آنی‌لار دوشرگه‌سی

گؤیلومدن گئچدی بیر نئچه سطیر أسکی آنی‌لاریمدان یازام smile ifade simgesi

اول(بیرینجی) کیلاسین آنیلاریندان

اول کیلاسینا گئده‌جه‌یدیم، آجانیم(آتام) بیله‌مه قیلاسه باشماق و قره کت شالوار آلمیشدی. مندن اؤنجه‌کیلر یالان اولماسا قوروت بلله‌سیله بویا باشا چاتمیشدیرلار. آمما دا من آنادان اولاندان بری دئیه‌سن دوروملار آلا-قولای جورله‌نمیشدی و داها اوگئچمیشده‌کی‌لر کیمی دئییل دیر. یئنی دوندوروجو (یاخچال) و بیر 14 اینچ آغ قره "پارس" تیلویزیون دا آلا بیلمیشدیک. البتده بونلارین هامیسی مندن یاش یاریم بؤیوک اولان باجیمین آیاغینین برکتلی و اورزولو (روزیلی) اولدوغونا یازیلمیشدی و بوتون ایقتیصادی گلیشمه‌لرین ندنی اونا حصر اولموشدو.
بیر گون 1374 ایلینده زومار آیی رحمتلی آنامین آتاسی بیزده‌ قوناغیدی، یئنی آلدیقلاری پالتارلاریمی گتیردیرلر اونادا گؤسترسینلر دئیه بیرداها أینیمه گئیدیردیرلر. نم هاردان سؤز دولاندی و پالتارلارین یاراشماسینی وورغولاما ایسته‌یه‌ن بابام (آنامین آتاسی) دئدی به‌به لاب تازا داماد اولوب سان با؛ آغا دا او اولدو بو اولدو دئدیم داها بو کت-و گئیمه‌رم و گئیمه‌دیم ده.
هرنه؛ مدرسه‌ده قیز اوغلان قاریشیق ایدیق، اؤیرتمن‌لریمیز ایسه خانیم ایدیرلار. یادیمدا ألیمی جیبیمه قویا بیلمه‌زیدیم؛ بیر خانیم معلیمیمیز واریدی اومارام هر یئرده‌دیرلر سالامات قالسینلار، دئیه‌ردی بو ایش ادبسیزلرین ایشی‌دیر من ده باش اوسته دئییب بیرداها ائتمه‌رم دئیه‌ردیم. 
ائوده مشق‌لریمی گئجه یاری‌سی آغلاییب زیریلداماغیمین گوجویله بؤیوک باجیما اؤز خطیمه اوخشاداراق یازدیراردیم صاباحیسی کیلاسدا بولبول اولوب هر نه سورویا کؤنوللو اولاراق تئز جاواب وئرمه‌یه جان آتاردیم.
بلکه ایلک سئودیییم قیز همین همکیلاسیم ایدی کی کیلاسین لاب تنبل شاییردیدی (شاگردی). خانیم معلیم منی اونا معلیم وئرمیشدی و سیاحت چاغلاریندا من اونون ایشکاللارین دئیه‌ردیم او ایسه آغلاییب بیرنینین لیلیغی آخاراق دئیردی من نَجور ائلیییم باشارمیرام دااااااا. اؤزومدن بؤیوک باجیلاریمدا او مدرسه‌ده درس اوخودوقلارینا گؤره بیلمیشدیرلر کی من او قیزا درس وئریرم بو اوزدن ائوده اونون آدینی اوجا سس ایلن چاغیریب دئیه‌ردیلر اونو آلاجییق سنه و من دلی اولوب دئیه‌ردیم یوووخ !!! اویاندان آنام سانکی اینانمیش کیمی دئیردی یوخ ها اونلار گوراندیرلار بیزلر موسلمانیق ...
بو دئمک‌لر باعیث اولموشدولار کی اوشاقلیق عالمینده ایستر ایسته‌مز گورانلار گورانلارا، موسلمانلار ایسه موسلمانلارا وورولالار و گؤزه گؤرونمه‌ین بیر سینیر آرالاریندا جیزیلا.