اکینچیلیک
اکینچیلیک اینشالله، ماشالله دئمک پئشه‌سی دیر!
آخ قادان دوشسون منی چکمه‌ین‌لرین گؤزونه، ایندی دولو یاغدیرماق واختی‌دیر؟ grin ifade simgesi
کرمینه قوربان اولدوغوم ائله گورولده‌ییر سانکی یازین قیرخ بئشی‌دیر! به بو باغیشلایان و مئهریبان تانری ندن یازیق ایشچی‌لری، ایندیه‌دک گئجه‌لری چؤلده یاتانلاری، مین بیر چتینلییه قاتلاشاراق یئر یوردو سویارانلاری، یایین ایستیسی‌نی جانلارینا قنیم ائدیب یئنه چالیشمادان دورمایانلاری، اؤنجه‌دن آغاج اوسته اولان حاصیللارینی گون خرجلری چیخسین دئیه ساتانلاری و ...لری ندن گؤرمور باااا؟
یاز اولور آغاج گول آچمادان اؤنجه قیشین گئج قالمیش شاختالاریندان بیری یئتیشر اؤز ناتارازلیغینی ایثبات ائتسین دئیه، تومورجوقدا اولان گول‌لری بیله قورودوب، گئدر. اوندان قورتولساق یازین اورتاسیندا گول واختی کرم صاحابی بیر یاغیش گؤندرر، گول‌لرین ائرکک مایالاری بیر بیریسینه چاتمادان یاغیشلا یویولوب گئدر. گرد افشانلیق واختسیز یاغیشلارین کؤمه‌یی ایله تاماملانماز. سونرا دا یای فصلی باشلار؛ سوسوزلوق، جهش تاپمیش آفت‌لر، یئل، توز، آرادا بلکی دولو، چکیلن زحمتلری زای ائدر. بوندان دا قورتولاسی اولسالار پاییز گلیب چاتانا قدر، حاصیلین دریلن واختلاریندا بیر دولو یاغیشی، قار یاغیشی یئتیشیب اولوب قالانی‌نی اؤزوله ییغار آپارار. یازیق اکینچی‌نین الیندن ده هوروت هوروت باخماقدان ساوایی هئچ ایش گلمز. (بو قورخویلا یاشاماقلاری ایلین باشا باشی سورکلی اولاراق سوره‌ر)
هله گؤررسن بوتون بو آشامالاردان کئچدیکدن سونرا بیر ناتارازی تاپیلار، یازیق کندلی‌نین باشینین شیره‌له‌ییب حاصیللاری تومن-عابباسی وئرمه‌دن آپارار. بو دفعه ده یازیق کندلی یا بوش چیخان چئک‌لرین دالیسیجا آوارا-سرگردان اولار، یا دا بو شهر او شهر، ساختا آدرس‌لر دالیسیجا.
بونا گؤره دئییرلر: اکینچیلیک اینشالله، ماشالله دئمک پئشه‌سی‌دیر!
-اینشالله گلن ایل یاخشی اولار!
-ماششالله بو ایل یاخشی دیر!
