تجاوز
بوگونلر توئیتردن باشلانان بیر دالغایلا بیر چوخ اینسان تجاوزلا باغلی آجی تجروبه‌‌لرینی پایلاشیرلار. بو ایسه فرقلی تپکی‌لره سبب اولوبدور. منسه بو حاقدا بیر نئچه سؤز اکله‌مک ایسته‌دیم:
بیر اینسانین منه #تجاوز اولوب دئمه‌سی بیراوقدر ده راحات آغیزا آلینیب یازیلاسی بیر ائیلم دئییل‌دیر. بیری بئلنچی بیر ادعادا بولونورسا ایلک باشدا آرخاندایییق، سنینله‌ییک، سن تک دئییلسن دئییلمه‌سی باشلیجا قوشوللاردان ساییلیر. بوردا بیز قونویا ذات‌انگارانه یاناشمالیییق. نئجه‌لیک‌لر، نییه‌لیک‌لر، بیر طرفه قضاوت‌لر/یارغیلامالار، متجاوز آدلانان کیمسه‌دن بوشونا یان ساخلامالار بیزه چاتماز. بو حیمایت‌دن باشلیجا آماجیمیز ایسه تجاوزا اوغرایانلارا اومود وئرمک‌دیر. اونلاری جسارتلندیریب، کؤلگه‌دن ائشیگه چیخارتماق‌دیر. هر شئیه رغمن هله یاشامالیسان دئمک‌دیر. تجاوزا اوغرایان یالنیز قالیرسا متجاوز داها آرتیق جسارتله‌نیب اوندان بتَرینی یاپاجاق‌دیر. حقوق قایداسی دئییر اصل برائته‌دیر آنجاق بورادا منجه اصل حیمایته‌دیر. بیز نه‌قدر تجاوزدان حالیمیز بولانسا دا تجاوزا اوغرایان اینساندان حیمایت ائتمزسک دئمک متجاوزی دستکله‌میشیک. کولتورل(فرهنگی) فرق‌لر، عاییله‌وی تربیت‌ین فرقلیلیگی، اینسانلارین بیر بیریسینه تانیمادان گوونمه‌لری، اجتماعی ایلیشکیلرینین سینیرلی اولماماسی، چئشیدلی آلانلاردا جینسی سرکوب، تجاوزلا ایلگیلی ائییتیم و اؤیرتیم بوشلوغو، قانون بوشلوغو، متجاوزین احساس امنیتی، یانلیش قضاوت‌لر، اقتصادی دوروملار و بیر چوخ مسئله‌لر بیرلشدیکجه تجاوزو داها آرتیق اولاسیلاشدیریر. بئله بیر وضعیت‌ده قانون و حقوقی حمایتین نه دئدیگیندن داها اؤنملیسی بیزیم هانسی طرفده یئر آلمامیز داها دا آرتیق اؤنم داشیییر.
تجاوز دئدیگیمین ایسه بیر ساده باخیش طرزیله بیریسینی معذب ائتمک‌دن توتون بیلینن تجاوزا قدر اوزانا بیلر. تجاوزون چئشیدلری، کیفیت‌لری، کیمین طرفیندن اویغولانماسی نه قدر فرقلنسه ده یئنه آدی تجاوزدوز. توپلومدا متجاوزلره چیرکین ایشلرینین آردینی توتمالارینا ایزین وئرمه‌میز، حتی تجاوزو دویوب دا سوسمامیز، تجاوزو تائید ائدیب بو چیرکین عملی بازتولید ائتمک دئمک‌دیر.
بو آرادا مسئله‌لری ائندیرگمه‌چیلیکله شخصی‌لشدیرنلر ده اولور. بیر حالداکی توپلوم بو مسئله‌یه حساسلاشیب نییه بئله‌دیر؟ گرک یاسال یوللار تعیین اولونا و بو کیمی اولوملو سوال‌لار سوروشماغا باشلادیغیندا ساختا ریوایت‌لر، دیس اینفورمیشن‌لر، جهت‌لی حمله‌لر مسئولییتی قانون بوشلوغوندان آلیب سادجه شخص‌لره محدودلاندیریر. دئمک کی ذهنی و ساختا ریوایت‌لر عمد اوزوندن چوخالابیلر. مسئله نه قدر لووس اولدوقجا مدنی توپلومون اینسانلارینین فیکیرلرینی بیر اوقدر راحات دا جایدیرماق اولار دئمک. بئله اولونجا دوزگون جبهه‌لرینی مشخص ائدنلرین اؤنمی داها آرتیق گؤزه‌گلیم اولار.
اتهام ووران بارماقلار تجاوزا اوغرایانا چوخالیب حتی چوخالدیریلیرسا دئمک حکومت انسانی سپر یاراتماق ایله اؤز مسئولییتینی یئرینه یئتیرمک ایسته‌میر. چونکی تجاوز داها سیرادانلاشیب قارشیسینا مدنی جامعه‌دن بیریلری دیرچلدیکجه حکومت امن حاشیه‌ده یئر آلیر، قضیه لووس و نتیجه‌سیز قالاجاقدیر!
