اعدام جزاسینا داییر
👈 بوگون اوکتیابرین اونو(١٠ اکتبر)، دونیا اعدام جزاسینا قارشی دورما گونودور. نه‌دن اعدام جزاسینا قارشی دورمالیییق؟ چونکی اینساندان، اینسانی ایلیشگی‌لردن دانیشیریق. چوخ ساده دیلده دئسک: اینسان بیر دفعه بو دونیادا یاشاییر، یاشامین ایکینجیسی یوخدور. بو اوزدن هئچ بیر سوچون بدلی اعدام جزاسیلا اؤده‌نیلمه‌مه‌لی‌دیر. ناقیص عدالتدن اوزاقدیر بیر چوخ عامیلین ال اله وئرمه‌سیله بیرآندا اوز وئرمیش بیر سوچون ایشله‌یه‌نینین یاشامینا بئلنچی سون وئرک.اعداما قارشی دیک دایانیب، اونون همیشه‌لیک لغو اولونماسینی ایسته‌ییمیز، بو مسئله‌نین چؤزومونو آختارماق ایسته‌ییریک دئمک‌دیر. یانی هئچ بیر شئیه دوزه‌لیش گتیرمه‌دن تکجه وار اولان مسئله‌نی سیلمک ایسته‌مه‌دیگیمیزه بؤیوک بیر بلگه‌دیر. بیز اینسانی توپلولوقلاردان دانیشدیغیمیزدا هرآن او توپلولوغو دوزگون یاراقلارلا یاراقلاندیرمالیییق.
👈 اینسانلاری ائییتمک، بیلگیلندیرمک، فرقینده‌لیک‌له بارا گتیرمک، حقوق سؤیله‌می ایله تانیش ائتمک گوج قایناقلارینین چئشیدلی نهاد، قوروم، سازمان و ساختارلارینین باشلیجا گؤره‌ولریندن ساییلیر. بیر مدنی توپلومدا بوتون اؤیره‌تیملره باخمایاراق یئنه سوچ ایشلمه گؤزه چارپیرسا ایلک اؤنجه سایدیغیمیز گوج قایناقلارینین چئشیدلی قوروملاری سورغولانمالی سونرا پیسخولوژیک یوللارلا او شخص یئنیدن ائییتیلمه‌لی‌دیر. نه‌دن‌لر و نییه‌لیک‌لر دقیق اینجه‌لنه‌رک البته. یئنه بیز بیر دفعه یاشانیلا بیلن حیات حاققینی کیمسه‌دن اسیرگمه‌مه‌لی‌ییک سؤزونو وورغولاماقدا فایدا وار.
👈 بو آرادا قونویلا ایلگیلی لهستانلی یؤنتمن(رژیسور) کریستوف کیشلوفسکی‌نین شاه اثری اولان «بیر قیسا فیلم اؤدورمک حاقدا» فیلمینی هرکس ایزله‌مه‌لی‌دیر. کیشلوفسکی‌نین فیلم‌لری چوخراق بیر تصادوف و دئمک تقدیر ایله باشلایار. اؤرنه‌یین قیرمیز فیلمی والنتینین بیر ایت‌له تصادوفویلا باشلاییر، ماوی فیلمینده ژولی تصادوف ائدیر عاییله‌سینی الدن وئریب افسرده‌لیگه گیریر و یا سؤزو گئدن بو، بیر قیسا فیلم اؤلدورمک حاقدا فیلمینده تصادوف اوزوندن قاتیل ایله مقتول بیر آرابادا اوتورورلار. و...
بو تصادوف و یا تقدیرلر اولماسایدی ریوایت و یا آنلاتی ناقیص قالاردی.
بو فیلم حضرت موسی‌نین اون امریندن بیری اولان «قتل ائتمه» فرمانین اوزوندن دوزلمیش‌دیر. بیر اوغلان تصادوف اوزره بیر تاکسی سوروجوسونو اؤلدورور آنجاق نهایتده اؤزو «قانون» الی ایله اؤلدورولور. بیز هئچ واخت بیله بیلمیریک او اوغلان ندن او تاکسیچینی اؤلدورور، آنجاق بونو یاخشی بیلیریک قانون(توپلوم) نه‌یه گؤره اونو اؤلدورمکده اؤزونو حاقلی بیلیر.
فیلمده شهر بوشدور، هر یئر بولاشیقدی، فیلم باشلایاراق اوشاقلار بیر سیچانی آساراق اؤلدورمکده‌دیرلر. اینسانلارین اوزوندن یورغونلوق یاغیر. اینسانلارین کدرلی اولمالاری هر شئی‌دن آیدین سئزیلیر.
بئلنچی بیر خسته توپلومدا قتل ائتمک لاپ سیرادان بیر ایشلردن بیری ساییلابیلر. فیلم کیشلوفسکی‌نین آنلاتی طرزی ایله قاباغا گئدیر، ایلک صحنه‌لرده نه‌قدر بیر قاتیله نفرت بسله‌دیگیمیزه باخمایاراق، قانون الیله اعداما محکوم اولان آداما قارشی ترحم حیسلریمیز ده اویانیر. سانکی او اعدامدا توپلومون هر تکینین دانیلماز رولو واردیر. بو اوزدن اینسان باغیراراق اعدام ائتمه‌یین دئمک ایسته‌ییر.
👈 بو فیلمدن آلدیغیم تاثیر منده اونودولماز بیر تاثیرلردن ساییلابیلر. بیر قتلده انگیزه‌لر نه‌لردن عیبارتدیردن داها اؤنملی اعدامین ذاتینین محکوم اولماسی‌دیر و بو منه داها اؤنملی‌دیر.
شکیلده کیشلوفسکی اعدام صحنه‌سینی کنترل ائدرک گؤرونور. او دئییر من توپلومون بیر اویه‌سی، بیر شهروندی‌یم، یاشادیغیم توپلومدا بیری اعدام اولاندا بئله سانیرام منیم ده او اعدامدا قاتغیم اولوب، سانکی منیم آدیملا اعدام حیاتا کئچیریلیر!
👈بوتون بونلارا رغمن گونوموزده بو غیرانسانی جزالاندیرما ان آزی ٢٠ اؤلکه‌ده هله ده یاسال و قانونی بیر جزالاندیرما کیمی اویغولانیر. بو ایسه نه قدر بؤیوک بیر اراده‌نین بیرلشیب اونو آرادان قالدیرماسیندا قاتغیلی اولا بیلمه‌لرینه دانیلماز بیر سند ساییلابیلر.
