آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالیییق دئیه دوشونورم. بو دوشرگه‌ده اؤز آنادیلیم اولان تورکجه‌ده یازاجایام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب، بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی‌دیر :)
سیز ده دیریلیگینیزی بیلمک ایسته‌ییرسینیزسه یازماغا باشلایین.
یادیمدان چیخمامیش: سلام، خوش گلیب‌سینیز :)

سون گؤندری‌لر
سون یوروملار

۵ مطلب با موضوع «دیل» ثبت شده است

هر نه‌دن اؤنجه‌کی آچیقلاما: بونلار منیم اؤزل دوشوندوکلریمدیرلر، اولا بیلر بوتؤولوکله یا بیر قیسمن دوغرویلا یانلیشین قاریشیمی اولاراق یانلیش ساییلالار.

¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥؛

دیلیمیز آذربایجانجا، آذربایجان تورکجه‌سی یوخسا ائله تورکجه‌دیر؟؟!!

بیر سیرا آذربایجان دوشونورلری بلکی دئمک اولار دیلیمیزین اوزه'رینده داها آرتیق حساسیت گؤستریرلر. بو اؤزلویونده چوخ گؤزل و آلقیشا لاییق بیر تاویرین سرگیلنمه'سی دئمک'دی. آنجاق نه یازیق بو سایین بی'لرین تکجه آماجلاری دیلیمیزه گیرن تورکجه سؤزلری آذربایجانجالاشدیرماق فیکیرینده اولماقلاری'دیر. بونا دایاناراق دا اؤزلرینه یازیلمامیش بیر گؤره'و تعریفله'ییب'لر دیلیمیزدن بئله'جه، تورکجه'نین قابا ایزلرینی سیلسینلر دئیه هئچ ایشدن اسیرگه'میرلر.

  • حامید مورسلی

بیر گون اورمانداکی حئیوانلار بیر آرایا گه‌لیب اوخول آچمایا قرار وئره‌رلر. 

بیر دووشان، بیر قوش، بیر سنجاب، بیر بالیق و ایلان یؤنه‌تیم شوراسینی اولوشدورارلار.

دووشان، تدریس برنامه‌سینده قاچمانین اولماسینی ایستمه‌کده ایصرارلی ایدی. قوش، اوچمانین داخیل اولماسینی، بالیق اوزمه‌نین داخیل اولماسینی و سنجاب، آغاجا دیرماشمانین موطلق زورونلو درس‌لر آراسیندا اولماسی گرکلی‌لیینی سؤیله‌مکده‌ایدیرلر. بوتون بونلاری بیر آرایا گه‌تیریب،بیر تدریس پروقرامی حاضیرلادیلار و بوتون حئیوانلارین بو درسلری گؤرمه‌سینی ایسته‌دیلر. 

دووشان قاچماق درسیندن A آلدیغینا باخمیاراق، آغاجا دیرماشماق اونون اوچون چوخ جیددی بیر سورونودو. سورکلی اولاراق باشی اوسته یئره دوشوردو. بیر سوره سونرا بئینی ضربه گؤردو و أسکی‌لر سایاغی قاچا بیلمه‌دی. آرتیق قاچمادا A آلماق یئرینه‌، C آلیردی. و طبیعی اولاراق، آغاجا دیرماشمادا ایسه هر زامانکی کیمی ضعیف اولوردو. قوش، اوچمادا چوخ باشاریلییدی، آمما سیرا تورپاق قازمایا گلدییی زامان، او قده‌ر باشاریلی دئییلدی.  سورکلی دیمدییی و قاناتلارینی سیندیریردی. بیر سوره سونرا تورپاق قازما نومره‌سی هله‌ده کی وار F اولماسینا رغمن، اوچما نومره‌سی C' یه دوشموشدو. او' دا آغاجا دیرماشماقدا چوخ زورلانیردی. 

سونوجدا اوخولون بیرینجیسی اولان حئیوان هر شئیی یاریمچیلیق باشارا بیلن، گئری ذکالی ایلان اولدو. آنجاق ائییتیمچی‌لر چوخ موتلویدولار، چونکو هرکس بوتون درسلری کئچیریردی. 

و بونا "گئنل ائییتیم و اؤیره‌تیم سیستئمی" دئدیلر. 

(اوشو'نون " سئزگی (شهود) " کیتابیندان آلینیب)

  • حامید مورسلی

دونیا آنادیلی گونوندن بیر نئچه ائپیزوت:

- بیر سیرا تورک وطنداشلاریمیز یونئسکو وریندن اعلان اولان آنادیلی گونونو قوتلاماق اوچون موجَوویز پئشینده اولدوقلاری اوچون توتوقلانیرلار.

- ایرانین میللی تقویمینده دونیا آنادیلی گونو قئید اولونماییب بو اوزدن ایش باشیندا سوروملو اولاراق تانیملانان کیمسه‌لر موجَوویز وئرمه‌یه آغرینیب بو ایشین گئرچکلشمه‌سینه مانع تؤره‌دیرلر.

- رسمی و یاسالار چرچووا‌سیندا موجَوویز آلماق پئشینده اولان تورک آکتیویست‍‌لری توتوقلانیر‌لار.

- آنجاق بو آرادا کوردلر و عرب‌‍‌‌لر بو گونو موجَوویزلی اولاراق قوتلایا بیلیب باشاریلا سونا چاتدیریر‌لار. 

- بئله‌لیک‌له نه میللی گووه‌ن تهلوکه‌یه‌دوشور نه‌ده اونلاردان کیمسه توتوقلانیر.

 

*********************

بوتون بونلارا باخاراق او قورد ایله قویونون ناغیلی یادیما دوشور:

گونلرین بیر گونو بیر قورد ایله قویون بیر بولاغین باشیندان سو ایچمه‌یه گئدرلر.  قورد بولاغین لاب یوخاری حیسسه‌سیندن (بولاغین باشیندان) سو ایچمه‌یه باشلار قویون ایسه بیر نئچه آددیم  آشاغیلیغیندان. بیر قورتوم سو ایچیب ایچمه‌میش قورد  اوزون توتار قویونا ساری دئیه‌ر "قویون سویو بولاندیرما" .

قویون باشین قالدیریب  باش اوسته آغای قورد دئییب سو ایچمه‌یه دوام ائدر. نئچه ثانیه سونرا یئنه قورد اوجا سس ایله دئیه‌ر"قویون به سنه دئمیرم سویو بولاندیرما؟"

قویون بو ایشه مات قالاراق " گؤزلریم اوسته آغای قورد، بولاندیرمارام" دئییب یئنه سوایچمه‌یینه دوام ائدر. اوچونجو دفعه قورد باغیراراق دئیه‌ر "به من سنه دئمیرم سویو بولاندیرما ؟ بو ایچدییم سویو لاب بورنومدان گَتیردین سن" دییب اؤزونو قویونا ساری اوزولمه‌یه حاضیرلادار.

داها قویون‌دا دؤزوم قالماییب دیله گلیب دئیه‌‍‌‌ر: سن ده لاب شورون چیخارتدین ها، بو ایش نئجه اولار آخی؟  سن بولاغین باشینداسان، اوجا یئرده دایانیب سو ایچیرسن؛ من سویو بولاندیرسام دا بولانتمیش سو سنه ساری گلمزکی. اوسته لیک بو سن سن سویو بولاندیرماغینلا منیم بولاندیریق سو ایچمه‌یینه نه‌د‌ن اولورسان. اوغول بالاسی منی یئمک گؤیلوندن کئچیرسه دا نیه ماهانا آختاریرسان؟  دا بیر دفعه‌لیک گل آنلی آچیق منی یئ دا. :) 

 

*******************

 

ایندی بیزیمکی ده بو قورد ایله قویونون اویونو اولوب. بیز نه‌قده‌ر بویون أییریک، اؤزوموزو قوراللارا، یاسالارا سیغیشدیرماق ایسته‌ییریک قارشیمیزداکی بیزی داها هده‌له‌مه‌یه باشلاییر. گئت گئده اونلاری گئری چکیلمک یئرینه، بیز گئری چَکیلیریک، اونلار ایسه بیزی اوسته‌له‌ییرلر. بیزلر اینسان حاقلارینی دیله‌مک یئرینه اؤزوموزو ایراندا آنایاسادا ناقیص، و بلکه دوز آراشدیریلسا بیزیم طبیعی حاقلاریمیزا آیغیری اولدوقلاری اوزه چیخا بیلن یاسالارا سیغیشدیرماق ایسته‌یه‌رک، آنجاق بوتون بونلارا باخمیاراق یئنه ده بیزیمکی‌لر بو ناقیص و بلکه اینسان حاقلارینا آیغیری اولان اوصوللاری دیله‌مک سوچونا توتوقلانیب دوستاقلانیرلار. بئلنچی یئرده برابرلیک ، اینسان سئورلیک، سایغی و حؤرمت دن دانیشماق ایستر ایسته‌مز اوخوجویا گولونج سؤزجوکلر کیمی گلیر.  کئشکه ائله بیر زامان گلسین کی کیمسه طبیعی و اینسانی حاقلارینی دیله‌مه‌ییندن دولایی توتوقلانماسین. و باشقا اینسانلار و باشقا میللت‌لر ده اؤزلرینی بو آماجین اوغروندا سوروملو بیلسین‌لر. نه یازیق کی هله بو سونوجا چاتماق بیزده بیر آرزی کیمی نظره گلیر. بو یانی هله چوخ ایشیمیز وار.

 

حامید مورسلی 5 اسفند 93 - 2.24.2015 

http://hamedmorsali.blog.ir

  • حامید مورسلی

:::::::: اردوغان ؛ تورکجه و فلسفه اوزره دارتیشمالار :::::::::



تورکییه‌ده اردوغان کیمی دیکتاتور دا دئمه‌سه‌ک، اؤزونه قاپالی بیریسی‌نین، عدالت و قالخینما پارتیاسی بیچیمینده اوسته گلمه‌سی سونوجوندا، تورکییه توپلوموندا بیر چوخ ده‌ییشیملره نده‌ن اولدو. اردوغان ائکونومیک‌ چالیشمالاردان باشلاییب تورکییه‌نین دئمه‌ک اولار پوزقون دوروملارین آریدیب (دوزلدیب،تمیزله‌ییب) گونو گوندن گلیشمه‌سینه دوغرو یول آچدیر. بونون یانی سیرا تورکییه کوتله‌سی وریندن اؤزللیکله تورکیه‌نین آشاغا قاتمانیلا(طبقه‌سی) بیرگه بیر سیرا اورتا قاتمانی و دینچی قیسیملری آراسیندا دا اؤزونه اؤزل یئر آچا بیلدی. بوردا دئمه‌لی یم کی قاتمان تام آنلامیلا تورکییه‌ کوتله‌سینی، اؤز ایچینده قاپسیا بیلَن بیر سؤزجوک ساییلمیر؛ نیه کی بیر چوخ اوزمانلارین دئدیکلرینه گؤره تورکییه ده، ایران کیمی دئمه‌ک اولار قاتمانسیز بیر توپلوما یییه‌دیر.
اردوغان رئفورمچولوغو تورکییه‌نین گله‌جه‌گه باخیش آچیسینی ده‌ییشدیریب بو یئنی باخیشلار چرچیوه‌سینده یئنی ایستک‌لر اورتایا قویدو. ائورنسل (جهانی) باخیشلارینین ده‌ییشمه‌سی اساسیندا بؤلگه‌سل گؤروشلرینی ده ده‌ییشدیردیرلر. تورکییه‌نین ایچ سیاستین قازانان اردوغان، اورتادوغونون (خاورمیانه) دا سون سؤزونو دئمه‌ک ایسته‌دی. آنجاق ایدولوژیک باخیشلارینا گؤره بیر چوخ متحدلرینی الدن وئریب، دیش(ائشیک) سیاستینده، بوتون دایاندیغی چرچووالاردان گئری چکیلمه‌ک زوروندا قالدی. میصردن باشلا سوریه‌دن عراغا کیمی بؤیوک اودوزانلارین سیراسیندا دایانانلارین بیریسی تورکییه اولدو. "عرب باهاری" دئدیگیمیز بوتون آختا دئوریملره ائگه‌منلیک ائتمه‌ک ایسته‌ین تورکییه، بو سیاستلری اساسیندا تورکییه‌یه قارشی یؤنه‌لیک چالیشان مئدیالار پروپاقانداسی آراجیلا ایچ چاخلانیشینا دا نَدن اولدو. و بو باشاری‌سیزلیق اردوغانین تورکییه‌نین ایچه‌ریسینده دیکتاتورجا داورانیشلارین، داها یوکسه‌گه قالدیردی.
بو نئچه ایلده اردوغان بیر چوخ ساحه‌لرده ده‌ییشیم‌لره ال قویموشدور. أن باشدا چؤزوم سوره‌جی دئییلن بیر گلیشمه‌یی اورتایا قویدو، بیر نئچه آنا یاسا ده‌ییشیک‌لیگی و حقوق آلانیندا دا ده‌ییشمه‌لره اوز گه‌تیرمیشدیر. سون دانیشیقلارینین بیریسینده " دیل دئوریمی"-نه قارشی چیخیب دیلی هدفه آلاراق " تورکجه ایله فلسفه یاپیلماز" سؤزونو اورتایا قویموشدور. آتاتورک قوران جومهوریتین اساسلارینین بیریسی اولان تورکجه‌نی رد ائدیب عوثمانلیجانی ساوونموشدور. و بئله ایفاده ائتمیشدیر کی فلسفه یاپماق ایسته‌ین یا عوثمانلیجانی دوزگون بیلمه‌لی دیر یادا اینگیلیزجه‌نی. بو اوزدن بو سؤزلره تپگی اولاراق بیر چوخ بیلیم آدامی و آکادئمیک اوزمانلار وریندن قینانیب ائلیشدیریلمیشدیر. "ائفدال سئوینجلی: دیل دئوریمی تورکجه‌یه مینلرجه سؤز(کلمه) قازاندیرمیشدیر " دئیه ایفاده ائدن تورک دیلی‌نین اؤیرتمنی "جومهمور باشخانی تورکجه‌نی یاخشی بیلمه‌ییر. تورکجه‌نی عربجه ایله قاریشدیریر آنجاق عربجه‌نی ده بیلمه‌ییر" دئمیشدی.
تورکییه‌نین فلسفه درنه‌گی وریندن ده تپگی‌لر گلدی و بو سؤزون اساس سیز اولدوغونو آچیقلادیرلار. آنجاق بیر نئچه بیلیم آدامی دا تورکییه‌‌ده واراولان بوگونکو تورکجه‌نی "آختا" دئییمی ایله ده‌یرلندیریب بیر ته‌هَر اردوغانا قاتیلمیشدیرلار. 
تورکجه آتاتورکون تاساریلادیغی یئنی جمهورییتین تمل‌لریندن بیریسی ساییلیر و سون 90 ایلده تورکجه دیل قورومو بودیلین زنگینلشمه‌سینده ده‌یرلی ایشلر گؤروب، آددیم‌لار آتماغا باشاریلی اولموشلاردیر. آنجاق بو دارتیشمالارا باخمیاراق اردوغان یئنه بو قونویا دا ایدولوژیک اولاراق یاناشیب اؤز اینانجلارینا آیقیری(ضد) اولان فلسفه پاپماق کیمی دئییمی اورتایا قویموشدور. نیه کی اردوغانین اینانجلارینا باخاراق "حیکمت" یئرینه فلسفه سؤزون قوللانیشی سؤزونون آرخاسیندا باشقا آماجینین اولدوغونو اورتایا چیخاردیر. اردوغانین فلسفه دردی دئییل هر هانسی آراجیلا اولور اولسون اؤز ایدولوژیک آماجی‌نی سونوجا وارماسی اؤنملی اولدوغودور کی بو اساسدا بئلنچی ایفاده‌لری اورتالیغا بوراخیر. 
فلسفه سؤیلملرینی اورتایا قویا بیلن بیر فیلوزوف (فیلسوف) اؤنجه‌لیکله یارادیجیلیق یاپماق ایسته‌دیگی دیلیی بیر دیلچی کیمی بیلمه‌گی گره‌ک‌لی دیر. نیه کی فلسفه دیلی‌ایله آنلاتماغا چالیشان فیلوزوف دیلی دوزگون بیلمه‌دیگینه گؤره یئرینده آخسارلیقلارلا راستلاشیب آنلاییش فرقینه وارماغا دا بیله، یؤنلمه‌ک زوروندا قالاجاغی قاچیریلماز اولاجاقدیر. دیلی آنلایان فیلوزوف یئره‌ل و ساوسال (فلسفی‌سل) یئنی سؤزجوکلری یارالدا بیله‌جه‌ک گوجونه یییه اولا بیله‌جه‌کدیر. اردوغانین بو سؤزلری تورکجه‌یه و تورکجه‌نین اوغروندا چالیشان شخص‌لر و قوروملارا بیر اویاری کیمی اولا بیلَر. نیه کی بیر چوخ دیلچی‌نین دئدیکلرینه گؤره دیلی دیلچی‌لر سؤزجوک یاراتماغیلان قورویوب ساخلیا بیلمزلر؛ بلکه دیلی کوتله قورویار. کوتله آراسیندا دانیشیلان دیل و باشقا دیللرله آل وئرده اولان دیل اؤز تمل قوراللارین و یاپیلارین قورویوب ساخلیا بیلدیگینده، او دیلین قورونوب ساخلانمیشدیر دئمه‌گینی ایدیعا ائده بیله‌ریک.

6/10/93
یازار: حامید مورسلی

  • حامید مورسلی

نئچه گون اؤنجه اؤتری باخیشدا اورمیه کانالیندا مسئولارین بیری‌سی‌نین، دونیالیق "اؤیره‌تیم و ائیتیم" گونو حاقیندا دانیشیقلاری ایلگیمی چکدی؛ همین دانیشمان‌-ین دئدیکلرین قایناق گتیره‌ره‌ک باتی آذربایجان‌دا : 
267 مین نفریمیز کؤکدن یازیب اوخویا بیلمه‌ییرلر ! 
29 مین نفرین اوشاقلاری مدرسه‌لرده اؤیرنجی اولاراق دئمه‌ک اولار اؤزلری موطلق ساوادسیزدیرلار ! 
اینقیلابدان اؤنجه ساوادسیزلیق اؤلکه‌نین (ایرانین) اورتالامالاریندان 11 قات یوخاریمیش ! آنجاق بوگون ایسه 5.5 قات یوخاریدادیر !!!
و بیر سورو بونلارا تای بو ساحه‌ده دهشتلی دوروملاریمیزی یانسیدان بیلگی‌لر ! 
هله بو دهشتلی بیلگی‌لره یونسکونون بو یاساسینی کی علی بی جباری گؤزل قوشوق شکیلینه سالیبدیرلار، آرتیرساق، بو قونودا دا دوروملاریمیزین داها دارماداغین اولدوغو دریندن گؤزه چارپاجاق :

" یونئسکو یازدیغی یاسا فریاددیر/ کیم اؤز دیلین یازانمیر بی‌سواددیر"

----------------------------------------------------------------------

ی. س 1: باشقا اوستانلاریمیزین دوروملاری، باتی آذربایجان‌دان چوخ دا یاخشی دئییل !

ی. س 2: گوزاریشده بیر قوجا کیشی‌نین سؤزو منی چوخ فیکیره دالدیردی: " بالا بیز کور قوش کیمی‌-ییق دا " frown ifade simgesi

ی. س 3: مدرسه‌لر آچیلیر آنجاق هله‌ده کی وار، بیزیم دیلیمیزه چه‌کیل اویانا دا دئیه‌ن یوخدور؛ دئیه‌سن بو ایل‌ ده دیلسیز قالماغیمیزا ، دیلیمیزی ائویمیزده بیراخماغیمیزا، اؤزگه‌لرین دیلینه قوللوقچو اولماغیمیزا آلیشمالییق !

ا. ی: شکیل‌ده اولان سؤز اینسان حاقلارینین تمل‌لریندن بیریسینی وورغولاییر !

  • حامید مورسلی