قاراباغ آذربایجاندیر
اومود سنهدیر آنجاق آذربایجان عسگری!
ریچارد جئوئل (٢٠١٩) آدلی فیلمده بئله بیر دیالوگ وار -سانمیرام ساواش سؤزوندن دهشتلی بیر سؤز ده اولا؟
+نییه وار، باریش! ساواشمالی اولدوغون زامان، سن باریشی دوشونهسن!
آذربایجان اوردوسو بوگون تام گوجویله ساواشمالیدیر. بوندان باشقا بیر سئچهنک یونتایانلار خیانت ائدیرلر. هر دفعه آتیشکس خبرلری گلدیکده سانکی بیر ابدی صولحه سونلانان ایشه، خیانت ائدیلیر نظریمده.
هردن ایران عراق ساواشینا فیکیرلشیرم. یاشیم چاتماسا دا اورتالیقدا اولان بلگهسل فیلملردن، سندلردن، حتی اؤلوب ایتنلرین عاییلهلرینی گؤرمکله نئجهلیگیندن بیر سیرا بیلگیلر الده ائتمیشم. او اوزونلوغا سورن ساواش، او بویدا اؤلوم ایتیمه سبب اولان ساواش، بیتسهیدی ده آرادا یارانان ساواشدان تؤرنمیش نیفرتی بیتمهیهجک کیمی گؤروردوم. ایکی طرفدهده شهریار دئمیشکن، قانلا اؤز لکهلرینی یوماق ایستهین مفکورهلر وار ایدی. ساواشا بیر نعمت گؤزونده باخیردیلار. دؤیوش غلبه اوچون دئییل، بوتون کسیملری بیرلشدیره بیلمهسی اوچون بیر ایلاهی فورصت کیمی نظره گلیردی. آنجاق آرادا اینسانلار اؤلوردو، ضحاکلار ایسه داها آرتیق قان ایستهییردیلر. ساواش هر نه تهر ایدیسه بیتدی. بونلار زهر جامینی ایچدیلر، صدام گئتدی. نهایتده او بویدا نیفرت یوخویموش سانکی. ایرانین آیاغی عراغا آچیلدی، سیاسی آنلاشمالار اولدو. خالقلار درین بیر باریشا دوغرو گئتدیکلری آن، قالسین کی بو وضعیتین خوشلوغو بونلاری آزدیردی، بوتؤوجول مفکورهلی ایراندان نیفرت، عراق خالقیندا یئنیدن دوغماغا باشلادی. آنجاق بونو یاخشی بیلیریک بیر سیرا حذفی باخیشلار، تک سسلی سیاستلر اؤنه سوردورولمهسهیدی ایندی عراقدا نه داعش یاراناردی، نه حشدالشعبی، نه ده بو قدر اینتحار قوخولو سالدیریلارا شاهید اولاردیق.
آذربایجان ایله ارمنیستانین تاریخی ساواشلارینی اینجهلهدیکده بیر بوتؤوجول، تکسسلی، راسیزان دوشونجهلرله اوسته گلمیش هم ده بؤلگهده اولان گوجلرین اویونجاغینا چئوریلمیش بیر راسیست حکومتله راستلاشیریق. بیر طرف اوتوز ایلدن چوخ بوتون یاسال یوللاری تام متانتله دنهیهرک هئچ نه الده ائده بیلمهین آذربایجان ایدیسه، قارشی طرف اؤز تاریخی اودوزمالارینی، سیاسی-اکونومیک باشاریسیزلیغینا بیر اؤرتوک اولسون دئیه ساواشی غنیمت بیلن بیر ایقتدار دایانیردی.
نئچه گون اؤنجهدن باشلانمیش بو ساواش، عملده گؤستردی کی کئچمیشده مئیدانا چیخان چاققیشمالارلا فرقلیدیر.
بیر چوخ تاثیرلی و بلکه دئمک اولار داها تکرارلانا بیلمهین عامیل الاله وئریب آذربایجان اوردوسونا ایرهلی گئت دئییر. سیویللری هدفه آلمادان، ایشغالچیلاری اؤز تورپاقلاریندان تمیزلهین اوردو ان دورغو ایشی گؤرور.
ایکینجی دونیا ساواشیندان بری باشقالارینین منافعی اوغروندا هزینهلره قاتلاشان ارمنی خالقی بیر داها بو اولوب بیتنی ایزلهییب بیر تاریخی قرارا گلمهلیدیر. بیز بیربیریمیزله قونشویوق، آنجاق بو قونشولوق اونلارین آرتیق طاماحلیقلاری سببیله دوشمانچیلیغا چئوریلیر. اورتاق کولتور، اورتاق میراثلارا صاحیب اولان بو ایکی خالق هرهسی اؤز حقوقی یئرلرینی تانیدیقدان سونرا اینسانجاسینا بیرلیکده یاشییا دا بیلرلر. آنجاق بونون گرهیی متجاویزلرین اؤزلرینه بؤیوک بیر هوپ دئییب عمللری ایله بو یولداشلیقلارینی ثبوتلامالاریدی. دئمک اوگون بیز ارمنی شرابی دا ایچه بیلریک بیرلیکده، یاللی دا گئده بیلریک. آنجاق ائله بیر سیاسی اراده اورتالیقدا اولمایینجا اومودوموز تکجه آذربایجان عسگرینهدی بیزیم اوزوموزو گولدوروب بایراغیمیزی اؤز تورپاقلاریمیزدا دالغالاندیرسین.
- ۹۹/۰۷/۲۸