آدامسیز پیشیک
آدامسیز پیشیک :
دونن گئجه دن اؤزونه بئله سؤز وئرمیشدی کی صاباح ائرته دن دوروب و دوستلاریلا بیرلیکده داغا گئدیب اورالاردا توپ بوزلاشاجیام! چوخداندی کی بئله أیلنجه‌لی ایشلره ماراغلی ایدی آمما فلکین تَیَه‌ری ترسینه چؤنمه‌گینه گؤره یئتیریب بئلنچی یئرلرده حاضیر اولا بیلمیردی !
اصلینده بئله یئرلره چوخراق دوستلارین گؤرمک و بیر دوستلوغون داشینی تزه‌له‌مک کیمی اولسون دئیه گئدیردی ! بو یاشاییشین آغیر دوروملاریندا بئله‌نچی ایشلر اؤزلوگونده چوخ یوخاری ایش ساییلیردی !
بونو یئتیریردی کی هله ده آداملار دونیانین داشین آتیب بیر نئچه ده‌یقه اؤزلرینه یاشیا بیلرلر !
سحر آلاتوردان یوخودان قالخدی بیر نئچه تیکه یئمک، پئندیر "گیرده کان" یئدیکدن سونرا ! أینینی گئییم ائله‌ییب یوللانماغا حاضیرلاشدی.
کوچه قاپیسین آچیب آلتدیمین ائشیگه قویماق ایسته‌دی؛ بیر شاختا سازاغی بیله‌سین قیسنادی ایچه‌ریه ساری ! آمما سایمازجاسینا قاپینی آچیب و یولا دوشمه‌ک ایسته دی ! کوچه‌یه آلتدیمین قویجاق بیر آغیز حوزونلو سس بیله سین هویوخدوردو ! سس قونشولارینین تانکئرلرینین آلتیندان گه‌لیردی ، باخدی گؤردو تانکئرین آلتیندا بیر ساری پیشیک ساختادان آز قالیر دونسون ! یازیق پیشیک بونو گؤروب و اینجارسیزجاسینا {میو میو } ائله‌ییر بلکی بو شاختانین ألیندن آدامسیز پیشیگینجانینی قورتارا بیلدی ! ...
تئز پیشیگی وجاغینا آلیب و ایچه‌ری‌یه آپاردی! سوبانین(بوخاری‌نی) لاب دیبینه قویدو بیله سین ! آللاه ائله بیل بونو یانلیز بو ایشدن اؤتورو ائشیگه چیخارتمیشدی! پیشیگین بالا بالا جانینا ایستی اوتوروب بو اوزدن پیشیک اؤزون تاپماغا باشلادی ! کئفی سازالدیقجا خوروتولو نفس آلما سس‌لری ده چوخالیردی ! ائله بیل سینه سینده بیر فیشقیراق قویموشدورلار پیشیک نفس آلدیقجا پوله‌نیلیردی! پوله‌ندیکجه بئله‌نچی بیر سس ائشیگه گه‌لیردی . . .
بیرآز دونن گئجه دن شوربا آرتیغی قالمیشدی ! اونو دا گه‌تیردی قوناغینین قوللوغونا؛ قوناق هئچ اوتانیب چکینمه‌دن دویونجا یئسین ! قوناق دا ماششاللاه ائله بیل آیلاریمیش کی هئچ‌نه یئمه‌میشیمیش ! شوربانی ائله سیلله‌له‌دی کی هئچ مه‌له‌یی ده قالمادی !
پیشیگی یئدیردیب یولا سالاندان سونرا اوتوردو پیلله لرین اوستونده و بیر چوخ فیکیرلر بئینینده جانلاندی ! بو پیشیگین دورومو چوخ زادلاری یادینا سالیردی !
شاختادا قالانلاری، ائوسیز آوادانلیق سیزلاری، آج‌لاری، کارتون اوستونده یاتانلاری، مؤعتادلاری و . . .
هامیسندان چوخ بو قار و شاختادا زلزله‌دن قورتولموش وطنداشلاری، ذهنینی قاتمیشدی ! نه دورمدا اولدوقلاری بیله‌سینه بللی دئییردی ! همئشه قاردان و قیش مئوسیمیندن (فصل) چوخ خوشو گه‌لیردی آمما بونلاری دوشوندوکدن سونرا داها راحات دئییل‌دیر ! شاختادان قورخوردو ! شاختانین عزراییل دونوندا گلمه‌سیندن قورخوردور! شاختانین اینسانلیقلاری، دویغولاری و سئوگیلری دوندورماسیندان قورخوردور!
داها داغا گئتمه‌گی اونودموشدو ر! عوه‌ضینده یئرین آغری‌لار و اؤزلم‌لر دولدورموشدورلار!!!
(یازار ؛ حامد مرسلی)
