دوغوم گونو اوزه‌رینه
کئچن هفته اوتوز بیر ایل اؤنجه آللاهین بئلنچی بیر گونلری‌نین بیرینده دوغولدوغوم گونون ایل دؤنومویدو. تقویمین اویاریسیلا عادت اوزره اینسانلار بئلنچی گونو دوغوم گونو آدلاندیریب جشن دوتارلار. آنجاق دوغوم گونونو سونوجو بللی اولمایان، نهایتده اؤلومه ختم اولان بیر چرخه کیمی نظرده آلارساق بو تکرارلانمانی جشن توتماق بیر اوقدر ده یاخشی آلیناسی بیر ایش ساییلمیر منجه. ندن اینسانین دوغولوشو تقویملره، گونلره، آیلارا حصر اولور؟ اردملی تصمیم‌لر، دؤنوشوم‌لر، اولوملو حیات فلسفه‌لری ائیله‌جه گؤزه گلیم ده‌ییشیم‌لرین عطف نقطه‌لری، ویا بؤیوک بیر ده‌ییشیملره ایمضا آتمالار قوتلانمالی‌دیر می یوخسا ایلده بیرگون تکرارلانان اؤلو موناسیبت‌لر؟ نوح یووال هراری‌دن آلدیغیم بو مضموندا بیر سؤز وار: بیلیم چاغیندا اینسانا دوغوم گونو قوتلاماسی نه‌دئمک‌دیر؟ کشاورزی دؤورونو گئریده بیراخمیش اینسانا گونلرین، آیلارین، فصیللرین هابئله ایل‌لرین تکرارلانماسی نه آنلامی داشیماقدادیر؟ هر آن یئنی بیر دوغوشدا اولان مدرن چاغین اینسانی طبیعتین تکراریلا دوغولماقدادیر. دئمک اینسان تاریخده بیر اؤزل گونده دئییل هر آنیندا یئنیدن دوغولور. تکی بو دوغولوشونون فرقینده اولابیلردی کئشگه. اینسان ائوریمی اوچ آشامانی آرخادا بیراخمیش: فرقینده‌لیک، اکینچی‌لیک، بیلیمسل‌لیک! بیلیمین گوجونو آنلامیش، بئینینی ایشه آلمیش اینسانا نه گره‌کیر فصیللرین تکرارینی گؤزله‌مه‌سی؟
دئمک کی بیلیم سیلاحیلا یاراقلانان اینسانا اکینچی‌لیک چاغی‌نین آیریلماز حیسسه‌سی اولان تکرارلانان بیر چرخه‌دن دانیشماق بیر اوقدر ده اوسلوجالیقدان ساییلماز. هرآن بیلمکده و گلیشمکده اولان اینسان بیلیمه سؤیکندیکجه ایتیردیگی چاغین حسرتینده قالیب یئنی دوغولدوغو چاغدا داها قالارغی ایشلر گؤرمه‌یه یؤنله‌نر. آنجاق عادت و بیرسیرا روانی احتیاجلاردان دولایی اینسان بیله‌رک بئلنچی آنلامسیز ایشلری گؤرمک مجبورییتینده‌دیر ده. اینسان پیسخولوژیاسی، ائیله‌جه اینسانی ایلیشکی‌لرین بو آیریلماز بؤلومونو بو سایاق قوتلاماق اینسان یالنیزلیغینا بیر مصنوعی اؤرتوک چکمک کیمی‌دیر. بیلگه‌لیکدن اوزاقلاشان، آماج‌سیزجاسینا یاشایان یئنی دؤورون اینسان فنومنی اؤز تکرارلانان بوش حیاتینا مصنوعی رنگ قاتماق ایسته‌ییر، بو ایسه چوخ آنلامسیزدیر.
**********
یازیدان سونرا: کیملیک بَلگَمده قئید اولان گونو چئشیدلی آراجلار واسیطه‌چیلیگی ایله منه تبریک یازان دوستلاردان وظیفه ایجابی تشککور ائدیر ساغ اولون کی وارسیز دئییرم.
سنه خوشبختلیک لر، سئوینجلر، حیاتیندا یئنی-یئنی موفقیت لر آرزو ائدیرم.
دوغوم گونون قوتلو اولسون🌈