آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

گونده‌لیک یازیلاریمین دوشرگه‌سی.

آنی‌لار دوشرگه‌سی

دیل وارلیغین ائوی‌دیر دئمیشدی هایدگئر؛ بو اوزدن وارلیغیمیزی قوروماق اوچون دیلیمیزی قورومالیییق دئیه دوشونورم. بو دوشرگه‌ده اؤز آنادیلیم اولان تورکجه‌ده یازاجایام؛ گونده‌لیک آنیلاردان، ادبیات، حیکایه و آراشدیریجی یازیلاریما کیمی. چالیشیرام قونو سئچیمینده چوخ سینیر قویماییب، بوتون قونولاردان بیلدیگیم و یازماق ایسته‌دیگیم قده‌ر یازام. یازماق منیم دیریلیگیمین بَلیرگه‌سی‌دیر :)
سیز ده دیریلیگینیزی بیلمک ایسته‌ییرسینیزسه یازماغا باشلایین.
یادیمدان چیخمامیش: سلام، خوش گلیب‌سینیز :)

سون گؤندری‌لر
سون یوروملار

۲۲ مطلب با موضوع «فیلم؛ سیناما» ثبت شده است

👈 بوگون اوکتیابرین اونو(١٠ اکتبر)، دونیا اعدام جزاسینا قارشی دورما گونودور. نه‌دن اعدام جزاسینا قارشی دورمالیییق؟ چونکی اینساندان، اینسانی ایلیشگی‌لردن دانیشیریق. چوخ ساده دیلده دئسک: اینسان بیر دفعه بو دونیادا یاشاییر، یاشامین ایکینجیسی یوخدور. بو اوزدن هئچ بیر سوچون بدلی اعدام جزاسیلا اؤده‌نیلمه‌مه‌لی‌دیر. ناقیص عدالتدن اوزاقدیر بیر چوخ عامیلین ال اله وئرمه‌سیله بیرآندا اوز وئرمیش بیر سوچون ایشله‌یه‌نینین یاشامینا بئلنچی سون وئرک.اعداما قارشی دیک دایانیب، اونون همیشه‌لیک لغو اولونماسینی ایسته‌ییمیز، بو مسئله‌نین چؤزومونو آختارماق ایسته‌ییریک دئمک‌دیر. یانی هئچ بیر شئیه دوزه‌لیش گتیرمه‌دن تکجه وار اولان مسئله‌نی سیلمک ایسته‌مه‌دیگیمیزه بؤیوک بیر بلگه‌دیر. بیز اینسانی توپلولوقلاردان دانیشدیغیمیزدا هرآن او توپلولوغو  دوزگون یاراقلارلا یاراقلاندیرمالیییق. 

  • حامید مورسلی

yol 1982
یوْل؛
توْپلوم آدلی دوستاغا گئدن بیر یوْل!

یوْل/1982/تورکیه/یؤنتمن: ییلماز گونئی‌/اوْیونچولار:خلیل ارگون، شریف سئزَر، آنیتا پی‌نس و ...
🎥🎥🎥📽📽📽

بئش نفر توتساغا، ایزینلی اؤزگورلوک(مرخصی) وئریلیر، عاییله‌لرینی گؤروب شخصی ایشلرینی یئربه‌یئر ائتسین‌لر دئیه؛ آنجاق ...

🎥🎥🎥📽📽📽

  • حامید مورسلی

The Burmese Harp 1956
بئرمه سازی
باریش اوچون بیر سس

@turkcesinema

برمه سازی/1956/اؤلکه: ژاپن/ یؤنتمن: کن ایچیکاوا/اوْیونچولار: رنتاروْ میکوْنی، شوجی یاسوْی، یان هاماموْرا و...

🎬🎬🎬🎬🎬🌹🌹🌹🌹🌹

ساواش چوْخ تئز قورتارا بیلَردی. بو قَدَر خسارت ایله ویرانلیغی تؤره‌تمه‌سین دئیه هئچ باشلانیلمازدی دا بیله. بو قدر گنج اینسان دونیاسین ده‌ییشمزدی؛ آزجا موسیقی ایله ایلگی‌لنسه‌یدیرلرسه، لطیف دویغویا اؤنم وئرسه‌یدیرلرسه، باریشین سسی‌نی ائشیتسه‌یدیرلرسه، ببرآز داها چوْخ مئهریبان اوْلسایدیرلارسا، هئچ بیر ساواش باش توتمازدی یقین.

  • حامید مورسلی

عروج (یوکسه‌لیش) The Ascent 1977

شئپیتکوْ'نون شاه اثری
@Turkcesinema
.

عروج/1977/اؤلکه: سوْوییئت‌لر بیرلیگی/یؤنتمن: لاریسا شئپیتکوْ/اوْیونچولار: آناتوْلی سوْنوْنیتسین، بوریس پلوْتنیکوْف، وئلادیمیئر گوْستیوخین و...
🌹🌹🌹🌹🌹🌹🌹🌹🌹🌹🌹؛

ایکینجی دونیا ساواشی چاغیندا ایکی نفر پارتیزان قاردا قالمیش قوروپداشلارینا یئمک اوچون بیر شئی تاپسینلار دئیه، بیر کنده یوْللانیرلار. بیر قوْیون (گوسفند) تاپیب قوروپلارینا ساری یوْللانیرلار. آنجاق یوْلدا آلمان عسگرلره توش گلیرلر. اوْنلار اسیر اوْلورلار. آلمانلی‌لار سوتنیکوْف ایله ریباک'ا اوْنلارین پوْلیس گوج‌لرینه قاتیلماق اؤنری‌سین وئریرلر. سوتنیکوْف بو اؤنرینی قبول ائتمه‌ییر آنجاق ریباک...

  • حامید مورسلی

الجزایئر ساواشی
The Battle Of Algiers 1966
پوْنته کوْروْنون شاه اثری

@turkcesinema

الجزایئر ساواشی/1966/اؤلکه: الجزایر ایله ایتالیا/یؤنتمن: جیلو پوْنته کوْروْ/اوْیونچولار: ژان مارتین، سعدی یاسف، براهیم هگیاگ، توماسوْ نری و...

🎥🎥🎥📽📽📽

۱۹۵۷ میلادی ایلینده فیرانسالی سوْرغوچولار (بازجولار) الجزیره شهرینده بیر الجزایئرلی ناسیوْنالیستی، علی لاپوْآنته آدلی الجزیره‌لی چیریک‌لرین گیزلندییی یئری لوْوا وئرسین دئیه، ایشکنجه ائدیرلر. آنجاق ...

  • حامید مورسلی

The Weeping Meadow 2004
آغلار اوْتلاق
پوْلوْسون شاه اثری 

آغلار اوْتلاق/2004/یؤنتمن: تئو آنجئلوْپوْلوْس/اوْیونچولار: الئکساندرا آیدینی، تالیا آرگیریوْ، جیوْرجوس آرمئنیس و...
🎬🎬🌹🌹🎬🎬

آغلار اوْتلاق (علفزار گریان)

ایکینجی دونیا ساواشی‌نین سوْنوجوندا ائولریندن دیده‌رگین توشموش بیر سیرا یونانلی، ائدسادان یونانیستانا گیریش یاپیرلار. هئچ بیر عاییله‌سی اوْلمایان ائلئنی اوْنلارلا بیرگه‌دیر. ائلینی بؤیویوب، یاشی چوْخالیر. بیر یانلیش اوْلای سوْنوجودا حامیله اوْلور.

آغلار اوْتلاق آنجئلوْپوْلوْسون شاه اثری ساییلیر. بو فیلم بیر قادین اوْلموش قیزجیغازین کدرلری‌نین ریوایتی‌دیر. بیر قادین کی آنا اوْلور، اؤزو ایسته‌مه‌دیی اوشاقلاری‌نین وورغونونا چئوریلیر. نه‌قدر چالیشسا دا چاتا بیلمه‌ییر. بو فیلم دوْلودور غم ایله کدر هم ده اؤزلم‌له. بو فیلم، شاه اثرلر یؤنتمنی اوْلان پوْلوْسون شاه اثری ساییلیر. هر بیر سئریجینی اوْزونه حئیران ائدیر...

آنجئلوْپوْلوْسون سینئماسی گونوموزده‌کی سیرادان بیر سینئمالاردان داها فرقلی بیر سینئمادیر. بو اوْلاغان اوستو سینئما حاقدا نه‌قدر دایشساق دا یئنه سوْنوندا سؤزوموز قیسیر قالاجاق. گئرچکدن اوْنون اینجه‌صنعتدن تام آنلامی ایله بارینمیش سینیماسینی، سادجه دیلده آنلاتماق اوْلماز. صنعت دوْلو سینئما، بلکی دئمک اوْلار پوْلوْسدا سوْن دوراغینا چاتیر.
آغلار اوْتلاق آنجئلوْپوْلوْسون بیتمه‌میش اوچلویونون ایلک فیلمی‌دیر دئمک. بو فیلم ده، باشقا فیلم لرینه تای پوْلوْسون همئشه‌کی وورنوخمالاری‌نین گؤسترگه‌سی‌دیر. آنایورد، آنا توْرپاق، وطن دردی، اوزاقلیق و اؤزله‌مک، ساواش، چاتماماق، غم، کدر، ائیله‌جه، قاندیرمایا دوْغرو سوْنوجا وارا بیلمه‌ین دورتولر؛ دئمک اوْلار پوْلوْسون همئشه‌کی وورنوخمالاریندان ساییلالار. بو فیلمده ده گؤزلجه‌سینه بونلارا توْخونوب‌دور. بو اوزدن ایزله‌ییچینی درین دوشونجه‌لره دالدیرمایی باشارا بیلیب‌دیر یقین. 

  • حامید مورسلی

#فیلم_تانیتیمی
کوروساوانین راشاموْن آدلی فیلمینده گیزلی اوْلان گئرچک


راشاموْن 

۱۹۵۰-Rashomon 

 

کوروْساوا راشاموْن آدلی فیلمینده گیزلی اوْلان گئرچک‌دن سؤز آچیر. آکیرا کوروْساوا، 1950-ده راشاموْن فیلمینی دوزلتدیکدن دوْلایی وئنیز فئستیوالی‌نین قیزیل آصلان اؤدولونو قازانیب، دونیالیق شؤهرت الده ائتمیش‌دیر. راشاموْن کسینلیک‌له سینئما دونیاسی‌نین تاریخینده ان فلسفی فیلم‌لر لیستینده، لاپ یوْخاریدا دایانار. "گئرچک" قوْنوسوندا دوزلمیش فیلم، سینئما فاکولته‌لریندن باشقا، فلسفه کیلاسلاریندا دا تدریس اوْلونور. 

فیلمین سئناریوْسونون اؤزه‌تی، "رینوْسوْکه آکه تاگاوا"-نین "مئشه‌ده" آدلی اثریندن آلینمادیر. بیر یوْل‌کسن(راهزن)، بیر سامورایی‌نین قادینینا تجاوز ائدیب و اوْنو اؤلدورمه‌سی سوچویلا توتوقلانیب‌دیر. یوْل‌کسن محکمه‌ده وورغولاییر، من سامورایی‌نی اؤلدورموشم. آنجاق سامورایی‌نین قادینی دا بئلنچی بیر ادعاسی وار. دئییر: من اؤزوم اؤز حیات یوْلداشیمی اؤلدورموشم. قاضی گئرچک نه‌دیر؟ بیلمک اوچون دئیه، بیر باشقاسی‌نین آراجیلیغی ایله سامورایی‌نین روحونو احضار ائدیب، سامورایی‌نین روحو ایسه اؤزو وورغولاییر، اؤزو اؤزونو اؤلدوروب‌دور. بو اوْلایین تک شاهیدی (یاخیندان گؤره‌نی) اوْدون (هیزم) سیندیران، بو اوْلایدان اوْنونلا بیرگه، آردی کسیلمه‌ین گورشات یاغیشین الیندن، شهرین قاپیسینا (دروازاسینا) ساری گلن بیر نئچه راهیبه، تام فرقلی بیر ریوایت ناغیل ائدیر. 

شاهیدلرین هر بیریسی‌نین کاراکتئری (شخصیت)، روحیاتی، ائیله‌جه ایچ قاوقالاریندان دوْلایی اوْلای نئچه چئشیدلی آچیدان ریوایت اوْلور. بو دورومدا گئرچه‌یی یانسیدا بیلن گؤرونتونو جانلاندیرماق چوْخ چتین و اوْلابیلمه‌ین ایش کیمی ساییلیر. راشاموْنو پیکاسوْنون اثرلرینه تای یوْخسا فوْتوْریست‌لرین اثرلرینه تای، بیر واحید گئرچه‌یه ال تاپمادان، اوْنون بوتون یؤن‌لرینه کسین یوْروم وئرمه‌دن، گؤرونتوله‌نن بیر موْدرن اثر حئساب اوْلورو. 

راشاموْن ایندی سینئمانین کیلاسیک اثرلریندن بیری ساییلیر. بیر کیلاسیک اثر کی فوْرمایا، موْدرن باخیشیلا ریوایی و گؤرونتوسل بوْیوتوندان یاناشیر. کوروْساوا گوجلو یؤنتمنلیک باشاریسی ایله هر شاهیدین سؤزلرینی اؤزونه اویغون توتومویلا گؤرونتوله‌ییری. اوْدون‌سیندیرانین سوْن ریوایتی بیر ائشیکدن باخان بیریسی کیمی یاناشماسی بیله، سوْن سوچلونون کیم اوْلدوغونو بللی ائتمیری؛ چونکی اوْ دا اوْنلارین ایچ دوشونجه‌لریندن خبرسیزدیر. بو اوزدن تکجه اؤز باخیش آچیسیلا قوْنونو آچیقلاییری. نئجه کی نیچه اینانیردی: "بیر چوْخ چئشیدلی گؤز وار، بو اوزدن سوْنوجدا چئشیدلی گئرچک‌لر اوْلاجاق؛ بونا دایاناراق گئرچک یوْخدور دئمک" 

بلکی گئرچه‌یین بللی اوْلان تکجه آنی، سوْن سئکانسدا اوْدون‌سیندیران بیراخیلمیش بیر کؤرپه‌نی اؤزونه اوشاق کیمی قبول ائتمه‌سی اوْلا. سینئمانین بؤیوک اوستاسی‌نین دوشونجه‌ آچیسیندان گئرچک چئشیدلی و قارشیت اینانج‌لاردان دئییل، سادجه بیر اینسانین اؤز هم‌نوعونا محبت ائتمه‌سینده اؤزونو گؤسته‌ریر؛ آرتیق آچیقلاما و تفسیر وئرمه‌دن. 

کوروْساوا بیر چوْخ اثری اینسانلارین یئر اوزونده یاراتدیقلاری بیر داموْنو (جهنم)  گؤرونتوله‌ییر؛ آنجاق بوتون بونلارا باخمایاراق عؤمرونون سوْن چاغینا دک اینسان آدلی جانلی‌دان اومودو کسیلمه‌دی. 


حاضیرلایان: ح. م

  • حامید مورسلی

‫#‏فیلم_تانیتیمی‬

🎬🎬 هئچ‌کیم به‌ی Mr. Nobody 🎬🎬

🔸یییرمینجی یوز ایللییین سوْنلاریندا "نیموْ" آدلی کیشی اوچ چئشیدلی آروادی، هم ده اوچ چئشیدلی یاشامی ایلا، چئشیدلی زامانلاری تجروبه ائدیب، کئچمیشینی 2092 میلادی ایلده بیر قوْجا اوز گؤزو قیریشمیش کیشی‌نین دیلی ایله، بیر چالیشقان و یئتیک ژونالیسته ریوایت ائدیری. قوْجا کیشی اؤزونو نیموْنون اوشاقلیغی و سوْنراسی نئچه یؤنلو کئچمیشی‌نین اورونو بیلیری؛ سانکی ائله همین گئرچک نیموْدور. آنجاق، بوتون اوْلایلار دوْغرویدورلار می؟
سانیرام فیلمین تمل سؤزو تئوریک فیزیک بیلیمی‌نین (اؤرنه‌یین: کووانتوْم فیزیکی، ایپ نظریه‌سی، مهبانگ تئوریسی و زامانین خطی اوْلمادیغینی وورغولایان نظریه) آراجیلا واراوْلوشچولوق فلسفه‌سی‌نین (اگزیستانسیالیسم فلسفه سی) دوشونجه‌لری ایله چالیشیر وارلیق بینئوره‌سین، وارلیغین آنلاما اوستون اوْلماسینی، مارتین هایدگرین دوشونجه‌لرینه دایاناراق گؤسترسین.

  • حامید مورسلی

فیلمین آدی: یاز، یای، گوز، قیش ... و یاز
Spring, Summer, Fall, Winter... and Spring

گونئی کره ایله آلمانییا اؤلکه'لری'نین امکداشلیغیلا دوزلمیش.
2003 میلادی ایلین اورونودور.

یؤنتمن، یازار و ائدیتور: 
Kim Ki-Duk
اویونچولار: 
Oh Yeong-Su, Kim Jong-Ho, Seo Jae-Gyeong 
فیلمین آنا دیلی: کره'جه'دیر؛ 106 دقیقه بویونجا.

تور(ژانر): Drama, Religion

@turkcesinema سینئما دوراغی

کره'لی "کیم کی-دوک" آدلی یؤنتمنین شاه اثری اولان بو فیلمی هر کس ایزله'مه'لی'دیر. 
"یاز، یای، گوز(پاییز)، قیش ... و یاز" بوداییسم'له موستقیم ایلگیده اولان بو فیلم بیر جاوان راهیبین یاشینین چئشیدلی دؤنه'لرینی تصویره چکیر. فیلم "اؤز تانیقلیق یا خودشناسی" و عرفان بیچیملرینده دوزلمیش. یازدا بیر آنا بالاجا یاشلی اوغلونو معبده گتیریر. بیر اوستاد وار، بیر ده بالاجا اوغلان. 

  • حامید مورسلی

 بوگون بیر فیلمه باخدیم. بلکی بو گونلر ایزلنسه داها چوخ ائتکیسی اولار. 

اورتادوغونون بو دارماداغین دوروملاری، آشیری شریعتچیلیک، یوخسوللوق، داعش، ساواش، اؤلوم، دیدرگینلیک. باشقاسی سنه زور دئمه سی، سنه ویلایتی اولدوغونو ساندیغی، آللاهین یئگانه جانشینی اولدوغونو ساندیغی و بو کیمی آجی قونولار ایزله ییچینین بئینینده یئنیدن جانلانیرلار. فیلمین یؤنتمنی سیساکو دا بونلارا توخونماق ایسته ییر.

  • حامید مورسلی