آنی‌لار دوشرگه‌سی

قبیله (The Tribe (2014 
میروسلاو اسلابوشپیتسکی / http://imdb.com/title/tt1745787/

کار و لال اولان بیر اوغلان لال کارلار مدرسه‌سینه (پانسیونونا) گیرمه‌یی ایله اورادا اولان اوشاقلارلا ایلگی قورماق ایسته‌ییر. آنجاق اوردا مافیایی بیر گروپون یا فیلمین آدیلا اویغون دئسک قبیله‌یله اوزله‌شیب او قبیله‌یه قاتیلیر. بو قاتیلماقدا چتینلیک‌لر چکیر آنجاق اؤزونو و اؤز اؤزل یئرینی قازانیر. او قبیله‌ده تام ییرتیجی بیریسینه چئوریلیر. بو آرادا اوردا اولان قیزلارین بیریله اؤزل ایلگی‌یه کئچیب بو یئنی یارانمیش اؤزل دویغو سونوندا اؤز ایشینی گؤرور...
بلکی 2014 ده ایزله‌دییم گؤزل و بئینیمده چوخ دارتیشمالارا ندن اولان فیلم‌لردن بیریسی ائله همین قبیله فیلمی اولا. قبیله اوکراینین فیلمی‌دیر هم ده چوخ گوجلو و ده‌یرلی فیلمی. تام اورالارین فضاسینی، چئوره‌سینی، سویوقلوقلارینی، اؤزلرینه اؤزل اولان اؤزللیکلری گؤزلجه‌سینه یانسیتماقدادیر.
فیلم سس‌سیزلیک، سویوقلوق، قارانلیق و سونوندا یالنیزلیقدان عیبارت دیر. اینسانلیق دویغولارینین اؤلن یئری؛ "رحم" دئیه بیر نسنه‌نین اولمادیغی یئر. نه دیالوقدان خبر وار نه ده متن موسیقی‌سیندن. نه آرمانی شخصیت‌لر و نه اؤزل اینسانلار نه ده اینسانلارین آد و مقام‌لاری بیله.
فیلمین اویونچولاری‌نین هامیسی گئرچک‌ده لال و کاردیرلار. ایلک دؤنه اولاراق کامئرانین قارشیسیندا فیلم اویناماقلارینی تجروبه ائدیرلر. هامیسی آماتوردولار آنجاق یؤنتمنین ایسته‌یی ایله تام رئال بیر فضانی یانسیتدیرا بیلمک‌لری اوچون فیلمین سوره‌جینده فیلم اویناماقلاری اوچون چتین‌لیک چکمه‌دیکلری تام آیدین گؤرونور. دئمک اویونچولار اؤز یاشاملارین اویناییرلار.
فیلمین یؤنتمنی بو فیلمده عئشق، سئکس، فاحیشه‌لیک، سورگونه گئتمک (زوروملو مهاجرت)، شیددت و زوراکیلیق، کورتاژ (سقط جنین) کیمی قونولارا اؤز آچیسیندان گؤزلجه‌سینه یاناشیر.