آنی‌لار دوشرگه‌سی

#بئلا_تار

#تورین_آتی

بیر چوْخ سینئما الیشدیریچی‌سی‌نین آچیسیندا تورین آتی‌ آدلی فیلم ۲۰۱۱ میلادی ایلده یؤنلتیلمیش اوْلسا دا، سینئما تاریخینین ان قالارغی فیلم‌لر سیراسیندا دایانیر.

فیلمین آدی: «تورین تورین

 / A torinói ló / The Turin Horse»

یؤنتمن بئللا تار Bella Tarr  اصلینده مجاریستانلی‌دیر. 

فیلمه کئچمکدن اؤنجه قیسسا بیر آچیقلاما وئرمکده فایدا وار. فیلم نیچه‌نین سوسقونلوغا کئچیش دؤنه‌می آدی ایله بیلینن اوْلاراق، ایچه قاپانیشیندان سوْنراسینداکی حیکایه ایله باشلانیر. آدلیم حیکایه‌یه گؤره فردریش نیچه ۱۸۸۹-دا تورین‌ده یئرییَرکن بیر فایتوْن سۆرۆجۆسۆ ایله قارشیلاشیر. فایتوْنچونون بۆتۆن باسغی‌لارینا باخمایاراق حرکت ائتمه‌یی رد ائدن آتین رحمسیزجه‌سینه قامچیلاندیغینی گؤرن نیچه، بیرآندا آتین بوْینونا ساریلیب حوْزۆنله آغلامایا باشلار. بو اوْلایین سوْنراسیندا ائوینه دؤنۆر و هرکسه قارشی قاپیلاری باغلایاراق آناسینا، «آنا من بیر آخماغام» دئدیکدن سوْنرا، سوْنوجوندا عؤمرۆنۆن سوْنونا دک سوسقونلوغا باشلاییر.

نیچه‌نین بو آغیر دویغوسال دورومونا سبب اوْلان شئی نه‌دیر؟ داها دا اؤنملیسی گؤره‌سن اوْ آتا نه اوْلموشدور؟

اصلینده بو سوْرولارلا فیلمی چکمه‌یه باشلایان بئللا تار، بیر آغیر و شیددتلی اسن یئلده ائوه دؤنرکن بیر بابا ایله آتی تصویره چکمکله باشلاییر. یالین و یالنیز بیر اوزاق دۆشمۆش اراضی‌نین اوْرتاسیندا بیر سو قویوسو وار، بیر ده بیر ائو. بئللا تار، بابا، قیز و آت اۆچلۆیۆنۆن بیربیری‌لری ایله ایلگیلنیب ائتکیلنمه‌لرینی سینئمانین چیلپاق دیلی ایله گؤزلجه‌سینه گؤزلر اؤنۆنه سریر. آخساقسیز میزانسئن‌لرین هر بیر آچیسی اؤزلۆیۆنده تایسیز بیر فوْتوْ شکیل‌لر بیرلشیمی ایله فیلمین بۆتۆنۆنۆ اوْلوشدورور. آغ قارا اوْلان تورین آتی آدلی فیلمده هارداسا دیالوْگ یوْخدور. بئللا تار بیر نئچه جۆمله‌دن علاوه موزیک ایله دوْغانین سسی قاریشیمیندا، ریوایتینی بۆتۆنله‌دیر. فیلم ۶ گۆنده اوْلوشور. بو دا دۆنیانین ۶ گۆنده دۆزلمیش اوْلدوغونا بیر ایشارت‌دیر. فیلم باشدان باشا تکرارلانان سس‌سیزلیکدن عیبارت‌دیر. بو دا اینسانین یاشامینا بیر استعاری یاناشماق کیمی آلقیلانا بیلر. اینسان حیاتا گلیر، بحرانلارلا یاناشی بیر تکرار دوْلوسو یاشامی سوْنونا چاتدیریب اؤلۆب آرادان گئتسین. ائله همین بو تکرارا قارشی چیخماق ایسته‌ییر بئللا تار. سانکی اینسانا هدفلر ده‌ییشیله بیلر.

بو فیلمی ایزله‌یه بیلمک اۆچۆن گئرچکدن سینئما چوْمورویلا بوْیا باشا چاتمیش اوْلمالی‌سینیز، یوْخسا یاریدا بیراخیب هئچ نه آنلامامیش کیمی سانکی بیر آنلامسیز صحنه‌لر ایزله‌ییبسینیز کیمی گلر سیزه. چۆنکی فیلم ۱۵۰ دقیقه‌دیر و بو ۱۵۰ دقیقه‌لیک فیلم ایسه بوْل-بوْل شیددتله اسن یئل، قاپی پئنجره جیریلداماسی، بیر نئچه دیالوْگ ایله اوْجاقدان گلن آتش سسی‌ندن عیبارت‌دیر. فیلمین بیر باشقا اؤنملی طرفی ده کی البته آت‌دیر. آتین حیاتا کۆسکۆنلۆیۆ گؤز آردی اوْلونمازدیر. بو کۆسکۆنلۆک گۆنۆ-گۆندن آرتماقدادیر. داها آرتیق شئیهه چکیب سس سالمایی دا بیراخیر. 

ائوین باشا باشیندان یوْخسوللوق یاغیر. بیرآز آرپا سویو، بیر نئچه سودا پیشمیش یئرآلما آتایلا قیزین گۆنلۆک تۆکه‌تیم‌لرینی تشکیل ائدیر. فیلمین سوْنو هر بیر سینئما حئیرانینین تۆکلرینی بیز-بیز ائده بیلر. 

فیلمه گؤره آنلادابیله‌جک صحیفه‌لرجه سؤز یازماق اوْلار.

بئللا تار اؤزۆ دئییر: «تورین آتی اینسان وارلیغی‌نین آغیرلیغی حاقدا چکیلمیش بیر فیلم‌دیر. تکجه دئمک ایسته‌ییردیم باخینیز، نئجه آغیردیر گۆنده قویونون باشینا گئدیب سو گتیرمک! بو فیلم گۆنده تکرارلانان بیر عئینی مسیرین یانلیش اوْلدوغونو گؤسترمک اۆچۆن بیر یوْلویدو. بو ایده چوْخ ساده‌ایدی. هم ده هئچ بیر حشو ایله آرتیقلیغی اوْلمایاراق.»

نه‌یسه، بیرجه سۆزله هر بیر سینئما سئوری ایقناع ائدجک قدر گؤزل چکیملی بو فیلمین ایزلمه‌سینی هر کسه تؤوصیه ائدیریک.

@turkcesinema

#فیلم_تانیتیمی #تورکجه_سینئما