لن بیز اولموشوق؛ تعهودو اوچ نفر ایمضالاماییب: سن، من بیر ده صیاد!
دئییردی قان آتدی کلله‌مه؛ بیلمیردیم اؤزومه یامان دئییم یوخسا اورداکی سارساق-قورخاق ایشچی‌لره. آخی بیزیم بیرلیییمیز اولسایدی بیر کؤپه‌ی‌اوغلو بیزه بیر سؤز دئیه بیلمزدی. نه یازیق کی بو فارس ره‌ییس ایشین یاخشی باشاریرمیش. اوشاقلاری بیربه‌بیر تکله‌ییب هده قورخو گوجویله ایمضالاتدیرمیشدی! داها بیز ده لابیت قالیب ایمضالادیق. اودوکی ایسفندین پولون هله آلا بیلمه‌میشیک.
واللاه زیندگانلیغین خرجی وار، بیلمیرم بونو دوشونورلر یوخسا یوخ؟ ائله دونن تویوغون گلمه‌سی بیرآز آخسادی صیادیلان حیه‌ط‌ده یغارلاشیردیق؛ حئیوان بالا آغلادی! دئییردی آرواد یاغ ایستیر، چؤره‌ک ایسته‌ییر، دویو ایسته‌ییر، اوشاق مدرسه باشماغی ایسته‌ییر؛ ایکی ایلده گئیدیغی باشماق لاب وئجدن دوشوب! دئییردی حسن آغا گئت آللاهینا شوکور ائله؛ نه یاخشی کی سنین بو ماشینین وار؛ گون خرجینی اوردان تاپیرسان؛ آنجاق من و منه تای یازیقلار نئینه‌سین‌لر؟ اؤز ألیمیزله ده تعهود وئرمیشیک هئچ جینقیریمیز دا چیخمایاجاق؛ حاققیمیزی دا ایسته‌یه بیلمه‌یه‌جه‌ییک. قالمیشام اودونان سویون آراسیندا. دونیا دوغرودان بیله‌مه دار گلیر. سانکی ألین یئتیریب خیرتده‌ییمه بیرخماقدا دا یوخدو!
بیر ایکی دفعه حیرصله‌نیب دیشیمی دیشیمه سورته‌رک قینجیلدادیب "بس ایندی نئجه اولاجاق؟" دئدیم
یازیق حسن باشین توولایاراق نئجه اولاجاغی قالیب آغام أبلفضه؛ هر زامان کئفلری چکدی پولوموزو وئره‌جک‌لر باشقا یئرده ده ایش یوخدو؛ هارا گئدیرسن گؤی ائله بو ره‌ح‌ده(رنگ) دیر! کاسیب فهله چوخداندی اؤلوب؛ آغلایانی یوخدو!
دئییردی هئچ سؤزلریمیزی ده بو ره‌ییس دئیه بیلمیریک؛ نه او بیزیم دیلدن باش چیخاردیر نه ده بیزیم اونون دیلیندن باشیمیز چیخیر.
هه قارداش اوغلو برک برک تؤوصیه ائدیرم درسیویزی اوخویون بیزه تای قارا فهله، اؤزو ده کور قوش کیمی قارا فهله اولمایین دئدی. داها هئچ نه دئمه‌دیم؛ دوغروسو هئچ نه دئیه بیلمزدیم. دئمه‌دیم یوخ حسن عمی درسین ده ائوین ییخیب چیراغین پوله‌ییب‌لر؛ یئنه سیز بئساواد اولاراق ایشله‌ییب پولونوزو آلا بیلمه‌ییرسیز؛ آنجاق ایندی فوق لیسانس ایله قارا فهله‌لی‌یی ده تاپا بیلمه‌ین‌لر تانییرام. ایسته‌مه‌دیم اؤز بئینینده بلکه درسی اوشاقلارینا بیر قورتولوش و چیخیش یولو سانسایدی کی سانیردی، اومود ائوینین چیراغینین پوله‌ییب داها قارانلیقلارا دالدیرام بیله‌سینی. سادجه حسن عمی اولسون اینشاللاه تئزلیک‌له هر شئی دوزلر دئدیم. اؤز اوره‌ییمده ده هم اؤزومه هم ده بیله‌رک بوش اومود وئرمه‌ییمه یامان دئدیم.
