قارا باسدی

قارا باسدی  /  ح . م

گؤزلریمی آچا بیلمیرم، سانکی قارا لچه‌ک‌لی "خالاسی‌آغزی‌پوخلو" کیرپیکلریمین اوستونده باغداشین قوروب. گؤزلریم آچیلماسین دئیه یئته‌ری قده‌ر گؤزلریمی اووچالاییب آغیرلیغین سالیر ائله‌بیل. اؤزومو اؤلومله دیریلیگین اؤرتاسیندا حیس ائدیرم. هئچ بیلیمرم یوخودایام یوخسا اویاغام. دونیا باشیما فیرلانیر؛ باشیمین اوستونو قارا بولوتلار چولغالاییرلار. کوللوکده چؤنبه‌لمیش یئتیم اوشاغی کیمی اؤزومو بیر اوجا بویلو دووارین اؤنونده دویورام.

بیرآن صحنه ده‌ییشیلیر. قارا بولوتلاردان آغ-آپباغ قار یاغماغا باشلاییر. یئنه منده گووه‌ن یارانیب اومودله‌نیرم. گؤزلریمین اوزیندن او چیرکینین گئتمه‌سینی حیس ائدیرم. گؤزلری آچماغا چالیشیرام؛ سول گؤزومو مورگوله‌یه‌ن بیریسی تک یاریمچیلیق اولموش اولسادا آچماق ایسته‌ییرم.

بیرآن آشپازخانادان سومورجونون (هود) ایشه‌دوشمه‌ک سسیله اؤزومو یئنه قاراباسمیش‌لار کیمی قارانلیغینین سونو بللی اولمایان بیر صحرادا دویورام. دؤرد دؤوره‌مده هوندور فیرتینالارین منه ساری گلدیکلرینی گؤرورم ! قاچماغا باشلییرام ؛ اؤزومو فیرتینانین آغزیندان قورتاریم دئیه تام قارانلیغین اورتاسینا تپلیرم. گؤزلریمین یومولو اولدوغونا باخمیاراق سوموروجونون سسی، هؤویشنه وئریجی بیر متن موسیقی‌سی کیمی هله ده کی وار قولاقلاریمدادیرلار.

بیرآن آنام سوموروجونو سؤندورور؛ یئنه دئیه‌سن اؤز الیمده اولمایاراق سول گؤزومو آچیب آچمامیش کیمی اولورام . ساغ قولوم آلتیمدا قالدیغینا گؤره کئریدیغینی دریندن دویورام ، اونون کئریمه‌سینه انگل اولوم دئیه قیچلاریمی اوزادیب  دابانلاریمی سؤنوب-سؤنمه‌میش کیمی اولان پونجا دایاییب الیمی زوران-گوجه‌ن آلتیمدان چیخاردیب سول بؤیروم اوستده چؤنوب یئنه گؤزلریمی یومورام.

لیم-لیم یانماقدا اولان پونجون سیجاقلیغینی(ایستیسینی) حیس ائدیرم، یاغی اریه‌ن بیریسی کیمی دابانلاریمی داها سیخ  اولاراق پونجا داییریرام. ایچیمدن بو دویغونو چوخ سئویرم. سیجاقلیق چوخالدیقجا اؤزومو فیرتینانین آغزیندان قؤپموش بیر یانار‌داغین (ولقان؛ آتش‌فشان) پوسکورتوسونون اؤزه‌رینده دویورام.

هر یئر قارالیر؛ دابانلاریمین یاندیقلاری سانکی سوموکلریمه بیر چوالدوز سوخورلار، ایکی قیچیمی‌دا آنیندا پونجون اوزه‌ریندن اوزوره‌م.

یاریم اویاق- دابانلاریمین سیزیلتیسینی دوشونه‌رک " مئساژین وار" سسی‌ایله ایکی گؤزلریمی‌ده آچیب؛ هوزمویلن (توولو) جئب‌تئلئفونوما ساری چؤنورم. الیم موبایلیما ساری گئده‌رک، اؤز اؤزومه دئییرم، به پیسلیک توتمیاسان هارداسان به ، آخ منی قارا باسدی سنسیزلیکدن.
 مئساژی اوخوماغا باشلییرام:

" سئوگی گؤزومدن دوشدو ؛ سن گؤزومدن دوشه‌ن زامان"

ایستر ایسته‌مز, سانکی هئچ اؤز الیمده دئییل، تئز گؤزلریمی یومورام ؛ قاراباسدیم یوخوسون گؤرمه‌ک ایستیرم ؛ آنجاق هر یئر داها ، سادجه قارانلیقدیر ، سینیرسیز بیر قارانلیق !

خزل آیی‌نین26-سی 1393

اورمو گؤلو

نئچه گون اؤنجه دیرلی دوستلاریمین بیریسیله دانیشیردیم؛ دئییردی بینابدا ایداره‌لرین بیرینده ایشیم واریدی بو اوزدن ماشینیمی تبریز یولو خیاوانیندا پارک ائله‌ییب ایشلریمی یئربه‌یئر ائتمه‌یه ساری یوللاندیم. ایکی ساعات اولوب اولمامیشدی ماشینیما ساری دؤندوم؛ آنجاق چوخ شاشیرتیجی بیر صحنه‌ایله قارشیلاشدیم؛ ماشینیمین اوستونه ائله بیل ایکی کیلووا یاخین تورپاغی تام قصد اوزوندن جالامیشدیرلار. ماشینیمین هر یئری ائله بیل بیر ته‌هر قورو اهه‌نگ-لی (آهک) تورپاغا بیله‌نمیشدی.نئچه دیقه سادجه اؤز ماشینیما باخیردیم و تام ایراده‌سیز اولاراق بیر بالاجا میرتی توتموش اوشاق آختاریدیم، اؤز نظریمده دئییردیم بس بو ایش بیر اوشاغین ایشیدی؛ یئردن تورپاقلاری ییغیب منیم ماشینیمین اوستونه سپه‌له‌ییب. آنجاق اویان بویانا باخدیغیمدا هئچ بیر اوشاغی گؤره‌بیلمه‌دیم. بالا بالا دونوم آچیلیردی، گؤزلریم باشقا پارک اولان ماشینلارا ساتاشدی ؛ گؤردوم اونلارین دا  دوروملاری منیم ماشینیمین دوروموندان یاخشی دئییل ؛ داها بو فیکیر کی بیر مردوم آزار بو ایشی گؤروب بئینیمدن چیخدی؛ باشقا هر هانسی بیر ندن آختارماغا باشلادیم؛ دئییردی تورپا دیققت ائله‌دیم گؤردوم دوز بلورلاری گؤزه چارپیر !  بیرآن بیلدیم کی مسئله نمنه‌دی. یئل فیرتیناسی دوزاناقلی تورپاقلاری بوتون ماشینلاری، باغلارین، ائولرین ، خیاوانلارین  خولاصه هر بیر یئرین اوزه‌رینه سپه‌له‌میشدی.

دوستوم دئییردی داها ماشینیم یادیمدان چیخمیشدی اؤز اؤزومه درین فیکیرلره جومموشدوم؛ دوز سونامی‌سینه فیکیرله‌شیردیم؛ بیر چوخ خسته‌لیکلرین گلمه‌سی، چئوره‌میزین آرادان گئتمه‌سی وساییره. دئییردی ائله همین فیکیرلرده‌ایدیم کی بیر باشقا سوروجو آراباسینا یاخینلاشدی؛ اونو گؤروب دئدیم گؤرورسن دریانین توزو ماشینلاری نه گونه سالیب؟؟؟  آللاه دادیمیزا یئتیشسین بوندان بئله باشیمیزا دوز یاغاجاق !

دئییر طرف آغیر بیر باخیشلا منه باخیب دوداغینی قاچیرداراق "هئه" دئییب ماشینین آلیشدیریب یولا توشدو!  بوردایدی کی داها ایچیمه‌ کیمی یاندیم؛ هله میللته مسخره گلیر بو سؤزلر، بو یانی فاجیعه‌نین نه‌قدر درین اولدوغون میللتیمیزه چاتدیرا بیلمه‌میشیک ! دئیه‌نده‌ده مسخره اولوب باشقا دامغالارلا سوچلانمیشیق.

آنجاق بو اولونموش ناغیلی دئمک ده بونو ایستیرم چاتدیرام کی هله میللتیمیز دوز سونامیسی‌نین نه اولدوغونو باشا توشمه‌ییبلر؛ چوخ یئرلی و گرکلی‌دیر میللتیمیز بو دوروملاری دریندن دویالار. بیر نئچه گون اؤنجه دوستلارین بیر سیراسی منجه تام یئرلی اولاراق، دونیادا گئدن ALS خسته‌لرینه گؤره گئدن بوزلو سو چالئشیندن فایدالاناراق بیر آلترناتیو کیمی یا دئمک اولار باز تعریف و بومی‌لشتیرمک‌له اوندان یارارلانیب و باشلارینا بوزلو سو  تؤکمه‌ک یئرینه بیر "دولچا دوز" تؤکمه‌یه قرار وئرمیشدیرلر.  بئله‌جه کی اؤز باشلارینا دوز تؤکمکله‌ آذربایجانین یاخین گله‌جه‌یین تصویره چکسینلر هم اؤز میللتیمیز هم آغیر دوروموموزو دونیایا چاتدیرسینلار دئییه. آنجاق نه یازیق ائله کی گؤزله‌نیلیردی بو باشلانقیج اوغورلو بیر ایش اولمادی نیه کی اؤز ایچیمیزدن تنقید اولوندو و دوستلارین بیرسیراسی وریندن یارارلی بیر ایش اولمادیغی وورغولانیلدی، بیرده قاتیلانلار بیر نئچه نفری چاغیرمیشدیرلار آنجاق چاغریلمیشلارین بیر چوخو قاتیلمادیرلار و دئمک اولار بو زنجیرین قیریلماسینا ندن اولدولار !

یاخشی اولاردی قولدان قاوزامادیغیمیز آندا قیچدان چکمه‌سه‌یدیک. منجه هر کیمسه اؤز دوشوندوغو یا تعریفله‌دیگی گؤره‌و اساسیندا پراتیک آتدیملار آتمالیدیر؛ بئله اولان چاغدان گؤرونن ایش دانیشیان سؤزلردن آرتیق گؤزه چارپا بیله‌ر.

 

08.06.93

دوغوم گونوم

بوگون دوغوم گونومدن توپلام 9131 گون سوووشدو؛ 25 ایل بیتدی گئتدی تاریخین صحیفه‌لرینه 
دوزدو کیملیک بلگه‌مده یازیلان تاریخه چوخ گووه‌نه‌بیلمه‌رم آنجاق بیر چوخوموز یاخامیزا کئچه‌ن یانلیش دوغوم تاریخیمیز دوغرو اولماسادا بئله اونونلا راضیلاشیب منیمسه‌مک زورونداییق یوخسا چاغی گلنده بیر بوشلوق دویاجاغیمیز قاچیریلماز اولاجاقدیر؛ منیم دوغوم تاریخیم آتامین دوغوم تاریخیله بیر آی و بیر گونده اولماسی داها ایلگینج، داها گوونمه‌مه‌لی اولدوغون وورغولاییر؛ آنجاق باشقا آچسدان آداما یاخشی بیر دویغو باغیشلاییر، اؤزون آتاسینا چوخ یاخین دویور و ساییره.
نئچه ایل اؤنجه کیمسه یاشیمی سورسایدی چالیشاردیم اولدوغومدان أن آزی بیر ایکی یاش آرتیق دئییب اؤزومو یاشلی گؤسته‌رم، چوخ چتین اولاردی فرقینده اولان اولا نیه کی اوُز-گؤزوم منی اولدوغوم یاشیمدان آرتیق گؤسته‌ریردی؛ مدرسه‌ده همین یاشلی گؤرونمه‌م بیرآزدا یئکه یئکه دانیشیب، آتابابا سؤزلرین قولانان، هر نمنه‌یه بیر ناغیلی اولان کیمسه اولدوغوما گؤره بوتؤولوکده یاشیندان ایره‌لی دانیشان بیریسی اولدوغوما گؤره بیله‌مه (منه) " قوجا " دئیه‌ردیرلر؛  اوزامان دوستلاردان منه چاتان بو تاخما آدی چوخ سئومه‌سه‌یدیمده بئله ایندی او آدی چوخ سئویب دئمک اولار اؤزله‌میشم، بو دفعه نه یازیق کی داها قوجا چاغیران یوخدو !!! 
سانال دونیایا گلدیکده کیمسه منی گؤرمه‌دیغینه گؤره اؤزومو یاشلی تانیملایاردیم، او زامان یاهو مسئنجر مدودو؛ هرکس چت دن دانیشاردی منسه اوردادا آزدان چوخدان فعالیدیم؛ 17-18 یاشیم واریدی آنجاق هر کیم " اصل "(ASL Plz) ایسته‌سه‌یدی اؤزومو 24 یاشیندا تانیتدیراردیم، بیلمیرم نیه بو 24دو چوخ سئوه‌ردیم ؛ باشیم بو دولما دولاشیق یاشاما ائله قاریشدی کی بوگون بیرآن گؤزومو آچدیم گؤردوم 24دو یوخ 25-ی ده سونا أرمیشه‌م؛ 26-یا سالام دئمه‌لی‌یم !
انگیمده بیر آغ توک بیتیب، ساچلاریمداکی آغ توکلرین داها ساییسی الیمدن چیخیب،داها باشیمدا دؤولت توکو یوخ قوجالیق توکلرینی گؤرورم، ظالیملرین سایلاریدا گونو گوندن آرتماغا دوغرو گئدیر ! 
ایندی بیر دویغو بئینیمی چولغالاییب دئییر 24 یاشینین سئوگیسی سنی آتماییب هله؛ سنده اونو آتما، یاشینی سورانلارا 24 یاشیم وار دئیه جاواب وئر ! 

ی. س:یاشاسین دیرلی دوستلاریمی کی همراه اولدن اؤنجه دونن گئجه ساعات 12دن سئوگیله دولو مئساژلارین منه یوللاماغا باشلادیرلار؛ بوتون منه دیه‌ر وئریب دوغوم گونومه گؤره، سئوگی دولوسو مئساژلارین گؤنده‌رن دوستلاریمدان سونسوز تشککورلریمی بیلدیریرم؛ نه یاخشی کی وارسینیز دئیه‌ بیله‌رم سادجه.

ا. ی: بو گؤزل گولون شکیلینی سئوگیله دولو بوتون دوستلاریما سونورام 

02.06.93

کوبودلاشماق

نئچه ایل اؤنجه جیب تئلفونون خیردا خیردا توپلومون بوتون قاتلارینا گیریدیگینده، اونونلا بیرگه بولوتوث دا یامان مد اولموشدو، هر کیمی گؤروردون دئییردی بولوتوثونو آچ یئنی بیر گؤرونتوم وار یا یئنی بیر سس وساییره.
یادیمدا خالامین اوغلو یبر چوخ دم تراغینان منه بیر ویدیونو گؤندرمک ایسته‌ییردی، دئییردی چوخ قورخمالیدی ها، اوره‌یین زادی ضعیف اولسا یا قاندان قورخسان باخماسان صلاحدی؛ اوره‌گین زادین پیس اولسا مندن دئییل!
آنجاق بو دئدیگی سؤزلری منی لاب یانقین ائدیب دئدیم تئز اول گؤندر گلسین؛ اوشاق دئییلم کی قورخام . یادیمدا اوردا ابوعلی‌سینیا نیسبت وئرن سؤزو کی دئییر "هر یازی بیردفعه اوخوماغینا دیه‌ر"-ی تحریف ائدیب " ناصیر جان هر ویدیو بیر دفعه باخماغینا دیه‌ر" دئدیم.
آنجاق ویدیونو بولوتوث ایله آلیب؛ تئز ایزله‌مه‌یینه باشلادیم؛ گؤرونتوده 2دیقه 30 ثانیه‌لیک ویدیو واریدی، بیر حالداکی نئچه نفر الی سیلاحلی، اوزلَری اؤرتولو، دایانمیشدیرلار؛ عربیستانین بایراغی‌ایسه داللارینداکی دووارا ویریلمیشدیر؛ اورتالیقدا بیر گنج یاشلی اوُز-گؤزو آچیق، اللری دالیسیندان باغلی، آیاقلارینین اؤنونده دیزله‌رین یئره ویریب دایانمیشدی!
بیرآن سؤزو گئدن الی سیلاحلیلاردان بیریسی بیر نئچه‌ عربجه سؤزو دئدیگیندن سونرا الینده‌کی پیچاق ایله او اوغلانین باشین کسمه‌یه باشلادی؛ اولدوقلاری اوتاقین کفی آغ کاشیدی بو اوزدن هر یئری آل قان آلدی آغزینا ، صحنه‌ده اولان باشقا الی سیلاحلیلار او آدامین باشی کسیله کسیله سیلاحلارینی قالدیراراق اوجا سس ایله "الله اکبر" دئمه‌یه باشلامیشدیرلار! 
بیر آن گؤزلریم قره‌لدی،سانکی آیاقلاریم یئردن اوزولدو، باشیم فیرلانماغا باشلادی، اوره‌ییم ائله بولاندی مصموم اولموشلار کیمی قوسماغیم گلیردی. نئچه گون اوندان سونرادا هر گؤزومو یومدوغومدا او صحنه‌ گؤزومون اؤنونه گلیردی یئنه اوره‌ییم بولانماغا باشلاییردی.
آنجاق او اولایدان چوخ آز ایلین سوروشدوغونا باخمیاراق، بؤلگه‌ده گئدن ساواشلار، قانسیزجاسینا باش کسیب تکبیر دئیه‌ن چئردکلرین چوخالدیقلاری، و او جینایتلرین ریسانه‌لرده گئنیش شکیلده یاییلماسی دئمک اولارداها او روحی لطافتیمی آرادان آپاریب؛ بیر چوخونون داها اوره‌یی بولانمیر، حالی خاراب اولانلارین سایی آزالیب ؛ قان تؤکمکله باش کسمه داها چوخالیب ! گونده باش کسمه‌لر، قان تؤکملرین فئیس بوک، یوتیوب یا باشقا آراجلاردان گؤروروک، بلکه دوداغیمیزین آلتی بیر یامان دئییب ظالیملری ، قان تؤکه‌ن‌لری قارقیش ائتدیگیمیزدن سونرا چوخ راحاتجاسینا !!! اوستوندن کئچیریک.

گؤره‌سن دوغرودان بو تووونان هایانا دوغرو گئدریک ؟؟؟

29.05.93

کولتوروموز

بیزیم بیلیم یوردوندا بیر سایقی ده‌یَر اوستادیمیز واریدی، همئشه دئیه‌ردی اؤز کولتوروموزو بوشلاییب اؤزگه‌لرین کوچه بازار کولتورلریله دانیشماغین نه فایداسی وار اؤزوموزون اؤزل شخصییتیمیزی کیچیتمکدن ساوایی؟؟؟
نؤکره‌م، کیچیگینه‌م، دربست نؤکره‌م و بو کیمی سؤزلره تپگی گؤسترَردیرلر و دئیردیرلر تورک خالقی اؤزل شخصییت و برئیسل پرینسیپلریندن مایا قویماز، عکسینه اونلاری قورویوب داها عزیزله‌یَر باشقالاری دا بو ده‌یَرلره سایقی ایله یاناشسینلار دئیه. 
دئیردیرلر تورک اوغلو یا قیزی باشقالاریلا ایلگیله‌نه‌نده، اؤزونون دونیا مالیندان، جیبینین پولوندان، دیلینین شیرینلیگیندن،الینین آچیقلیغیندان و بوکیمی وارلیقلاریندان مایا قویوب اونلارین دیه‌ری قدر اولانلارا خرجله‌یه‌ر!
قوربان کسه‌رم، سنه مالیم قوربان، قادان آلیم، و ...
بئله ایش گؤرسه هم اؤزونون سایقیسینا آرتدیرار هم ده محبت و یولداشلیق بیتگیسین أکه‌ر ؛ أکدیغی ایسه گونو گوندن کوک سالیب قول قانات آچار !

kend

اوشاغیدیم؛ کندیمیزده ایکی نفرین یئرلرینین مرسی(مرزی) اوُسته سؤزلری چیخمیشدی ، بیری دئییردی او آغ داشدان بویانا منیم دی اوبیریسی دئییردی یوخ او نوواخدان بویانا سنین دی . بو آرادا سؤزو گئدن یئرین دوزگون قورقوشوملو سندی ده یوخودو بللی اولا کیم دوز دئییر کیم‌سه او بیری‌نینی حاققینی پوزوب اونون یئرینه و امه‌یینه یییه دورماق ایسته‌ییردی !
بونلارین خیرخاخیرلاری گئت گئده چوخالیردی ، هئچ بیری ده شئیطانین آتیندان یئره توشموردولر؛ نه آغ ساققال ساییردیلر نه قارا ساققال. آنجاق بیر گون بیر آغ ساققال گیردی آرالارینا بیر حیرص پورسونان سون سیلاحی آرایا قویدو: " آللاه هر ایکیزین ده شئیطانیزا قووات وئرسین ؛ سیزین بو بوغاز دؤومه‌نیزه سادجه قورآن سون قویا بیلر" دئدی.
هاندان گئجدن او کی، ایکی آیاغین سوخموشدو بیر باشماغا و کسینلیکله دئییردی بو یئر منیم دی دستاماز آلیب قورآنا ال قویوب آند ایچدی ! و قارشی طرفی ده داها موجادیله سون قویوب "تاپیشیریرام او قورآنین یییه‌سینه" دئییب دا ایسته‌گیندن واز گئچدی.
او گونلرده ایدی کی مدرسه‌ده اوردا بوردا ائشیدیردیم نئچه ایلدی ایسراییل-له فیلیسطینین آرالاریندا تورپاق ساواشی وار و بو ساواش ایلردی بیر طرف‌ده اولان چئشیتلی سیلاحلاریلان اوبیری طرف‌ده ایسه اللرینه داش آلاراق موباریزه‌یه داوام وئریردیرلر. کندیمیزده اوُز وئره‌ن بیر آند ایچمه‌نین گوجونه دایاناراق بئینیمدن کئچیردی اونلاردا بئلنچی بیر آند ایچسینلر دا !!! دئییردیم بلکه اوردا دا بیر آغ ساققال تاپیلا و بو نئچه ایللیک ساواشا سون قویا ! 
دوغروسو اوندا اؤز نظریمده دئییردیم بس حق ایسراییل طرفیینده دی؛ نیه کی پارا وئریب تورپاق آلیب و بو تام نورمال دیر، حققی ده وار او تورپاقلارا یییه دورا و فیلیسطینلیلر گرک بو آجی گرچه‌گی قبول ائده‌لر !
سونرالار اؤزومودن فیلیسطینلی‌لره گؤره ائله دوشوندوغومه گؤره اوتاناردیم ، ایسرائیلین نئجه دوزه‌لمه‌سی ، هانسی گوجلرله اورا گئدیب چاتماسی، فلیسطین باشچیلارینین ساتقین اولمالاری و بیر چوخ مسئله منه آیدین اولدوقجا بو اوتانج داها درینله‌شیردی. چوخ زامان اخباردا زاتدا اونلارین ساواشلارین گؤرنده اؤز میللتیمیزی اونلارین یئرینه اولمالارین تصوور ائلردیم ، کی کاش هئش واقت ائتمه‌زیدیم.
میللی مسئله لریمیز ایله تانیش اولدوغومدا قاراباغ، ائرمنیستان،کرکوک ، کیریمه و ... فیلیسطینلیلرین دورومو من‌ده داها دویولوردو. 
بوگونلر تورکیه‌ و ایران حاکیمیت‌لرینین داورانیشلاری، عراقدا گئدن سون اولایلار، ائشیکدن گلن اللر، آمریکا و بوتون امپرالیست رین اللری ، کوردلرین ترپه‌نیشلری، باتی آذربایجان دا سون دوروملار و ... بو قورخونو و یئنی بیر ایسرائییل و یئنی بیر فیلیسطینین یارانماسی گؤزومون اؤنتونده جانلانیب بیر چیرکن تابلو یارالدیر !

هردن دئییرم اولمایایدی بئله کاش ، یا اورتا دوغودا دوغولماسایدیم ، یا بیزده او بیرینجی دونیا دئولتلرینین بیرنده دوغولسایدیق و... لری دوشونورم سونرا بو فیکیر ذهنیمه گلیر : کاش باریشین یولون تاپیب ،بوتون سینیرلاری قالدیریب ، یئنی بیر دونیانین دوزنلرین تؤکه‌بیلسه‌یدیک؛ نه اولاردی !

31 تیر 93

وارلیغیمیز

خولاصه: وارلیق، بوگونکو وارلیغیمیزین تمل داشین قویدو !

---

بیلیم یوردو چاغلاریندان بیر دوستوم ایله بیرگه جیددی اولاراق ایراندا تورک میللتینین مسئله ‌لری‌ایله تانیش اولدوم، باشقا هئچ کیمسه‌ایله ایلگیمیز اولمادیغینا و دوغروسو عاییله‌میزده بیرآز دوشونجه یوخسوللوغو اولدوغونا گؤره تام اولاراق اؤزوموز اؤز قیچیمیزین اوستونده دایانماق زوروندایدیق. بو اوزدن اینتئرنت بیزیم أن گوجلو اؤیرتمنیمیز اولموشدور. آزدان چوخدان بیزی اوخوماغا و آرتیق بیلگی قازانماقا چالیشدیریردیر. چالیشیب اوخویوب بیلدیکجه نه‌قدر گوجسوز، بیلگی‌سیز، دَیاز اولدوغوموزو دریندن دویوردوق. بیلیم یوردونون ایکینجی ایلی انجمن‌ایسلامی سئچگی‌لرینده بیر ائتیلاف اولاراق یوخاری ساییلان " انجمن ایسلامی‌ "-نی تحویل آلدیق. بیز او درنه‌یه گیردیغیمیزدن بری بوتون درنه‌یین آدینا چالیشمالار، یازیلار، درگیلری، بولتن و... ده آذربایجان و کیملیک دیله‌ییجیلیگی گؤزه چارپیردیر. یادیمدا "نیکوزیا،(قوزئی قیبریس)"-دان توت اوکراینین کیریم تورکلرینه قدر یازی یازیب پایلاشاردیق، بوتون ایمکانلاریمیزین یئتدیغینه قدر. بئله دئیه بیله‌رم ماراغا بیلیم یوردونوندا ایلک اؤیرنجی لر بیزیدیک میللی مسئله‌لر و تورک روحونو بیلیم یوردوندا دیریلتمه‌یه چالیشدیق. دئیه بیله‌رم بو یولدا بیر چوخ زحمت و مشققت‌لره، مشروط اولماقلارا قاتلاشاراق، درسدن، یاشامدان ، و بیر چوخ دیلخوشلوغوموزدان قالسایدیق دا بیله ائلیه بیلدیک ماراغا بیلیم یوردوندا "ماراغا بیلیم یوردونون آذربایجان تانیتیم اوجاغی "-نین تمل داشینی قویاق و بیر موستقیل، موجویزلی و یئری گؤرونن دَرنه‌یین آچیلماسینا نده‌ن اولاق.

یادیمدا او ایللرده دوستوملا بیرگه هر هفته‌نین سونوندا شَهَرایچینده اینجه یولدا (پیاده رودا) بیر کؤهنه کیتاب ساتانی‌نین یانینا گئدیب اوجوزونا، گؤیلوموزدن کئچن کیتابلاری سرگیله‌دیگی کیتابلارین ایچه‌ریسیندن سئچیب، اوخوماغیمیز اوچون آلاردیق.

أن ائتکیله‌ییجی و گوجلو، همده تورکجه کیتاب، کی او ایللرده یادیمدا او کؤهنه کیتابچیدان آلیب اوخوموشدوم رحمتلیک تبریزلی علی‌نین "دیل و ادبیات" کیتابی‌ایدی. هله‌ده چوخ گوجلو و دولو دوشونجه‌لی بیرکیتابدیر منه. باشقا تعریفده دئسه‌م مانیفست اولاراق کیمی بیر کیتاب ایدی منیم اوچون.

واریق درگیسین ده اوردان تانیدیم. یادیمدا بیر دفعه دوستوملا بیرگه وارلیق درگی‌سینین 12دنه سایین کؤهنه کیتابلارین ایچیندن تاپیب آلدیق. وارلیغین قات قاریشیق شوماره‌لری ایدی.68-78 ایللرینه عایید دریگی‌لر. اوندا ایلک اولاراق وارلیغینان تانیش اولدوم. آللاه عؤمور وئرسین سایین پروفسور دوکتور جاواد هئیت، رحمتلیک دوکتورحمید نوطقی،اوستاد فرزانه و ...کیمی اوستادلاریلان وارلیغین گوجو ایله تانیش اولدوم و بو تانیش اولدوغوما نه‌قدر غرور دویوردوم. دوغورسو بئلنچی گوجلو چالیشمالاری هئچ سانمازدیم آنجاق بو آلچاق کؤنوللو، دولو دوشونجه‌لی اینسانلار یورولمادان،کیمسه‌دن شیکایت ائتمه‌دن ،اؤز مالی ایمکانلاریندان اسیرگه‌مه‌دن یازیب یارالدیردیرلار بو منه داها غرور وئریجی ‌ایدی.

ایکی اووچ آی اؤنجه اوستاد هئیت-ین حاضیرلادیغی وارلیغین ضمیمه‌سی " یئنی دیلچیلیک " گلیب الیمه چاتدی؛ دوغروداندا بو کیشی عؤمرو بؤیو نه خیدمتلر کی ائتمه‌ییب بیزیم دیلیمیزه، قوجا و خسته ایکن گئنه چالیشمالاری دیه‌ر باخیمیندان هله‌ده بیرینجی سیرادا یئر آلیر منجه.

بوتون بو چالیشمالاری، عؤمرونو بو یولدا وقف ائتمه‌لری، پروفسور هئیتی او یئره چاتدیردی کی بوتون آذربایجان عئشقینه اوره‌کلری چیرپینانلار جاواد هئیتی اؤزلرینه بیر معنوی آتا و ال چاتماز زیروه‌لرده اولان بیر اؤیرتمن بیلدیرلرو فخریلن ده بونو دئمه‌ییندن چکینمه‌دیلر منده اونلارین ایچینده. آنجاق بوگونلر آذربایجان تورکلرینین معنوی آتاسینین ساغلیق دورومو ائله‌ده سن دئیه‌ن یاخشی دئییل دئمک اوستاد یاشام موجادیله‌سی ائدیر.سون وئریلن بیلگیلره گؤره اوستادین دوروما یاخشیلاشیب آنجاق داها یاخشی اولوب ساغالمالارینی دیله‌ییب ائلیمیزین باشی اوسته کؤلگه‌لرینین اولماسینی تام کؤنولدن دیله‌ییریک.

اوستادین داها ساغالماسینا دوعا ائدیب سیزی ده دوعا ائتمه‌یه چاغیریرام.

 

(حامید مورسلی 25 تیر 93)

اوشاقلیق آنی‌لاریمدان

اوشاقلیق آنی‌لاریمدان

ایبتیدایی‌نی کندیمیزین مدرسه‌سینده اوخوموشام. سحر چاغی کیلاسلاریمیز 8/30 دان باشلاردی ناهاردا دا معلیملریمیزین ائولرینه گئتمه‌لرینه گؤره یاریم ساعات زنگی تئز چالاردیرلار ؛ مدره‌سه میز بیر تپه کیمی یئرین اوستونده یئرله‌شمیشدی ائله بو اوزدن مدره‌سه میزین دالی طرفینده یئرله‌شن باغچالارا تپه‌دالی دئیردیرلر.نه دوواری واریدی نه دوزاغاللی بئهداشتی سئرویسی.داشدان پالچیقدان تیکیلمیش مدره‌سه بیر چوخلارینا اوردان ایلک تحصیللرینی آلماقلارینا ندن اولموشدور. 
سون زنگین آخیر دیقه لری هامی کیرکیتابی‌لاریندان توت سیلگی، قلم‌لرینه کیمی جامتایی لاریندا یا بیر سیرالاری کیفلرینده یئربه‌یئر ائدردیرلر. او دومئیدانی‌ده باشلانیش سیلاحینین سسلنمه‌سینی گؤزتله‌ین ایدمانچیلار کیمی بیزلرده سون زنگین چالینماسینی گؤزله‌یردیک. زنگ چالیندیغیندا سانکی قفس‌دن قورتولموش قوشلار کیمی یا داها اویغون یانسیتما دئسم ؛ موزا آریسی چالمیش بوغالار کیمی اوجا سسیمیز ایلن " ائـــــــــــــــــــــو " باغیراراق قوشا-دؤرد-أم یوللاناردیق ائولریمیزه ساری. ائله‌بیل هامی اؤز آراسیندا ایستردی بیرینجی نفر ائولرینه چاتسین. تپه کیمینی ائویمیزه ساری قاچدیغیمیزدا اؤزوموزو بیر تکه‌ر کیمی حیس ائدردیک کی بیر سیرتیق اوشاق بیزی اوردان هئللتمیشدیر ؛ هاوا نین اوزونده ائله یئلله‌نیب قاچیردیق، سانکی بولودلاردان آیاقلاریمیزین آلتیندا ییمیشاق فرش سالمیشدیرلار.

تاکسی سوروجوسو و من

["منیم بو یاشیما قَدَر بیر نفر ده موصاحیبیم اولماییب ! "]

*************

هاوانین شاختاسی آدامی کَسیردی ، بیر یئره گئتمه‌لی‌ ایدیم کی نئچه تاکسی ده‌ییشمه‌ک زوروندایدیم ! بو اساسدا زنگ آچدیم " آژانس"-آ بیر ماشین گئتمه‌ک ایسته‌دیگیم یئره ایسته دیم !
بیرآز گئج گلمه‌سی و هاوانین شاختاسینا گؤره قیزقین (حیرصلی) حالدا زنگ ووردوم دئدیم قاغا به سیزین بو ماشین هاردا دی بس ؟؟؟ دا من دوندوم دا !!!
سس : "ایندیجه یئتیشربا " دئدی !
...
هاندان گئج‌دن بیر اورتا یاشلی کیشی پیرایدیلان گلدی ! دا بیر سؤز دئمه دن مینیب و یوللاندیم !
"کیشی بس هاردایدین منی دا شاختا ووردو دا " دئدیم .
یولو ائله داغدان باغدان دانیشدیق ! سؤز گلدی چاتدی بورایا کی سوروجو عمی جان دئدی منیم بو یاشیما قَدَر بیر نفر موصاحیبیم (یولداش) اولماییب ! بونو دا او کابلایی-یا بورجلویام ! (رحمتلیک آتاسینا کابلایی دئییردی) 
دئییردی :
اوشاغیدیم ، یاشیتلاریمیلا بیرلیکده ایلک اولاراق خرمنده (کندلی اوشاقلارین استادیوم لاری) توپ اویناماغا گئتمیشدیم ! کابلایی سسله‌مه‌دن الینده‌کی موُسوُن شیرپیسی ایله دالدان منیم کوره‌ییمین اورتاسیندان یاش شیرپینی ائله یاتیرتدی کی frown ifade simgesi ائله بیل بوزون اوستونه قاینار سو تؤکدون ! بئلیمی ائله پؤشله ییب قیزیشدیردی ، دا من ایلان کیمی اؤزومه دولاشدیم ! 
"داها او اولدو بو اولدو من یولداشی ، توپو و تریبیت سیزلیک‌لری بیر دفعه لیک بوکدوم قویدوم قیراغا " دئدی !
هله ده دئییردی من او کیشی‌یه بورجلویام یوخسا ایندی بیلمیرم نه دورومدایدیم ! 
دا ایسته‌مه‌دیم اوره‌گین سیندیرام ! {هن}ین گتیردیم !
بیله سینه "حاقلی سان کیشی ، آللاه او کیشی لره رحمت ائله سین " دئدیم ! 
آمما اوره‌گیمدن چوخ اؤزلم‌لر، حسرت لر و دویغولار کئچدی ! 

او بی بوگون تاکسی سوروجوسو اولموشدور و گئجه گوندوز قاچا قاچدایدی ! آمما هئچ واخت یئتیشه بیلمه‌ییردی ! frown ifade simgesi 
توپلومدا اولان ساختا ، آنلامسیز و بوش قوراللار گؤزومون اؤنوندن کئچدی ! 
آتاسینین نه‌یی دوشوندویو و اوشاغینین اوشاخلیق ائله‌مه‌سینه قارشی دورماسینی دوشوندوم !!! اؤزومو قاندیرا بیلمه دیم !!!
توپچولارین میلیاردلار پول - پارانین یئر به یئر ائله‌مه‌لری و بو کیشی‌نین هله ده تاکسی سوروجوسو اولماسی گؤزومون اؤنوندن کئچدی ! 
و بیر چوخ بونلارا بنزه‌ر آجی دوشونجه‌لر !
بیلمیرم آدین اخلاق قویام، تربیت قویام، کولتور قویام، یا باشقا هر نمنه ! مینلر اینسانی بو سوروجو عمی جان کیمی‌لرینین یاشاملارین نیسگیللی ائله‌ییب !
هله ده بئچارالار اونلاردان ائتکیله‌نه‌رک شوکور نعمت اینسانلاردیرلار ! 
هله ده بونلار اؤزلری ده او دوشونجه‌لر ایله اؤز اوشاقلارین یئتیریب، بویا باشا چاتدیریرلار ...
و بو آجی ناغیل چوخلارینین یاشامیندا آردیجیل اولاراق آتین چاپدیریر! frown ifade simgesi

(ح.م)