بیروتو دوشونرکن
بوگونلر اعتیراض یوللارینی کووید-١٩ ویروسو گلدیکدن سونرا داها دا آرتیق ایتیرن بیروت اینسانی مستاصل اولوبدور. الی هر یئردن اوزولوب. او اؤز حؤکومدارلاریندان الی سویوسا دا ایچه‌ریده‌کی آلترناتیولره دا راضیلاشا بیلمیر. البته کی حاکیمییت ایله خالقی بیرلشدیره بیلن آلترناتیولر ده گؤزه گؤزوکمور. آنجاق فرانسه حاکیمییتی کیمی سؤموروجولرینه بیر قورتاریجی و منجی کیمی باخمالاری حقیقتن اینسانی کدرلندیریر. بوگونلر لبنانلی‌لاردا میللی ایراده اؤلوب، تکی قفسین بیرآز گئنیشلنمه‌سینه ایمضا توپلاییرلار. نه فرق ائدر، لبنان تالانچیلار الینده تالانا گئده‌جک‌سه کیمین الیله اولسون؟ اؤز حاکیم اقتیدارلارینا و باشقا سیاسی طیف‌لره گوونمه‌دیکلری، هرکسه آیدیندیر. بونون اوچون بئلنچی بیر سیاسی اکتی اورتایا بیراخیرلار.
اینسان چوخ گوجلو بیر مؤوجوددور. بعضن اینسان اؤز گوجونون و نه‌لر ائده بیله‌جه‌ییندن خبرسیز اولماسایدی چوخ بؤیوک بیر ایشلره، چوخ بؤیوک بیر ده‌ییشیملره، چوخ بؤیوک دئوریملره ایمضا آتاردی. اینسان تاریخینین باشا باشیندا تکرارلانان ریوایت، بیلمه‌ینلرین حقوقو، بیلن‌لر طرفیندن یییه‌له‌نیب سؤمورولمه‌‌سینین ریوایتی‌دیر. اینسان بیلگیلندیکجه، اؤز گوجونون فرقینده اولدوغوجا داها کیمسه اونو ایسته‌دییی کیمی یؤنلندیرنمز. عینی حالدا بیلمه‌دییی سوره‌جه اونون باشینا اولمازی اویونلار گله‌بیلر. بئله اولورسا دا نهایت آدینی ایلاهی تقدیر قویماقلا بو حقوق پوزونتوسونو اؤرت باسدیر ائتمک ده اولار.
بیلیمین داییره‌سی یئکه‌لیب هر شئیی اؤزونده چؤزدوکجه جهالت کؤلگه‌لیکلری محو اولماق زوروندا قالاجاق‌دیر. بوآرادا اینسانلارین ائیله‌جه غیری دئموکراتیک حکومت‌لرین منافع توققوشماسی قاچینیلمازدیر. اؤز حقوقویلا تانیش اولماقدا اولان یئنی دیرچه‌لن میللت‌لر گون گئده حکومت‌لری ایله منافع تضادلاری داها آرتیق گؤزه گلیب، بؤیوک چکیش-برکیشه سبب اولاجاغی قاچینیلمازدیر. سؤمورگه‌چی دؤولت‌لر باغلی حاکیمییت‌لردن یانا اولماقلاری دئمک کی اؤز منفعت‌لرینی قوروماغی دوشونمک‌لریله ایلگیلی‌دیر. دئمک بو ساده‌لشمیش تصویر ایدی. رئال دونیادا ایندی بو ایلگی‌لر داها دولاشیق داها نئچه قاتلی و نئچه بویوتلو بیر ایلگی‌لردن عیبارت‌دیر. قدرت اینسانلاری اینمز-دینمز بیر قول ائتمک اوچون ایدولوژی، دین/خرافه، پروپاگاندا آراجلارینی و س ایشه آلیر بلکی دیرچلمکده اولان ضدقدرت ایش اوستونه گلمه‌سین. اینترنت، ساختا و قوندارما اوپوزیسیون قوللاری، ایقتیصادی سیخینتیلار، ایدولوژیک رئکلاملار و بیرچوخ بنزری آلانلار اینسانلاری اللرینده اسیر بیر وارلیق کیمی ساخلاییب اونلاری ایسته‌دیکلری یونه آپاریر. بو آرادا اینسان وارلیغی چوخ اؤنملی‌دیر. اینسانلار بیرله‌شیب ضدقدرت اولوب، بؤیوک ده‌ییشیملره ایمضا آتابیلرلر.
بو اوزدن هر بیر حاکیم گوجدن، حاکیم سؤیلمدن، بیرجه سؤزله قدرت‌دن فرقلی دوشونن اینسانین یاشایا بیله‌جه‌یی بو بئش آشاما اونون هانسی‌سا یولونداکی اینامینین ثبوتونا دانیلماز بلگه حسابلانا بیلر:
تبلیغ، ترغیب، تهدید، تطمیع، تحریم! بو آشامالارین آدلاری و باشلیقلاری هر شئیی آیدینجاسینا چاتدیریر. حاکیم گوج بوتون فرقلی دوشونن اینسانلارا قارشی بوتون ایمکانلاریلا بو پیلانلاری آرد آردینا ایشه آلار. آنجاق اویانیش دالغالاری گوجلو اولورسا و بیرچوخ اینسان حقوقلاریلا تانیش اولارلارسا وضعییت فرقلنمه‌یه طرف ده گئده‌بیلر. تکی گوجلو ایراده‌لر و بیلگین اینسانلارین یئتیشدیریلمه‌سی اساس قوشولدور(شرط‌دیر).
١٧/٠۵/٩٩
