◘◘◘ قادین‌لاریمیز و بیزیم توپلوم ◘◘◘
شَهَرین ایچینه کی چیخیرسان بیر چوخ گؤرونتو، بیر چوخ صحنه سنین فیکیرینی اؤزونه ساری چه‌کیر. فرقلی فرقلی اینسانلار گؤرورسن، فرقلی فرقلی دوشونجه‌لر و فرقلی فرقلی پئشه‌لرله راستلاشیرسان. توپلومون چاخلاشماسین، ترپه‌نیشین، جانلی اولاراق چالیشماسینی گؤز آردی ائده‌بیلمیرسن. بوتون چتینلیک‌لر، فلاکت‌لر، یوخسوللوق‌لار، ایش‌سیزلیک‌لره، بیرجه سؤزده دئسه‌م " آغری و دردلره" رغمن یئنه یاشاییشین چیرکین اوزون گؤردویونه بیله، هله‌لیک جانلی‌لیغین ایلکین یانسیدیجی‌لارینین ایزلرینی گؤردویونده بیر ته‌هَر بوتون بونلارا قاتلاشیب اؤزونو ساواش مئیدانی‌نین اورتاسیندا گؤرورسن. من بونون آدین قویورام "یاشام موجادیله‌سی".
یاشادیغیمیز توپلومدا بیر چوخ گئری قالمیشلیک‌لار وار، بلکی باشقا اؤلکه‌لرده یاشاسایدیق بیر چوخ داورانیشلاریمیز، بیر چوخ قایدا قوراللاریمیز، بیر چوخ یازیلمامیش یاسالاریمیز بیزی هویوخدورموش، قورخوتموش " نئجه بئله اولا بیلر آخی؟" سوروسونو دئیه سوروشدورموش کیمی اولاردی. آنجاق زامان سوره‌جی بیزیم تاریخ‌سل آلت بیلینجیمیزه ائتکیسین بوراخمیش کیمی دورومدادیر. بو گلیشمه‌لر داها بیزی بیر ته‌هر کوبوتلاشدیریب، داها عادی‌لشمیش بیر چوخ مسئلیه گؤرمزدن گلمه‌گیمیزه، دایاناقلی نده‌ن اولوب دور. بیر چوخ بئلنچی سورونلاریمیز وار کی داها سورون بیله ساییلمیرلار نیه کی زامان او چاتیشمازلیقلاری اؤز ایچینده بوغوب، گله‌نک و دینی-مذهبی یاپیلار بو سوره‌جه توو وئریب داها قاباریق آجیلارین أللریندن آلیب لار. بونلارین بیریسی و اؤنملی‌سی ساییلان "قادنین‌لار و قادین حاقلارینین دورومودور" منجه. "بیل کیلینتون" آمئریکانین کئچمیش پیرئزیدنت‌لریندن اولان بیریسی دانیشیقلارینین بیرینده دئمیشدی "قادین ده‌ییشیلیرسه توپلوم ده‌ییشیله‌ر" آنجاق منجه بو سؤز دوغرو دا اولسا یئته‌رلی دئییل نیه کی قادینا قارشی باخیشلار، قادینین بیلگی‌سیز قالماغی، قادین‌لارلا ایلگیلی بیر چوخ توپلومسال قورال و قایدالار، قادین حاقلارینا ائرکک‌لرین سایقیلا یاناشمالاری و... کیمی قونولار ائتکیلی درجه‌ده داخیل‌دیرلر؛ تکی قادین یوخ سایدیغیم اؤرنک‌لر ده اویغونلانیب، یئرینده بلکی ده‌ییشیلمه‌لی‌دیرلر.
بوگون بیر آنانین اؤلوم اعلامییه‌سین بیر دووارا یاپیشدیریلمیشین اولدوغونو گؤردوم. آنجاق سؤزو گئدن اعلامییه‌‌نی گؤردوک‌ده توپلوموموزدا قادینلاریمیزین دورملارینین نه‌قده‌ر آغیر اولدوقلاری یئنی‌دن گؤزومون اؤنونه گَلدی. بیزیم توپلومدا دونیاسین ده‌ییشمیش قادینین اؤز شَکیلین اعلامییه‌سینه وورمازلار !!! ؛ اونون یئرینه، بیر زامانلار دینی کیتابلاریمیزدا 14 معصوم‌دان بیریسینی گؤسترمک ایسته‌دیکلری کیمی بیر ایشیق‌لی اؤرتو یا دا ایشیق‌سیز بیر اؤرتویله گؤستَرَرلر. آنجاق بوگون گؤردوگوم شکیلده او ایشدن علاوه رحمته گئندن قادینین بؤیوک اوغلونون شکیلین ده وورموشدورلار. و آنانی اوغلویلا تانیتدیرمیشدیرلار ! بیلمیرم نیه ولی چوخ اوزولوب ایچیمدن یازیقلاندیم.
بو دئمک اولار قادینلاریمیزین مین‌ده بیر اولان آغری‌لارینین گؤسته‌رگه‌سی‌دیر. و گؤسته‌ریرکی نه‌قده‌ر زامان ایستیر بو گؤروشلر ده‌ییشیب ایده‌آل بیر توپلوما یییه اولاق. هله بونا دیلسیزلیق و او اعلامیه‌نین اؤز دیلیمیزده یاییلماماسی‌نین نیه‌لیگین ده آرتیرساق بو آغری‌یا ساخلاشماق داها چتین اولاجاق. آنجاق بؤیوک ده‌ییشیم و بؤیوک اوغورلار بالاجا آددیم‌لاردان اولاشیر. بو بالاجا ده‌ییشیم‌لر یئرینده ائعمال اولسالار بؤیوک دئویرمه‌لری آز زامان‌دا گؤره‌بیله‌جه‌ییک، دییه دوشونورم.
18/10/93 حامید مورسلی.
