چئوره
بیر اؤلکه‌نین گلیشمه و قالخینماسینی اؤلچه بیلن فاکتورلارین اساسی او اؤلکه‌نین GDP-سی (تولید ناخالص ملی) دیر. GDP بیر اؤلچودور دئمک. هربیر شخصه بیر اؤلکه‌نین بوتون ناخالیص قازانجیندان چاتا بیلن مالی رقم نه قدر بؤیوک اولورسا او اؤلکه‌نین ائکونومیک وضعییتی یاخشی‌دیر/یاخشیلاشماقدادیر، ادعاسینی ائتمک اولار. بو GDP اوچ اساس بؤلومون چیخارلاریندان اولوشور. صنعت، خدمات و اکینچیلیک!
بیزده صنعت ایله خدماتین هانسی یئرده دایاندیغی هرکسه آیدین‌دیر، بیرجه قالیر اکینچیلیک. دئمک اکینچیلیک او ایکی قولون یوکونو چکمکده‌دیر. بیلیمسل اولمادیغی سانیلان اکینچیلیک، سنتی باخیشلارلا یؤنه‌تیلیر، کور سیاست‌لر اساسیندا ایسه داها ویران ائدیجی سونوجلارا سبب اولور. یاشادیغیمیز اؤلکه‌نین دوغرو اقلیمینی و هانسی جغرافیادا یئر آلماسینی نظرده آلارساق داها دهشتلندیریجی حاللارلا راستلاشاجاغیق. بیز نه‌قدر صنعت و خدماتدان چیخاردا بیلمه‌دیکلریمیزی اکینچیلیکدن جبران ائتمک فیکرینده اولورساق بیر او قدر گله‌جک نسیل‌لری توتروغونا(امانتینه) خیانت ائدیریک دئمک. و نهایت تالان اولموش طبیعت جانسیز حالا گله بیلر/گلمک‌ده‌دیر ده.
بیر زامانلار ایراندا انقلاب سفیدین سونوجوندا صنعتی‌لشمکده اولان شهرلرین چئوره‌سینده، یئر یوردلارینی بیراخمیش کندلی‌لرین سایی چوخالسایدی دا، ایندی ایشسیزلیک و معیشت سببیندن دولایی بیرچوخو یئنه آتا بابا اوجاغینا دؤنوب سوسوزلوق مسئله‌سی ایله اوغراشان قره‌چؤپ قالمیش، کالاه اولموش یئرلری زورلا اولموش اولسا دا تولید چرخه‌سینه گتیرمک ایسته‌ییرلر. گون گئده اینسانلارین سایی چوخالیب توکه‌دیجیلیک میدان سولاسا دا، یئرلرین مساحتی ائیله‌جه ظرفیتی ثابیت بیر عدددیر. مدرن دؤولت‌لر اینسانلارین ایشلرینی تامین ائدیب اونلارین ریفاهینا چالیشارلار. بیزده دؤولت‌لر نه‌قدر بو قونودا چیخارسیز اولورلارسا ال‌لرینی دوغال قایناقلارین جیبینه سالیب اونلارین محدود ظرفیت‌لریندن یارارلاندیقلاری هر بیر توزسوز باخیشا مالیک اولان اینسانین گؤزو اؤنونده آیدینجاسینا سرگیلنمکده‌دیر. منفعتجیل دؤولت‌لر هئچ بیر اؤن گؤرو ائدیب و یا یانلیش سیاست‌لرینین فرقینده اولماق ایسته‌مزلر. تکجه بیر قیسا مدت‌لیک تسکین‌وئریجی درمانلار آختارارلار. اینسانلار دا گئت گئده یئتکی‌لی‌لرین بیر تایی اولوب باشلی باشینی ساخلاسین دئیه هرکس اؤز تورباسینی، اؤز چیخارلارینی دوشونور. تکجه اؤزونو دوشونن اینسانلارین سایی گون گئده آرتماقدادیر، حاکمییت ده فرمانی طبیعته بیراخیب هله مورگوله‌مک‌ده‌دیر. بو سیاست‌لر نتیجه‌سینده اورمو گؤلونون قوروماسی کیمی آغیر مسئله‌لرله اوز-اوزه گلمک، و یا فرسایشین ایراندا جهانی آمارلاردان 5 قات یوخاری اولماسی و یا سیل و یئر اوزونده آخان داشقینلاردان آغیر خسارت آلان اینسانلارین سای باخیمیندان چوخ اولماسی بیزده هشدار آلارملارینین چالینماسی‌دیر دئمک!
بئش ایله یاخیندی منابع طبیعی‌ده ایشله‌ییرم. بوآرادا هر نه مدل اینسان ایله تانیش اولوب اونلارین چئشیدلی وضعیت‌لرده فرقلی داورانیشلارینا شاهید اولموشام. یییه‌سیز قالمیش میللی یئرلره یییه‌لیک ادعاسیندا اولانلارین سایی گون گئده آرتماقدادیر. و بو آرادا تایی بنزری تکرارلانمایان چئوره‌میز آغیر خسارت‌لر گؤرمکده‌دیر. یئرلر بعضن تغییر کاربری‌یه اوغراییر بعضن بیر آز سایلی حریص اینسانلارین منافعینه گؤره عمومون منفعتلری تالانا گئدیر. ایشلریمیزین و سیاستلریمیزین بیلیمسل اولماماسی اوچون نه‌یی قازاندیغیمیزا نه‌لر اؤده‌دیگیمیزین فرقینده دئییلیک هله. سیستم بو معیوب چرخه‌نی بازتولید ائدیر سؤزونو دئمک تئیخا دا یانلیش بیر سؤز دئییلدیر. نه ده اولسا سونوندا کلان سیاست‌لری عادی اینسانلار یوخ، دؤولت باشچیلاری پیلانلاییرلار!
99/05/14
