بیزلر
بیزلر، بیزلر، بیزلر...
هر نهیین پارالئلینی دوزلدن یازیق بیزلر! اؤزوموزو دونیادان فرقلی گؤروب آچیقجا اؤزوموزدن باشقاسینی بیهنمهدییمیزی اوتانمادان دارهادارینان دیلیمیزه گتیرن راسیست بیزلر. هر بیر کورهسل آنیمساما گونونه اؤزوموزدن چیخارتما قوندارما گونلر قوشان بیزلر. دوشونمهمیش دانیشان بوشبوغاز بیزلر. آز ایشلهییب چوخ قازانماق فیکرینده اولان بوتؤوجول بیزلر. اوخومامیش دؤهدور مهندیس، اوستاد کیمی القابلاری فخرله اؤزوموزله داشییان بیزلر. دیلی اوزون بئینی کوت، گوج مئدیالارینین اویونجاغی اولاراق، باشینی قارا سوخوب هئچ یئردن خبری اولمایان کلیکلر سایاغی یاشایان بیزلر. یالان دانیشیب دا، یالانچیلاردان زهلهسی گئدن بیزلر. اونون بونون مالیندا، عاییلهسینده، خصوصی یاشامیندا گؤزو اولان بیزلر. اوزده دوست دالدا خائین اولان بیزلر. اورتمهدن توکهدن بیزلر. شاپالاق ایله اوز قیزاردان بیزلر. اونا-بونا فخر ساتیب ایچیمیزدهکی بوشلوغو دریندن دویان بیزلر. پالازا بورونوب ائلینن سورونوب، هامیمیز بیر بئزین قیراغی اولان بیزلر. ایچمهمیش کئفلی، چکمهمیش توهم ووران بیزلر. دئدی قودولار اوزمانی اولان بیزلر. دین چؤرهیی یئییب دینسیزین دینسیزی اولان بیزلر. بئش قیرانا گؤره اؤزوموزدن چوخ اسکیکلره یالتاقلیق ائدن بیزلر. بدوی توپلوملار سایاغی هر بوجاقدان گلهبیلن ایشیغی بوغماقدا بنزهریمیز اولمایان بیزلر. ساواشدان اؤز کؤکوموزو برکیتمک اوچون فایدالانان بیزلر. چئورهنی ییرتیجیلار سایاغی دیدیب داغیدان، آنجاق همئشه اونون داشینی سینهمیزه ووران بیزلر. چؤرک داشدان چیخیر سؤزو دیلیمیزدن دوشمهسه ده، باشقا بیریسینه چؤرک وئرمکده داشدان برک اولان چیلیس بیزلر. بیر عابباسییا دهیمز اولان ماشینلاری قانیمیزین قیمتی ایله آلان بیزلر. دیلسیز آغیزسیزجا، اینمز دینمز اولان، اعتیراض یوللارینی باشارمایان بیزلر. اؤز وطنینده غوربتده یاشاییر کیمی اسیر یاشایان بیزلر. اؤز دوشونجهلریمیزی سانسورلاییب باشدان دیرناغا ریاکار اولان بیزلر. قادین حقوقو دئیه باغیریب عملده جهالت عصری سایاغی اونلاری دیری دیری قویلاماق ایستهییمیزده ایصرارلی اولان ایسلامی فمنیست بیزلر. هئچ بیریمیز اولدوغوموز گئرچک مؤوقعیمیزدن راضی اولمایان بیزلر. اؤزوموز بیر گؤزلو اولساق دا قونشوموزو کور گؤرمک ایستهییمیزده ایصرارلی اولان بیزلر. اؤلوم حقدیر دئییب آنجاق سانکی اؤلمهیهجهییک کیمی یاشایان بیزلر.
بیزلر، بیزلر، بیزلر!
- ۹۹/۰۲/۱۳