سیستئم گوجونه یییه‌له‌نن‌لر
گوج قایناقلارینا یییه‌له‌نن کیمسه‌لر گونو گوندن بو أللرینده اولان گوجدن یارارلانیب گئرچه‌یی مصلحته قوربان وئریب، بو یانغیلاری داها درینله‌شه‌جک.
بیر نئچه ایل اؤنجه ماراغا بیلیم یوردوندا اؤیرنجی اولدوغومدان بری بیلیم یوردوندا سوروملو (مسئول) آدینا چالیشان بیر چوخ اینسانلا تانیش اولدوم. آذربایجان تانیتیم اوجاغینین بیر اویه‌سی اولاراق اونلارلا ایلگیده اولماق زوروندایدیم. چوخ زامان اؤنجه‌دن بیزدن اولان اؤن یارغیلاریندان دولایی، گؤزلرینده اولان مات گؤزلوکلردن دولایی، اؤزلرینی بیزیم دوشونجه‌میزین یؤنه‌تیجیسی اولدوقلارینی ساندیقلاریندان دولایی، چوخراق دارتیشمالاریمیز اوزونا چکیب سونوندا أللری اوزولوب هر هانسی مدنی و منطقی دانیشمامیزین قاباغینا بیر سؤز اورتایا قویا بیلمه‌ین ایش باشیندا اوتوردولموشلار، زوراکیلیغا قاپانیب "داها قونو قاپانیب" " بو سؤز بیتدی" "همان کی بیز دئدیک اونو ائده‌جک سیز" "بو ایشی گؤرسز توبیخ اولاجاقسیز" "دوشمان جیبهه‌سینده دایانماق ایسته‌میرسینیزسه بیزیم سؤزوموزه باخین" و بونلارا بنزر منطیق‌سیز و اصولسوز سؤزلر دئییب "بیر منم بیر باغداددا کور خلیفه" دئییمینی ثبوتلاردیلار. بیز ایسه بیرجای چابالادیغیمیزدان سونرا أل-آیاغیمیز هر یئردن اوزولوب کؤنوللو اولاراق بونو ایسته‌مه‌‍دن بو حاقسیزلیغا قاتلاشماق زوروندا قالاردیق.
اوجاغین بیر خبری بولتنی واریدی، بیر گون ایش اورا چاتدی بیلیم یوردونون همین سوروملولاریندان بیریسی بیزه بؤیوک ألیشدیریسی بو اولدو: سیز ندن بیزیم (حاکیمیتین) گلیشدیغیمیز گوجلندیییمیز قونولاردان یازیب رئکلام ائتمه‌ییرسیز؟ اؤرنه‌یک ایسته‌یه‌نده "مردم سالاری دینی" "نانو و اوزای بیلیمی ساحه‌لرینده گلیشمه‌لر" "توپلومسال عدالت" چئشیدلی کندلر و شهرلرین آوادانلیغی اوچون یاپیلان ایشلر" و بونلارا بنزر آخسارلیقلاری گؤزده اولان سؤزلری اورتایا آتماقلا سانکی بیزیم گؤره‌ویمیز اونلاری رکلام ائتمک اؤته یاندان باشقا آخسارلیقلاری اؤرت باسدیر ائدیب اوزده تانیمادیغیمیز دوشمان دئییلن‌لرین ده‌ییرمانملارینا سو آختیرمایاق. بئلنچی بیر توپلومدا و بئلنچی سیاست‌لر اوزده دوزنله‌نن سیستم و اونون قوروجولاری داها مسئله‌لرین چؤزمک یولونو دئییل مسئله‌لرین اوزلرینی سیلمه‌ک پئشینده اولاجاقلاری قاچیریلماز اولاجاق. بو سیستئمده گوج قایناقلارینا یییه‌له‌نن کیمسه‌لر ایسه گونو گوندن زایلاشیب فسادلار تؤره‌ده‌جک‌لر. سیستئمین تعریفله‌دیگی أساس‌لارا دایاناراق اؤت باسدیرمالار چوخالیب ایچه‌ریدن زایلامالار گونو گوندن داها چوخ آرتاجاق.
أتک یازی: سانیرام بو یازی ناقیصدی هله. بیر ده بونو میللی مسئله‌میز و اؤز سیویل حرکتیمیزه ده یانسیدیب نقدلر و ألیشدیری‌لر یازماق اولار.
