قیسا قارشیلاشما(1945) Brief Encounter

قیسا قارشیلاشما (برخورد کوتاه) ( 1945) Brief Encounter



یؤنتمن: دئیوید لین
بیر قادینین قیسا اولموش اولسا دا عاشیقانه ایلیشگی‌سی‌نین ریوایتی؛ لورانین (سیلیا جانسون) اؤز آغزیندان. قادین دا ائولی دیر اونونلا قیسا قارشیلاشدیغی دوقتور دا. بیر بالاجا چینقیلین لورانین گؤزونه آتیلماسیندان سونرا ألئک اونو چیخاردیر و ...
فیلم لورانین ریوایتی ایله گئچمیشده اوز وئرمیش اولایلاری ایزله‌ییجی‌نین گؤزو اؤنونده جانلاندیریر، بئله‌جه هر کس اؤزونو او دویغودا یاشامیش کیمی حیس ائدیری.
قیسا قارشیلاشما آدلی فیلم، عئشق و عاشیقانه ایلیشگی‌یه اؤزل یؤندن یاناشیر. بیر دویغو دولوسو قادینین رومانتیک و البته عادی یاشامینی، قیسا قارشیلاشما آراجیلا دئوریلمه‌سینی گؤزلجه‌سینه یؤنتن دئیوید لین گؤزل سئناریونو آز سای‌لی و اؤزل یئرلرده باغلادیغی کادرلارلا (قاطار دوراغی، بار و...)، سئچدییی موسیقی ایله (روس موسیقیچی‌سی، سئرگئی راخمانینوف ون شاه اثرلریندن بیریسینین واسیطه‌سی ایله) و البته اویونچولارین گؤز قاماشدیریجی اویونلارینین گوجویله بیر قالارغی فیلمی ایزله‌ییجی‌لرینه سونوب دور.
بلکی بو فیلمی ایزله‌مه‌دییمدن اؤنجه کیلاسیک فیلم‌لرده "کازابلانکا"نی بو ژانردا أن اوستون فیلم ساناردیم آنجاق بونو ایزله‌دییم‌دن سونرا گؤروشوم ده‌ییشیب، بیر قالارغی فیلمی ایزله‌دییمدن دولایی موتلو اولدوم.
(مریم رایانین یازیسیندان ایلهام آلاراق یازدیم)
تیر آیی‌نین بئشی 1394؛ ح. م

In the Mood for Love

سئوگی دوروموندایکن
(In the Mood for Love (2000
یؤنتمن : Kar Wai Wong



آه سئوگی یانی "سئوگی دوروموندایکن" آدلی فیلم. دویغو، سئوگی، اینسانلارین ایچ قاتدان بیر بیرینی ایسته‌مک‌لرینین ریوایتی.
فیلمین قونوسو، موسیقی‌سی، یؤنتمنین دوشونجه‌سی، کادرلارین نئجه باغلانماسی، بویالارین اولدوغو یئرلرده قوللانیلماسی، اویونچولارین اویناماقلاری و سایره؛ هامیسی اولاغان اوستو بیر فیلمین دوزلمه‌سینین تمل داشینی قویوب‌لار.
سئوگی، ائولیلیک، آیریلیق، قونشولارین ایلگیسی، ایکی اینسانین سادجه باخیشلاریلا آنلاشمالاری، بیر باخیشدا مین‌لرجه سؤزو بیر بیریسینه دئمک‌لری گؤزلجه‌سینه تصویره چکیلیب؛ تام سئوگی‌سل چکیلی بیر فیلم. بو فیلمین گؤزل‌لییی حاقدا نه‌قدر دئسم یئنه آز دئمیشم. موطلق ایزله‌مه‌ین‌لر ایزله‌سین‌لر؛ ایزله‌نلر ایسه بیرداها ایزله‌سین‌لر هردن بئلنچی فیلیمی تکرار ایزله‌مک لازیم. تام دویغوسونو آلماق لازیم. او دویغونو کندی یاشامیمیزا دا یانسیتماغیمیز لازیم.

سینئما؛ یئددینجی صنعت

سینئما؛ یئددینجی صنعت / حامید مورسلی (چاپ شده در روزنامه آنا وطن)
سینئما، فیلم اوستونه یئرلشیدیریلمیش گؤرونتولرین یا دا چکیلمیش صحنه‌لرین ایشیقلا بیر پرده‌یه آرد آردا دوشوروله‌رک حرکتلی گؤرونتولر ألده ائدیلمه‌سی تمه‌لینه سؤیکنن صنعت (هنر) ساحه‌سی. سینئما، هر هانسی بیر حرکتی دوزه‌نلی آرالیقلارلا پارچالارا بؤله‌رک بونلارین شکیللرینی تعیین و سونرا بونلاری گؤستریجی گوجویله قارانلیق بیر یئرده، بیر پرده اوزرینده عکس ائتدیره‌رک حرکتی یئنیدن مئیدانا گتیرمه ایشیدیر.

قبیله (The Tribe (2014

قبیله (The Tribe (2014 
میروسلاو اسلابوشپیتسکی / http://imdb.com/title/tt1745787/

 

کار و لال اولان بیر اوغلان لال کارلار مدرسه‌سینه (پانسیونونا) گیرمه‌یی ایله اورادا اولان اوشاقلارلا ایلگی قورماق ایسته‌ییر. آنجاق اوردا مافیایی بیر گروپون یا فیلمین آدیلا اویغون دئسک قبیله‌یله اوزله‌شیب او قبیله‌یه قاتیلیر. بو قاتیلماقدا چتینلیک‌لر چکیر آنجاق اؤزونو و اؤز اؤزل یئرینی قازانیر. او قبیله‌ده تام ییرتیجی بیریسینه چئوریلیر. بو آرادا اوردا اولان قیزلارین بیریله اؤزل ایلگی‌یه کئچیب بو یئنی یارانمیش اؤزل دویغو سونوندا اؤز ایشینی گؤرور...

بی‌بیم گلدی- فیلم

یؤنتمنی آلمانیا دوغوملوسو أرهان کوزان (Erhan Kozan) ایمضالی اولان، "بی‌بیم گلدی Halam Geldi" فیلمی، بیرچوخ اؤدوله لاییق گؤرونن فیلم‌لر سیراسیندا دایانیر. قوزئی قیبریس تورک جومهورییتی‌نین روم کندی (کؤیو) اولان لیمیا (لیمپیا) سینیریندا یئر آلان آکینجالار(Akınılar) کندینده چَکیلن فیلمده أذان سَس‌لری، کئلیسا زنگی، تورک موزیکی و یونان مئلودی‌لری فیلمین دریندن آنلانماسی و ایزله‌ییجی‌نین فیلمدن ائتکی‌لنمه‌سی سونوجونا یاردیمچی اولورلار. اوُچ اوشاغین دیراما حئکایه‌سی، 3 اوشاق هله 13 یاشیندادیرلار و اوچونون ده باش یازیلاری عئینی دیر. موکممل بیر دیرام فیلمی؛ ایران، تورکیه و دونیانین بیر چوخ اؤلکه‌سینین قانایان یاراسی اولان "قیز اوشاقلاری‌نین ائولی‌لی‌یی" حاقدا گؤزل چکیلی بیر فیلم. باشدان أته‌یه آغری، سیزی، درد. قادینا قارشی ظولم، اوشاقکن گَلینلیک، حاقسیزلیق، ساوادسیزلیق، کور قورووملار، یئترسیز و بوشلوقلارلا دولو اولان یاسالار و ساختا ایناملارین دوستاقی اولماقلیق. نورمال یاشامین گونده‌لیک آغیرلیغینین آلتیندا قالیب چابالاماق. سئودیکلرینه چاتماماق، زامانسیز اؤلوم، آیریلیق، نیفرت. سینیر، سیاست، ساواش.

جک نیکولسون

جک نیکولسون، 78 یاشیندا

بوگون سینئما دونیاسینین دئو آدلاریندان بیریسی اولان جک نیکولسونون دوغوم گونودور.
) John Joseph "Jack" Nicholsonدوغوم گونو 22 نئیسان 1937، نیویورک)،  آمئریکا سینماسی‌نین اونلو اویونجوسودور. نیکولسون سینمانین أن ائتکیلی و أن یاخشی اویونچولاریندان بیریدیر. نیکولسون دوغولدوغوندا آناسی نیویورک'دا شو قیرل (Show girl) اولاراق چالیشماقدایدی. کیچیکلییینده بؤیوک ننه‌سینی و بؤیوک باباسینی گئرچک آناسی و باباسی اولدوغونو ظن ائتدی. نئپتون شهرینده بؤیودو، نیوجئرسی ایالتینده کاتولیک اولاراق یئتیشتیریلدی. بیر آرخاداشینین اؤلوموندن سونرا یاستیغینین آلتیندا چَکیش(چکش)-له یوخلاماغا باشلادی. ائوینده پولانسکی‌یه تجاووز ایددیاسی ایله توتوقلاندی. و...

آدای گؤستریلدییی 12 اوسکار اؤدولونون 3'ونو قازانمیشدیر. بو دالدا 3 اؤدول قازانان ایکی ایسیمدن بیریدیر. اوبیریسی ایسه دانیئل دای-لویس 'دیر. آیریجا 16 دفعه آدای گؤستریلدییی آلتین کوره اؤدولونون 7'سینی قازانمیشدیر. ایکی دفعه أن یاخشی اویونچو سئچیلمیشدیر. 1994 ایلینده آمریکا فیلم ائنستیتوسوندان "عؤمور بویو باشاری اؤدولو"-نو آلاراق، بو اؤدولو آلان أن گنج اویونچو عونوانینی قازانمیشدیر.

*****

قومرونون یوواسی‌نین اوزه‌رینده اوچوش  One Flew Over the Cuckoo's nest  یا  دَلی قفسدن اوچدور!

قومورو (فاخته) چیخارتدیغی سسیندن دولایی اینگیلیزجه‌ده "کوکو" آدیلا تانیملانیب. اونو بلکی جیزگی فیلم‌لرینده ساعات 12 اولدوغوندا ساعاتدان ائشیگه چیخیب کوکو-کوکو دئمه‌سی ایله خاطیرلاییرسینیز. بو قوشون یاشامی و ائوریمی(تکامل) کندی نسلینی قوروماغی اوچون چوخ ایلگینج دیر. بو قوش دوغادا یووا سالماز، آنجاق کندی یومورتاسینی باشقا تیره‌دن اولان قوشلارین یووالاریندا یومورتایار. یووا یییه‌سی اولان قوش ایسه بو اولایی بیلمزدن جوجه‌نی یومورتادان چیخاردیب، قومورونون جوجه‌سینی یئدیردیب بؤیودر.

بللی دئییل، بلکی او عاییه‌لرده کی دلیجه‌لی بیریسی اولسا عاییله‌سی اونو اورادا قورویوب پرستارلیق ائدیلسین دئیه دلی‌خانایا تاپشیرارلار؛ اولا بیلسین بو رومانین یازاری بوندان دولایی بو آدی سئچیب. فیلمین باشلانغیجی گونشین باتیشی ایله باشلانیب و اونون دوغوشو ایله سونوا چاتیر. دئمک اولار بو یانی مک مورفی(جک نیکولسون) اونلارین (دلی خانادا اولانلارین) قارشیسینا یئنی یول و یئنی باشلانغیج آچدیغینی گؤسته‌ریر.

50 ایلدن آرتیق سینئمادا اولان نیکولسون بیرچوخ چئشیدلی سینئما طورلرینده (ژانرهای سینمایی) اویونچولوق ائدن آز سایدا گؤرونن اویونچولارداندیر: کمدی، وئستئرن، درام، قورخو، بیلیم‌سل- فانتاستیک و...

آرتیرمالی بوکی آمئریکانین گوجلو اویونچوسو 60 دنه‌دن آرتیق فیلمده اویونچولوق ائدیب دیر.

قایناقچالار :

1- تورکجه ویکیپئدیا

2- کافه سینما

 

یازار: حامید مورسلی 2/2/94

چارلی چاپلین

دوغوم گونون قوتلو اولسون بؤیوک چارلی :)

بوگون آپریلین 16-سی، 1889 میلادی ایلینده سینئما دونیاسینین سؤزسوز اوسطوره‌‌لریندن بیری اولان "چارلی چاپلین"-ین دوغوم گونودور. چارلی چاپلینه منصوب بیر سؤز وار:

"چوخ چالیشدیم میللت دوشونه‌لر مع‌الاسف سادجه گولدولر"

بو اونودولماز آدلیم سینئما اویونچوسونون باشی چوخ بلالی ایدی. ایدولوژی و دوشونجه‌سینه گؤره حرفه‌ای یاشامیندا چوخ چتین‌لیک‌لره معروض قالدی. او دئیه‌رمیش: "هر نه‌یین سونو یاخشی اولاجاق، أیه‌رسه یاخشی اولماییب هله سونا چاتماییب دیر." آنجاق اؤزونون اؤلوم حئکایه‌سی داها ایلگینج، داها دیراماتیک ایدی. چارلی چاپلین 1977-ده دونیادان گؤز یومدو. اوغورولار اؤلموش جسدینی 3 آیلیق بویوندا اوغورلاییب جسدی گئری قایتارماقلاری اوچون آغیر پول دیله‌میش‌دیرلر. آنجاق سوییس دئولتی‌نین ایزله‌مه‌کلری أساسیندا جسدینی گئری آلا بیلیب تئزلیک‌له تورپاغا تاپشیردیرلار.

persona

persona

یؤنتمن" Ingmar Bergman

یازار: Ingmar Bergman

اویونچولار:  Bibi Andersson,Liv Ullmann,Margaretha Krook

سئناریونون اؤزه‌تی:
ائلیزابئت ووگلر بیر اویونچو دور؛ بیرآن بیر اویونلاریندان سونرا یاشاییشینین بوتونونده سوسماق قرارینا گلیر. بلکی داها یاشاییشیندا فیلم اویناماق زوروندا قالماییب یالان دانیشمایا. او خسته فالان دئییل آنجاق اؤزو ایسته‌یه‌رک یاشامینین بوتونونو سوسقونلوقلا کئچیرتمک ایسته‌ییر. بو اوزدن "آلما" آدلی پرستاریلا بیرگه بیر آدایا گئدیب دنیز قیراغیندا بیر سارایدا یئرله‌شیر. ایکی قادین چئشیدلی دوروملاردا ایلگی‌له‌نیب بیر-بیرینه یاخینلاشیرلار. بونلارین بیر بیرینه قارشی داورانیشلاری، کیملیک‌لرینی تانیماق اویونونا چئوریلر، بیر-بیرینه گیریب  بیرگه اولوب و...

"پرسونا" تاساری و بوی باخیمیندان چئشیدلی ماسکالارا دئییلیر. بو ماسکالاری أسکی یونانیستاندا تیاتر اویونچولاری او چاغلاردا کی سس و اوزلرینین قیافه‌سی اوینادیقلاری کارکتئره اویویان اؤزللیکلری داشییا بیلمه دیینده، اویوندا اولان کارئکترین دوغرو اوزونو (کاراکتئرینی) گؤسترسین‌لر دئیه قوللانارمیش‌لار.
"اینگمار برگمانین" "پرسونا" آدلی فیلمی آردیجیل اولاراق ماسکالاریلا اؤز یاشامالاریندا بیر سیرا نسنه‌لری گیزلتمه‌یه عادت ائدن کاراکتئرلری بیچیمله‌ییر. اؤزلری بئیین‌لرینده اولدوغونو دوغرو سانانلار و گئرچکده اولدوقلارینین آراسینداکی فرق‌لردن، قورخودا اولان کاراکتئرلر.
فیلم بیر نئچه أورنسل قونولاری قاپسادیغینا باخمیاراق، فیلمین ایچ قاتلاری تام قادین‌سل پیسخولوژیسیندن ائتکیله‌نیب، بیچیمله‌نمیش، چَکیلی بیر فیلم دیر. اؤرنه‌یین آلمانین ایکی کیشی‌ایله ایلگیسی‌نین آنی‌سینی تعریفله‌مه‌سی و حامیله اولماسینی گؤز اؤنونه گتیرمک اولار.
بیرجه سؤزله دئسم بو فیلمی کسینلیکله ایزله‌مه‌لیسینیز. بو فیلمی ایزله‌دیکدن سونرا ایزله‌دیینیز فیلمی دونشونمه‌مک اولاناقسیزدیر. فیلم دن سونرا دوشونمک سیزی چولغالایاجاق.

12 فروردین 94 حامید مورسلی.

Ordet

«اوردئت»؛ «کارل تئودور درایئر»

بیرداها مؤجیزه‌لر اورتایا چیخمایاجاقلار...

اوردئت اینانج‌لارین آراسینداکی بیتمه‌ین ساواشدیر. ساواش قازانماق اوچون دئییل. هر بیر کارکتئر اؤزونه مخصوص اولان اؤزللییی ایله، اؤز ایناملاری و اینانجلارینا گؤره ساواشماقدادیر. بو آرادا "بورگئن"-نین بؤیوک اوغلو دینه اینانمایان بیریسی دیر. فیلمین یؤنتمنی "درایئر" نئچه کاراکتئر تانیملاییر؛ هر بیر کاراکتئره اینامین بیر درجه‌سینی وئریر. آنجاق دَیاز و اؤتری بیر اینام.  بؤیوک اوغلو اؤز اینامینا قوشقویلا باخیر، بونو دیلینه گتیرمکدن ایسه چکینمیر. او دینه اینانان بیریسی دئییل بو اوزدن بئلنچی بیر ایفاده‌نی دیله گه‌تیریب اؤز سئویملی قادینینی پرستش سینیرینا کیمی سئویدییینی دئییر. او بئله دوشونور باشقالاریلا قیاسلاناندا اؤزونو بئلنچی یئرسیز دینی تعصوبلاردان قورویا بیلمیش دیر.
اونون ایکینجی اوغلو "یوهانس" پئیغمبرلیک (ساوچیلیق) ایدیعاسی وار؛ اؤزونو گئری قاییتمیش مسیح  پئیغمبری آدلاندیریر. بورگئنین خیردا اوغلو تام بیر دینچی خیاطین قیزینا وورولوب.  او خیاط بورگئنین گلینینین اؤلمه‌سینی آرزی ائدیر، بورگئن هیدایت اولسون دئیه. بیر کئشیش وار مؤجوزه‌یه اینانمیر، بیر دوکتور وار کی سادجه بیلیمی تانییر بو اوزدن باشقا بیر نسنه‌یه اینانماق ایسته‌میر. بونلارین هامیسینی درایئر گوجلوجه‌سینه بیر بیریسینین یانیسیراسی گتیرمه‌یی ایله هر بیر ایزله‌ییجی‌نین دینی اینانجینی مهنگه چَکیب اونلارین هانسی درجه‌ده دیاز اولماقلارین آیدینجاسینا گؤسته‌ریر. بو آرادا "گئرچک اینام" دئیه بیر نسنه‌نین وارلیغینی دا دانماق ایسته میر. بو اوزدن عاییله‌نین بالاجا قیزینین یوهانسا اولان اینامینی تصویره چکیر. بورگئنین گلینی دوغماق چاغیندا اؤلور. او یئره کیمی کی بو اوشاق هامی اونون دلی اولدوغونو سانان عمیسی یوهانسا دئییر: منیم اینامیم وار سن اؤلونو دیریلده بیلرسن.
اوردئت بئلنچی ساختا اینام‌لارین ریوایتی دیر.
بو آرادا فیلمین سونا چاتماسی و فیلمین نئجه باغلانماسی‌نین دارتیشیلمالی یئرلری چوخدور. او یئرده کی بیلیم سوسور، بورگئن کیمی بیریسی‌نین دوعالاری کسرسیز قالیر؛ بیر گئرچک اینامین اورتایا چیخا بیلمه‌سینین هانسی درجه‌ده اؤنملی اولدوغو گؤزه چارپیب قاچیریلماز اولاجاق.
(ایزله‌مه‌سین هرکسه اؤنه‌ریرم)

حامید مورسلی 28 اسفند 93

2014-جی ایلین اوسکار اؤدولو

2014-جی ایلین اوسکار اؤدولونون سونوجلاری:

87 اینجی اوسکار اؤدولونون فیلم‌لری سیراسیندا «Birdman» و «Grand Budapest hotel هره‌سی 4 اوسکاریلا أن چوخ اؤدوللری قازانانلار سیراسیندا دایاندیلار.  Whiplash فیلمی اووچ اوسکار قازانماقلا، سای باخیمیندان، ایکینجی سیرادا دایانیر.

اینگیلیزجه اولمایان اوستون فیلم اؤدولونو لهستان فیلمی «آیدا» قازاندی.

اؤنملی بؤلوملرین قازانانلارینین آدلاری:

+أن اوستون فیلم اؤدولونو قازانان: Birdman (الخاندرو گونزالس ایناریتو یؤنه‌تمن‌لیگی ایله)

+ أن اوستون اینگیلیزجه اولمایان فیلم اؤدولونو قازانان: Ida (پاول پاولیکوفسکى یؤنه‌تمن‌لیگی ایله )

+أن اوستون یؤنتمن اؤدولونو قازانان :الخاندرو گونزالس ایناریتو (Birdman)

+ أن اوستون اوریجینال سئناریو اؤدولو قازانان: الخاندرو گونزالس ایناریتو اووچ باشقا سئناریو یازانلا بیرلیکده (Birdman)

+أن اوستون آلینما(اقتباسی) سئناریونون اؤدولونو قازانان: گراهام مور (Imitation game)

+أن اوستون قادین اویونچو اؤدولونو قازانان: جولیان مور (Still Alice)

+أن اوستونکیشی(ائرکک) اویونچو اؤدولونو قازانان:  ادى ردمین (Theory of Everything)

+أن اوستون دستکله‌ییجی رولونون اؤدولونو قازانان قادین: پاتریشیا ارکت (Boyhood)

+أن اوستون دستکله‌ییجی رولونون اؤدولونو قازانان کیشی(ائرکک) اویونچو: جى کى سیمونز (Whiplash)

 --------------------------------------------------------

أته‌ک یازی: قیش یوخوسونون حاققینی یئدیلر بو ایل؛ آدای سئچیلسه‌یدی کسینلیکله بیر چوخ اؤدولو سوپوره‌جک‌ ایدی. آنجاق من بو قازانانلارلا راضی یام. :)