دوغوم گونوم

بوگون دوغوم گونومدن توپلام 9131 گون سوووشدو؛ 25 ایل بیتدی گئتدی تاریخین صحیفه‌لرینه 
دوزدو کیملیک بلگه‌مده یازیلان تاریخه چوخ گووه‌نه‌بیلمه‌رم آنجاق بیر چوخوموز یاخامیزا کئچه‌ن یانلیش دوغوم تاریخیمیز دوغرو اولماسادا بئله اونونلا راضیلاشیب منیمسه‌مک زورونداییق یوخسا چاغی گلنده بیر بوشلوق دویاجاغیمیز قاچیریلماز اولاجاقدیر؛ منیم دوغوم تاریخیم آتامین دوغوم تاریخیله بیر آی و بیر گونده اولماسی داها ایلگینج، داها گوونمه‌مه‌لی اولدوغون وورغولاییر؛ آنجاق باشقا آچسدان آداما یاخشی بیر دویغو باغیشلاییر، اؤزون آتاسینا چوخ یاخین دویور و ساییره.
نئچه ایل اؤنجه کیمسه یاشیمی سورسایدی چالیشاردیم اولدوغومدان أن آزی بیر ایکی یاش آرتیق دئییب اؤزومو یاشلی گؤسته‌رم، چوخ چتین اولاردی فرقینده اولان اولا نیه کی اوُز-گؤزوم منی اولدوغوم یاشیمدان آرتیق گؤسته‌ریردی؛ مدرسه‌ده همین یاشلی گؤرونمه‌م بیرآزدا یئکه یئکه دانیشیب، آتابابا سؤزلرین قولانان، هر نمنه‌یه بیر ناغیلی اولان کیمسه اولدوغوما گؤره بوتؤولوکده یاشیندان ایره‌لی دانیشان بیریسی اولدوغوما گؤره بیله‌مه (منه) " قوجا " دئیه‌ردیرلر؛  اوزامان دوستلاردان منه چاتان بو تاخما آدی چوخ سئومه‌سه‌یدیمده بئله ایندی او آدی چوخ سئویب دئمک اولار اؤزله‌میشم، بو دفعه نه یازیق کی داها قوجا چاغیران یوخدو !!! 
سانال دونیایا گلدیکده کیمسه منی گؤرمه‌دیغینه گؤره اؤزومو یاشلی تانیملایاردیم، او زامان یاهو مسئنجر مدودو؛ هرکس چت دن دانیشاردی منسه اوردادا آزدان چوخدان فعالیدیم؛ 17-18 یاشیم واریدی آنجاق هر کیم " اصل "(ASL Plz) ایسته‌سه‌یدی اؤزومو 24 یاشیندا تانیتدیراردیم، بیلمیرم نیه بو 24دو چوخ سئوه‌ردیم ؛ باشیم بو دولما دولاشیق یاشاما ائله قاریشدی کی بوگون بیرآن گؤزومو آچدیم گؤردوم 24دو یوخ 25-ی ده سونا أرمیشه‌م؛ 26-یا سالام دئمه‌لی‌یم !
انگیمده بیر آغ توک بیتیب، ساچلاریمداکی آغ توکلرین داها ساییسی الیمدن چیخیب،داها باشیمدا دؤولت توکو یوخ قوجالیق توکلرینی گؤرورم، ظالیملرین سایلاریدا گونو گوندن آرتماغا دوغرو گئدیر ! 
ایندی بیر دویغو بئینیمی چولغالاییب دئییر 24 یاشینین سئوگیسی سنی آتماییب هله؛ سنده اونو آتما، یاشینی سورانلارا 24 یاشیم وار دئیه جاواب وئر ! 

ی. س:یاشاسین دیرلی دوستلاریمی کی همراه اولدن اؤنجه دونن گئجه ساعات 12دن سئوگیله دولو مئساژلارین منه یوللاماغا باشلادیرلار؛ بوتون منه دیه‌ر وئریب دوغوم گونومه گؤره، سئوگی دولوسو مئساژلارین گؤنده‌رن دوستلاریمدان سونسوز تشککورلریمی بیلدیریرم؛ نه یاخشی کی وارسینیز دئیه‌ بیله‌رم سادجه.

ا. ی: بو گؤزل گولون شکیلینی سئوگیله دولو بوتون دوستلاریما سونورام 

02.06.93

کوبودلاشماق

نئچه ایل اؤنجه جیب تئلفونون خیردا خیردا توپلومون بوتون قاتلارینا گیریدیگینده، اونونلا بیرگه بولوتوث دا یامان مد اولموشدو، هر کیمی گؤروردون دئییردی بولوتوثونو آچ یئنی بیر گؤرونتوم وار یا یئنی بیر سس وساییره.
یادیمدا خالامین اوغلو یبر چوخ دم تراغینان منه بیر ویدیونو گؤندرمک ایسته‌ییردی، دئییردی چوخ قورخمالیدی ها، اوره‌یین زادی ضعیف اولسا یا قاندان قورخسان باخماسان صلاحدی؛ اوره‌گین زادین پیس اولسا مندن دئییل!
آنجاق بو دئدیگی سؤزلری منی لاب یانقین ائدیب دئدیم تئز اول گؤندر گلسین؛ اوشاق دئییلم کی قورخام . یادیمدا اوردا ابوعلی‌سینیا نیسبت وئرن سؤزو کی دئییر "هر یازی بیردفعه اوخوماغینا دیه‌ر"-ی تحریف ائدیب " ناصیر جان هر ویدیو بیر دفعه باخماغینا دیه‌ر" دئدیم.
آنجاق ویدیونو بولوتوث ایله آلیب؛ تئز ایزله‌مه‌یینه باشلادیم؛ گؤرونتوده 2دیقه 30 ثانیه‌لیک ویدیو واریدی، بیر حالداکی نئچه نفر الی سیلاحلی، اوزلَری اؤرتولو، دایانمیشدیرلار؛ عربیستانین بایراغی‌ایسه داللارینداکی دووارا ویریلمیشدیر؛ اورتالیقدا بیر گنج یاشلی اوُز-گؤزو آچیق، اللری دالیسیندان باغلی، آیاقلارینین اؤنونده دیزله‌رین یئره ویریب دایانمیشدی!
بیرآن سؤزو گئدن الی سیلاحلیلاردان بیریسی بیر نئچه‌ عربجه سؤزو دئدیگیندن سونرا الینده‌کی پیچاق ایله او اوغلانین باشین کسمه‌یه باشلادی؛ اولدوقلاری اوتاقین کفی آغ کاشیدی بو اوزدن هر یئری آل قان آلدی آغزینا ، صحنه‌ده اولان باشقا الی سیلاحلیلار او آدامین باشی کسیله کسیله سیلاحلارینی قالدیراراق اوجا سس ایله "الله اکبر" دئمه‌یه باشلامیشدیرلار! 
بیر آن گؤزلریم قره‌لدی،سانکی آیاقلاریم یئردن اوزولدو، باشیم فیرلانماغا باشلادی، اوره‌ییم ائله بولاندی مصموم اولموشلار کیمی قوسماغیم گلیردی. نئچه گون اوندان سونرادا هر گؤزومو یومدوغومدا او صحنه‌ گؤزومون اؤنونه گلیردی یئنه اوره‌ییم بولانماغا باشلاییردی.
آنجاق او اولایدان چوخ آز ایلین سوروشدوغونا باخمیاراق، بؤلگه‌ده گئدن ساواشلار، قانسیزجاسینا باش کسیب تکبیر دئیه‌ن چئردکلرین چوخالدیقلاری، و او جینایتلرین ریسانه‌لرده گئنیش شکیلده یاییلماسی دئمک اولارداها او روحی لطافتیمی آرادان آپاریب؛ بیر چوخونون داها اوره‌یی بولانمیر، حالی خاراب اولانلارین سایی آزالیب ؛ قان تؤکمکله باش کسمه داها چوخالیب ! گونده باش کسمه‌لر، قان تؤکملرین فئیس بوک، یوتیوب یا باشقا آراجلاردان گؤروروک، بلکه دوداغیمیزین آلتی بیر یامان دئییب ظالیملری ، قان تؤکه‌ن‌لری قارقیش ائتدیگیمیزدن سونرا چوخ راحاتجاسینا !!! اوستوندن کئچیریک.

گؤره‌سن دوغرودان بو تووونان هایانا دوغرو گئدریک ؟؟؟

29.05.93

بیزیم میللت

گلین قبول ائده‌ک کی مرثیه اوخویان بیر میللتیک یا بلکه‌ده اولموشوق! 
گنج قیزلارین آغ آت رویالارینا تای بیزلرده گؤزوموزو تیکمیشیک چیخیش یولاریمیزین قاپیلارینا، بیر قورتاریجی گلیسین بیزی بو دوروملاردان قورتارسین دئیه؛ چاباسیز، چالیشماقسیز. بیر یئرده قالان سو کیمی اؤز ایچیمزدن قوخوماغا باشلاییریق. 
نیه دئییرم چیخیش یوللاریمیزین قاپیلاری، اونون اوچون کی چیخیش یوللاریمیزین لاب آچیق آیدین فرقینده‌ییک. بو اوزدن هئیت کیمی‌ دوشونورلریمیزی چوخ سئویریک؛ اونلارا بیزی قورتاران منجی کیمی باخیریق! کیتابلارین آلیریق آنجاق قاتلاری آچیلمامیش قالیر، ائله‌بیل ساتیش اوچون آلمیشیق، کیتاب قفسه‌لریمیزده توز یئییرلر. بو دوروم نه‌قدر اؤزوموزو اوتوزموش ساندیغیمیزدا بیر اوقدر ده داها آرتیق گؤزه چارپیر،گئت گئده اؤزوموزده بئلنچی دوروملارا قاتلاشمیش کیمی داورانیریق نه یازیق.

کئشکه بئله اولماسایدی و هر کیمیمیز اؤزونه هئیت کیمی بیریسی اولا بیلمه‌سه‌یدی‌ده بیله بو یولون دوغرو یولچوسو اولماسینا اولدوغو و یئته‌نه‌ییجه چابا گؤسترسه‌یدی . . .

ی. س: نئچه ایل اؤنجه دوستلارین بیرینه تئهراندان نئچه سای "وارلیق" درگیسی گؤندریلمیشدیر؛ درگیلری ساتسین، پاراسین اونلارا گؤندرسین دئیه. آنجاق درگیلر دوستوموزون الینده قالمیشدیرلار، سادجه ایکیسین ساتا بیلمیشدیر؛ بو یولداشیم ایسه قورخوردو رحمتلی دؤکتور هئیت (ایندی زنگ آچماسین)، زنگ آچیب، درگیلره گؤره سوروشسون، بودا اوستادین أمه‌یینین قارشیسیندا اوتاندیغیندان بیلمه‌سین نه جاوابی وئرسین.

بیتیک‌لر

اوزون بیر باش آغریسی وئرمه‌ک  اوخوساز میننت قویارسیز

-------------------------------

ایکی ایل اؤنجه فئیس بوکدا اوخودوغونوز اون ائتکیله‌ییجی بیتیکلرینیزین آدلارینی بیزیمله پایلاشین اویونو باشلانمیشدیر؛ آنجاق او ایله بیر شوکور ائتمه‌لی یئر بو ایدی کی هر منه تای بیتیکله ایلگیده اولمایان بیریسی اؤزونه ایزین وئرمه‌ییردی بئلنچی اویونا قاتیلیب ده‌یرلی اویونون معنوی ده‌یرین یئندیرسین آشاغایا. بو اوزدن ده‌یرلی بیتیکلر، ده‌یرلی اینسانلاردان تانیملانیردی. آنجاق تاسوفلرله بو ایل بوزلوسو اویونوندان سونرا بو اویون بیر داها گوندمه گلدی بیر بؤیوک فرق ایله :

بو ایل هر یئریندن دویان؛ پایلاشدیغی بیتیکلری اوخومامیش اولاراق بیله دونیانین أن چوخ تانینمیش، ساتیلمیش، دفعه‌لرجه باسیلمیش بیتیکلرین آدلارینی سیرالاییب دوستلاریلا پایلاشماقلا منی بوحاقدا نئچه قونویا گؤره دوشوندوردو:

بیر: بیزیم توپلومدا بیتیک اوخویاندان چوخ بیتیک اوخویانلاری یامسیلایان داها چوخوموش؛ یالان دئییل کی باشا اوخوماق دیقه‌سی ایراندا نئچه دیقه‌دن آرتیق اولماییر! هله قالسین کی بو نئچه دیقه هانکی ساحه‌ده و هانکی قونودا اوخونولور.

ایکی: پایلاشانلارین بیر چوخو اؤزلرینی داها گؤزدن سالدیرلار؛ نیه کی هر بیر دوزگون بیتیک اوخویانین بوینونا بیر سیرا دئیین‌لر گلیر. بئلنچی دورومدا او آدامدان بیر سیرا چاتیشمامازلیقلار گؤزله‌نیلمز، آنجاق نه یازیق کی بو اویون او آتابابا سؤزونو بیرداها جانلاندیردی: آچیلمامیش سیرفانین بیرعئییبی واردیرسا آچیلمیش سیرفانین مین عئیبی اولار!

اووچ: هر بیر ده‌یرلی بیتیگی اوخویان کیمسه‌دن بئله گؤزله‌نیلیر باخیش آچیلاری ، گؤروشلری؛ یازار اولسا یازیلاری ، کوتله ‌ایله داها فرقلی اولا .بئله کی ائشیکدن باخان اونون اوخودوغو بیتیکلرین سوموتلوغون (عئینیتین) دریندن دویا بیله؛ آنجاق نه یازیق کی پایلاشیلانلارین بیر چوخوندا بو فاکت آز گؤزه چارپیردی.

دؤرد: بیزیم بوتون یازارلا و کولتور آلانیندا چالیشانلاریمیزا چوخ بؤیوک بیر دویورو اولدو؛ نیه کی هئچ بارماق سایی‌سی‌جادا اونلاری اوخویوب ائتکیله‌نن یوخویموش سانکی.گره‌کلی‌دیر چالیشمالاری یارارلی اولسون دئیه گله‌جک یازدیقلاری، حاضیرلادیقلاری، کؤچوردوکلری بیتیکلرده بو سلیقه‌لری اؤنمسه‌ییب اونلارا اویغون چالیشسینلار.

بئش: بیتیک باسدیرانلار؛ دوزنله‌یه‌نلر، یایین ائولری و بوننلارا تای یئرلرین سوروملو یؤنه‌لدنلرینه چوخ یاخشی فورصت اولدو ایقتیصادی دوشونجه‌لرینه‌ دوزه‌ن وئریب، توپلومدا چوخ به‌یه‌نیلن و ساتیشی یاخشی اولان بیتیکلری یاخشی تانیسینلار و او سلیقه‌لر اوزره چالیشسینلار.

آلتی: بیزیم اؤلکه‌ده باسدیریلمیش بیتیکلرین بیر چوخو شئعیر و ادبیات ساحه‌سینده اولدوغو چوخراق گؤزه چارپیر و دئمه‌ک دوغرونو یانسیدیر؛ بو دورومدا یئنی آلانلار، یئنی قونولار تخصصوصلشمیش اولاراق یازیلار و بیتیکلرین یئری برک برک گؤرونور.

یئتدی: اؤز دیلیمیزده گوجلو و ده‌یرلی بیتیکلرین آز اولدوغونا باخمیاراق دوستلارین بیر چوخو اؤز تورکجه‌میزده یا آنادولو تورکجه‌سینده اوخومادیقلاری بیتیکلرین چوخ یئری گؤرونوردو؛ منجه ایلک اؤنجه اؤزونو توپلومدا بیر کولتوره‌ل حرکته باغلی تانیملایان کیمسه‌یه گره‌کلی دیر أن آزی چالیشا اؤز دیلینی منیمسه‌ییب اییه‌سیز قالمیش دیلینه اییه دورا یوخسا کیمسه بو ایشه بیزیم وریمیزدن گؤرمه‌یه‌جه‌یینه امینم.

و ...

************************************************

اومارام یوخاریدا بیر سیرا سؤزلری یازدیغیمدان اینجیمه‌ییب بئله دوشونمزسینیزکی طرف اؤزونو چوخ آیدین و بیتیک اوخویان بیلیر؛ یوخ عکسینه من اؤزوم ایچیمدن چوخ بیتیک اوخوماغا ماراقلی اولسامدا نه یازیق کی چوخ اوخویاسی دئییلم و اؤزومو چوخ فرقلی گؤسترمه‌یه چالیشماییرام؛ بو اوزدن بیر سیرا بیتیکلر کی اوخوموشام و بلکه بیر نئچه‌سین بوتون اولاراق بیتیرمه‌میشم سیزیله پایلاشیرام: بو حاقدا چوخ گئنیش اولاراق یازماق ایسته‌ییرم.

 من بیر کند اوشاغی اولاراق نه یازیق کی بیزیم عاییله‌‌ده بیتیگین اؤزه‌ل یئری اولماییب بوگونه کیمی. ایلک بیتیگی دوم ایبتیدایی اؤیرتمه‌نیمیز یاخشی درس اوخویان اولدوغوم ندنیله جایزه وئرمیشدی :کیتابین آدی دخترک کبریت فروش ایدی. یادیمدا ایبتیدایی مدرسه ده "دهه فجر" تؤرنلرینه گؤره آتامین بیر ایقیلابی قوتلایان سرود بیتیگی واریدی کی اونون یاریسی تورکجه‌ایدی؛ "قوجاغینی آچ وطنیم: قهرمان بالان گلیر" شئعرینی حیفظ ایدیم. شهریارین حئیدر بابایا سالامی‌نین دا اؤزه‌ل یئری واریدی.

سؤزو اوزاتمایالیم: بیر جای درس کیتابلاریندان ساوایی چوخ ریساله و احکام کیتابلارین اوخویاردیم. بولوغ دؤنه‌سینده مسائل زناشویی کیمی کیتابلاری گؤیده ویراردیم! گیزلیجه اوخوماقلارینین آیری دادی ، آیری لذذتی واریدی. جوانان چرانی دا همین دؤورده اوخودوم بیلمه‌گیم زادلاریدا اوندان اؤیرندیم.

بیلیم یوردوندا تورپاق تانیتیمیندا اؤیرنجی اولاراق گوجلو تخصصوصی بیتیک کی اوخودوم: مبانی خاکشناسی ؛ شهلا محمودی –مسعود حکیمیانین ییغما (تالیفی) بیتیکلری ایدی .

ایلکلرده علی شریعتی دن و روانشناسی کیتابلارین چوخ اوخویاردیم؛فاطمه قاطمه است، آری پدر و مادر ما متهمیم ، لطفا گوسفند نباشید؛ 24 قانون بدست آوردن قدرت؛ چگونه ثرتمند شویم ،فکربرتر ایده برتر و بونلارا تای بیتیکلر ایدی.

بالا بالا میللی مسئله‌لرله تانیش اولدوغومدا سایین حسن راشیدی‌نین بحران هویت کیتابچاسی درین ائتکیلر بیراخمیشدی منده. همین یازاردان ترکان آدلی کیتاب دا گؤزه‌ل و یارارلی ایدی. تبریزلی علی‌نین دیل و ادبیات بیتیگی‌سی منده بیر دئوریم یاراتدی.

تاریخ دیرین ترکان ایران ؛تاریخ مختصر ترک؛ قام شامان؛ 12 شهریور؛ فرقه دموکرات آذربایجان از تخلیه تبریز تا مرگ پیشه‌وری دیرلی لردنیدی لر منیم اوچون.

صمد عمی‌نین کیتابلارین اوخودوغومدا لذت آلاردیم.

او زامان اوخودوغوم رومانلاردان لاب ائتکیله‌ ییجی‌سی هیتلرین " نبرد من " رومانیدی.

خیدمتده اولاندا کیتابدان چوخ درگی‌لرله ایلگیلنمیشدیم: وارلیغین کؤهنه سایلارین، دیلمانجین کؤهنه سایلارین،بایرام درگیسین و آفتاب آذربایجان و آغری دریگی‌سی‌نین چوخ سایلارین اوخویاردیم.

سهندین اثرلری اوخومادیغیم دده‌قورقودو اوخودوردو؛ صابیرین هوپ هوپ نامه‌سی و هوشنگ جعفری نین آغ آتیمی دا بو لیسته‌ده یئر آلا بیلرلر.

اوستاد باریشماز دئمه‌ک اولار چوخ سئودیگیم آدلاردان ساییلار، نیه کی تبت یداسینین هله ده دادی داماغیمدادی، دووارلار، دارتیلمامیش دنلر، اودوملو دیره‌ک؛ گولنده هرزامان و نغمه ‌داغی باشقا اوخودوغوم گؤزه‌ل اثرلریندن ساییلیر.

بو آرادا فارسجا رومانلارداندا اوخویاردیم: 1984 و حئیوانلار قالاسی جورج اورول دان هاریکایدیلار؛ جک لندنین سپید دندانین دا چوخ سئوردیم. بزرگ علوی نین " گؤزلری "یا " چشم هایش" رومانین چوخ سئودیم.

تاریخسازانین سری کیتابلاریندان مائو ، گاندی و هیتلره گؤره حاضیرلانمیش کیتابلاریدا اوخویا بیلدیم.

گون وار عصره بدل: اشک سبلان ؛ دنیای سوفی؛ زندگی به روایت بودا؛ تفتیش عقاید و ... کیمی کیتابلاری اونوتمارام.

بیر جای ایسته‌ییردیم ارشد علوم سیاسی اوخویام بو اوزدن اوخودوغوم اصول سیاست خارجی و سیاست بین الملل- عبدلعلی قوام و جامعه شناسی سیاسی حسین بشیریه چوخ گؤزه‌ل ایدیرلر. سونرالار توپلوم بیلیملرینه ماراقلاندیم گیدئنزین سوسیالوژی سی و لوییس کوزئرین زندگی و اندیشه بزرگان جامعه شنا‌سی سی دیرلی ایدی منه.

از دیکتاتوری تا دموکراسی – جین شارپ؛ مرزها و برادری- براندا شیفر یارارلی بیتیک‌لر ایدیرلر.

سون اوخودوغوم ده‌یرلی و گوجلو تورکجه کیتابلاردان بیریسی ده سایین رحمانی‌فرین شهریارلا بیرلیکده اؤزگه‌له‌شمه‌دن اؤزلشمه‌یه دوغرو ایدی.

نه یازیق فئیس بوک و بئلنچی اورتاملار یایغین اولدوغوندان بری اینتیظار لیستیم چوخدان دولوب آنجاق اوخوماق سورعتیم قات قات یئنیب! هله ده‌کی وار بیر چوخ ده‌یرلی بیتیکلرین اوخویا بیله‌جه‌ییمین اؤزلمینده‌یم.

------------------------------------------------------

سونوندا آرغین چاغداش و بهنام تورکان‌پور جنابلاریندان تشککور ائدیرم کی منه ‌ده ده‌یَر وئریب چاغیردیلار. 

کولتوروموز

بیزیم بیلیم یوردوندا بیر سایقی ده‌یَر اوستادیمیز واریدی، همئشه دئیه‌ردی اؤز کولتوروموزو بوشلاییب اؤزگه‌لرین کوچه بازار کولتورلریله دانیشماغین نه فایداسی وار اؤزوموزون اؤزل شخصییتیمیزی کیچیتمکدن ساوایی؟؟؟
نؤکره‌م، کیچیگینه‌م، دربست نؤکره‌م و بو کیمی سؤزلره تپگی گؤسترَردیرلر و دئیردیرلر تورک خالقی اؤزل شخصییت و برئیسل پرینسیپلریندن مایا قویماز، عکسینه اونلاری قورویوب داها عزیزله‌یَر باشقالاری دا بو ده‌یَرلره سایقی ایله یاناشسینلار دئیه. 
دئیردیرلر تورک اوغلو یا قیزی باشقالاریلا ایلگیله‌نه‌نده، اؤزونون دونیا مالیندان، جیبینین پولوندان، دیلینین شیرینلیگیندن،الینین آچیقلیغیندان و بوکیمی وارلیقلاریندان مایا قویوب اونلارین دیه‌ری قدر اولانلارا خرجله‌یه‌ر!
قوربان کسه‌رم، سنه مالیم قوربان، قادان آلیم، و ...
بئله ایش گؤرسه هم اؤزونون سایقیسینا آرتدیرار هم ده محبت و یولداشلیق بیتگیسین أکه‌ر ؛ أکدیغی ایسه گونو گوندن کوک سالیب قول قانات آچار !

kend

اوشاغیدیم؛ کندیمیزده ایکی نفرین یئرلرینین مرسی(مرزی) اوُسته سؤزلری چیخمیشدی ، بیری دئییردی او آغ داشدان بویانا منیم دی اوبیریسی دئییردی یوخ او نوواخدان بویانا سنین دی . بو آرادا سؤزو گئدن یئرین دوزگون قورقوشوملو سندی ده یوخودو بللی اولا کیم دوز دئییر کیم‌سه او بیری‌نینی حاققینی پوزوب اونون یئرینه و امه‌یینه یییه دورماق ایسته‌ییردی !
بونلارین خیرخاخیرلاری گئت گئده چوخالیردی ، هئچ بیری ده شئیطانین آتیندان یئره توشموردولر؛ نه آغ ساققال ساییردیلر نه قارا ساققال. آنجاق بیر گون بیر آغ ساققال گیردی آرالارینا بیر حیرص پورسونان سون سیلاحی آرایا قویدو: " آللاه هر ایکیزین ده شئیطانیزا قووات وئرسین ؛ سیزین بو بوغاز دؤومه‌نیزه سادجه قورآن سون قویا بیلر" دئدی.
هاندان گئجدن او کی، ایکی آیاغین سوخموشدو بیر باشماغا و کسینلیکله دئییردی بو یئر منیم دی دستاماز آلیب قورآنا ال قویوب آند ایچدی ! و قارشی طرفی ده داها موجادیله سون قویوب "تاپیشیریرام او قورآنین یییه‌سینه" دئییب دا ایسته‌گیندن واز گئچدی.
او گونلرده ایدی کی مدرسه‌ده اوردا بوردا ائشیدیردیم نئچه ایلدی ایسراییل-له فیلیسطینین آرالاریندا تورپاق ساواشی وار و بو ساواش ایلردی بیر طرف‌ده اولان چئشیتلی سیلاحلاریلان اوبیری طرف‌ده ایسه اللرینه داش آلاراق موباریزه‌یه داوام وئریردیرلر. کندیمیزده اوُز وئره‌ن بیر آند ایچمه‌نین گوجونه دایاناراق بئینیمدن کئچیردی اونلاردا بئلنچی بیر آند ایچسینلر دا !!! دئییردیم بلکه اوردا دا بیر آغ ساققال تاپیلا و بو نئچه ایللیک ساواشا سون قویا ! 
دوغروسو اوندا اؤز نظریمده دئییردیم بس حق ایسراییل طرفیینده دی؛ نیه کی پارا وئریب تورپاق آلیب و بو تام نورمال دیر، حققی ده وار او تورپاقلارا یییه دورا و فیلیسطینلیلر گرک بو آجی گرچه‌گی قبول ائده‌لر !
سونرالار اؤزومودن فیلیسطینلی‌لره گؤره ائله دوشوندوغومه گؤره اوتاناردیم ، ایسرائیلین نئجه دوزه‌لمه‌سی ، هانسی گوجلرله اورا گئدیب چاتماسی، فلیسطین باشچیلارینین ساتقین اولمالاری و بیر چوخ مسئله منه آیدین اولدوقجا بو اوتانج داها درینله‌شیردی. چوخ زامان اخباردا زاتدا اونلارین ساواشلارین گؤرنده اؤز میللتیمیزی اونلارین یئرینه اولمالارین تصوور ائلردیم ، کی کاش هئش واقت ائتمه‌زیدیم.
میللی مسئله لریمیز ایله تانیش اولدوغومدا قاراباغ، ائرمنیستان،کرکوک ، کیریمه و ... فیلیسطینلیلرین دورومو من‌ده داها دویولوردو. 
بوگونلر تورکیه‌ و ایران حاکیمیت‌لرینین داورانیشلاری، عراقدا گئدن سون اولایلار، ائشیکدن گلن اللر، آمریکا و بوتون امپرالیست رین اللری ، کوردلرین ترپه‌نیشلری، باتی آذربایجان دا سون دوروملار و ... بو قورخونو و یئنی بیر ایسرائییل و یئنی بیر فیلیسطینین یارانماسی گؤزومون اؤنتونده جانلانیب بیر چیرکن تابلو یارالدیر !

هردن دئییرم اولمایایدی بئله کاش ، یا اورتا دوغودا دوغولماسایدیم ، یا بیزده او بیرینجی دونیا دئولتلرینین بیرنده دوغولسایدیق و... لری دوشونورم سونرا بو فیکیر ذهنیمه گلیر : کاش باریشین یولون تاپیب ،بوتون سینیرلاری قالدیریب ، یئنی بیر دونیانین دوزنلرین تؤکه‌بیلسه‌یدیک؛ نه اولاردی !

31 تیر 93

اوروجون سیندیران عسگر

اوروجون سیندیران عسگر ( حیکایه‌جیک)

 

بو گؤردویو یای أن ایستی یایلاردان بیری ایدی؛ خیدمتین اؤزونلویونده اولان آغیرلیق‌لار، سیخیجیلیق‌لار و داریخدیریجی اولان دویغولار بیر یانا؛ یایین ایستی‌سی ده بیر یانا. بو اوروجلوق آیینین دا یایدا، اؤزوده سینیر باشیندا بیر پاسگاهدا عسگر اولدوغو زامان یاخاسینین توتماسی بیریاندان لاب کیریخدیرمیشدی بیله‌سین، کلفچه‌سی پؤزولموشدو، هئچ اینجاری یوخودو آتدیمین آتیب ترپنسین ! 

خیدمتینین چوخو هر نه ته‌هر اولموش اولسایدی دا گلیب سووموشدو آزی قالمیشدی، نئجه دئیرلر توشموشدو تسبح سیندیرما گونلرینه، بوتون اوزو یوخاری گونلری ایندی اوزو آشاغایا دوغرو گئدیردیرلر. بو اوزدن قاچماغی و پاسگاهی ترک ائتمه‌نی‌ده هئچ دوشونموردو. اؤز الیلن اؤزونو دوستاقلامیشدی . آمما هر دفعه سئوگیلیسی یادینا دوشوردو بوتون بو زور یاشام نظرینده هئچ سانیلیردی. دئمک سئوگیلیسینین تخییوللاری اولماسایدی چوخدان قیرپاچ ائلردی، بو سئوگی‌نین اولماسی بیله‌سین بوندان چوخ آغیر دوروملارادا حاضیر ائتمیشدی .سادجه بیر آن گؤزلرینی یوموب سئوگیلیسین گؤزلرینین اؤنونه گتیردیغینده دونیانین بوتون یورغونلوقلاری جانیندان چیخیردی.

او گون هاوانین دورومو آشیری درجه ‌ده ایستی ایدی. اوروجون سیندیرماق زوروندا قالدی ، سادجه بیر قورتوم سو ایچمه‌ک ایسته‌ییردی. سوسوزلوقدان ایت لح‌له‌مه‌یه توشموشدو. یئمک یئمه گؤیلوندن کئچسئیدی‌ده بیله بو خارابادا یئمه‌یه هئچ بیر شئیالده ائده بیلمزدی. دوغروسو هر یئردن ال قولو اوزولموشدو، اؤزوده بئلنچی بیر ایتین قودوران یئرینده هئچ بیر ایش الیندن گلمیردی.

بو اوزدن فرمانده‌لرینی گؤز گؤز ائله‌ییب اؤزونو شیرین سویونون باشینا چاتدیردی.داها کیسه‌نی گؤز گؤز ائله‌مه‌دن شالپا دوداقلارینی شیرین سویو آخان دوداقلارینا دایادی ، دئیه‌سن شیرین دودوقلارینین یانقیسی ایمیش؛ وحشی‌جه‌سینه قورتوم قورتوم سو ایچیردی هر قورتومدا بوغازینین قیرتدانی هیزلی شکیلده ائنیب قالخیردی و سویون سومورماسینا ندن اولوردو. ائله سوروردو سانکی کؤرپه قوزونو بیر گوندن سونرا ننه‌سینین آلتینا آتمیشدین . دئیه‌سن او لحظه دونیادا داها هئچ نه ایسته‌میردی و چاتدیغی بو گؤزل آندان اولدوقجا لذت آپارماق ایسته‌ییردی.

 

همئشه آناسیندان ائشیتمیشدی کی دئیردی اوروج توتوروق بوندان اؤتورو کی آجلارین، سوسوزلارین دوروملارینی دریندن آنا بیله‌ک. آنجاق بوگون اوروجون سیندیرسایدی دا بیله دریندن اونلارین دورملارینی آنیب چئوریسینده اولان ساییسیز نعمت لری أن باشدا اولان حیات وئریجی سویو بیرداها دریندن دویدو.نم هارداندیرسا اورمو گؤلو گؤزونون اؤنونده جانلاندی، سوسوزام سوسوز دئمه‌لری ، یانقیندان باغیرمالاری، قان آغلاماقلاری ، سونوندا سوسوزلوقدان قوروماسی و . . .

بو اینسان اوغلانلارینین نه قدر نانکور اولدوقلاری ، سویو گؤلون اوزونه باغلامالاری؛ سوسوزلوقدان گؤلون آلوولامالاری ،و...  گؤزونون اؤنونده بیر چیرکین تابلو یاراتدی !

بوتون شیرین دویغولاری آجیا دؤنوشمه‌ک‌ده ایدی کی، فرمانده‌لری اوجا سس ایلن بیله‌سین چاغریب " اوغلان به سن اوروج دئییل سن؟؟؟ " دئدی

ال قولون ایتیرمیش عسگر، ایکی اووچ دفعه یئره توپوره‌رک ، دیلی توتار توتماز " نیه  اوروجام " دئدی !!!

"اولسون، بیلمه‌ییب سن ، باطیل اولماز اوروجون" فرمانده دئدی.

 

29 تیر 93 - حامید مورسلی (رمضان آیی‌نین 22 سی)

وارلیغیمیز

خولاصه: وارلیق، بوگونکو وارلیغیمیزین تمل داشین قویدو !

---

بیلیم یوردو چاغلاریندان بیر دوستوم ایله بیرگه جیددی اولاراق ایراندا تورک میللتینین مسئله ‌لری‌ایله تانیش اولدوم، باشقا هئچ کیمسه‌ایله ایلگیمیز اولمادیغینا و دوغروسو عاییله‌میزده بیرآز دوشونجه یوخسوللوغو اولدوغونا گؤره تام اولاراق اؤزوموز اؤز قیچیمیزین اوستونده دایانماق زوروندایدیق. بو اوزدن اینتئرنت بیزیم أن گوجلو اؤیرتمنیمیز اولموشدور. آزدان چوخدان بیزی اوخوماغا و آرتیق بیلگی قازانماقا چالیشدیریردیر. چالیشیب اوخویوب بیلدیکجه نه‌قدر گوجسوز، بیلگی‌سیز، دَیاز اولدوغوموزو دریندن دویوردوق. بیلیم یوردونون ایکینجی ایلی انجمن‌ایسلامی سئچگی‌لرینده بیر ائتیلاف اولاراق یوخاری ساییلان " انجمن ایسلامی‌ "-نی تحویل آلدیق. بیز او درنه‌یه گیردیغیمیزدن بری بوتون درنه‌یین آدینا چالیشمالار، یازیلار، درگیلری، بولتن و... ده آذربایجان و کیملیک دیله‌ییجیلیگی گؤزه چارپیردیر. یادیمدا "نیکوزیا،(قوزئی قیبریس)"-دان توت اوکراینین کیریم تورکلرینه قدر یازی یازیب پایلاشاردیق، بوتون ایمکانلاریمیزین یئتدیغینه قدر. بئله دئیه بیله‌رم ماراغا بیلیم یوردونوندا ایلک اؤیرنجی لر بیزیدیک میللی مسئله‌لر و تورک روحونو بیلیم یوردوندا دیریلتمه‌یه چالیشدیق. دئیه بیله‌رم بو یولدا بیر چوخ زحمت و مشققت‌لره، مشروط اولماقلارا قاتلاشاراق، درسدن، یاشامدان ، و بیر چوخ دیلخوشلوغوموزدان قالسایدیق دا بیله ائلیه بیلدیک ماراغا بیلیم یوردوندا "ماراغا بیلیم یوردونون آذربایجان تانیتیم اوجاغی "-نین تمل داشینی قویاق و بیر موستقیل، موجویزلی و یئری گؤرونن دَرنه‌یین آچیلماسینا نده‌ن اولاق.

یادیمدا او ایللرده دوستوملا بیرگه هر هفته‌نین سونوندا شَهَرایچینده اینجه یولدا (پیاده رودا) بیر کؤهنه کیتاب ساتانی‌نین یانینا گئدیب اوجوزونا، گؤیلوموزدن کئچن کیتابلاری سرگیله‌دیگی کیتابلارین ایچه‌ریسیندن سئچیب، اوخوماغیمیز اوچون آلاردیق.

أن ائتکیله‌ییجی و گوجلو، همده تورکجه کیتاب، کی او ایللرده یادیمدا او کؤهنه کیتابچیدان آلیب اوخوموشدوم رحمتلیک تبریزلی علی‌نین "دیل و ادبیات" کیتابی‌ایدی. هله‌ده چوخ گوجلو و دولو دوشونجه‌لی بیرکیتابدیر منه. باشقا تعریفده دئسه‌م مانیفست اولاراق کیمی بیر کیتاب ایدی منیم اوچون.

واریق درگیسین ده اوردان تانیدیم. یادیمدا بیر دفعه دوستوملا بیرگه وارلیق درگی‌سینین 12دنه سایین کؤهنه کیتابلارین ایچیندن تاپیب آلدیق. وارلیغین قات قاریشیق شوماره‌لری ایدی.68-78 ایللرینه عایید دریگی‌لر. اوندا ایلک اولاراق وارلیغینان تانیش اولدوم. آللاه عؤمور وئرسین سایین پروفسور دوکتور جاواد هئیت، رحمتلیک دوکتورحمید نوطقی،اوستاد فرزانه و ...کیمی اوستادلاریلان وارلیغین گوجو ایله تانیش اولدوم و بو تانیش اولدوغوما نه‌قدر غرور دویوردوم. دوغورسو بئلنچی گوجلو چالیشمالاری هئچ سانمازدیم آنجاق بو آلچاق کؤنوللو، دولو دوشونجه‌لی اینسانلار یورولمادان،کیمسه‌دن شیکایت ائتمه‌دن ،اؤز مالی ایمکانلاریندان اسیرگه‌مه‌دن یازیب یارالدیردیرلار بو منه داها غرور وئریجی ‌ایدی.

ایکی اووچ آی اؤنجه اوستاد هئیت-ین حاضیرلادیغی وارلیغین ضمیمه‌سی " یئنی دیلچیلیک " گلیب الیمه چاتدی؛ دوغروداندا بو کیشی عؤمرو بؤیو نه خیدمتلر کی ائتمه‌ییب بیزیم دیلیمیزه، قوجا و خسته ایکن گئنه چالیشمالاری دیه‌ر باخیمیندان هله‌ده بیرینجی سیرادا یئر آلیر منجه.

بوتون بو چالیشمالاری، عؤمرونو بو یولدا وقف ائتمه‌لری، پروفسور هئیتی او یئره چاتدیردی کی بوتون آذربایجان عئشقینه اوره‌کلری چیرپینانلار جاواد هئیتی اؤزلرینه بیر معنوی آتا و ال چاتماز زیروه‌لرده اولان بیر اؤیرتمن بیلدیرلرو فخریلن ده بونو دئمه‌ییندن چکینمه‌دیلر منده اونلارین ایچینده. آنجاق بوگونلر آذربایجان تورکلرینین معنوی آتاسینین ساغلیق دورومو ائله‌ده سن دئیه‌ن یاخشی دئییل دئمک اوستاد یاشام موجادیله‌سی ائدیر.سون وئریلن بیلگیلره گؤره اوستادین دوروما یاخشیلاشیب آنجاق داها یاخشی اولوب ساغالمالارینی دیله‌ییب ائلیمیزین باشی اوسته کؤلگه‌لرینین اولماسینی تام کؤنولدن دیله‌ییریک.

اوستادین داها ساغالماسینا دوعا ائدیب سیزی ده دوعا ائتمه‌یه چاغیریرام.

 

(حامید مورسلی 25 تیر 93)

اوشاقلیق آنی‌لاریمدان

اوشاقلیق آنی‌لاریمدان

ایبتیدایی‌نی کندیمیزین مدرسه‌سینده اوخوموشام. سحر چاغی کیلاسلاریمیز 8/30 دان باشلاردی ناهاردا دا معلیملریمیزین ائولرینه گئتمه‌لرینه گؤره یاریم ساعات زنگی تئز چالاردیرلار ؛ مدره‌سه میز بیر تپه کیمی یئرین اوستونده یئرله‌شمیشدی ائله بو اوزدن مدره‌سه میزین دالی طرفینده یئرله‌شن باغچالارا تپه‌دالی دئیردیرلر.نه دوواری واریدی نه دوزاغاللی بئهداشتی سئرویسی.داشدان پالچیقدان تیکیلمیش مدره‌سه بیر چوخلارینا اوردان ایلک تحصیللرینی آلماقلارینا ندن اولموشدور. 
سون زنگین آخیر دیقه لری هامی کیرکیتابی‌لاریندان توت سیلگی، قلم‌لرینه کیمی جامتایی لاریندا یا بیر سیرالاری کیفلرینده یئربه‌یئر ائدردیرلر. او دومئیدانی‌ده باشلانیش سیلاحینین سسلنمه‌سینی گؤزتله‌ین ایدمانچیلار کیمی بیزلرده سون زنگین چالینماسینی گؤزله‌یردیک. زنگ چالیندیغیندا سانکی قفس‌دن قورتولموش قوشلار کیمی یا داها اویغون یانسیتما دئسم ؛ موزا آریسی چالمیش بوغالار کیمی اوجا سسیمیز ایلن " ائـــــــــــــــــــــو " باغیراراق قوشا-دؤرد-أم یوللاناردیق ائولریمیزه ساری. ائله‌بیل هامی اؤز آراسیندا ایستردی بیرینجی نفر ائولرینه چاتسین. تپه کیمینی ائویمیزه ساری قاچدیغیمیزدا اؤزوموزو بیر تکه‌ر کیمی حیس ائدردیک کی بیر سیرتیق اوشاق بیزی اوردان هئللتمیشدیر ؛ هاوا نین اوزونده ائله یئلله‌نیب قاچیردیق، سانکی بولودلاردان آیاقلاریمیزین آلتیندا ییمیشاق فرش سالمیشدیرلار.

بوشقاب

بوشقاب!  (اؤیکوجوک)

گشت سین سین کوچه‌لری گزیردی ؛ باش فرمانده بیله‌لرینه دئمیشدی بو گون الی بوش قاییتساز هر تکینیزه بیر توبیخ یازیب یوخاریداکیلارا گوزاریش ائده‌جه‌یم ؛ دا بو مندن سیزه سون دویورو اولسون، ایندی قالیب چیخارینیزا، یا شهرده دولو اولان دام دوواریندان بیر بوشقاب آختاریب تاپمالیسیز یادا بازاردان بیر آکبندین آلیب گتریرمه‌لی‌سیز ؛ آیلاردی آمارلاریمیز صیفیر دی، منیم حوزه‌مده بو قدر ماهواره اولا اولا ، سیز قولو قیچیندان اوُزون قاییدیرسیز ، بوگون بئله اولمایاجاق هااااااااا !!!!

بو اوزدن بو گون هر یئردن اولموش اولسایدی دا آزی بیر ماهواره توتمالیدیرلار. اونا گؤره لاب لیم لیم آرابانی کوچه‌لرده آختیراراق ، ایچه‌ریسینده ایله‌شنلر دؤرد گؤز اولوب دام دوواردا ماهواره بوشقابی گزیردیرلر ؛ گونده آتدیما بیر بوشقاب گؤرونن شهرده دئیه‌سن بو گون هئچ ماهواره بوشقابینین ایری توزودا یوخودو ؛ باخدیقجا دا لاب گیجه‌میشلر کیمی کرپیش، سیمان، مرمر داش و ایزوگامدان سونرا هئچ نه گؤره بیلمیردیلر. سانکی گؤزلری تیلیسیمه توشموشدور !

- " آهان جیناب سروان بیرین گؤردوم " دالی صندلده ایله‌شن عسگر دئدی

- "هانی ؛ هایاندادی، به نیه من گؤره بیلمیرم؛ هانسی دامین اوستونده دی؟؟؟ " فرمانده دئدی

- " او بیر مرتبه‌لی، یالنیز تیکیلمیش، کرپیشلی دامداشین اوستونه دیققت ائله‌یین، اودو با ، من قشه گؤرورم بااا "  عسگر دئدی

- " آهان منده گؤردوم ؛ تئز سور اورا کی تاپمیشیق ، دده‌میز یاندی بوگون؛ آمما دئیه‌سن سونوندا تاپدیق! " فرمانده سوروجویه دئدی!

تئز اؤزلرینی گؤردوکلری ائوین قاپیسینین قارشیسینا چاتدیردیلار؛ ائویین دؤوره‌‌سینده بیر دؤور فیرلاناراق داما دیرماشماقلارینا یول تاپا بیلمه‌دیلر ، بو اوزدن قاپینی چالماق و دام ییه‌سیندن بوشقابی ایسته‌‌مک زوروندا قالدیلار. قاپینی چالیب بیر نئچه دیقه‌دن سونرا  بیر بئله بوکولموش قوجا کیشی قاپینی آچیب؛ قوجا سسی ایلن " خوش گلیب سیز بویورون گؤرک " دئدی!

فرمانده باشلادی الینده اولان بیر کاغاذدان بو سؤزلری حاجی‌یا اوخوماغا:

« حکم قانون در مورد ماهواره:

بر اساس قانون ممنوعیت به کارگیری تجهیزات دریافت از ماهواره مصوب 23/11/1373 مجلس شورای اسلامی،توزیع و استفاده از تجهیزات دریافت از ماهواره جز در مواردی که قانون تعیین کرده ممنوع می باشد. و وزارت کشور موظف است با استفاده از نیروی انتظامی و یا نیروی مقاومت در اسرع وقت نسبت به جمع آوری تجهیزات دریافت از ماهواره اقدام نماید. »

 

- حاجی فرمانده‌هین سؤزونو کسه‌رک " آی بالا ؛نه دئییرسن ؛ من کی باش تاپمادیم سن نه دئییرسن ؛ اؤز دیلیمیزده دی گؤروم آخ نه دئییرسن  سن،  بلکه اوندا باش تاپدیم " دئدی

" حاجی ایزین وئرسه‌ز گلمیشیک ماهواره‌نیزی آپاراق " فرمانده دئدی

- بو ائوده بیر منم بیرده بیزیم بو حاجی خانیم؛ بوردا میراثا قالمیش تیلویزوینوموزدا هئچ یئری توتمورو؛ اونا گؤره بو ماهواره‌نی بؤیوک اوغلوم آلیب گتیریب قوشوموشدو بیز " تربیز" (تبریز:سهند)  کانالینا باخاق،  اونودا کی نئچه آیدی آروادین الی ایلیشیب دستگاهین کنترولونا هئش یئری توتمور؛  نه تربیزی، نه اورمیه‌نی  نه‌ده اردبیلی!!  ائله آپارماغینیز صلاح‌دی،دای بیز کی باخا بیلمیرک ؛  بو اوشاقلاریندا هئش بیری آیلاریدی بیزه  گلمه‌ییب لر ؛ تاپیشیرام  اونو دوزلده‌لر !

کیشی توموب ، دولومسایاراق  " دئیه‌سن بؤیوتدوغوموز اؤز دوغما اوشاقلاریمیز دا بیزی اونودوبلار ! " دئدی

فرمانده توموبان بیر نئچه دیقه فیکیره جومدو، سونرا کیشیه دئدی حاجی ماهواره‌نی منه گؤسته‌ر گؤروم ؛

حاجی‌دا اولسون دئییب ، قاباقا توشوب یول گؤسته‌ره رک فرمانده‌هی ایچه‌ری‌یه آلدی

فرمانده ماهواره‌ ایلن تیلویزونو آچیب ماهواره‌نی رادیو لیسته‌سیندن چیخاردیب تبریز کانالینین اوستونده بیر داها تنظیم ائده‌رک حاجیا دئدی حاجی بودا سنین تبریز کانالین !

حاجی دریندن " بالا آللاه ایشیوی راست گتیرسین ؛یامان داریخیردیق بو تکلیکده، گئنه بو قولاق یولداشی اولار بیزه " فرمانده‌هه دئدی !

فرمانده ایسه " کیشی خوش اول ؛ گونده آزی بیریول  بودان کئچیریک. هر زامان ماهواره‌ن قاتیشدی منه خبر وئر" دئدی و حاجی ایلن ساغوللاشیبان او ائوی الی بوش ترک ائتدی !

نئچه دویغو ایچینده چالخالانماغا باشلانمیشدی ؛ آمما اؤزونون اوره‌یینین لاب دیبینده او گونو حاجینین ماهواره‌سینین توتماماسیندان اؤتورو، موتلولوق دویغوسون دریندن دویوردو !

آرابادا اوتوروب ، بیر داها یولا دوشوب ، دام دوواری سئزمه‌یه باشلادیلار ، بلکه باشقا بوشقاب تاپسینلار دییه!
 
حامد مرسلی