دده‌لرین ایتیرمه‌سی، اویغارلیغیمیزین قیسیر قالماسی
یئنه اؤلوم خبری پایلاشماق زوروندایام؛ ایتیرمک، الدن وئرمک، اییه دورماماق بلکی اودوزماق.
بیریسی جوذاملی خسته‌لرین قورتاریجیسی، ام وئره‌نی، اومود باغیشلایانلاری لاییقی اولدوغو جوذاملی‌لار آتاسی لقبینه ده‌یری اولان دوکتور، شیمشک آدیلا قوشوق قوشوب، یازی پوزونون ایلکین اوستالاریندان بیریسی. بو شیمشک آذربایجان درنه‌ک‌لرینده چوخلارینی اؤزلویونه ساری اوز دؤندرمه‌یه یؤنلتمیش‌دیر. بابا باغیندا سون جوذاملی‌نی ساغالدان ال، ایل‌لر بویو چالیشیب، یورولمادان، مالی بدلی دوشونمه‌دن، گوجو یئتنه‌قدر، اؤزو عؤمرونو بیلیم و دوشونجه‌نین یولوندا خرجله‌ین، بیر چوخ کیتاب یازان، مهندیس صرافی‌نین وورغولاماسینا گؤره "گذشته چراغ راه آینده است" کیمی کیتابین مؤلیف‌لر هئیتینده یئر آلان، آذربایجاندا بیر چوخ آچیدان دانیلا بیلمز دیرک‌لردن بیریسی اولان، رحمتلی دوکتور محمد حسین مبین دونیاسینی ده‌ییشدی.
دوکتور مبین آدنیا ان آزی دیریلیک چاغیندا بیر دَرنک آچیلدی، آنیت آبیده‌سی تیکیلدی، ائله اؤزو دیری ایکن ده جوذاملی‌لار آتاسی اولمانی قازاندی. یونسیف تکین اولوسلار آراسی قوروم‌لار وریندن نئچه دفعه آلقیشلانیب تقدیر اولوندو.
آنجاق نه یازیق یئنه رحمتلی مبین ده رحمتلی هئیت و بیر چوخ بونلارا تای دیرک‌لریمیز کیمی، لاییق اولدوغو قدر اؤلوم خبری اؤزلرینی بیزیله وطنداش بیلن‌لرین وریندن قارشیلانمادی. دئمک اؤنمسنمه‌دی. بلکی اونودولموشلار سیراسیندا اولدوغوموز اوچون بو تام دوغال بیر تپگی ساییلا. آخی هله بیزیم ایشه‌کچمک زامانیمیزا قالیر. قارداشیق آنجاق اؤگئی.
گؤز اومدوغو یئردن کوسَر دئمیشلر آنا-آتا‌لاریمیز، کئشه بو اوماجاق گؤزوموزو ده بیر دفعه‌لیک کسیب آتا بیلسه‌یدیک. اؤز قیچیمیز اؤز دوشونجه‌میز اوستونده دورا بیلسه‌یدیک؛ داها بئلنچی اورک توتولمالاری، اونودولموش اولدوغوموزو جانلاندیران دویغولاری دویمازدیق بلکی ده.
ایکینجی ایتیرمک خبری، ائل آشیغی رحمتلی رسول قربانی‌یه عایید دیر؛ 1314 ده کلئیبر ماهالی‌نین عابباس آباد مئشه پارا کندینده گؤز آچیب ایل‌لر بویو ائل فولکولورو، ناغیل‌لاری، عادت عنعه‌لری سینه‌سینده داشیان آشیغیمیزین نئچه آی اؤنجه « سینه‌مده سسله‌نن سازیم وار منیم» آدلی شعر توپلوسو ایشیق اوزو گؤرموشدور. ائل و البته آشیقلار آراسیندا "دده" لقبی ایله تانیان عاشیق قوربانی ده چوخ نیسگیللی‌جه‌سینه کؤچدو. نئچه آی اولاردی بئیین سکته‌سینه گؤه خسته خانا یاتیردی. دونن خزل آیی‌نین آلتیسی بو قدرینی بیلمه‌ین دونیادان گؤز یوموب بیزی ترک ائتدی. نه یازیق آشیق قوربانی‌نین اؤلوم خبری آشیق ادبیاتی و موسیقی‌سی‌نین اییه اولدوغو ایستاتوسا باخاراق، ائله او قدر ده اؤنم‌سندی؛ اولمایایدی بئله کاش!
دئمک اولار بیر تَهَر هر ایکی آدلیم و بؤیوک اوستادلاریمیزین دده‌لیک لقب‌لری وار ایدی. بلکه بونو بوگون وورغولاماق دوغرو ایش حئساب اولمایا آنجاق من بو ریسکی ائدیرم. ندن بیزلر همئشه دده آدی وئریریک؟ ندن بو دده‌لرین ننه‌لرینی سئچمیریک؟ ندن بو دده و ننه‌لرین اوشاقلاری و یئتیردیک‌لرینی گؤره بیلمیریک؟ * موقاییسه‌م شخص‌لر اوزه‌رینده دئییل اوره‌تیم و اورون‌لر (سونوج و محصول) اوزه‌رینده دیر. ندن اوستاد مبین دده‌سی اولان بیر بیلیم دالی‌نین گئنیشلنمه‌سینی (آنا و اوشاغی) گؤرموروک؟ هابئله آشیق صنعتینده ندن آشیق قوربانی او صنعتین دده‌سی ساییلان صنعت قولونون آناسینین و داها آرتیق چیچک‌لنسه‌یدی، بالاسینی گؤره بیلمه‌میشیک بوگونه دک؟ ندن قیسیر قالمیشیق؟ بئلنچی دده‌لرین یئرینی دولدورا بیله‌سی اوچون کیمسه‌لر بئچرتمیشیک می؟
یازیدان سونرا: 1-*: آچیقلاما: ننه و اوشاقدان آماج اینکیشاف و گلیشمه‌نین گؤسترمه‌سینی تمثیل ایله اولاراق آچیقلانماسی‌دیر، یوخسا ننه یا اوشاق آدی وئرمک آماجیمدا دئییل‌دیر.
2- من ده اؤز وریمدن میللتیمیزه باش ساغلیغی وئریرم؛ آذربایجان باشین ساغ اولسون.
